eppeg qaɗaiedappeg, ah ag uɗin, qiin aon gona, aab ilaglag. Aɗinu ⌊uug amu Israel dilagppa bekku⌋? Israel danab ah ag diignu doyak tutukku am iitta ele. ⌊Ag Yawe uun oitteb.⌋ Anam amunu, laa Nug ag hattom ele, Nug ahilagnu oo ii mattama. Ao, laa Nug ag daaglagnu hattom amu, Nug ahilagnu ena ii doya, keeke ena ii mattama. Iitta.
Jeremaia 21:7 - Nobonob Baibel7 Yawe Nug anam atte, amge Nug Sedekaianu imu ele atte. ‘Da amu hewoya, da Juda dilag king Sedekaia, nuhikkud ehanittak anuqak danab, amu Juda danab ah ele aab okkai ooppa daan, oɗe nau danab kuɗum aqe mauhttebppa, qep elabppa, enugppa ele ii mauhkkulag amu, da amu oh diie, Babilon dilag king Nebukatnesar, nuhikkud daup ag aqappeg mauhkkulagnu hetteb ele amu, da amu eppelagppa maadkkul. Da amu heppi, Babilon dilag king nug ahilagnu oo gai-iitta doya oo matta ehanittak kobol nakok laa iinab ii hema. Iitta. Nug qep elabppa kuɗum aqadkku,’ awa atte. အခန်းကိုကြည့်ပါ။ |
Jeremaia 21:7
37 ပူးပေါင်းရင်းမြစ်များ
Da dahilad danab ah, ag hipunin heppig amunu, da ahilagnu ool nauhe, da hei, Babilon ag wana, ahilag wan aon, ahilag daakkunu aɗappig. Da hei, Israel danab ah ag, ag Babilon eppelagppa daappig, amge ag Babilon ag Israel dilagnu oo gai-iitta doya oo metta ehanittak laa iinab heppig. Iitta. Ag nid bau dilag eheɗ hadappig, amge amuib iitta. Iitta. Ag ele ahilag eheɗ hak tuɗidna, wagai mena, ag Israel danab ah kaino dilag eheɗ hattanna, uɗat nau, uug ele ag madappig.
Danab ag le ɠagattag huan laeg, kaaka aqe oinna, nug qak henana, guittak aotteb, amubia da heppi, ag oh bu aon, guittak aoglag. Mameg guittak aokku, bekka ele anamib. Da ahilagnu ool gai-iitta doyen, ool matten, iinab ehanadpa. Da ag nauhmananu ehanadppi, guittak ii aomnanu iinab hepa.” ’ ” Yawe Nug anam awa atte.
Danab ah imu ag ee ohnu kud mena daaglagtai, amge diig amunuib da ahilag unuqittak ii doopa. Ag manaknu ofa, amu ee aegnu ofa ele hekkulagtai, amge diig amunuib da ahilagnu ena ii doopa. Iitta. Da heppi, ag banppa, enugppa, amu oɗe nau danab kuɗum aqe mauhtteb eleppa ele mauhadna, padal mekkulag,” awa aum.
Kekeɗ ag ah laa bekkod nid danab eblaih aɗit ele aqappeg mauhppeg, anilag nug gai-iitta ma, hik aokkunu elele iitta daakku. Tatam nug bekkod ele amunu, nug ehanittak, binag ele, amge kekeɗ heppeg, amu oh iitta mekku. Nug uɗa nak nau guittak ele doya, laa noolagppa nau daakku. Da heppi, Juda danab ah laa ag ban haenppanab ii mauhkkulag amu, ban dimppa kekeɗ ag ag aqadppeg mauhkkulag.” Yawe Nug anam awa atte.
Juda danab, laa Jerusalemnu, laa Juda wanppa laih laihnu amu, ag aɗi aɗi hekkulagnu, ag attem attem daaglagnu maittak aotteb amu, aben imuppa da heppi, maittak amu iitta mekku. Juda dilag kekeɗ, ag Juda danab aqaglagnu hetteb ele amu, da heppi, ag ag qep elabppa aqappeg mauhkkulag. Da heppi, ag aqappeg mauhppeg, ai hab waappa hagagaɗna oitteb, doɗ wanppa oitteb ele amu, ag gaɗalag lakkulag.
Aɗinu na onin anam daakku? Yawe Nug amunu inam atte. ‘Da heppi, na eheɗ nau baɗanna oippe, na laipad ele ag eheɗ nau baɗan oiglag. Na amenppanab na laipad ag kekeɗ dilag qep elabppa mauhppeppeg anidkkut. Da Juda danab ah oh Babilon dilag king eppegppa maadppi, nug ag diia, Babilon gokku, o iitta nug qep elabppa aqeb mauhkkulag.
Nug aokku amu, Juda dilag king Sedekaia nug ele genabnab genab Babilon dilag daup eppelagppa daakku. Nug uug amu ii eɗidma. Iitta. Babilon dilag daup ag nug aɗan, ag aon gona, Babilon dilag king eppegppa meppeg, nug Babilon dilag king amegppanab antta, noobppa dayebeb, Babilon dilag king aɗi aɗi oɗ mettebeb, nai madikku.
Na genabnab genab king amu eppegppa daakkut. Na uug amu ii eɗidmana. Iitta. Babilon dilag kingnu daup ag na aɗaidna, aidna gona, nug eppegppa meidkkulag. Na Babilon dilag king amenppanab anidna, nug noobppa daappe, nug aɗi aɗi oɗ medakku amu, na nai amunu nob nug medakkut. Amu na Babilon gokkut,” ’ ” awe attem.
Na nai amu oh buk itoɗiak ele laappa yona, na Juda dilag king Jehoiakim amegppa inam appe doyaɗ! ‘Yawe Nug inam atte. “Na buk itoɗiak ele laa amu manae ewe, na ame. ‘Jeremaia, aɗinu na Babilon dilag king nug genab uɗia, wan imuppa ban ha heeb, wan nauhakib dayebeb, ippa danab, doɗ ele ii daamna buk amuppa yaame?’ aon ame.” ’ ” Jeremaia nug nai amu doyom.
Jeremaia appa haen elab daye, dimppa King Sedekaia nug laa me, nug ukka, Jeremaia omala, Sedekaia dayomppa ukkom. Aria, Jeremaia nug Sedekaia toppa daye, Sedekaia nug laa ii daaegeg, aya daayya, nug oɗ mettom. “Yawe Nug nai laa a doomete,” awa oɗ mettom. Oɗ mette amu Jeremaia nug aum. “Ao, Yawenu nai laa daatte. Yawe Nug heeb, na Babilon dilag king eppegppa daakkut,” awa aum.
Israel am sipsip ag oolna, matatun gona daatteb bia daatteb. Laion nug sipsip lamatte gona, tamtam daatteb, Israel ag amubia daatteb. Tatam Asiria dilag king nug uɗia, doɗ layag qe mauhe latte bia heeg, Israel nauhom. Dimnab amu, Babilon dilag king Nebukatnesar nug uɗia, nug Juda danab ah he nauhna autna aoppig,” awa atte.
O Yawe, na imu anidna dabmekkutnu oɗ medattem; na Juda danab ah uug naunab mattame amu, na laa dilagppa anambia hemete? Ah ag ahilkad nid, ag nid amu atognoattegeg, ena metteb ele amu, ag ag battiadna latteb am kobol tutukkute? Ge, kekeɗ ag mana mettak danab, propet ele Naɗinu mettid lakka aqaeg mauhtteb am enate?
O Yawe, anukka na danab ah ag uɗin, hobul dayaknu haen na epeɗiadna maadme laa anidkkulagnu onilagppa eme; amubia na baɗak eheɗ nau taliligna daaglagnu onilagppa eme. Yawenu oo nauhe, bu mettaknu deɗppa laa nug hamu ii oolom. Laa nug bau ii dayom. Ao, laa ig ag atognoadmut ele amu, kekeɗ ag oh aqaeg mauhadppig.
ကြော်ငြာတွေ