Jeremaia 30:6 - Nobonob Baibel

⁶ Oɗ mattan doye! Danab nug ah nid menutte bia nid menukkunu elelete? Iitta amunu, aɗinu da danab ɠagattag ohnab anen anen ag ah nid aokkun oo eppegppa lamuhitte bia, ag oolag lamuhieg anadttem? Aɗinu da danab ɠagattag iɗulag oh hakkab eppom anidttem.

Jeremaia 30:6 ပူးပေါင်းရင်းမြစ်များ

Sam 48:6

Appa ag Kayak Nug aab amu atognotte anidna, ag huanaknab baɗappig. Ao, ag anidna baɗan, ag ⌊ahilag dabmak aab amunu dim lamidkkulagnu elele iitta doon,⌋ ag ah nid aokkun haaha, nug guittak naunab doyaya, beɗu aab qette, ag amubia guittak ⌊oolagppa⌋ dooppig.

Aisaia 21:3

Yawe keeke amu ippuniɗaɗa, nuhig nai amu a doomi amunu, da beɗulppa guittak okkai doottem. Ao, da ah nid aoglagnu guittak dootteb bia guittak doottem. Da nai doomi am he, da nein qekkulnu hettem. Ao, keeke da anidmi am he, da dabmak huanaknab aottem.

Aisaia 29:22

Anam ⌊amge Yawe Nug heeb, Israel ag genab oolag eɗuglag⌋ amunu, Yawe, Nug Abraham hipuninnu qagaiettakppanu eɗua uhuqak heum ele, Nug Jakop buɗub dilagnu inam atte. “Israel danab ag baula uɗa nak ii doomna. Ge! Ag baula uɗa nak nau doon, iɗulag hakkab ii eppama. Iitta!

Jeremaia 13:21

Laa yawalti uɗitteppanu uɗitteb amu, tatam ag Juda okkai, ag ag ele nug tituana nai qakkakppa daaglagnu wagai men heppig, amge Yawe heeb, amu dilag ag okkai ahilkad daappeg, ag ag waalagppa daaglag amunu, haen amuppa ag aɗi nai mattiglag? Iitta. Ag uug okkai, ah nid aokkunu guittak dootte, ag amubia dooglag.

Jeremaia 22:23

Lag ahilagppa ad sida Lebanonnu kuɗum daatte; ag amuppa enanag daatteb, amge gadon, uug amu ahilagppa beeb, ag aiqakkak nau, ah nid aokkunu hette, ag amubia hekkulag.” Yawe Nug da amelppa Juda danab ah dilagnu anam aum.

Jeremaia 4:31

⌊O gadon tuleglegppa da⌋ gayak doottem. Da ah nug nid tatamnu aokkunu haaha, ewawa aiqagatte, da gayak amubia doottem. Da gayak doottem am, ag Juda danab ah, ahilag. Ah laa nug laa ehanidkkunu eppeg bahia, “O gadonnab gadon, da mauhkkulnu hettem. Da danab nau eppelagppa daaiyi, ag heppeg mauhkkulnu hettem,” atte amu, ag Juda danab ah ag amubia daatteb doomi.

Jeremaia 48:41

Kekeɗ ag uɗin, Keriot eɗadna, wan amuppan aab aɗ ɠagattagnab ele aoppeg, Keriot danab ah ag eppelagppa daaglag. Amu beeb, deɗ amuppa Moapnu daup ag ah nid aokkunu hette bia daaglag.

Jeremaia 49:22

Antteg! Ai igel hagagaɗa oiyaya, doɗ aokkunu noa ukka, eɗua tette, amubia kekeɗ ag Bosra danab ah diiadppeg, ag eppelagppa daaglag. Amu beeb, deɗ amuppa Edom dilag daup ag ah nid aokkun hette bia daaglag.

Jeremaia 49:24

Damaskus danab ah ag gai-iitta daaglag. Ag oolkkulagnu henana, baɗak naɗi okkai doon, ag guittak nau ele aoglag; guittak amuam ah nid aokkun haaha, guittak nau dootte, amubia.

Jeremaia 50:43

Babilon dilag king nug daup amunu nai dookku amu, nug aɗi keeke hekkunu laa iitta, nug gai-iitta daakku. Nug ooppa guittak naɗi dookku; ah nid aokkun haaha, guittak dootte, guittak amubia nug ooppa dookku.

Jeremaia 6:24

⌊O gadon, ig Juda⌋ ig daup amunu nai doot malamut, amu ig gai-iitta daattem. Ig eppenig am hamu daatte, danab eppeg laih laih oh mauhom, amubia. Ig doot, ig dabmakppa guittak okkainab doottem. Ao, ig ah nid aokkunu haaha, guittak okkainab dootte, amubia ig guittak okkainab oonigppa doottem.

Daniel 5:6

King nug amu antta, nug eheɗ baɗe, iɗu hakkab eppe, baeg eheɗ hahaɗe, gateg laih ona laih qeeqe, gateg laih uɗia, laih qeeqe, baeg laih laih oh gai-iitta meum.

Hosea 13:13

Israel danab ah ag am bau daaglagnu ib ele, amge ag ib amuppa ukkaknu ag doyak dabmak ena ele iitta; appa ii oitteb. Aɗinu? Ag am nid yuɗ laa menuaknu daatte, amge nid loabppan dokkunu uua daatte, ag amubia daatteb.

Joel 2:6

Am danab wanppan wan ohppa daatteb ele, ag tap-lokus amu anidna, ag eheɗ baɗaeg, beɗulag hahaɗtte; iɗulag ele hakkab ebatte.

Nahum 2:10

Kekeɗ ag Niniwenu keeke oh aakku ban hena aoglag. Ag aon gokkulag. Ag anam hebeppeg, Niniwe danab ah ag beɗulag gai-iitta mekku. Oolagppa am ag ɠagattag laa ii doomna. Ag hahaɗppeppeg, ag iɗulag am hakkab ebakku.

1 Tesalonaika 5:3

Danab ah ag, “Haen ena aakku beum, ig maɗoɗ ena daagnig,” abeppeg, haen amuppanab keeke eheɗ, ag heeb nauhkkulagnu, ahilagppa bekku. Keeke eheɗ amuam ah nug nid aokkunu guittak paha bette, amubia beeb dooglag. Danab ah ag keeke eheɗ amu ii qe-eɗidmana.