Jeremaia 18:23 - Nobonob Baibel

²³ O Yawe, na ahilag maittak, ag heppeg mauhkkulnu dabmetteb ele amu, na amu doottem. Na doottem amunu, na ahilag hipunin ii uhuqna mattamnanu, na ahilag hipunin na noomppa daan, ii iitta memananu da na oɗ medattem. Na ahilag haknu oo nauhak doonna, na heppe, ag nena qena, padal mena autna aoglagnu oɗ medattem,” awa unuqittom.

Jeremaia 18:23 ပူးပေါင်းရင်းမြစ်များ

Sam 119:126

O Yawe, na keeke laa hekkutnu haen aakku doum daatte. Danab ah ag nahip ɗo loppaɗtteb.

Sam 35:4

Amu laa ag da iuppeg mauhkkulnu hetteb ele amu, ag uɗa nak aoglagnu, ge ag uɗa nak, nau, guittak ele dooglagnu oɗ medattem. Ao, na heppe, laa ag da eheɗ heiɗkkulagnu hetteb ele, ag bittumttum goppeg, ahilag dabmak am kaboliak nau ele daakkunu unuqidttem.

Sam 56:8

Na dahil oo doyak amu oh anidme. Ao, na da amel leb am nippudppa itame. Ge, na buk itoɗiak nahip-ppa amu oh anen anen yaan aome.

Sam 59:5

O Yawe Kayak Nakka Ɠagattag Oh Ele, na Israel dilag Kayak, na wan imuppan wan anen anen ohnu laa ag nau hetteb ele bu madakkutnu ahakkutnu oɗ medattem. Ao, na laa ag dimul menan, nau hekkulagnu maidtteb ele, am na oo gai-iitta doya oo metta ehanittak kobol ii dim lamidna heppe, ag nau aoglagnu unuqidttem. Sila.

Aisaia 10:3

Ag anam hetteb amunu, Yawe Nug geha ahilag hak nau amu nob mekkunu haen tituanom, amuppa Nug ag uug naunab madakkunu dabmette amu, ag amu eɗidkkulagnu elelete? Iitta! Haen amuppa Nug danab wan laa umanu diieb, ag ulah ɠagattag uɗitte, amubia ag uɗin, ag ag eheɗ madappeg, ag geha attem hekkulag? Ag geha oolna, aun toppa ehanadkkunu gokkulag? Keeke kuɗum ag aoppig, geha ag keeke amu aben adekkuppa mekkulag?

Aisaia 2:9

Danab ag dottolkad amu noolagppa dup nona binag metteb. Ge! Danab ag nigul amu noolagppa dup nona, ikkilag wan yaatte. ⌊O Yawe, nahipad danab ah ag kobol amu ii uunna,⌋ ag na ahilag hipunin uhuqna madakkutnu ib oo netteb.

Jeremaia 11:23

Da heppi, bu awak haen ahilagppa uug naunab Anatot danab dilagppa nekku amunu, ag padal mena, danab kobol nau amu hetteb oolagppa laippu laa ii daama, buɗulkad ele laippu laa iinab daama,’ awe attem.” Yawe Nug anam awa atte.

Jeremaia 15:15

Yawe Nug anam a, da ami. “O Yawe, laa ag guittak meɗatteb na doottem amunu, na dahilnu dabmena, atognoiɗkkutnu oɗ medattem. Ao, na heppe, laa guittak meɗatteb, ag nob nau aoglagnu unuqidttem. O Yawe, laa guittak meɗatteb amu, ag amu hebeppeg, na oo maɗoɗ ele dayak kobol dim lamidppeppe ukkeb, ag da iuppeg mauhpanu oɗ medattem. Na da nahipnu anuqak doyen oiiyi, laa guittak meɗatteb amu, na amu dabmekkutnu oɗ medattem.

Jeremaia 17:18

Na ehaniɗppe, da uɗa nak ii doopa, amge na heppe, laa ag eheɗ heiɗtteb ele ag uɗa nak aoglagnu oɗ medattem. Ao, na ehaniɗppe, da baɗak eheɗ nau ii doopa, amge na heppe, laa ag eheɗ heiɗtteb ag baɗak eheɗ nau dooglagnu oɗ medattem. Na heppe, laa eheɗ heiɗtteb amu, uug naunab ahilagppa bekkunu oɗ medattem. Ge, na heppe, ag padal mena autna autnanab aoglagnu unuqidttem,” awa unuqittom.

Jeremaia 17:4

Ag beɗulagppa ag wan ahilag, da wan amu ag aulag daakkunu ag mattami amu, ag beɗulagppa ag wan amuppa ii daamna. Ag hipunin anam heeg, oo nauhak dahil am aab huana ewewe, laa qauhkkunu elele iitta bia daatte amunu, da heppi, ag kekeɗ waalagpa, ahilag begbeg maɗi nid daan, ag wan laappa, ag amu ii dootteb ele, ag aguppa anam daan oiglag,” awa atte.

Jeremaia 18:18

Amu danab laa ag appig. “⌊Jeremaia atte am genab iitta.⌋ Mana mettak danab ag Yawenu ɗo ippunigtteb amu, kobol amu ii iitta mema. Danab doyak dabmak ena ele ag ulum nai ena megatteb amu, amu ele ii iitta mema. Propet danab ag Yawenu nai mehuqeg doottem amu, kobol amu ele anamib daakku, ii iitta mema amunu, ahappeg, ig hepput, Jeremaia hettoɗiakppa dayaya nauhaɗ! Ig amu hepput, nuhig nai ig daunigppa baula ii daama,” aon appig.

Jeremaia 26:11

Daaegeg amu, mana mettak danab, amu propet ele ag Juda dilag kingnu ehanittak anuqak danab, amu danab ah oh ele amelagppa appig. “Danab imu nug nuhignu, ‘Da propet,’ atte amu, nug kekeɗ ag aab okkai imu heppeg nauhkkunu aum amunu, nuhig propet nai amunu ig qepput mauhkku am elele; am ena. Nug nai amu mattieye, ag daulagppa aakku dooppig,” aon appig.

Jeremaia 26:8

Jeremaia nug keeke oh Yawe nug akkununab aum danab ah oh amelagppa mattia male amu, mana mettak danab, propet, amu danab ah oh ele ag oh dona, nug aɗana, “Na mauhkkutoitte,” aon appig.

Jeremaia 37:15

Nug eppelagppa me, ⌊ag nug Jeremaianu nai aum am doon,⌋ ag oolag nauhe, ag heeg, laa ag Jeremaia ad mahappa makkuɗeg, ag Jeremaia aon gona, nai yaak danab Jonatan laugppa meppig. Aɗinu? Okkai danab ag matu heeg, lag amuam maniguittak lag dayom.

Jeremaia 38:4

Kingnu ehanittak anuqak danab waɗele amu ag amu doon, ag gona, King Sedekaia amegppa appig. “Ig Jeremaia qepput mauhkku am ena. Aɗinu? Nug nuhig naippa nug he, ihinkad daup danab aab okkai imuppa daatteb ele, ag oolagppa gai-iitta daatteb, danab ah ele anamib. Nug mauhkkunu diig laa ele amu, danab amu nug Juda danab ah ag ena daaglagnu ib ii maditte. Iitta. Nug ag nauhkkulagnu hette,” aon appig.

Jeremaia 6:15

Ag naunab nau hetteb amunu, ag uɗalag nettete? Iitta! Ag uɗa nak nakoknab laa ii dootteb. Ag uɗa nak kobol hetteb, amge ag amelag kokoɗ iinab ebatte. Ag anam hetteb amunu, ib laa ii daatte. Ag laa qep elabppa mauhtteb bia, ag ele mauhkkulag. Da bu eheɗ madappi, ag nena qekkulag,” awa atte.

Jeremaia 6:21

Anam amunu Yawe Nug atte. “Da heppi, Juda danab ah ag gai-iitta daappeg, kekeɗ ag eɗadkkulag. Mamelkad, bekkalkad ele ag danab nug menppa baeg ya, na qette bia nena qekkulag. Ao, ahilkad mudippan laippu, amu ag lailkad ele, ag ele danab nug menppa baeg ya, na qette bia nena qekkulag. Ag oh mauhkkulag,” awa atte.

Jeremaia 7:20

Ag nau amu hetteb amunu, Naɗi Yawe Nug imu atte. “Ag hetteb, ahilag hak amunu dahil oo nauhak, dahil oppoɗi bak ele bettep. Amu da oppoɗi bak amu gokkaɗppi, wan imuppa, danab qaɗelagppa, doɗ qaɗelagppa, atuppan adppa, ee wanppa bette ele ohppa gokku. Ukka, aab ewewe, laa qauhkkunu elele iitta bia, amu oh dilagppa daakku,” awa atte.

Jeremaia 8:12

Ag naunab nau hetteb amunu, ag uɗalag nettete? Iitta! Ag uɗa nak nakoknab laa ii dootteb. Ag uɗa nak kobol hetteb, amge ag amelag kokoɗ iinab ebatte. Ag anam hetteb amunu, ib laa ii daatte. Ag laa qep elabppa mauhtteb bia, ag ele mauhkkulag. Ahilag bu awak haenppa, ag nena qekkulag.’ ” Yawe Nug anam awa atte.

Gayak Nai 3:60

Na laa ag nau dahilppa hekkulagnu henana, ag eheɗ heiɗkkulagnu dabmak aon aɗan oitteb amu, na amu oh anidna malame.

Gayak Nai 3:61

O Yawe, laa ag aon aon iunna, ag eheɗ heiɗkkulagnu dabmak aon aɗan oitteb amu, na amu oh doon malame.

Luk 21:22

Aɗinu? Haen amu Kayak Nug ahilag eheɗ hak nob eɗua madakku. Kayak naippa nai amunu daatte amu, nai amunu meu bekku.

Rom 2:5

Kayak Nug na oot eɗukkunu oo daatte, amge na nakka na he nahip dabmak am ɠagattag eppak daye, na oot ii eɗutte. Kobol amuppa amu na nakka eheɗ hak nahip-ppa na Kayaknu oppoɗi bak na nidakkunu huana aakku qagmettem. Yo, deɗ laa Kayaknu oppoɗi bak miag atieb, Kayak Nug nuhig kobol tutukkuppa na epeɗitteb amu na geha nob nau aokkut.