Jeremaia 24:9 - Nobonob Baibel

⁹ Da heppi, Juda danab ah amu ag adeppa adeppa matatun gona daaglag amu, wan atu laa ohppan danab ah ag ahilagnu uuaknab dooglag. Ag ahilagnu, “Danab ah nau,” anan oiglag. Ag Juda danab ah dilagnu hamu bia doon, ag ahilagnu ag am nau bekkunu at daatteb dabmena, ag aon aon aqanna, ag eheɗ laa awaknu anak waappa daaglagnu akkulag.

Jeremaia 24:9 ပူးပေါင်းရင်းမြစ်များ

1 King 9:7

da geha ag Israel danab ah da wan ag mattami imu amu, da wan imuppanu lamatten, mettid lag imu, da onil aguppa daakkunu dahilnu tituana meɗak daakkunu hemi amu, geha da baula amunu ii dabmepa. Am laa ele, wan atu ohppa, danab ah ag Israel ag nau bekkunu at daatte dabmena, ag aon aon aqaglag.

2 Stori 7:20

amu da geha ag Israel danab ah da wan dahil, da ag mattami imu amu, da wan imuppanu lamatten, mettid lag imu, da onil aguppa daakkunu dahilnu tituana meɗak daakkunu hemi amu, geha da baula amunu ii dabmepa. Am laa ele, da heppi, danab ah laa ag lag imuam nau bekkunu at daatte dabmena, ag aon aon qettaglag.

Sam 69:11

Haen da oo doyak okkai awewe, lamen heɗiag ele takken daaiyi amu, danab ah ag da aon aon iutteb.

Aisaia 43:28

Amunu da heppi, ag Juda, ag ahilag mana mettak danab amu, danab ah laa ag ahilagnu, ag am keeke hamu bia dooglag. Ao, da heppi, ag Jakop buɗub, ag dahilnuib, dahil pelemppa daaglag. Ge, da heppi, ag Israel buɗub ag uɗa nak nau guittak ele dooglag.” Yawe Nug anam atte.

Aisaia 65:15

Ag ahilag hak nau, diig amuppa ag bu eheɗ amu aoppeg, dahilad danab ah ag ag onilag diin, anen anen laa amegppa, ‘Yawe Nug amu dilag bu mattom bia, nahip eheɗ laa awaknu anak waappa dayak am amubia daakkunu ool daatte,’ akkulag.” Yawe Nug anam atte. Amu Naɗi Yawe Nug heeb, ag nau hetteb ag mauhkkulag, amge Nug nuhikkud danab ah onig laa matteb ⌊ag enaib daaglag⌋.

Jeremaia 15:4

Hesekaia bekka Manase, Juda dilag king, nug Jerusalem dayaya, nug kobol eheɗ nau kuɗum heum amunu, da heppi, wan laa ohppan danab ah ag Juda danab ah dilagnu oolagppa uuaknab dooglag.

Jeremaia 19:8

Da heppi, aab okkai imuam nauhakib dayebeb, danab ah laa ag aab imuppan danab ah dilagnu, ‘Keeke hamunab,’ dooglag. Ge, aun aɗi ag aab imu guguittak oinna, ag aab okkai imu eheɗ nau awom anidna, ag dabmak huanak aona, ag aab imunu danab ah aon aon aqaglag.

Jeremaia 25:18

Da tatam hei, danab ah Juda appa daatteb, Jerusalem ele daatteb, ahilkad king, nuhikkud ehanittak anuqak danab ele ag nauhak daappeg, laa ag anadna, amelag iɗuak doon, ahilagnu, “Keeke hamunab,” doon, ag eheɗ laa awaknu anak waappa daaglagnu akkulagnu lappig. Lanak dimppa anamnab be, aakku daatte.

Jeremaia 26:6

da heppi, lag dahil imu nauhakib daakku; anukka da hei, aab Silo nauhom, amubia nauhak daakku. Da amu heppi, wan atu ohppan danab ah ag aab okkai Jerusalem onig aon, eheɗ laa awaknu anak waappa dayaknu nai ahilagppa mekkulag,” awa atte.’ ” Yawe Nug Jeremaia anam akkunu aum.

Jeremaia 29:18

Da heppi, kekeɗ ag qep elabppa aqappeg, enug aqeebeb, oɗe nau danab kuɗum aqe mauhtteb ele aqeebeb, wan atu laa ohppan danab ah ag ahilagnu naunab doon, guguattak daaglagnu uun autnanab aoglag. Amu da heppi, gemu Juda daatteb ag wan laalappa diia ukka laih me dayak danab ah daaglag amu, wan amuppan danab ah ag ag eheɗ laa aoglagnu anak waappa daaglagnu anana, ag anadna, amelag iɗuak doon, ag ahilagnu, ‘Keeke hamunab,’ dooglag.

Jeremaia 29:22

Danab aɗit amu aa Israel oolagppa eheɗ nau hepiɗ, gemu ele hettep amu, da doottem. Da anat-ttem. Aa mudippan lailti dilag ah ele ewau pakkua gappai heya, aa hambuppuak nai da ii matami, da aa mattiglahnu ii ami amu, aa nai amu mattiya, da ippuanatmi attep amunu, aa eheɗ hak ahilah, diig amunu qinob aa nob naunab aopeɗ, Juda danab ah oh ag Babilon wanppa diia ukka laih me dayak danab ah daatteb, ag laanu nug eheɗ laa awaknu anak waappa daakkunu akkulagnu hekkulag amu, ag inam akkulag. ‘Babilon dilag king nug Sedekaia, amu Ahap ele aab aɗuppa manate mauhpiɗ, amubia Yawe Nug heeb, nahip-ppa baɗ!’ aon akkulag.” Yawe Nug anam awa atte.

Jeremaia 34:17

Nug anam atte amunu, Yawe Nug ele inam atte. “Ag dahil nai ii dim lamidppig. Ag laa, ag ag ele tiilag laippu, ahilkad maɗi nid daatteb amu, ag uhuqatteg, ag uhuqak aon, hamu ii daatteb. Iitta! Ag ag waalagppa ahilkad maɗi nid daatteb amunu, ag da dahil nai ii dim lamidppig ele, da ag uhuqak laa madakkulnu hettem. Uhuqak amuam ag qep elabppa mauhkkulag. Uhuqak amuam ag oɗe nau danab kuɗum aqe mauhtteb, ag amuppa mauhkkulag. Uhuqak amuam ag enugppa mauhkkulag. Amu da heppi, wan ohppa danab ah ag ahilagnu oolagppa uuaknab dooglag.

Jeremaia 42:18

Aɗinu anam daakku? Am Yawe Nukka Ɠagattag Oh Ele, Israel dilag Kayak, Nug atte. ‘Da ool nauhe, oppoɗil beebe, Jerusalem danab ah bu eheɗ mattami, amubia ag laa, ag Isip gona daanna oiglag dayeb, da oppoɗil beeb, bu eheɗ ag madakkul. Danab ah laa ag ahilagnu ag eheɗ laa awaknu anak waappa daaglagnu anana, ag anadna, ameg iɗuak doon, ag naippa yaaladnana, ag aon aon aqaglag. Ag Isip gona daan oiglag, ag baula ahilag wan imu iinab anidmana.’ ” Yawe Nug anam awa atte.

Jeremaia 44:12

Uug naunab Juda wanppa beum, dimppa ag kuɗum iitta, ag laib laib uug haen dimppa bau daan, Juda wanppa daappig, amge ag haen amuppa Isip gona daaglagnu dabmak aoeg ɠagattag eppom daye, ag aakku heppig. Ag uɗin, Isip wanppa daatteb; am ag amu heppig amu, da heppi, ag nauhkkulag. Ag oh Isip daanna nauhkkulag. Ag qep elabppa, o enugppa mauhkkulag. Danab okkai ukkeb, danab onig iitta ele, ag oh qep elabppa, o enugppa mauhkkulag. Danab ah laa ag ahilagnu ag eheɗ laa awaknu anak waappa daaglagnu anana, ag anadna, ameg iɗuak doon, ag naippa yaaladnana, ag aon aon aqaglag.

Jeremaia 44:13

Juda ag uɗin Isip daatteb amu, da ag qep elabppa, enugppa, oɗe nau danab kuɗum aqe mauhtteb eleppa bu madakkul. Da Jerusalem danab ah bu mattami, amubia da ag Isip daatteb bu madakkul.

Jeremaia 44:22

Yawe Nug amu antta, amunu dabma, Nug ag ahilag nau hak digdig, ahilag hak nug amunu ooppa uuaknab dootte ele, Nug ag uuatteb, ag hak amu tuɗidna hekkulagnu elele ii doya, Nug he, danab ah laa ag wan amuam eheɗ laa awaknu anak waappa daakkunu anan oiyegeg, wan amuam hele-ettak, wan meu waknu nakokib elele, am anam dayom, amu danab ah appa ii daappig. Gemu ele anamib daatte.

Esekiel 23:46

Amunu Naɗi Yawe Nug inam atte. “Ag laa ag heppeg, danab kuɗum ag oppoɗi bak doon, ah aɗit amu gumatna gona hatappeg, aa baɗak eheɗ nau doopeɗ, ahilah keeke ele aweg!

Esekiel 25:3

na, ‘Ag Amon danab ah, ag Naɗi Yawenu nai doyeg!’ awona, na Naɗi Yawe Nug inam atte appe doyeg! ‘Haen kekeɗ ag uɗin heeg, dahil mettid lag nauhom, haen ag heeg, Israel wan oh nauhaknab dayom, haen ag heeg, Juda danab ah ag Babilon wanppa diia ukka laih me dayak danab ah daaglagnu goppig, haen amuppa diig amu ohnu ag Amon, ag oolag gamag ahe, “Enanag, ig oonig anamib hette,” appig.

Esekiel 26:2

“Danab bekka, Tair danab ah ag Jerusalem na qeumnu oolag gamag ahak eheɗ doon, ag inam appig. ‘Am enanag! Kekeɗ ag gona, aab okkai Jerusalem heeg nauha autanab awom. Gemu aab amuam loppaɗakib daatte. Jerusalem danab ah baula keeke meppeg, laa daden meppeg, men doɗo ii aomna. Ag ig ib amuppa men doɗo okkai aognignu ib baula oo ii nemata; ig anam aognig,’ aon appig.

Esekiel 5:8

Anam amunu, Naɗi Yawe, Nug inam ele atte. “Ag anam heegeg, da, da ahilag hak amunu eheɗ doyeye ool ii madattem amunu, da wan laihnu danab ag, ag neekkadna daappeg, da bu madakkul.

Duteronomi 28:25

Yawe Nug heeb, ahilkad kekeɗ ag eɗadkkulag. Am ag kekeɗ ahilkad, ag ib laippu amuppaib banelag gona, aqaknu ban hekkulag, amge ag ib kuɗumppa ahilag kekeɗ noolagppanu oolna gokkulag! Ahilagnu amu, wan atu ohppan danab ah ag, ag anadna, amelag iɗuak dooglag.

Duteronomi 28:37

Anam beeb amu, wanppan wan laalappanu danab ah, Yawe Nug lamatte, ag goppig, ag oolagppa daatteb ele amu, laa amu ag kobol ahilagppa bekku amu anidppeg, ag ameg iɗuak doon, ahilagnu, “Keeke hamunab,” ele doon, imadkkulag.