Jeremaia 23:12 - Nobonob Baibel

¹² Amu Yawe Nug imu ele atte. “Propet, mana mettak danab ele ag amu hetteb amunu, da heppi, ag danab ib aiɗikkakppa oitte bia daaglag. Da heppi, ag gatatu ooppa oinna, nena qekkulag. Aɗinu anam bekku? Ahilag bu awak haenppa amu, da heppi, uug naunab ahilagppa bekku,” awa atte.

Jeremaia 23:12 ပူးပေါင်းရင်းမြစ်များ

Job 18:18

Laa ag lamitteg, nug aben gatatu ele, aben amahlak iittappa wana daatte; nug wanppa baula ii daatte.

Sam 35:6

Ge, laa ag da eheɗ heiɗkkulagnu hetteb ele, ag ippulag am gatatu nau, aiɗikkak ele dayebeb, nahip engel laa, O Yawe, ag lamadkkunu na unuqidttem.

Sam 73:18

Am genab, na ag aben eheɗppa maadttem. Na heppe, ag nena qena, ag eɗun ii ahamna.

Sam 82:5

⌊Epeɗiak danab nau dilagnu amu, Kayak Nug atte⌋. “Ag am keeke laa iinab dootteb. Ag keeke laanu diignu doyak tutukku laa iitta. Ag eheɗ hetteb amunu, wanppan ɗo, wanppan uug mawaknu ukku ele ɠagattag dayaknu elele iitta, keeke oh uɗaltte.

Eksodas 32:34

Amu na gona, na danab ah diin, aben da na amenppa ami amu, na amuppa gokkut! Doye! Engel dahil nug geha ibppa ag noolag awa, anuqa omaladkku, amge dimppa bu mattak haen tutukkuppa beeb amu, da geha uɗie, da danab ah ag hipunin heppig ele am bu madakkul,” awa aum.

Prowerb 4:19

Anam, amge nau hak danab dilag ib amu gatatu naunab bia; aɗi keeke he, ag nena qetteb amu, ag ii dootteb.

Aisaia 8:22

ag ele neegppeg, honap wanppa gokku, amge geha ag keeke ena laa ii anidmana. Iitta! Geha ag uug nau, uug amunu haen nau ele anidnana, amuib ag aben ohppa gatatu ele anidkkulag. Uug nau amuib aben oh gatatu ele tona dayebeb anidna, baɗaglag. Geha ag uug amu, haen nau amu ele uun, oolna laih gokkulagnu am, ahilagnu ib laa iitta; ⌊laa nug⌋ heeb, ag gatatu nauppaib wana daaglag.

Jeremaia 11:23

Da heppi, bu awak haen ahilagppa uug naunab Anatot danab dilagppa nekku amunu, ag padal mena, danab kobol nau amu hetteb oolagppa laippu laa ii daama, buɗulkad ele laippu laa iinab daama,’ awe attem.” Yawe Nug anam awa atte.

Jeremaia 13:16

Ag Yawe, ahilag Kayak, danab ah oh ag Nug binag amahlak oppiaawak ele mekkulagnu daatteb amu, ag Nug binag amu meig! Nug heeb, uug naunab bekkun daatte, amu haen imuppa, haen gamag imu, uug amu ii beum, haen imuppa ag anam heig! Ao, ag danab qaukoppa oiyaya, aam aam eeɗe, gatatu neene, na qette, ag amubia nena qemananu, ag uug amu ii beum haen gamag imuppa ag Kayak binag anam meig! Ag haen ena, amahlak bia, ag amu anidkkulagnu dabmetteb, amge Yawe Nug heeb, haen amu eɗua, haen nau, gatatu bia daamanu, ag uug amu ii beum haen gamag imuppa ag Nug binag meig!

Jeremaia 48:44

Ge, Yawe atte. “Da Moap danab ah ahilag bu awak haenppa bu madakkul amunu, aun nug baɗak eheɗ nau anidmanu ooltte amu, nug wan moɗppa na qekku. Laa nug moɗppa na qa, eɗua dimittim doa, nug eɗua, pelemppa tekku.” Yawe Nug atte.

Jeremaia 50:27

Babilon dilag daup enanag, ag makau gaiɗ bia daatteb, amge ag kekeɗ ag Babilon dilag daup amu oh aqappeg mauheg! Ag Babilon, ag ahilagnu gadonnab gadon. Aɗinu? Ahilag bu awak haen aakku uɗiom daatte,” awa atte.

Jeremaia 8:12

Ag naunab nau hetteb amunu, ag uɗalag nettete? Iitta! Ag uɗa nak nakoknab laa ii dootteb. Ag uɗa nak kobol hetteb, amge ag amelag kokoɗ iinab ebatte. Ag anam hetteb amunu, ib laa ii daatte. Ag laa qep elabppa mauhtteb bia, ag ele mauhkkulag. Ahilag bu awak haenppa, ag nena qekkulag.’ ” Yawe Nug anam awa atte.

Gayak Nai 2:20

O Yawe, na imu anidna dabmekkutnu oɗ medattem; na Juda danab ah uug naunab mattame amu, na laa dilagppa anambia hemete? Ah ag ahilkad nid, ag nid amu atognoattegeg, ena metteb ele amu, ag ag battiadna latteb am kobol tutukkute? Ge, kekeɗ ag mana mettak danab, propet ele Naɗinu mettid lakka aqaeg mauhtteb am enate?

Maika 7:4

Danab amu oolagppanu laa, nug laa oh naunab hetteb bia ii hette, nug nakok ena hette; nug anam daatte, amge nug ele am nau, uud keeke qaun ele bia. Ao, danab amu oolagppanu laa nug danab nakok ena bia daatte, amge nug ele am nau, aɗ keeke qaun ele eppak, amubia daatte. Amu ahilag bu awaknu deɗ, ahilag gumak danab tutukku, ag appig bia, deɗ amu aakku paha uɗitte. Ao, deɗ Kayak Nug ag bu madakku amu, deɗ amu aakku uɗiom daatte. Gemu am ahilag kaaka aqeb oiyak haen.

Jon 12:35

Anam aeg am Jesus Nug aum. “Ag haen nakoknab laa ele amahlak ele daaglag. Haen imuppa ag amahlak ele amunu, gatatu ag tonadmanu ag amahlak ele oiyeg! Laa nug gatatuppa oitte amu nuhig ib ii anidtte.

Duteronomi 32:35

Eheɗ haknu nob tutukku eɗua mettak uɗat am dahil. Ao, da geha aun aɗi ag eheɗ hetteb amu, da nob nau madakkul. Ag hanebppa nena qekkulag. Ahilag haen nau geha paha uɗikku. Ag geha hetteb amu, hak amunu ag bu paha aoglag,” awa atte.

1 Jon 2:11

Am aun laa nug layagnu nau ninig ele dootte amu, nug gatatuppa daatte, gatatuppa ele oitte; nug adeppa gotte amu, nug ii dootte. Gatatu nug ameg qehakkom.

Jut 1:13

Ag am yu duban qa uɗia koɗkoɗ qa ukka, hipaɗ aha hakkab daatte bia daatteb. Yuppan hipaɗ ahak miag atiak daatte, amubia ahilag uɗa nak kobol miag atiak daatte. Ag hoɗoppai habppa daanna, mauhnoak oitteb bia amunu, Kayak Nug aben gatatu teppu naunab babaittom daatte, geha ag amuppa hanhan daaglag.