Jeremaia 25:9 - Nobonob Baibel9 da heppi, Babilon dilag king Nebukatnesar, dahil maɗi nid, nug nuhikkud daup ele, aria, laa oh ag wan imunu laih yawalti uɗitteppanu daatteb ele, ag Nebukatnesar nuhikkud daup ele oh banelag uɗiglag,’ awa atte. Amu Nug atte. ‘Da heppi, ag uɗin, ag wan imu aoglagnu, ag ippan danab ah, wan laala wan imu talilittak daatteb ele amu, ag ele oh ban hekkulag. Da heppi, wan imu, amu wan laala wan imu talilittak daatteb ele, ag dahilnuib, dahil pelemppa daaglag. Ag anam daappeg, wan laappan danab ah ag anidna, ameg iɗuak doon, ahilagnu, “Keeke hamunab,” dooppeg, wan imu, wan amu oh am hanhan padal mak anamib daaglag. အခန်းကိုကြည့်ပါ။ |
Jeremaia 25:9
48 ပူးပေါင်းရင်းမြစ်များ
Ig mamenkad ag amu heppig amunu, Yawe Nug Juda danab ah, laa Jerusalemnu, laa Juda wanppa laih laihnu amu, Nug amu dilagnu oo huanak nauhe, Nug bu okkai ag mattom. Nug he, danab ah laihnu ag kobol Juda, Jerusalem ele dilagppa beum, ag kobol amu ahilagppa bemanu baɗak okkai doon, ag kobol amu anidna, ag amelag iɗuak doon, ag Juda danab ah dilagnu, ‘Keeke hamunab,’ ele doyegeg uɗie, gemu ele anam dootteb. Ag Lewi buɗub ag, ag Yawe aɗi kobol he beum, ag amu amelagppa aakku anidtteb.
Yawe Nug anukka Juda danab ah ag wan ahilkad atognonana, ag maɗ eblaih aɗit eleppa hanhan keeke ii eppamnanu aum. Ag amu heppeg, wan eɗua, ittag ele daakkunu dabmaama, anam aum. Nug anam aum, amge Juda danab ah ag uueg, kekeɗ uɗin heeg, Juda wanppa danab ah qainqainib daaeg, wan am hele-ettak daye ukke, maɗ 70 iitta meum batak, wan am, maɗ ebqak eblaih aɗit ele, maɗ amuam wannu sabat maɗ, nug maɗ amu nuhig elele awom. Yawe Nug Jeremaia oɗeppa anam bekkunu aum amu, Nug aakku he beum.
Amu Kayak Nug atte. “Asiria danab ah dilagnu am gadonnab gadon. Gemu Asiria nug da eppelppa bu aɗak bia da aɗai dayeye, danab ah ag da oo nauhak meɗatteb amu, da amuppa ag uug matte, eheɗnab mataɗadttem. Ao, Asiria nug da eppelppa daɗib bia da aɗai dayeye, da danab ah dilagnu oppoɗi bak huanak doyeye, amuppa bu madattem.
⌊Amu Kayak Nug atte.⌋ “Da dahil ban danab, huu da epeɗiadmi amu, da ag gona, ⌊Babilon eɗadkulagnu⌋ haknunab amelagppa ami. Ao, da ⌊Babilon danab ah dilagnu oppoɗil bette amunu, da⌋ ban danab dahil ag noob mettak nau ⌊Babilon⌋ mattaglagnu onilagppa emi. Ban danab huu amuppanu amu, ag da onil attannab daakkunu gamalagnab ahatte.” Yawe Nug anam atte.
Aɗinu? Da Yawe, da attem. Da wan laalappan huu Yawalti uɗitteppanu daatteb amu, da ag onilagppa ekkul. Da heppi, ahilkad king, daup ele ag uɗin, ag Jerusalem, Juda dilag aab laala ele ban henan, ag eɗadkkulag. Ag eɗadna malona, ahilkad king ag Jerusalemnu aɗ odppa ahilkad sia king qappaladna, ag aguppa daaglag.
Yawe Nug atte. “Da wan laa dahilad danab ah, Israel, ag aulag daakkunu da ag mattami, amge danab laa ag kekeɗ meɗappig, wan amu talilidna daatteb ele amu, ag uɗin, Israel ele ban henana, Israel dilag keeke aon goppig. Ag anam heppig amunu, danab uud hiɗa buɗie gotte, amubia da heppi, laa da kekeɗ meɗappig amu, ahilag kekeɗ ag uɗin, ag diin goppeg, laa da kekeɗ meɗappig ele ag wan laappa diia ukka laih me dayak danab ah daaglag. Amu da Juda danab ah ehanadppi, ag ag eppelagppa baula ii daamna.
Aɗinu na onin anam daakku? Yawe Nug amunu inam atte. ‘Da heppi, na eheɗ nau baɗanna oippe, na laipad ele ag eheɗ nau baɗan oiglag. Na amenppanab na laipad ag kekeɗ dilag qep elabppa mauhppeppeg anidkkut. Da Juda danab ah oh Babilon dilag king eppegppa maadppi, nug ag diia, Babilon gokku, o iitta nug qep elabppa aqeb mauhkkulag.
Da heppi, Juda danab ah amu ag adeppa adeppa matatun gona daaglag amu, wan atu laa ohppan danab ah ag ahilagnu uuaknab dooglag. Ag ahilagnu, “Danab ah nau,” anan oiglag. Ag Juda danab ah dilagnu hamu bia doon, ag ahilagnu ag am nau bekkunu at daatteb dabmena, ag aon aon aqanna, ag eheɗ laa awaknu anak waappa daaglagnu akkulag.
Da heppi, kekeɗ ag qep elabppa aqappeg, enug aqeebeb, oɗe nau danab kuɗum aqe mauhtteb ele aqeebeb, wan atu laa ohppan danab ah ag ahilagnu naunab doon, guguattak daaglagnu uun autnanab aoglag. Amu da heppi, gemu Juda daatteb ag wan laalappa diia ukka laih me dayak danab ah daaglag amu, wan amuppan danab ah ag ag eheɗ laa aoglagnu anak waappa daaglagnu anana, ag anadna, amelag iɗuak doon, ag ahilagnu, ‘Keeke hamunab,’ dooglag.
Ig mamenig anukkanu anam haknunab anak amu mekke, ig dim lamittutut uɗie, gemu ele hettem, amge Babilon dilag king Nebukatnesar nug wan imu aokkunu nuhikkud daup ele ban hekkulagnu uɗin, wan imuppa beeg, ig amut. ‘Ahappeg, ig Babilon dilag daup, Aram dilag daup ele eppelagppa daamtanu, ig gota, Jerusalem appa teta, nakok daagnig,’ amut amunu, ig uɗit, ippa Jerusalem iikku daattem.” Rekap buɗub ag Jeremaia amegppa anam appig.
Na nai amu oh buk itoɗiak ele laappa yona, na Juda dilag king Jehoiakim amegppa inam appe doyaɗ! ‘Yawe Nug inam atte. “Na buk itoɗiak ele laa amu manae ewe, na ame. ‘Jeremaia, aɗinu na Babilon dilag king nug genab uɗia, wan imuppa ban ha heeb, wan nauhakib dayebeb, ippa danab, doɗ ele ii daamna buk amuppa yaame?’ aon ame.” ’ ” Jeremaia nug nai amu doyom.
Yawe Nug anam a, da, Jeremaia, da Juda danab ah amelagppa ami. “Laa amu uɗitte amu, nug am laion laa nug teɗ nuhigppan aha, doɗ aqeeb mauhkkulagnu oitte bia uɗitte. Ao, laa nug wan kuɗum he nauhtteb ele, nug uɗikkun aakku ahom. Nug heeb, ag Juda, ag ahilag wan am nauhaknab daakkunu ahom. Ao, nug heeb, ahilkad aab kuɗum am nauhakib daaglag. Danab ah laa appa ii daamna. Iitta.
Na amu hewona, na ag amelagppa inam appe doyeg! ‘Yawe Nukka Ɠagattag Oh Ele, Israel dilag Kayak, Nug inam atte. “Da dahil maɗi nid Nebukatnesar, Babilon dilag king amu, da nug onigppa eppi uɗikku. Uɗieb, men da hei, iikku iguppa boumak daatteb amu, da heppi, ag sia king nuhig men amu attan meppeg daakku. Da heppi, balal nuhig men imu attan dayebeb, nug heeb, ag aam king amu qemanu lamen laa, am kingnu, ag lamen amu balal amu attan taiettaglag.
Yawe atte. “Laion laa nug atu duppu Jodan le guguittak daatteppanu ba, sipsip dilag gikkiɗah dad enappa ta, sipsip diikkun lamatte ooltteb, amubia da heppi, Edom danab ah ag ahilag wanppa ii daamna. Kobol amuam pahanab anam bekku. Da amu hewoya, da laa da nug uɗat amu hekkunu ool hette ele, da nug Edom gumadkkunu tituankkul. Aɗinu? Laa nug da bia daattete? Laa nug da amu ii hepanu ab, da ii hekkulte? Sipsip gumak danab nug laion, o doɗ nau laa qeeb mauhkkunu hette, o lamitteb gokkunu hette, gumak danab laa nug dahilnu amubia hekkunu elelete? Iitta!” awa atte.
Yawe Nug atte. “Ag Benyamin danab ah, ag ahan ooleg! Ao, ag Jerusalem appa aib daappig. Ag ahan ooleg! Uug naunab yawalti uɗitteppanu uɗitte. Appan laa uɗin heppeg, nauhak okkai nau daakku. Anam amunu, danab ah ag dooglagnu ag trampet Tekoa appa iwaleg! Ge, ag Bet Hakerem appa danab ah anidna, uug naunab uɗitte dooglagnu ag appa pilak, amunu at daakkunu qappeg!
Kekeɗ ag uɗin, Dan appa daaegeg, danab nug hos noobppa nokoɗu qe doya, hos miag daatte dootte, amubia ig kekeɗ ag miag daatteb doottem. Danab nug hos dawai gaye, danab doya ottaitte, amubia ig Juda danab ah ohnab ottaittem. Kekeɗ ag wan imu oh, aɗi keeke wan imuppa daatte, ag diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb. Ao, ag wan imunu aab okkai oh, danab ah appa daatteb ele amu, ag amu oh diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb.’ Juda danab ah ag anam akkulag,” awa atte.
Anam amunu, Naɗi Yawe Nug inam atte. “Da heppi, danab laa, nug appag diig am Jerusalemnu yawalti uɗitteppanu daatte, danab amuam Babilon dilag king onig Nebukatnesar, nug nuhikkud daup ele ag Tair ele ban hekkulagnu uɗiglag. Nebukatnesar nug king laa oh eɗattak daatte. Da heppi, nug daup baelagppa oitteb kuɗum huanaknab, daup laa hos attan daan ban hetteb, laa bannu karisppa ele oinna ban hetteb ele oh uɗiglag.
Naɗi Yawe Nug ag oh amelagppa inam atte. “Da oo nauhaknab doyeye, wan ohppan danab ah amu heppig amu, ag ahilag hak naunu bu aoglagnu da ain malami, amge Edom ag genabnab genab bu anam aoglag. Aɗinu? Kekeɗ ag Israel eɗatteg, Israel nena qeppig, haen amuppa Edom ag oolag gamag eheɗ ahe, Israel dilagnu oolagppa oo aeg bak doon, ag dahil wan ahilag daakkunu aoppig,” awa atte.
⌊Yawe Nug anam aum amu, Habakuk nug inam unuqittom.⌋ “O Yawe, na haen ohnab aakku daye uɗie, gemu ele daattem. O Kayak, na am dahil Kayak Oppiaawak Ele; ig ii mauhmata. O Yawe, na Babilon dilag daup ag uɗin, hipunin haknu nob mekkaglagnu tituanadme. Ao, O Yawe, na am kekeɗ nikkamnanu ehanittak ihinig daattem, amu na Babilon ag bu mekkaglagnu otiadme.
ကြော်ငြာတွေ