Jeremaia 4:15 - Nobonob Baibel

¹⁵ Aɗinu? Ag paha anam ii hekkulag dayeb amu, nai awa uɗiak danab Dan appanu uɗia, nai uug ele ab dooglag. Ao, laa nug Epraim wanppa, qauko daattebppanu uɗia, kekeɗ uɗin, appa digmena wan heeg nauhom ab dooglag,” awa akku.

Jeremaia 4:15 ပူးပေါင်းရင်းမြစ်များ

Aisaia 52:7

Danab laa nug qauko letata uɗia, danab ah amelagppa nai ena maditte, danab ah laa oh dilag neekkakppa amu, danab amu nug enanag hette anidtteb. Ge! Danab nug uɗia, nug nai ena, maɗoɗnu nai, ehanitteb padal ii maknu nai ele mattiaya, nug Juda danab ah amelagppa, “Ahilag Kayak Nug laa oh eɗatta, keeke oh gumatte,” atte amu, danab ah ag ahilag neekkak nuhignu am enaib anidtteb.

Jeremaia 10:22

Ag daulag human doyeg! Oqotti okkai wan laa yawalti uɗitteppanu daatte, appanu uɗitte! Amuam kekeɗ huanak ag appanu uɗiegeg, oqotti otte. Ag uɗin heppeg, Juda dilag aabppa danab ah qainqainib daappeg, aab am nauhakib daaglag. Ao, doɗ jakal, ag aguppa daaglag.” Da anam ami.

Jeremaia 6:1

Yawe Nug atte. “Ag Benyamin danab ah, ag ahan ooleg! Ao, ag Jerusalem appa aib daappig. Ag ahan ooleg! Uug naunab yawalti uɗitteppanu uɗitte. Appan laa uɗin heppeg, nauhak okkai nau daakku. Anam amunu, danab ah ag dooglagnu ag trampet Tekoa appa iwaleg! Ge, ag Bet Hakerem appa danab ah anidna, uug naunab uɗitte dooglagnu ag appa pilak, amunu at daakkunu qappeg!

Jeremaia 8:16

Kekeɗ ag uɗin, Dan appa daaegeg, danab nug hos noobppa nokoɗu qe doya, hos miag daatte dootte, amubia ig kekeɗ ag miag daatteb doottem. Danab nug hos dawai gaye, danab doya ottaitte, amubia ig Juda danab ah ohnab ottaittem. Kekeɗ ag wan imu oh, aɗi keeke wan imuppa daatte, ag diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb. Ao, ag wan imunu aab okkai oh, danab ah appa daatteb ele amu, ag amu oh diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb.’ Juda danab ah ag anam akkulag,” awa atte.

Josua 17:15

Ag anam amegppa aeg amu, Josua nug ag amelagppa aum. “Ag genab kuɗumnab amubia daatteb dayeb amu, ag Epraim wanppa, qauko qauko daattebppa, wan maha amu ahilagnu elele iitta daatte amunu, ag wan ad kuɗum daattebppa, wan amuam Peres danab, Repaim danab ele dilag amu, ag wan amu oppeg, amahalebeb, elele dayeb, ag ele aguppa dayeg!” awa amelagppa aum.

Josua 20:7

Yawe Nug anam aum amunu, Israel danab ag ii doyaya laa qe mauhomnu ehanattak aab daaglagnu tituanadppig. Aab ag tituanppig ele amu, laa am Galili appa aab Kedes, aab amuam Naptali wanppa, qauko qauko daattebppa dayom. Laa am Sekem. Sekem am Epraim wanppa qauko qauko daattebppa dayom. Laa am Kiriat Arba, onig laa am Hebron. Nug Juda wanppa qauko qauko daattebppa dayom.

Ikki Danab 18:29

Ag alalag Dan, Israel bekka, nug onig, amu aab okkai amu onig meppig, amge aab okkai amu onig tatam am Lais.

Ikki Danab 20:1

Am anam beum, aakku Israel ohnab, aab onig Dan, appanu ukka ukka Berseba batak, Gileat wanppanu ele, ag oh aɗa mak laippu, Mispa appa Yawe noobppa qagmeppig.