Jeremaia 23:11 - Nobonob Baibel

¹¹ Amu Yawe Nug atte. “Propet danab, mana mettak danab ele ag dahilnu, dahil haknu ele uuak dootteb. Dahil mettid lag, amuppanab da ahilag nau hak ag hetteb anidttem,” awa atte.

Jeremaia 23:11 ပူးပေါင်းရင်းမြစ်များ

2 Stori 33:5

Amu Yawenu mettid lag, lag amuppa haɗap aɗit ohppa Manase nug aam, kalam, hoɗoppai ele binalag maknu qaɗab aqom.

2 Stori 33:7

Manase nug kayak laa dabmekkulagnu dottog nug hoiyom ele, nug amu awa, nug Kayaknu mettid lag ooppa meum. Amge Kayak Nug anukka Dawit, nug bekka Solomon ele lag amunu aa amelahppa inam aum. “Israel dilag huu okkai ohppanu wanelkadppanu amu, da mettid lag imu, Jerusalem ele, da imuppa da onil hanhan iguppa daakkunu, tituanatmi.

2 Stori 36:14

Sedekaia nug anam heum, amge amuib iitta. Iitta. Mana mettak danab anuqak oh, Juda danab ah ele ag Yawe ippuanattomnu oo metta ii uuak kobol ii dim lamidna, ag amu hena, tuɗid tuɗid, ag amu okkai heppig. Ag danab ag Yawe ii dootteb ele kobol nau, Yawe Nug kobol amunu ooppa uuaknab dootte amu, ag kobol amu hetteb ele, amu Juda danab ah, mana mettak danab anuqak ele ag kobol amu dim lamidnana, ag Yawenu mettid lag, Jerusalem appa, Yawe Nug he, nuhignu tituana mettak dayom amu, ag lag amu heeg, dubuttid ta dayom.

Esra 10:18

Amu mana mettak danab ag laihnu ah diippig ele, ag appeg, ah amu gokkulagnu, “Yo,” ana, ag eheɗ heppig, ag beɗulagppa aab ele amunu, ag eheɗ haknu ofa hekkulagnu ag anen anen sipsip dawai ele aon uɗin main, Kayak medappig ele, ag onilag am iikku. Josadak bekka Jesua, nug awakkud, amakkud ele buɗulkadppanu am Masea, Elieser, Jarib, Gedalaia ele.

Jeremaia 11:15

Yawe Nug da amelppa anam awowa, Nug da Juda danab ah amelagppa inam akkulnu aum. “Da ag tituanadmi, amge ag dahil mettid lagppa doɗ main, meɗaglagnu daanna, ag kuɗum qagmena, eheɗ hekkulagnu lokkumakppa dabmenana maittak eheɗ aotteb. Aɗinu ag da laulppa anam henan daatteb? Ag doɗ dahilnu tituana meɗak daatteb, ag amu main meɗanna, amuppa ag eheɗ hettebnu bu ib amuppa eɗidkkulagnu elelete? Iitta! Ag ib amuppa bu ii aolob, ag oolag gamag ahalo, amge iitta,” awa aum.

Jeremaia 23:15

Propet Jerusalem daatteb, ag amu hetteb amunu, Yawe Nukka Ɠagattag Oh Ele, nug propet amu dilag inam atte. “Da heppi, ag danab uud ad tiig mua ele lana, ena ii dootte, ag amubia dooglag. Ao, da heppi, ag danab uud tiig mua nau ele lana eheɗ aotte, amubia ag bu dahil eheɗ aoglag. Aɗinu da amu hekkul? Propet Jerusalem daatteb ag heeg, kobol nau, amuam dahilnu, dahil haknu ele uuak kobol, kobol amuam Juda wan oh tonappig daatte,” awa atte.

Jeremaia 32:34

Ag kayak hambuppuak dottolkad, da keeke amunu oolppa uuaknab doottem, ag dottolkad amu lag da onilppa daatte, ag lag amuppa qappalatteg, lag dahil aakku dahil neekkakppa dubuttid tak ele dayom.

Jeremaia 5:31

Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.

Jeremaia 50:6

Yawe atte. “Dahilad danab ah ag sipsip qettoɗna oitteb bia daappig. Ahilkad gumak danab ag diiadna, eheɗ goppig. Ag heeg, dahilad danab ah ag sipsip qaukoppa matatun gona oitteb, ag amubia daappig. Ag sipsip qaukoppa oinna, ahilag niiaknu aben enanagnu daulag atitte, amubia dahilad danab ah ag eheɗ daanna oippig.

Jeremaia 6:13

Amu Yawe Nug atte. “Juda danab ah oh, danab onig iitta, danab onig okkai ele, ag oh baubau awaknu hik aqeeqe oitteb. Propet danab, mana mettak danab ele ag hambuppuak kobol dim lamidtteb.

Jeremaia 7:30

Yawe Nug atte. “Aɗinu ⌊da Juda geɗadmi⌋? Juda danab ah ag dahil neekkakppa eheɗ henan daatteb. Ag ahilkad kayak hambuppuak akkan, da laul, da onil aguppa daatte amu, ag da laul amuppa qappaladppig. Dottolkad amunu da oolppa uuaknab doyeye, ag da laulppa qappalatteg, dahil neekkakppa da laul aakku dubuttid tak ele daatte.

Jeremaia 8:10

Ag dahil nai geɗidna, ii dim lamidtteb amunu, da heppi, kekeɗ ag uɗin eɗadna, danab laa ag ahilag wan, ah ele diippeg, ahilkad daaglag. Aɗinu da anam hekkul? Juda danab ah oh, danab onig iitta, danab onig okkai ele, ag oh baubau awaknu hik aqeeqe oitteb. Ao, propet danab, mana mettak danab ele ag hambuppuak kobol dim lamidtteb.

Gayak Nai 2:20

O Yawe, na imu anidna dabmekkutnu oɗ medattem; na Juda danab ah uug naunab mattame amu, na laa dilagppa anambia hemete? Ah ag ahilkad nid, ag nid amu atognoattegeg, ena metteb ele amu, ag ag battiadna latteb am kobol tutukkute? Ge, kekeɗ ag mana mettak danab, propet ele Naɗinu mettid lakka aqaeg mauhtteb am enate?

Esekiel 23:39

Deɗ aa nid ahilah manai, kayak hambuppuak dottolkad madattapiɗ, deɗ amuppanab aa mettid lag dahilppa teya, da binal mekkulahnu heyaya, amuppa aa heeh, da laul am dahil neekkakppa dubuttid teum daatte. Aa da laulppa anam hepiɗ.

Esekiel 44:10

Haen Israel danab ag ib apiɗidna, uuiɗna matatun oiyegeg, Lewi buɗub laa ag ele uuiɗna, umanab gona, kayak hambuppuak noolagppa dup nona binalag meppig ele, Lewi buɗub amu ag hipunin heppignu bu aoglagnu daatteb amunu, ag bu amu aoglag. Ii qe-eɗidmana.

Esekiel 7:20

Israel danab ah ag ahilag bala enanag dabmena, dada henana, ag heeg, laa ag kayak hambuppuak dottolkad, da dottolkad amunu oolppa uuaknab doottem, keeke amuam uɗig wak ele, laa ag dottolkad amu bala amuppa hadappig. Ag amu heppig amunu, da heppi, bala ⌊gemu ahilagppa daatte,⌋ bala amuam keeke hamu, dubuttid ele daakku.

Esekiel 8:11

Keeke nau dottolkad anam daaeg, Israel dilag ikki danab 70 ag appa hippaidna, keeke nau dottolkad noolagppa daappig. Sapan bekka Jasania nug ag oolagppa ele dayom. Am danab 70 amu ag anam daanna, ag anen anen kalu danab ile muttuɗig enanag bette ele manaknu tappiɗ eppelagppa aɗan, kayak hambuppuak digdig binag mekkulagnu kalu danab ile muttuɗig enanag bette ele amoteg ewewe, muttuɗig enanag aakku teum.

Esekiel 8:16

Kayak Nug anam awowa, Nug omaiɗa, Yawe laugnu mana mettak danab dilag haɗap ooppa meiɗe, da neekki ukke, appa Yawenu mettid lag odppa, Oo Gun Eleppa ukkaknu oo veranda bia, qaɗab ele gamalahppa da danab 25 anam daaegeg anadmi. Ag Yawenu mettid lag dimettan, ag aam bedeppa neegnana, aam noobppa dup nona binag meppig.

Sepanaia 3:3

Israel dilag ehanittak anuqak danab amu, ag danab ah dilagnu laion doɗ laa qa lakkunu oiyaya gaatte, amubia ag danab ah dilagppa hetteb. Ao, Israel ag ahilkad okkai danab ag doɗ wulp, ag tueb meeb, ag doɗ laa anidna, qena lalobnu oitteb bia hetteb. Doɗ laion, o doɗ wulp ag aɗi doɗ laa tueb qena lae neppig, butti buttua huppu nakok laa ii daatte, amubia hetteb.

Sepanaia 3:4

Propet danab Jerusalem daatteb ele ag am beɗuppa tak danab daatteb. Ao, ag hambuppuak kobolppa keeke ag oolag hette ele, ag amu aotteb. Mana mettak danab Jerusalemnu ag kobol eheɗ heegeg, Kayaknu mettid lag, nuhig neekkakppa am dubuttid teum daatte. Ge, ag hambuppunna, Kayaknu ɗo inam inam ippunigtte atteb, amge Kayaknu ɗo anam ii ippunigtte.