Jeremaia 26:18 - Nobonob Baibel

¹⁸ “Hesekaia nug ig Juda, ihinig king dayeye, propet onig Maika, Moreset ted, nug dimppa aɗi bekkunu nai mattia, nug Juda danab ah amelagppa inam aum. ‘Yawe Nukka Ɠagattag Oh Ele, Nug inam atte. “Kekeɗ ag heppeg, Sion am datta wan buuak bia daakku. Ao, kekeɗ ag heppeg, Jerusalem am kinipan ameg okkai hume tak daakku. Anam amu, dahil mettid lag, nuhig tomppan keeke oh ele qauko nakokppa daatte amu, aben amu oh am ad naunau qataiettak bena, wan tonan daaglag.” Yawe Nug anam atte,’ awa aum.

Jeremaia 26:18 ပူးပေါင်းရင်းမြစ်များ

2 King 19:25

Senakerip, na anam ame, amge na nai imu iite doome? Anukkanab da Yawe, da keeke amu bekkunu tituanmi. Anukkanab da maittak amu aomi. Da amu hemi amu, gemu da hei, aakku beum. Ao, da hei, na amu oh henana, na hee, aab okkai ɠagattag aɗ ele am loppaɗattak, kinipan ameg okkai hume tak daatteb.

2 Stori 32:26

Anam daye, Hesekaia nug dada danab ooppa doyak kobol dim lamidkkun uua, oo eɗue, Jerusalem danab ah ag ele oolag eɗuom amunu Yawe Nug ag Hesekaia bau dayom haenppa bu ii mattom.

Nehemaia 4:2

Nug awa awa iqaaqa, nug laikkud amelagppa, Samaria dilag daup ele amelagppa aum. “Juda danab imu, ebehilag iitta ele, ag attem dabmena hetteb? Ag eɗun, aɗ hekkulagte? Ag eɗun, doɗ manadna, ahilag Kayak mettaglagte? Ag uɗat dabmetteb ele am paha malaglagte? Ag men kekeɗ loppaɗeg nena, aab ewakppa nauhppig, kinipan ameg okkai hume tak niitteb amu, ag amu eɗun aon, keeke laa hekkulagte?” awa aum.

Sam 79:1

O Kayak, iitta aɗi danab ag nahip wan aoppig daatteb. Wan amuam nahip, am na aut daatte. Ao, ag nahip mettid lag nahipnu tituanak daatte, ag lag amu heeg, nahip neekkakppa dubuttid tak ele daatte. Ge, ag heeg, Jerusalem am kinipan ameg okkai hume tak, anamib daatte.

Jeremaia 17:3

qauko okkaippa, amu gikkiɗah dad okkaippa ele meeg daatteb amu, ag amu dabmena, appa ag kayak hambuppuak laala, amu Aserah ele noolagppa dup nona binag metteb amunu, da ahilag en, ahilag keeke ena ena ele laa hamu madakkul. Ag wan ahilagppa aben ohppa kayak hambuppuak noobppa dup nona binag menan hipunin hetteb amunu, da aben amu oh laa hamu madakkul.

Jeremaia 51:37

Da heppi, kekeɗ ag heppeg, Babilon am kinipan ameg okkai hume tak daakku. Doɗ jakal, ag aguppa daaglag. Danab ah ag Babilon anidna, ag ameg iɗuak doon, ag Babilon danab ah dilagnu, ‘Keeke hamunab,’ dooglag. Danab laa Babilon appa ii daama.

Jeremaia 9:11

Amu Yawe Nug inam awa atte. “Da heppi, Jerusalem am kinipan ameg okkai hume tak daakku. Doɗ jakal ag aguppa daaglag. Ge, da heppi, Judanu aab laala ag nauhakib daaglag. Danab laa appa daakkunu elele iitta daaglag,” awa atte.

Maika 1:1

Juda wanppa, haen Jotam, Ahas, Hesekaia ele ag king daappig, haen ag king daappigppa Yawe Nug Maika, Moreset ted, Nug nug nai imu mettom. Maika nug Samaria, Jerusalem ele dilahnu tulegleg imu anttom.

Maika 3:12

Ag Jerusalem danab okkai, ag nau amu hetteb, ag nai hambuppuak amu ele maditteb amunu, ag beɗulagppa kekeɗ ag heppeg, Sion am datta wan buuak bia daakku. Ao, kekeɗ ag heppeg, Jerusalem am kinipan ameg okkai hume tak bia daakku. Anam amu, Kayaknu mettid lag, amunu tomppan keeke oh ele qauko nakokppa daatte amu, aben amu oh am ad naunau qataiettak bena, wan tonan daaglag.

Maika 4:1

Qauko laa, Yawenu mettid lag qauko amuppa daatte amu, deɗ laa dimppa, Yawe Nug heeb, qauko amuam qauko laa oh eɗattak daakku. Ao, Yawe Nug heeb, qauko amuam qauko nakok laa oh eɗadkku. Eɗatteb amu, geha danab ah kuɗumnab huu anen anenppanu geha ag appa ⌊qagmekkulagnu⌋ uɗiglag.

Sekaraia 8:3

Amu Yawe Nug laa ele inam atte. “Da eɗuen, qauko Sion appa ukken, da Jerusalem daakkul. Da amu heppi, danab laa ag Jerusalemnu, aab okkai amu onig am Yawe Dim lamittaknu Oo Metta Ii Uuak Kobol, akkulag. Amu qauko Sionnu, qauko amuam Yawe Nukka Ɠagattag Oh Elenu amu, ag qauko amunu, qauko amu onig am, Qauko Kayaknu Tituanak Daatte, akkulag,” awa atte.