Jeremaia 22:22 - Nobonob Baibel

²² ⌊Ahilag eheɗ hak am anam amunu,⌋ ulah keeke uug iitta iwale gotte, amubia kekeɗ ag ahilkad danab okkai heppeg laih gokkulag. Ao, kekeɗ ag heppeg, ahilkad ehanittak laa ag diia ukka laih me dayak danab ah daaglag. Amu oh beeb, ag uɗa nak nau guittak ele dooglag. Amu oh ahilagppa bekkunu diig am, nau hak ahilag aakku.

Jeremaia 22:22 ပူးပေါင်းရင်းမြစ်များ

Aisaia 64:6

Ig oh am oonigppa dubuttid ele na noomppa bemut daattem Keeke oh ig hetata, ihinig dabmakppa, ig kobol amunu am genab tutukku hak kobol doottem ele, keeke amu oh am lamen qatti dubuttid naunab ele bia na amenppa anidttem. Ig am ad uɗug mauɗna qaɗaiedatteb bia hettem. Ao, ulah ad uɗug bunaɗak iwale gotte, amubia hipunin ihinig he, ig iitta mettem.

Aisaia 65:13

Ag nau amu hetteb amunu, Naɗi Yawe Nug inam atte. “Dahilad danab ah, ag am dahilad maɗi nid maɗi ah ele amu, ag ee lakkulag, amge ag nau hetteb ele, ag enug aqakku. Dahilad danab ah ag le oug lakkulag, amge ag nau hetteb ele, ag le baalag diikku. Dahilad danab ah ag oolag gamag ahakku, amge ag nau hetteb ele, ag uɗalag nekku.

Jeremaia 10:21

⌊Jerusalem danab ah ag oɗelag oohob, anam akkulag amunu, da, Jeremaia, da inam ami.⌋ “Aɗinu laa anam ii daama? Sipsip gumak danab nug dabmak pehettak ii aotte, sipsip mauhnoak gumadtte, sipsip ag matatun gona oitteb, amubia Juda dilag gumak danab ag dabmak iitta. Ag Yawe Nug ulum nai madakkunu oɗ ii medatteb amunu, ag ena ii heegeg, Juda danab ah ag eheɗ daatteb.

Jeremaia 12:10

Danab okkai kuɗum ag uɗin, grep dad dahil tappan heppeg, dad amu nauhkku. Ao, ag uɗin, dad okkai dahil heppeg nauhkku. Ag wan ena dahil heppeg, am eɗua, hele-ettak, wan meu waknu nakokib elele, am anam daakku.

Jeremaia 2:36

Ag dabmak digdig dim lamidnana, kobol kaboliak kuɗum hetteb. Tatam ag Asiria ehanadkkulagnu dabmeppig; iitta anidna, ag ahan, Isip ehanadkkulagnu goppig. Amge ag ele ii ehanadmana.

Jeremaia 2:37

Da laa ag Israel, ag ahilagnu ehanittak aoglagnu oolagppa genab dootteb, da laa amu geɗadmi; ag Israel, ag ahilagppa ehanittak ii aomna amunu, ag Isip dilagppa ele oo uugnab, uɗa nak ele doon, ahan Isip uuglag.” Yawe Nug anam atte.

Jeremaia 2:8

Mana mettak danab ag da Yawe, ag dahilnu ii dabmeppig. Ao, danab ag danab ah laa dahil ɗo ippunadtteb ele, ag da ii dooiɗppig. Ikki danab ag da dimeɗan, dahil nai tappaeg neum. Propet danab ag Bal dabmenan, nug onigppa ahilag nai mehuqppig. Ag Bal, kayak hambuppuak laa ele, amu dottolkad dabmenana, dim lamadppig.

Jeremaia 20:11

Ag anam atteb, amge Yawe Nug da gukkuiɗak daatte. Nug ban danab ɠagattagnab laa bia daatte. Nug amubia daatte amunu, danab ah ag da heiɗppeg nauhkkulnu hetteb, ag geha nena qeppeg, ahilag dabmak am iitta mekku. Geha ag aɗi keeke hekkulagnu dabmetteb amu, ag ii hemana amunu, geha ag uɗa nak nau guittak ele dooglag. Geha danab ah ag uɗa nak ahilagnu iinab daulag atima.

Jeremaia 30:14

Wan atu laalappan danab ag ehanadkkulagnu appig amu, danab amu ag ag Juda, ag ahilagnu ag daulag aakku atia malom. Ahilagnu ag, ‘Ag keeke hamu,’ doon oitteb. Ag Jakop buɗub, ag beɗulagppa aab nau ele. Ao, ahilag hipunin am huanak. Am anam amunu, da Yawe, da kekeɗ makkuɗadlo bia da ag makkuɗadmi. Ao, danab nug laa guittak medakkunu ooppa uug ii dootte amu, da amubia ag bu mattami.

Jeremaia 4:30

Haen amu bekku amu, Yawe Nug Juda danab ah amelagppa inam akku. “O Juda danab ah, kekeɗ ag uɗin, ag eheɗ hattana daatteb amunu, ag eheɗ amu aoppig ele, ag aakku aɗi hetteb? Am imu bia. Ib baag ah laa, danab laa ag nuhignu ena doon, nuhig hak attenppa ag eɗun, nuhignu eheɗ doon, ag baula eɗun nuhignu ena dooglagnu nug lamen kokoɗnab tagakka, bala ena ena ele ma, nug amegppa bala, kala ena ele mette. Ib baag ah nug danab amu ag eɗun, nuhignu ena dooglagnu anam hette, amge danab ag nuhignu oolag huana nauhtte amunu, ag nuhig hak amu ohnu ii dabmemana, amubia ag Juda ag ahilag kekeɗ ag eɗun, ahilagnu ena iinab doon, ahilag kekeɗ daanna, aqappeg mauhkkulagnu hetteb,” awa akku.

Jeremaia 5:13

Propet danab ag ulah hamu bia daatteb. Yawenu nai ahilagppa ii daatte amunu, ag uug bekkunu atteb amu, uug amu ahilagppa baɗ!” Juda danab ah ag anam aon atteb.

Jeremaia 7:19

Ag amu hetteb, amge diigppanab ag heeg, da eheɗ aottemte? Iitta. Ag akka ag ahilag eheɗ hak henana, ag eheɗ aonna, ag akka ag uɗa nak madatteb,” Yawe Nug anam awa atte.

Hosea 12:1

Israel danab ah ag am danab laa nug ulah lanan daakkunu hette bia hetteb. Ao, ag am danab laa nug kaɗag ulah deɗ ohppa dim lamittattaib hette bia hetteb. Ag hambuppuak kuɗumnab mattinna; ag danab ah guittak nau mauhnoak madatteb. Ag nug tituana nai qakkak Asiria danab ah ele heeg; ag ⌊Isip ahilagnu, “Ig lainig,” dooglagnu, ag amu daden nob daakkunu⌋ olip goɗen meeg, Isip gotte.

Hosea 13:15

Epraim danab ah ag am Israel danab ah laa oh oolagppa enatai daaglag, ⌊amge diig amunu da geha ag bu madakkulnu ii uupa⌋. Amuam geha da heppi, kekeɗ ag kaɗag ulah atu taɗakppan, keeke kuɗum he nauhtte ele uɗitte, ag amubia uɗiglag. Le qeppuɗia bette am iitta mekku. Le moɗ ele qaɗaiedakku. Amu geha kekeɗ ag uɗin, ag ag Israel, ahilkad en aɗadna, akkan gokkulag.

Hosea 4:19

Am ag anam hetteb amunu, ag geha kilibob ɠagattag keeke diia, laih gotte, amubia ag nauhkkulag. Ao, ag kayak hambuppuak dottolkad dilagnu mana mettak hetteb amunu, ag uɗa nak aoglag.” Yawe Nug anam atte.

Sekaraia 11:17

O gadonnab gadon! Danab okkai amu, nug sipsip pehettak ii gumadtte, nug genab bu okkai aokku. Qep elab nug eppeg okkuleb, nug ameg naɗiap ele yaakku. Ao, nug eppeg am aakku nauhak dayebeb, nug ameg naɗiap ele gaɗuak daakku.” Yawe Nug anam awa atte.

Sekaraia 11:8

Da anam dayeye, kalam laippuppa da sipsip gumak danab nau ewam lamadmi. Da anam heiyi ukkom, amge sipsip amu, ⌊ag am Israel danab ah,⌋ ag dahilnu ag oolagppa uuaknab dooppig amunu, da ahilagnu bahil yom.