Jeremaia 18:11 - Nobonob Baibel

¹¹ Anam amunu, Jeremaia, na danab ah Jerusalem daatteb, Juda danab ah laa oh ele inam amelagppa appe doyeg! ‘Yawe Nug inam atte. Antteg! Da uug naunab ahilagppa bekkunu babaittette daattem, da ag nau aoglagnu ib aakku ooɗttem amunu, ag anen anen ag nau tuɗidna hemananu ag oolag eɗueb, ag ahilag kobol, ahilag hak ele tutukku dayaɗ!’

Jeremaia 18:11 ပူးပေါင်းရင်းမြစ်များ

Genesis 11:7

Am anam daatte amunu, ig nota hepput, ag nai laippu ii mattinna, dimppa ag akka akka nai ahilag ii doomna,” awa aum.

1 King 22:23

Mikaia nug anam awowa, nug tutukku Ahap amegppa aum. “Yawe Nug ouɗi nau hambubutte ele amu he, nug uɗia he, nahipad propet imu oh ag na amenppa nai hambubuppig. Yawe Nug na eheɗ aokkutnu mattiom daatte,” awa aum.

2 King 17:13

Yawe Nug Juda, Israel ele, ag nau aomnanu nai, nuhikkud propet oh oɗelagppa mattom. Nug ag oɗelagppa, Juda, Israel ele dilagppa inam aum. “Ag oolag eɗueb, ahilag kobol nau am uueg! Ag dahil haknunab nai, am ɗo nai ele, da ag mamelkad aɗi dim lamidkkulagnunab mattoya, dahilad maɗi nid, propet, da ag oɗelagppa ele ag amelagppa mehuqmi amu, ag amu dim lamitteg!” awa aum.

2 King 22:13

“Ag da, Juda danab ah oh ele, ag ig oh ig ounkad daanna, ag gona, buk imu laa nug anttom amu, ag buk imunu nai, ag amunu Yawe oɗ medappeg, ig aɗi hekkunignu ab dooglag. Ig mamenkad aɗi ag nai amu ii dim lamidppig, ag nai amu oh aɗi aɗi ippunigtte ii heppig amunu, Yawe Nug ihinignu oo nauhak okkai dootte,” awa aum.

2 King 5:5

Nug king amegppa a, aria king nug inam Naman amegppa aum. “Na gokkut am enanag. Da geha Israel dilag kingnu uɗug laa ye medappi, na uɗug amu aon gona medakkut,” awa aum. King nug anam anana, uɗug amu ya, Naman mette, aakku Naman nug aha, 340 kilogram silwa awa, 70 kilogram gol awa, nug lamen 10 ele awa aha, Samaria ukkom.

Aisaia 5:5

⌊Iitta! Da amu oh elele hemi⌋ amunu, gemu da muɗi grep dad dahilppa keeke laa hekkulnu dabmemi amu, da ag amelagppa akkul. Gemu da dadnu aɗ keeke qaun ele eppak amu oadppi ukkeb, muɗi grep dad dahil am, doɗ ag wana, ee lanan daaglagnu aben daakku. Ao, da dadnu men aɗ aoɗppi neeb, doɗ ag dad ooppa nona, tappanna, ⌊ee lanan daaglag⌋,” awa aum.

Aisaia 57:1

Genab tutukku hak danab ag mauhegeg, laa ag amu diignu ii dabmetteb. Ao, laa ag Yawenu oo metta ii uuak kobol dim lamidtteb ele amu, laa ag diia ugekke, danab ah laa ag amu anidna, ag amu diignu doyak tutukku ii aotteb. Kobol amunu diig am, Yawe Nug genab tutukku hak danab amu, ag uug naunab ahilag haenppa bekku, ag uug amu anidmananu Nug ag diia gotte.

Jeremaia 11:11

Amu Yawe Nug atte. “Juda ag anam hetteb amunu, da heppi, uug naunab laa, ag eɗidna, ii anidmananu elele iitta, ahilagppa bekku. Uug naunab amu beebeb, ag da ehanadkkulnu da onilppa ekkulag, amge da ahilag ewak da ii doopa.

Jeremaia 11:19

Da sipsip gaiɗ manan, danab qeeb mauhak abenppa awa gotte, da sipsip amubia daami. Ag da iuppeg mauhkkulnu dabmena, ag, “Danab ad o qiie, ad amu ii daatte, meu ele ii otte, ig amubia Jeremaia, nuhigppa hepput, nug amubia dayaɗ!” anana, ag, “Danab ag Jeremaia onig baula dabmemananu, ig makkuɗpput, nug danab ah bau daatteb ele oolagppa aib dayom!” ele appig amu, da Yawe ii ippuniɗom haenppa amu, da amu ii doomi.

Jeremaia 18:18

Amu danab laa ag appig. “⌊Jeremaia atte am genab iitta.⌋ Mana mettak danab ag Yawenu ɗo ippunigtteb amu, kobol amu ii iitta mema. Danab doyak dabmak ena ele ag ulum nai ena megatteb amu, amu ele ii iitta mema. Propet danab ag Yawenu nai mehuqeg doottem amu, kobol amu ele anamib daakku, ii iitta mema amunu, ahappeg, ig hepput, Jeremaia hettoɗiakppa dayaya nauhaɗ! Ig amu hepput, nuhig nai ig daunigppa baula ii daama,” aon appig.

Jeremaia 19:15

“Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.

Jeremaia 19:3

Na inam akkut. ‘O Juda dilag king, amu Jerusalem danab ah ele ag Yawenu nai doyeg! Yawe Nukka Ɠagattag Oh Ele, Israel dilag Kayak, Nug inam atte. “Doyeg! Da heppi, uug naunab aben imuppa nekku. Danab auntai nug amu nekku dimppa, nug amunu nai dookku amu, nug eheɗ ottaikku.

Jeremaia 25:2

Nug Yawe oɗeppanu nai laa amu awom amunu, propet Jeremaia nug danab ah Jerusalem daappig, amu Juda danab ah laa oh ele amelagppa aum.

Jeremaia 25:5

Propet amu ag appig. ‘Ag anen anen ag ahilag eheɗ hak digdig hetteb, ag kobol eheɗ digdig dim lamidtteb ele, ag amu tuɗidna hemananu oolag eɗueb, ag hak amu, kobol amu ele ii hekkulag dayeb amu, ag wan imuppa, Yawe Nug ag, amu ag mamelkad aɗi dilag hanhan daakkunu mattom amu, ag aguppa tuɗidna daaglag.

Jeremaia 26:13

Amunu ag ahilag oiyak, ahilag hak ele bappaidna, elele mettan dayeg! Ag anam henana, ag Yawe, ahilag Kayak, ag Nug oɗe doon dim lamitteg! Ag anam hekkulag amu, Yawe Nug nuhig dabmak baolia, Nug ag bu madakkunu dabma hekkunu aum bia ii hema.

Jeremaia 26:3

Na da attem bia hekkut dayeb amu, danab ah anen anen ag oolag eɗueb, eheɗ hak kobol ag hetteb tuɗidna iitai hekkulag. Ag eɗun ii tuɗidkkulag dayeb, da ag hipunin kuɗum henan daaegeg uɗie, gemu ele hetteb, da amunu uug naunab madakkulnu dabmak aomi daatte amu, da dabmak amu uuen ii hepa.

Jeremaia 3:1

Amu Yawe Nug atte. “Danab ah aa ewau daattep, ah nug ⌊gappai heeb,⌋ danab nug nuhig ah amu lamitteb, ah nug ukka, danab laa awa, ⌊baula gappai heeb,⌋ danab amu ele nug ah amu lamitteb, danab nug tatam ah amu awa lamittom amu, nug eɗua, ah amu baula aokku am enate? Kobol augigiak amuppa wan am Kayaknu neekkakppa dubuttid tak ele iite daama. Anam, amge ag Juda, ag kayak hambuppuak kuɗum noolagppa dup nona binalag meegeg uɗie, gemu ele hetteb. Ag ib baag ah nug danab kuɗum ele niiglagnu hette, ag amubia hetteb. Ag anam hetteb, amge da tuɗitten, ag eɗue diiadkkulnu onilagppa ettem.

Jeremaia 3:22

Ag anam hetteb amunu, Yawe Nug atte. “O danab ah, ag da dimeɗona kayak hambuppuak laala dim lamadtteb ele, ag eɗun, dahilppa uɗieg! Ag uɗippeg, da heppi, ag baula da ii dimeɗona kayak hambuppuak laala ii dim lamidmana. Ag baula dahil nai dim lamidkkulagnu ii uumna,” awa atte. Nug anam atte amunu, Israel danab ah ag atteb. “Ao, na am Yawe, na ihinig Kayak amunu, ig nahip-ppa gokkunig.

Jeremaia 35:15

Da haen kuɗum dahilad maɗi nid, ag propet amu, da ag maatti, ag gona, ag Israel, ag amelagppa inam appig. ‘Ag anen anen ag nau hak ahilag uun, ii henana, ag ena hak henana, ag kayak laa dim lamadna, waappa daan, ag oɗelag dim lamidkkulagnu aib heppig. Ag amu hekkulag dayeb amu, ag haen elab wan imuppa, da wan imu ag mamelkad aɗi mattami amu, ag wan imuppa haen elab daaglag.’ Da propet oɗelagppa haen kuɗum anam ami, amge ag daulag human, nai dahil ii dabmedappig. Ag dahil nai ii dooppig.

Jeremaia 36:3

Na anam buk amuppa yaappe, Juda danab ah ag uug naunab digdig da heppi, ahilagppa bekkunu da maittak aomi doon, ag anen anen ag nau hak ahilag uuglagtai. Ag anam nau hak ahilag uuglag dayeb amu, da ahilag nau hak, ahilag hipunin ele uhuqen madakkul.” Yawe Nug Jeremaia amegppa anam aum.

Jeremaia 36:7

Yawe Nug danab ah imu dilag haknu oo nauhe, oppoɗi beum daatte; ag bu okkainab aoglagnu daatteb atte amunu, na ebqeppe, ag doon, ag anen anen ag Yawe unuqidnana, ag nau hak ahilag uuglagtai,” awa aum.

Jeremaia 4:1

Amu Yawe Nug inam atte. “O Israel danab ah, ag eɗun, da waalppa daaglanu oolag daatte dayeb amu, ag eɗun, dahilppa uɗieg! Ag kayak hambuppuak dottolkad, da amunu oolppa uuaknab doottem amu, ag dottolkad amu agappeg goppeg, ag ib eheɗ amu tuɗidna ii gokkulagnu dayeb, ag kobol genab, ag nai doya mala hettoɗia epeɗia elele mettak kobol, amu genab tutukku hak kobol ele dim lamidnana, ag, ‘Yawe genab bau daatte, genab amubia,’ ag nai amuppa ahilag nai ɠagattag qedappeg, ⌊da ag itittak ena madappi, wan ohppa danab ah ag amu anidna, unuqiɗppeg,⌋ da ag itadppi, ag dahilppa gamag ahak doon, ag da binal meɗaglag,” awa atte.

Jeremaia 4:14

O Jerusalem danab ah, Juda danab ah ele, ag oolag dubuttid ele amunu, ag padal ii memananu, ag ehanittak aoglagnu, ag dubuttid amu oppieg! Ag nau hekkulagnu dabmak aɗan daatteb; amu haen gane laa ele ukkeb, ag dabmak amu uuglag.

Jeremaia 4:23

Amu da, Jeremaia, ⌊da tuleglegppa⌋ neekki ukke, da wan imu anidmi; amu wan am iɗu laa iitta anidmi. Keeke laa appa ii dayom ele anidmi. Amu da ele neekki ukke, hab anidmi, amu habppan amahlak laa ele ii dayom anidmi.

Jeremaia 4:6

Ag laa ag ib epponaknu at ib daugppa, o qauko igippa metteb ele, ag danab ah ag Sion ukkak ib anidkkulagnu at amu qappeg! Ag Juda danab ah ⌊Sion nakok guguittak daatteb,⌋ ag paha aab ahilag anen anenppanu, ag ena daaglagnu, ⌊ag aab amuppa⌋ paha oolna ukkeg!” Yawe Nug da anam akkulnu amelppa aum. Yawe Nug anam da amelppa ana malowa, Nug nai tuɗitta aum. “Juda danab ah, ag amu hekkulag diig am inam. Da hei, laa yawalti uɗitteppanu nug eheɗ hadakkunu uɗitte. Nug keeke kuɗum loppaɗeb nauhkkulag ⌊amunu ag padal mena autna aomnanu, ag anam ooleg⌋!” Yawe Nug anam da amelppa aum.

Jeremaia 51:11

Ag lat doɗo babaitteg! Ahilag guppiɗ human aɗeg! Babilon ag heeg, Yawenu mettid lag nauhom amunu, Yawe Nug Babilon eheɗ hak amunu nob tutukku madakku. Yawe Nug heeb, Babilon nauhkkunu maittak awom daatte. Amunu Nug Midia dilag king Babilon ele ban hekkulagnu dabmak matta he, ag hekkulagnu yag bak dootteb.

Jeremaia 7:3

Na amu anam mattin malona, na inam ele appe doyeg! ‘Yawe Nukka Ɠagattag Oh Ele, Israel dilag Kayak, Nug inam atte. “Ag Juda, ag ahilag hak nau uuna, ag eɗun, kobol ena dim lamidppeg, da uuadppi, ag wan imuppa inam daaglag.

Esekiel 13:22

Da genab tutukku hak danab ah uug dooglagnu ii hei, ag ah eheɗ hetteb ele ag nai hambuppuak mattiegeg, genab tutukku hak danab ah ag kobol ena dim lamidkkulagnu uug doon oitteb. Ag ah ag eheɗ hetteb, ag anam henana, ag nau hak danab ag mauhmananu, ag oolag eɗueb, eɗun ena daaglagnu dabmak ii madatteb. Iitta! Ag tuɗidna, eheɗ hekkulagnu atteb.

Esekiel 18:23

Da nau hak danab laa nug mauha, padal mekkunu amu, da amunu ool iinab daatte. Da nau hak danab ag oolag eɗueb, kobol tutukku dim lamidna, bau daaglag, da amunu ool daatte.” Naɗi Yawe Nug anam awa atte.

Jona 3:8

Laa ele amu, ag ohnab, danab, doɗ ele, ag lamen heɗiag ele maattak daana, ag Kayak amegppa ɠagattag unuqitteg! Aria, ag danab guittak nau mauhnoak mettak kobol, amu eheɗ hak laa oh ahilag uueg!

Maika 2:3

Ag amu hetteb amunu, Yawe Nug inam atte. “Da heppi, ag amu hetteb ele, ahilagppa uug naunab ag qaɗelagppa nekkunu, da dabmettem. Uug amu ag eɗidkkulagnu ib iinab anidmana; iitta. Uug amuam keeke oh he nauhaknu uug amunu, uug amu beeb, ag danab ah amu hetteb ele, ag baula dada danab ah daanna, ii oimna.

Sekaraia 1:3

amunu, na danab ah imu amelagppa inam appe doyeg! Yawe Nukka Ɠagattag Oh Ele Nug inam atte. Ag eɗun, dahilppa doppeg, da eɗuen, ahilagppa gokkul.

Aposel 26:20

Iitta. Da tatam Damaskus danab amelagppa nai mattie, dimppa Jerusalem danab, Juda danab, amu iitta aɗi ele amelagppa ami. Da ag amelagppa nai inam mattimi. ‘Ag oolag eɗueb, ag eɗun Kayak waappa daanna, danab laala ag genab oolag eɗuom anidkkulagnu, ag kobol tutukkuib dim lamitteg!’ awe ami.

Jems 4:13

Aria, ag oolagppa danab laala ag, “Gemute o iitta buttite ig aab okkai laappa gota, maɗ laippu daatta, men doɗo mattiak uɗat hetat, men doɗo aognig,” aon atteb ele amu, ag doyeg! Amuam hambuppuak bia.

Jems 5:1

Gemu amu, ag danab enulag ele ag doyeg! Ahilagppa uug nau digdig bekkunu daatte amunu, ag dabmena gaanna huana heig!