Jeremaia 20:8 - Nobonob Baibel

⁸ Aɗinu? Haen da nai attem amu, da nai qale, danab ag laa guittak nau mauhnoak madatteb, amu danab ag laa dilag keeke heeg nauhtteb, da amu dilagnu ai, nai amu ag yaaladtte. Yawe na da nai akkulnu, na amu ippuniɗme amunu, nahipnu nai, nai amu he, danab ah ag hanhan awa awa qettak nai naunab dahilnu anana, da nai madittemnu ele ag dahilnu nau dootteb,” awa aum.

Jeremaia 20:8 ပူးပေါင်းရင်းမြစ်များ

2 King 2:23

Dimppa Elisa nug Jerikonu aha, Betel gokkunu ukkom. Ugekke, nid aabppanu nakok kuɗum ag dona, aab dimittim uɗin, ag Elisa anidna, awa awa qettak nai inam appig. “Eee bikkan ele na, na tena ukke, na tena ukke, na bikkan ele, na ippa aib daame,” anam appig.

2 Stori 36:16

Anam maatte goppig, amge Juda danab ag Kayaknu nai awa ukkak danab nai aon goppig ele, ag nai amunu ena iinab doon, ag Yawenu danab amu aon aon aqanna, ag Yawenu propet ele aon aon aqaegeg, Yawe Nug amunu oppoɗi bak doya, bu madakkunu dabmak awe, laa heeb bu ii aomnanu ib laa ii dayom.

Aisaia 57:4

Ag danab eheɗ hetteb ele, ag ⌊danab Kayak dim lamidtteb⌋ anadna, ag aon aon aqadtteb. Ag ⌊danab Kayak dim lamidtteb⌋ anadna, ag ahilagnu nai nau atteb. Ag danab eheɗ hetteb ele, ag ⌊danab Kayak dim lamidtteb⌋ anadna, ag kalemlem aqadtteb. Ag Yawe waappa daaglagnu uun, nuhig nai tappaeg nette. Ag hambuppuak danab buɗulkad.

Jeremaia 15:10

O anai, na da ii menuiɗlom am ena. Wan imu ohppan danab ah ag dahilnu ena ii doon, ag dahilnu nai hetteb. Da aɗi keeke, ag amu anidna, dahilnu eheɗ dooglag, da amu laa ii hemi, amge danab ah oh ag da eheɗ laa awaknu anak waappa daakkulnu atteb.

Jeremaia 15:15

Yawe Nug anam a, da ami. “O Yawe, laa ag guittak meɗatteb na doottem amunu, na dahilnu dabmena, atognoiɗkkutnu oɗ medattem. Ao, na heppe, laa guittak meɗatteb, ag nob nau aoglagnu unuqidttem. O Yawe, laa guittak meɗatteb amu, ag amu hebeppeg, na oo maɗoɗ ele dayak kobol dim lamidppeppe ukkeb, ag da iuppeg mauhpanu oɗ medattem. Na da nahipnu anuqak doyen oiiyi, laa guittak meɗatteb amu, na amu dabmekkutnu oɗ medattem.

Jeremaia 17:27

Ag da oɗel dim lamidkkulag dayeb amu, anam daakku, amge ag oɗel ii dim lamidkkulag dayeb, ag Sabat deɗ am dahilnu tituanak daakkunu ii dabmekkulag dayeb, ag Sabat deɗppa keeke maon uɗin, Jerusalem aab aɗnu od laalappa uɗin, aab ooppa gokkulag dayeb, da heppi, aab ewak, laa qauhkkunu elele iitta aɗnu odppa digma ewawa, appanu ewebeb ukkeb, aab oh, nuhig aab aɗ ɠagattagnab ele oh eokku.” ’ ” Yawe Nug anam awa atte.

Jeremaia 20:7

⌊Jeremaia nug Yawe amegppa aum.⌋ “O Yawe, da nahip uɗat hekkulnu ɠagattag ame, amu da aakku hemi, gemu ele hettem. Ao, na da nahip uɗat hekkulnu wagai meme, amu da aakku nahip uɗat hemi, gemu ele hettem. Amu gemu danab ag dahilnu hanhan ihaklel doon, imiɗtteb. Ao, danab ah oh ag da aon aon iutteb.

Jeremaia 28:8

Anukkanunab haen uɗiak, aria na anin, amu da anil ele ii menuitpiɗ, haen amu ohppa ele propet ag dimppa aɗi bekkunu nai madippig. Ag geha ban daakku, haen naunab daakku, amu oɗe nau danab kuɗum aqe mauhtteb, ag keeke ewam amu oh wan atu kuɗumppa bekkulagnu, amu ɗo maɗoɗ ɠagattag, amuppa ele bekkulagnu madippig.

Jeremaia 5:1

Amu Yawe Nug aum. “Ag Jerusalem ooppa ib ohppa oinna, aab amunu qagmak abenppa ele oinna, tutukku neekkeg! Ag anam hena, ag ⌊danab ah aab okkai amuppa wan imunu hakib henan daatteb, ag oolagppanu⌋ danab, o ah laippu laa nug genabib hak kobol hette, nug doyak diig genabib anidkkunu mattiak hette ele, na amu laippu laa anidkkut dayeb amu, da aab okkai amu heppi ii nauhma.

Jeremaia 5:6

Danab ah imu oh ag anam hetteb. Ag Yawe oɗe huana tappaeg nette. Ao, ag haen kuɗum tuɗidna, Yawe dimettona kayak hambuppuak laala dim lamadtteb. Anam amunu, kekeɗ ag laion laa atuppanu uɗia, doɗ, o danab qe mauhtte bia heppeg nauhkkulag. Doɗ wulp, nug atu taɗak appanu uɗia, doɗ, o danab qe mauhtte bia kekeɗ ag heppeg, danab ah imu ag nauhkkulag. Doɗ laa onig lepad, pusi okkai amu, nug aab guguittak dayaya, aun laa aab dimittim uɗikku amu, doɗ amu nug aha, danab amu aɗa he, nug beɗu huppu naunau na niitte, amubia kekeɗ ag heppeg, danab ah imu ag nauhkkulag.

Jeremaia 6:10

Yawe Nug anam a, da, Jeremaia, da ami. “Da aun amegppa Kayaknu nau aomnanu dabmettak nai appi dookku? Aun nug daug huma dookku. Ag nai dooglagnu uuppig amunu, ag dooglagnu elele iitta. Yawenu nainu amu, ag oolagppa uuaknab dootteb. Ag Yawe nainu gamag ahak nakok laa ii dootteb.

Jeremaia 7:9

Ag yab hetteb. Ag layag qe mauhak hetteb. Ag ewau pakkua gappai hak kobol hetteb. Ag hettoɗiakppa nai hambuppuak aon, nai amunu, ‘Am nai genab,’ ahilag naippa ɠagattag qettan maditteb. Ag kayak hambuppuak Bal noobppa daanna, kalu danab ile muttuɗig enanag bette ele maina, nug medatteb. Ag kayak laala ele, ag anukka kayak amu ii dooppig, ag kayak amu ele dim lamadtteb.

Habakuk 1:3

O Yawe, laa ag nai doya mala hettoɗia epeɗia elele mettak kobol ii dim lamidna, laa eheɗ hattegeg, na ag amu ii hemananu ib oo ii nettem amunu, ag heegeg, da ag anadttem. Da amu antten, diig aɗinu na hee, ag amu ii hemananu ib oo ii nettem amu, da ool ii maidtte. Laa ag laa dilag keeke heeg nauhtte anidttem. Laa ag laa dilagppa guittak nau mauhnoak mettak kobol dim lamidna hetteb anidttem. Nug aittak, nug qak ele huanak daatteb anidttem.

Luk 11:45

Jesus Nug anam a amu ɗo mehuqak danab doyak amu okkainab ele laa nug oɗeppa awa aum. “Ippunittak danab, na nai ame amu, na nai amuppa ig nai dittiakppa yaaigttem,” awa aum.

Hibru 11:26

Nug nob ena, butti aɗi Kayak medakku amunuib dabmeum amunu, nug Kristus onigppa uɗa nak aokkunu ena doya, Isip enubnu amu, nug keeke hamu doyom.

Hibru 13:13

amunu ig ele aab okkainu aɗ dimittim nuhigppa gota, Nug uɗa nak guittak ele Nug mawom bia maotu!

1 Pita 4:14

Amu ag Kristus onig ɠagattag aɗatteb amunu, danab laa ag ahilagnu nai eheɗ akkulag amu, ag itittak ena aoppig daatteb. Aɗinu? Kayak Ouɗi, Nug binag amahlak oppiaawak ele, Nug ag ele daatteb.