Jeremaia 3:18 - Nobonob Baibel

¹⁸ Haen amuppa Juda danab ah, Israel danab ah ele ag oh qagmena, wan laa yawalti uɗitteppanu daatte, ag wan amuppanu ahan uɗin, wan da ag mamelkad aɗi ag aulag daakkunu mattami ele, ag uɗin, wan amuppa daaglag.

Jeremaia 3:18 ပူးပေါင်းရင်းမြစ်များ

Genesis 12:7

Anam daye amu, Yawe Nug Abram gumitta na, amegppa aum. “Da wan imu oh na buɗun madakkul,” awa aum. Anam a amu, aben amuppa Yawe Nug Abram gumitta ukkom amunu, Abram nug Yawe noobppa dup noa binag mekkunu qaɗab qeum.

Aisaia 43:5

Ag aib baɗappig. Aɗinu? ⌊Da heppi, ag laih laih mattatun gona daaglag, amge⌋ da ehanadppi, ag aam bedeppanu, aam nodeppanu ele eɗun uɗiglag.

Aisaia 43:6

Da danab ah ag yawalti uɗitteppanu daatteb, da ag amelagppa, ‘Ag dahilad danab ah paɗadppeg, ag eɗun wanelagppa ukkeg!’ appi dooglag. Amu danab ah yau uɗitteppanu daatteb amu, da ag amelagppa, ‘Ag danab ah dahilad aib aɗualadppig!’ appi dooglag. Da wan ohppa, dahilad danab ah aguppa daatteb ele, da amu amelagppa ag dahilad danab ah omaladppeg, ag eɗun, ahilag wanppa uɗiglagnu appi dooglag.

Jeremaia 16:15

Iitta. Ag, ‘Yawe Nug Israel danab ah wan yawalti uɗitteppanu, amu wan laala, Nug he, ag appa gona, diia ukka laih me dayak danab ah daappig, Nug appanu ele omalatte uɗippig amu, Nug genab bau daatte, genab amubia nai imu da madittem am genab,’ akkulag. Aɗinu ag anam akkulag? Da heppi, ag eɗun, ahilag wan, da wan amu ag mamelkad aɗi mattami amu, ag amuppa daaglag.” Yawe Nug anam awa atte.

Jeremaia 23:8

Iitta. Ag ahilag nai ɠagattag qa anaknu, ag, ‘Yawe Nug genab Israel buɗub ag wan yawalti uɗitteppanu, amu wan laala, Nug he, ag appa gona, diia ukka laih me dayak danab ah daappig amu, Nug appanu ele omalatte uɗippig, genab amubia nai da akkulnu hettem am genab,’ akkulag. Amu haen amuppa da heppi, ag eɗun, ahilag wanppanab aakku daaglag.” Yawe Nug anam awa atte.

Jeremaia 3:12

Amunu, Jeremaia, na yawalti uɗitteppanu neegna, dahil nai imu Israel dilagppa appe doyeg! Yawe Nug inam atte. ‘Israel, ag da dimeɗona kayak hambuppuak laala dim lamattegeg uɗie, gemu ele hetteb amu, ag eɗun, da Yawe, ag dahilppa uɗieg! Aɗinu? Da laa dilagnu oo gai-iitta doya, oo metta ehanattaknu diig daattem amunu, da tuɗitten, ahilagnu oo nauhak ii doopa. Da hanhan ahilagnu oo nauhak ii doopa.’ Da Yawe, da anam aakku attem.

Jeremaia 30:3

Aɗinu? Haen laa dimppa da heppi, Israel danab ah, Juda danab ah ele ag wan laalappa gona, appa diia ukka laih me dayak danab ah daatteb, ⌊daaglag ele amu,⌋ ag appanu eɗun uɗin, wan imu, da ag mamelkad aɗi, ahilag daakkunu mattami amu, ag imuppa daaglag,” awa atte.

Jeremaia 31:8

Antte, Israelnu wan laa, yawalti uɗitteppanu daatte, da appanu Israel danab ah diie uɗikkul. Yo, da ag wan batakppanu diie qagmaadkkul. Danab ah kuɗumnab, ag uɗiglag. Kuɗum laa ag beɗulag ena ele, amge laala ag amelag gaɗuak ele, laala ag baelag mauhak ele, laala ag ah oolkad ele, laala amu, ag ah nid menuadkkulagnu miag daatteb ele oh uɗiglag.

Jeremaia 50:20

Yawe Nug atte. “Haen amuppa laa ag Israel danab ah ag hipunin atten atten heppig ele, ag hipunin amu eɗun anidna dabmekkulagnu mattiglag, amge ag ii anidmana. Ao, laa ag Juda danab ah ag hipunin atten atten heppig ele, ag hipunin amu eɗun anidna dabmekkulagnu mattiglag, amge ag ii anidmana. Aɗinu? Da Yawe, da heppi, Israel danab ah oɗo yaak daaglag. Ag anam daappeg, da amu dilag hipunin uhuqadkkul,” awa atte.

Jeremaia 50:4

Amu Yawe Nug atte. “Haen amuppa amu, Israel danab ah, Juda danab ah ele ag ahan, ag gaanna, ag da, Yawe, ahilag Kayak, ag da aniɗna dim lamiɗkkulagnu mattiɗkkulag.

Jeremaia 50:5

Ag gonana, ag laa Sionnu ib adeppa daattenu oɗ mattan doon, ag appigppa gokkulagnu gokkulag. Ag amu hena, ag Sion tewona, ag da, Yawe, ag da ele ig nug tituana nai qakkak hanhan daakkunu qakkagnig. Ag nai qakkak amu daulag ii atima,” awa atte.

Jeremaia 7:7

diig amunu da uuadppi, ag tuɗidna wan imuppa daaglag. Da wan imu ag mamelkad aɗi hanhan ahilag daakkunu mattami.

Esekiel 11:17

Jerusalem danab ah ag anam atteb amunu, na laa ag diia ukka laih me dayak danab ah daatteb, na ag amelagppa inam appe doyeg! Naɗi Yawe Nug inam atte. ‘Da heppi, ag wan laalappanu eɗun, ahilag wanppa uɗiglag. Ao, da heppi, ag wan laalappa da hei, ag appa matatun gona daatteb amu, da heppi, ag eɗun uɗin, ahilag wanppa daaglag. Da heppi, Israel wan anukka ahilagnu dayom amu, ag wan amuppa eɗun daaglag,’ awa atte.

Hosea 1:11

Anam dayeb, geha Juda, Israel danab ah ele ag laippu tamanin, ikki danab laippu waappa daan, ag diia ukka, laih me dayakppanu eɗun uɗin, tamanin daaglag. Deɗ amuam geha deɗ naɗinab daakku. Deɗ amunu amu, ag geha, ‘Jesrilnu deɗ,’ akkulag. Aɗinu? Deɗ amuppa, Kayak nug geha danab ah nuhikkud baula nuhig wanppa maatteb daaglag,” awa aum.

Hosea 11:12

Israel danab ah ag hanhan buppuiɗtteb. Ge, Israel danab ah ag hanhan nai genab iitta da amelppa maditteb. Amge Juda danab ah ag Yawe ele ɠagattag daatteb. Ao, ag tuɗidna, oo metta ii uuak kobol dim lamidna, Kayak Oppiaawak Ele oɗe dim lamidtteb.

Hosea 2:2

Amu Yawe Nug ⌊danab ah nuhikkud amelagppa Hosea, Gomer ele dilah oiyakppanu Nug, Israel ele dilagnu nai dottog laa⌋ mattia, inam aum. “Ag dahilad, ag anilag nug da waal dayom, amge gemu nug da waal ii daatte. Ao, da nug gamu daami, amge gemu da nug gamu ii daattem. Anam amunu, ag anilag ag daug bateg! Ge, ag daug bateg! Ag anilag nug am ah ewau pakkua gappai hette. Nug baubau amu hekkunu nug danab laa nug antteb, ameg qeeb, nug ele niiglahnu bala mette. Anam amge, ag anilag nug amubia hak uuaɗ! Ge, nug gamu uuitte, danab laa ele oittepnu hak am uuaɗ!

Amos 9:15

Da heppi, Israel danab ah ag ahilag wanppa daaglag, danab nug ad laa eppe, ba daatte bia. Da heppi, laa nug Israel danab ah ahilag wanppanu baula diia ii goma. Da wan amu ag mattami.” Yawe, Nug am ag Israel, ahilag Kayak, Nug anam awa atte.

Sekaraia 10:6

Yawe Nug atte. “Da Juda danab ɠagattag madakkul. Ao, da Israel danab ele ehanadppi, ag padal ii memana. Da ahilagnu oo bodoetta le mak doottem amunu, da heppi, ag eɗun, ahilag wanppa uɗin daaglag. Da matu geɗadmi, amge da am Yawe, ahilag Kayak amunu, haen amuppa ag da deɗ laa ii geɗadlom bia daaglag. Da ahilag unuqittak doyen ehanadkkul.

Sekaraia 2:6

Amu Yawe Nug atte. “Ag Israel danab ah, kekeɗ ag heeg, ag matatun gona, laih laih daatteb ele amu, ag eɗun uɗieg! Ag yawalti uɗitteppanu uɗieg! Aɗinu? Da hei, ag ulah waɗele uɗittebppanu, amuam kaɗag, yau, qaban, yawalti ele amu, ag aben amu ohppa matatun gona daatteb, ⌊amge ehanittak dahilppa ag aben amu ohppanu ahan, eɗun uɗieg!⌋” awa atte.