Jeremaia 34:2 - Nobonob Baibel

² “Da Yawe, da Israel dilag Kayak, da inam attem. ‘Jeremaia, na ahan, Juda dilag king Sedekaia toppa gona, na inam appe doyaɗ! Yawe Nug inam atte. “Da heppi, Babilon dilag king nug aab okkai imu eɗitteb, nug eppegppa dayeb, nug amoteb eokku.

Jeremaia 34:2 ပူးပေါင်းရင်းမြစ်များ

2 King 25:1

Sedekaia nug Nebukatnesarnu nai tappe neum amunu, Babilon dilag king Nebukatnesar nug nuhikkud daup oh ele ag ahan uɗin, Jerusalem danab ah ele ban heppig. Nebukatnesar, nuhikkud daup ele ag Sedekaia king dayaya, nuhig king dayaknu maɗ eblaih waɗeleppa, kalam eblaih laih elenu deɗ eblaih laih eleppa uɗin, Jerusalem guguittak daappig. Ag appa haen tutu dayaknu aab kalan daan, ag Juda danab Jerusalem daappig ele ban hekkulagnu aab amu talilittak bannu keeke bappaidppig.

2 King 25:9

Nug ba he, Babilon dilag daup ag Yawenu mettid lag, kingnu lag enanagnab, amu danab ah onilag ele, nug ag laulkad oh ele Jerusalem appa manatteg eoppig.

Jeremaia 21:10

Da heppi, kekeɗ ag aab okkai imu heppeg nauhkku. Da ag Juda, da ag ehanadppi, ena ii daamna. Da amu hekkulnu dabmak aoi ɠagattag eppom daatte amunu, da uuppi, aab imuam Babilon dilag king eppegppa daakku. Nug eppegppa dayebeb, nug maneb eokku,” ’ awa atte.

Jeremaia 21:4

‘Yawe, Israel dilag Kayak, Nug atte. “Ag Juda, ag gemu Babilon ele ban hetteb. Ag aab okkaippa daatteb. Babilon ag aab dimittim ag oo mattan aqadkkulagnu maadna daatteb. Ag Israel ag ban hekkulagnu lat, lat doɗo, ban haknu keeke laala ele eppelagppa daatteb, amge da heppi, ⌊Babilon dilag daup ag keeke amu ag eppelagppanu aɗualadna,⌋ ag amuppa ag Juda aqaglag. Amu da heppi, Babilon dilag daup ag aab okkai imu ooppa uɗiglag.

Jeremaia 27:22

“Babilon dilag daup ag keeke amu oh aon, Babilon gokkulag. Ag aon gona, maadppeg daappeg, haen laa dimppa, laa ag eɗun aon wan imuppa uɗiglagnu dabmekkul amu, haen amuppaib ag Babilon wanppa eɗun ii daamna. Haen amuppa da heppi, laa ag aon uɗin, keeke amu ag abennalagppa mekkulag,” awa atte.’ ”

Jeremaia 32:3

Juda dilag king Sedekaia nug Jeremaia maniguittak daakkunu anan, Jeremaia amegppa inam aum. “Na dimppa aɗi bekkunu nai madittem amu, aɗinu na anam madittem? Na dimppa aɗi bekkunu nai mattinna, na danab ah amelagppa inam attem. ‘Yawe Nug inam atte. “Da aab okkai imu Babilon dilag king eppegppa meppi, nug eɗitta aokku.

Jeremaia 34:22

Da appi, Babilon dilag king, nuhikkud daup ele ag eɗun, aab okkai imuppa daanna, ban hekkulag. Ag aab imu eɗidna aon, ag manappeg eokku. Amu da heppi, Babilon dilag daup ag Judanu aab heppeg nauhattakib daappeg, danab ah laala ag amuppa daaglagnu elele iitta daaglag.” Yawe Nug anam awa atte.

Jeremaia 38:23

Na nakka, na beɗun Babilon eppelagppa ii mekkut dayeb amu, nahipad ah oh, nahipad nid oh ele ag Babilon eppelagppa daaglag. Na ele, na ag eppelagppa daamnanu ib laa anidna, oolna laih ii gomana. Iitta. Babilon dilag king nug na aɗaitteb, na nug eppegppa daappe, Babilon dilag daup ag aab okkai imu manappeg eokku.” Jeremaia nug Sedekaia amegppa anam aum.

Jeremaia 39:8

Appa ag Sedekaianu anam heppig, amge Babilon daup Jerusalem daappig amu, ag kingnu lag enanagnab manaeg ewe, danab ah laulkad ele manatteg ewegeg, ag aab aɗ ele loppaɗeg, nauhakib dayom.