Jeremaia 23:14 - Nobonob Baibel

¹⁴ Ag anam heeg anidmi, amu propet Jerusalem daatteb, ag ele eheɗ nau heegeg anadttem. Ag ewau pakkuna gappai henana, ag danab ah amelagppa ena hak danab bia daatteb, amge oolagppa, lokkumakppa ele ag danab nau daatteb. Ag danab eheɗ hekkulagnu hetteb ele ehanadtteb amunu, laa nug eheɗ hak nuhig ii dimedatte. Dahil neekkakppa Jerusalem danab ah oh ag Sodomnu danab ah, o Gomora danab ah bia daatteb,” awa atte.

Jeremaia 23:14 ပူးပေါင်းရင်းမြစ်များ

Genesis 13:13

Amu Sodom danab ag nau hak danab. Ag Yawe noobppa hipunin kuɗum, okkai ele henan oidttappig.

Genesis 18:20

Yawe Nug anam ana amu, Nug ⌊Abraham amegppa⌋ aum. “Da Sodom, Gomora danab ah ele ag hipunin naunab, huanak hetteb, da amu daulppa doomi

Genesis 19:24

Lot nug Soar te, aam be, Yawe Nug he, kalu laa huana eotte onig salpa habppanu ewawa Sodom, Gomora ele qaɗelahppa neum.

Genesis 19:25

Yawe anam he amu, uɗem amu, aab okkai aɗit amu, aab okkai laala uɗem amuppa daappig, amu danab ah oh ele, amu keeke ohnab appa daappig ele, amu oh padal meppig.

Aisaia 9:15

Ikki amuam ahilkad ikki danab, ahilkad danab onilkad ele. Boob amuam propet danab ahilkad, ag nai hambuppuak danab ah amelagppa mehuqtteb ele.

Jeremaia 14:14

Da ai, Yawe Nug nob ma, da amelppa aum. “Propet amu da onil diin, ag dimppa aɗi bekkunu nai hambuppuak maditteb. Da ii maatti uɗippig. Da ag amelagppa nai laa ii mattimi. Da danab amu propet daaglagnu ii tituanadmi. Propet amu ag tuleglegppa keeke anidna, aeg dootteb, amge keeke ag tuleglegppa anidtteb ele am genab iitta. Ag eman kobol meu iittappa keeke doon, aeg dootteb, amge ag aɗi keeke ib amuppa dootteb am keeke genab iitta. Ag akka, ahilag dabmakppa keeke hambuppuak dabmetteb, amge keeke ag dabmetteb ele am genab iitta,” awa aum.

Jeremaia 18:13

Ag anam akkulag amunu, Yawe Nug imu ele atte. “⌊Laa⌋ ahan gona, wan atu laih ohppa danab ah oɗ mattan doyeg! Appa Israel danab ah hetteb bia heppigte oo iittate? Israel danab ah ag ah makkun kobol nau laa hette, ag amubia heegeg uɗie, gemu ele hetteb.

Jeremaia 20:16

Aab laala Yawe Nug amunu oo gai-iitta doya oo matta ehanittak kobol ii haaha he, aab amu ag nauhna autna aoppig amu, danab amu nug anam bia dayaɗ! Danab amu nug buttua qanak heegeg doyaya, belo haenppa nug bannu ewak ele doyaɗ!

Jeremaia 23:17

Propet amu ag laa dahilnu ena iinab dootteb ele amelagppa, “Yawe Nug atte, ‘Ag maɗoɗ ele daaglag,’ aon atteb. Ag amu dilagnu anam anana, ag laa ag oɗe dim lamidmananu dabmak ahilag ɠagattag eppe, aɗi hekkulag dabmakppa daatte amu, ag amuib dim lamidtteb, ag amelagppa, ‘Uug laa ahilagppa ii bema,’ ” aon atteb.

Jeremaia 23:22

Ag amu heppig, amge ag da noolppa daanna, dahil nai doolob, ag dahil nai danab ah dahilad amelagppa mattilob. Ag anam helob, ag heppeg, danab ah ag eheɗ hemananu ag oolag eɗueb ii helob, amge iitta,” awa atte.

Jeremaia 23:32

Genab, da propet hambuppuak, ag akka tulegleg hambuppuakppa keeke anidna, dimppa aɗi bekkunu nai maditteb, da amu dilag haknu eheɗ doyeye ool ii madattem. Ag tulegleg hambuppuak anidna, danab ah amelagppa mattinna, nai amuppa ag danab ah omalatteg, ib eheɗppa gotteb. Ag hambuppuak nau amu maditteb, amge da maadppi gokkulagnu onilagppa ii emi. Da ag amu hekkulagnu ii tituanadmi. Ag eheɗ heegeg, Juda danab ah ag ehanittak nakok laa iinab aotteb.” Yawe Nug anam awa atte.

Jeremaia 29:21

Yawe Nukka Ɠagattag Oh Ele, Israel dilag Kayak, Nug Kolaia bekka Ahap, am Masea bekka Sedekaia ele, aa am ahilti propet aɗit, aa hambuppuya, aa Yawe keeke laa ippuanatom attep, amge Nug ii ippuanatom. Aa dimppa aɗi bekkunu nai hambuppuak amu madittep, amge aa mattieheh, Yawe Nug danab aɗit amu dilahnu aɗi atte amu, ag Babilon appa diia ukka laih me dayak danab ah daatteb, ag doyeg! Nug atte. “Da heppi, aa Babilon dilag king Nebukatnesar eppegppa daapeɗ, ag laa ag neegna daappeppeg, Nebukatnesar nug heeb, aa mauhkkulah.

Jeremaia 36:2

“Jeremaia, na buk itoɗiak ele laa aon, da aɗi nai kuɗum na amenppa Israel wan, Juda wan, amu wanppan wan laa oh ele dilagnu ain malami amu, na buk amuppa ye! Da Josaia king daye digmein, na amenppa ai uɗie uɗie, gemu batak nai mattimi amu, na nai amu ohnab buk amuppa ye!

Jeremaia 49:18

Kayak he, Sodom, Gomora ele, aab laala aab aɗit amu gukkuatak daappig ele nauhna autna aoeg, danab ah appa laa ii daappig. Appa beum amu, amubia laa nug Edom appa ii daama. Ao, appa danab laa ii daama,” awa atte.

Gayak Nai 4:6

Yawe Nug dahilad huu bu mattom amu; bu mettak amuam Sodom dilag eɗittom. Yawe Nug Sodom pahanab he nauhom; danab heeg, Sodom danab ah uug ii dooppig.

Esekiel 13:16

Laa ag gauppaib bappaidppig am Israel dilag propet hambuppuak. Ag tulegleg hambuppuakppa Jerusalem am maɗoɗib daakkun anidna, ag aɗi bekkunu propet nai hambuppuak anana, “Jerusalem ippa ig maɗoɗib daagnig,” atteb, amge amuam genab iitta.’ ” Naɗi Yawe Nug anam awa atte.

Esekiel 13:19

Ag ah ag uɗat nau ahilag hekkulagnu aeg, danab ag bali aeg nakokib mattan, bret huppu laib laib ele mattaeg hetteb. Ag ah eheɗ hetteb ele ag keeke nakok amuppaib ag heeg, da onil oppiaawak ele dahilad danab ah laa dilag neekkakppa hamu bia daatte. Dahilad danab ag nai hambuppuak dooglagnu uug ii doon aotteb amunu, ag ah eheɗ amu hetteb ele, ag nai hambuppuak anam aegeg, danab mauhkkulagnu ii daappig ele ag mauhtteb; laa ag mauhkkulagnu elele amu, ag ii mauhtteb,’ ” awa atte.

Esekiel 22:25

Amu laion laa nug gaya, doɗ laa qa latte, amubia Israel dilag anuqak danab ag dabmak laippu mena, ag danab ah heeg nauheg, ag danab ah dilag en keeke, keeke awaknu men doɗo okkai ele, ag keeke amu oh yab aona, ag danab kuɗum ele aqaeg, waalkad ag ah qab daatteb.

Hosea 6:10

⌊Ag anam hetteb amunu,⌋ da kobol naunab nau Israel appa anidmi. Israel danab ah ag kayak hambuppuak noolagppa dup nona binalag menan daatteb. Ge, Kayaknu neekkakppa ag oolagppa dubuttid teum daatte.

Amos 4:11

Yawe Nug anam ana amu, Nug ele atte. “Da hei, ag oolagppan laa ag Sodom, Gomora danab padal meppig, amubia padal meppig. Ge, ag am aab bau maha laa, danab nug aab maha amu ewebeb, eɗua aotte, tuɗitta ii eotte, ag amubia daappig, amge ag eɗun, da dim lamiɗkkulagnu da gumiɗna ii uɗippig,” awa atte.

Maika 1:5

Yawe Nug oo nauhe uɗittenu diig am, Jakop buɗub ag hipunin henan heeg uɗie, gemu ele hetteb. Ao, Israel danab ah ag hipunin henan ii uuppig daatteb. Amu aun beɗuppa Jakop buɗub ag Yawe uuidna, kayak hambuppuak dim lamadtteb? Amuam ag ahilag aab okkai Samaria aakku. Amu Juda danab ah kayak hambuppuak noolagppa dup nona binalag metteb ele amu, amu hak naunu aab diig am adekku? Amuam ag ahilag aab okkai Jerusalem aakku.

Maika 3:11

Jerusalemnu danab okkai ag epeɗiak henana, ag lokkumakppa eheɗ haknu ehanittak aon hetteb. Danab ah ag Jerusalemnu mana mettak danab men doɗo mattaeg, ag ippunittak madatteb. Amu danab ag Jerusalemnu propet men doɗo mattaeg, ag propet nai ahilag maditteb. Ag nau amu oh hetteb, amge ag atteb. “Ig Yawe waappa daat, ehanittak aottem,” atteb. Ag anam anana, ag inam ele atteb. “Yawe Nug ig oonigppa iite daatte? Uug nau laa ihinigppa ii bema,” aon atteb.

Sepanaia 3:4

Propet danab Jerusalem daatteb ele ag am beɗuppa tak danab daatteb. Ao, ag hambuppuak kobolppa keeke ag oolag hette ele, ag amu aotteb. Mana mettak danab Jerusalemnu ag kobol eheɗ heegeg, Kayaknu mettid lag, nuhig neekkakppa am dubuttid teum daatte. Ge, ag hambuppunna, Kayaknu ɗo inam inam ippunigtte atteb, amge Kayaknu ɗo anam ii ippunigtte.

Sekaraia 13:2

Yawe Nukka Ɠagattag Oh Ele Nug atte. “Deɗ amuppa da heppi, Juda wanppa danab o ah laippu laa nug kayak hambuppuak noobppa dup noa binag ii mema. Diig amunu amu, danab ah ag kayak hambuppuak laippu laa onignu ii dabmemana; oh am daulag atikku. Da heppi, propet ouɗi nau dilag ehanittakppa uɗat hetteb, amunu laippu laa, amu ouɗi nau amu oolagppanu laippu laa ele Juda wanppa iinab daama.

Malakai 1:1

Nai meunab ele imu, am Israel dilagnu. Yawe Nug propet Malakai mette, nug ag mattom.

Matyu 11:24

Da ag amelagppa attem; epeɗiak haen Sodom am nob nau aokku, amge na Kaperneam, na am nob nau amu eɗittak aokkut,” awa aum.

Duteronomi 32:32

Israel dilag kekeɗ ag diɗilkad am Sodom appa daatte. Ao, ag diɗilkad amu Gomora dadppa daatte. Muɗi grep laala ag meu ninig nau ele otteb, amubia Israel dilag kekeɗ ag Israel dilagppa eheɗ hetteb. Ao, ag grep meu mua ele, nau daatte, ag amubia daan hetteb.

1 Timoti 4:2

Nai amuam hambuppuak danab ag kobol hambuppuak henana, nai hambuppuak amu yaaeg bette. Hambuppuak danab amu ag oolagppan oiyak ippunittaknu ulum am uɗat pehettak ii hette amunu, ag ahilag hipuninnu dab-ii-medatteb.

2 Pita 2:6

Amu Kayak Nug he, aab okkai aɗit, Sodom Gomora ele, aa iite padal mepiɗ? Yo, Nug he, aab naɗi ewatom. Kobol amu danab laa oh ag aab okkai aɗit nauhpiɗ, amu dilah haen dimppa daanna, Kayaknu nuhig haknu ele uuak danab oiglag amu, ag Sodom Gomora danab padal mak aoppig anam aakku ahilagppa uɗikku, ag amu anidna dabmekkulagnu heum.

Jut 1:7

Kobol amubia laa ele am ag Sodom, Gomora ele, amu aab laala taliliatak eleppa anidkkulag. Appan danab ag gappai henana, ag danab danab ele, o ah ah ele gappai ele heppig amunu, nob nau ahilagppa beum. Nob nau amuam aab ewatte, ag padal mena autna aoeg, hanhan daatte. Ag hak naunu nob nau awaknu antte oo maittaknu kobol daatteb.

Revelesen 11:8

Mauhpeɗ amu aa gaɗalah amu aab okkai okkainu ibppa niiglah. Piksa naippa laa ag aab amunu Sodom, Isip ele atteb. Aab amuppa danab ag Kayaknu laa aɗi heehe anttomnu mattiak danab aɗit dilah Naɗi ad emaitakppa atulppig.

Revelesen 19:20

Anam amge, laa ⌊hos hakkab attan dayom⌋ nug doɗ dakkuɗ aɗa, propet hambuppuak ele aɗom. Propet amu nug doɗ dakkuɗ ehanidkkunu epponak keeke kuɗum danab haknu elele iitta heum. Kobol amuppa nug danab oh, ag doɗ dakkuɗnu epponak keeke aoppig, ag ele doɗ dakkuɗ dottog noobppa dup nona binag meppig amu, nug ag hambuppualattom. Amunu doɗ dakkuɗ nug propet hambuppuak ele aa bau daaeheh, laa ⌊hos hakkab attan dayom ele,⌋ nug aa aɗalata, aab ameg kalu laa huana eotte onig salpa eotteppa buɗiate nopiɗ.

Revelesen 21:8

Amge laa ag baɗanna, akka ahilagnu dabmena hak kobol dim lamidna, laa ag oolagppa genab doyak iitta, laa ag kobol nau uɗig wak hetteb ele, laa ag danab aqaeg mauhtteb, laa ag gappai kobol hetteb, laa ag baɗ mak danab, laa ag dup noa kayak hambuppuak binag mak danab, amu nai hambuppuak danab oh ele, amu oh aab ameg kalu laa huana eotte onig salpa eotteppa, ag amuppa aben aoglag. Amuam mauhak ebqak 2 aakku,” awa aum.

Revelesen 22:15

Amge baɗ mak danab, gappai danab, qe mauhak danab, kayak hambuppuak binag mak danab ele, amu laa oh ag hambuppuak kobol oolag mettan hetteb ele, ag Kayaknu aab okkai dimittim qai bia daaglag.