Jeremaia 34:3 - Nobonob Baibel

³ Na genabnab genab king amu eppegppa daakkut. Na uug amu ii eɗidmana. Iitta. Babilon dilag kingnu daup ag na aɗaidna, aidna gona, nug eppegppa meidkkulag. Na Babilon dilag king amenppanab anidna, nug noobppa daappe, nug aɗi aɗi oɗ medakku amu, na nai amunu nob nug medakkut. Amu na Babilon gokkut,” ’ ” awe attem.

Jeremaia 34:3 ပူးပေါင်းရင်းမြစ်များ

Jeremaia 21:7

Yawe Nug anam atte, amge Nug Sedekaianu imu ele atte. ‘Da amu hewoya, da Juda dilag king Sedekaia, nuhikkud ehanittak anuqak danab, amu Juda danab ah ele aab okkai ooppa daan, oɗe nau danab kuɗum aqe mauhttebppa, qep elabppa, enugppa ele ii mauhkkulag amu, da amu oh diie, Babilon dilag king Nebukatnesar, nuhikkud daup ag aqappeg mauhkkulagnu hetteb ele amu, da amu eppelagppa maadkkul. Da amu heppi, Babilon dilag king nug ahilagnu oo gai-iitta doya oo matta ehanittak kobol nakok laa iinab ii hema. Iitta. Nug qep elabppa kuɗum aqadkku,’ awa atte.

Jeremaia 27:22

“Babilon dilag daup ag keeke amu oh aon, Babilon gokkulag. Ag aon gona, maadppeg daappeg, haen laa dimppa, laa ag eɗun aon wan imuppa uɗiglagnu dabmekkul amu, haen amuppaib ag Babilon wanppa eɗun ii daamna. Haen amuppa da heppi, laa ag aon uɗin, keeke amu ag abennalagppa mekkulag,” awa atte.’ ”

Jeremaia 32:28

Anam amunu, Yawe Nug atte. “Haen elab iitta da heppi, Babilon dilag king Nebukatnesar, nuhikkud daup ele ag aab okkai imu eɗidna aoppeg, ag eppelagppa daakku.

Jeremaia 32:3

Juda dilag king Sedekaia nug Jeremaia maniguittak daakkunu anan, Jeremaia amegppa inam aum. “Na dimppa aɗi bekkunu nai madittem amu, aɗinu na anam madittem? Na dimppa aɗi bekkunu nai mattinna, na danab ah amelagppa inam attem. ‘Yawe Nug inam atte. “Da aab okkai imu Babilon dilag king eppegppa meppi, nug eɗitta aokku.

Jeremaia 32:4

Nug aokku amu, Juda dilag king Sedekaia nug ele genabnab genab Babilon dilag daup eppelagppa daakku. Nug uug amu ii eɗidma. Iitta. Babilon dilag daup ag nug aɗan, ag aon gona, Babilon dilag king eppegppa meppeg, nug Babilon dilag king amegppanab antta, noobppa dayebeb, Babilon dilag king aɗi aɗi oɗ mettebeb, nai madikku.

Jeremaia 34:21

Gemu Babilon dilag king nug Jerusalemnu aha, laih ukkom, amge nug eɗua uɗikku. Amu da heppi, laa ag Juda dilag king Sedekaia, nuhikkud ehanittak anuqak danab ele aqappeg mauhkkulagnu hetteb, amuam Babilon dilag king, nuhikkud daup ele, ag ag eppelagppa daaglag,

Jeremaia 34:4

Anam, amge O Juda dilag king Sedekaia, Yawe Nug nahipnu atte amu, na nai nuhig amu doye! Nug nahipnu inam atte. “⌊Na nakka na Babilon dilag king eppegppa na beɗun mekkut amu,⌋ na qep elabppa ii mauhmana.

Jeremaia 37:17

Jeremaia appa haen elab daye, dimppa King Sedekaia nug laa me, nug ukka, Jeremaia omala, Sedekaia dayomppa ukkom. Aria, Jeremaia nug Sedekaia toppa daye, Sedekaia nug laa ii daaegeg, aya daayya, nug oɗ mettom. “Yawe Nug nai laa a doomete,” awa oɗ mettom. Oɗ mette amu Jeremaia nug aum. “Ao, Yawenu nai laa daatte. Yawe Nug heeb, na Babilon dilag king eppegppa daakkut,” awa aum.

Jeremaia 38:18

Amge na nakka, na beɗun Babilon dilag kingnu daup ikki eppelagppa ii mekkut dayeb, da heppi, Babilon dilag daup ag aab okkai imu eɗidna aon, ag eppelagppa dayebeb, ag maippeg eweb, na ele ag eppelagppa daakkut,” awa atte.

Jeremaia 38:23

Na nakka, na beɗun Babilon eppelagppa ii mekkut dayeb amu, nahipad ah oh, nahipad nid oh ele ag Babilon eppelagppa daaglag. Na ele, na ag eppelagppa daamnanu ib laa anidna, oolna laih ii gomana. Iitta. Babilon dilag king nug na aɗaitteb, na nug eppegppa daappe, Babilon dilag daup ag aab okkai imu manappeg eokku.” Jeremaia nug Sedekaia amegppa anam aum.

Esekiel 12:13

Nug oolkkunu anam hekku, amge da uhui dahil meppi, nug amuppa tekku. Nug teeb, da Yawe, da heppi, kekeɗ ag omalna, Babilon wanppa, Kaldia danab daatteb, appa gokkulag. Ag omalna gona tekkulag, amge nug wan amu ii anidma. Nug appa mauhkku.

Esekiel 17:15

Babilon dilag king nug anam heum, amge Dawit buɗub laa, Babilon dilag king nug Dawit buɗub amu nug waappa Juda dilag king daakkunu meum ele amu, king amu nug Babilon dilag king waappa daakkunu uua, nai tappe ne, nuhikkud danab laala ag Isip appanu Juda ehanittak aoglagnu he goppig. Ag Isip appa hos, ban danab kuɗumnab ele diiglagnu goppig. Juda dilag king nug anam heum amunu, da oɗ mettem. Juda dilag king amu nug nuhig dabmak amu heeb ukkeb, meu okkute? Laa nug kobol mauhnoak amu hette ele, nug heeb ukkeb, Babilon eppelagppa bu iite aoma? Ge, nug Babilon dilag king ele nug tituanya nai qagapiɗ, nug nai amu anam okkuleb, nug Babilon dilag king eppegppa bu iite aoma?’ ” awa aum.

Esekiel 17:16

Amu Naɗi Yawe Nug anam awowa, Nug tuɗitta atte. “Da genab bau daattem, genab amubia Juda dilag king nug ena ii daama; nug Babilon dilag kingnu wanppa mauhkku. Babilon dilag kingnu amu, nug Juda dilag king amu king abenabppa me dayom. Nug king amu ele nug tituanya, nai qakkaya, Juda dilag king nug Babilon dilag king waappa daakkunu nuhig nai ɠagattag qetta aum, amge Juda dilag king nug nai ɠagattag qettak nuhig amunu ena iinab doyom. Nug Juda dilag king amu ele nug tituanya nai qagapiɗ, amge Juda dilag king nug nai amu bippiɗom.

Esekiel 21:25

Amu na Israel dilag anuqak danab, na da, Yawe, na dahil neekkakppa ootppa dubuttid ele, na nau hak danab, nahip haen aakku gogppa teum daatte. Ge, na bu aokkutnu haen aakku uɗiom daatte,” awa atte.