Jeremaia 17:23 - Nobonob Baibel

²³ Da ɗo amu ag mattami, amge ag memetalkad ag ii doon, ii dabmeppig. Ag akka ag ahilag dabmak dim lamidkkulagnu wagai mena hena, ag toliatta, bu mettak da mattami ele dab-ii-meppig amunu, ag oolag ele ii eɗuppig,” awa atte.

Jeremaia 17:23 ပူးပေါင်းရင်းမြစ်များ

Sam 50:17

Ag anen anen ag dahil tolittaknu nau ninig ele dootteb. Ag dahil ɗo dimedappig daatteb.

Prowerb 1:3

nug attem ha, nug nuhig oiyak atognoa enaib oikkunu, nug eheɗ bemanu dabmak awa dabmak amu dim lamittak kobolppa oikkunu, nug genab tutukku hak kobol, nai doya mala hettoɗia epeɗia elele mettak kobol ele dilahnu dabmak pehettak awa dim lamatkkunu,

Prowerb 1:5

danab nug oiyak ehanittaknu nai tutu, aria keeke danab ag dootteb ii dootteb ele ouaqata ippuanattak nai ele dookkunu, diig amu ohnu amu, oiyak ehanittaknu nai tutu imu am amunu daatte. Aria, danab nug doyak dabmak ena ele, nug daug huma doya, nug nuhig doyak dabmak ena ele nai imuppanu tuɗitta awaɗ! Ge, danab nug oo maittak awaknu ehah ele amu, nug ele nai imuppa ulum awaɗ!

Prowerb 29:1

Danab nug oo eɗukkunu daug batak kuɗum awawa, hamu bia doyaya, nug oo eɗumanu dabmak nuhig ɠagattag eppe oitte, nug guittak okkai awa nauhkku; nauhaknu aɗi keeke bette amu, baoliaknu ib laa iitta.

Prowerb 5:12

Am na geha akkut. “Laa ag da toliɗna, bu meɗaglagnu heppig amu, da uue autenab aomi! Ao, laa ag da daul batappig amu, daug batak ahilagnu doyak nakok laa aokkulnu, da uue autenab aomi!

Prowerb 8:10

Doyak dabmak ena ele am men laa onig rubi, daden nob okkainab ele, am amu eɗidtte. Aɗi keeke laa na aokkutnu oot huan daatte ele amu, keeke amu doyak dabmak ena ele ii eɗidtte amunu, na dahil ippunittak nai aokkutnu anuqak doon, silwa aokkutnu am anuqak aib doome. Ao, na doyak ena aokkutnu anuqak doon, na gol enanag aokkutnu anuqak aib doome.

Aisaia 48:4

Da ag, ahilag dabmak am ɠagattag eppom daatte, da ag heppeg, dabmak ahilag eɗukkunu iinab hetteb am doomi. Ahilag dabmak am ɠagattagnab; aen o bras bia.

Jeremaia 11:10

Ag mamelkad aɗi dahil nai dooglagnu uuppig, ag hipunin heppig, gemu danab ah imu ag hipunin amuib hetteb. Ag kayak hambuppuak dim lamadna, ag noolagppa dup nona, ag binalag metteb. Israel danab ah, Juda danab ah ele ag nug tituana nai qakkak nai da hei, da ag mamelkad aɗi ele bappaidta, ag nai amu waappa daan oinna, ag nai amu tippalna, ii dim lamidppig amu, laa gemu daatteb, ag ele anamib.” Yawe Nug anam awa aum.

Jeremaia 19:15

“Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.

Jeremaia 32:33

Ag da dimeɗan, ag dahilppa doaknu uuppig. Da ippunittak haen kuɗum ag madakkulnu hemi, amge ag dooglagnu daulag ii human dooppig. Da ag toliatte, bu mattami, amge ag oolag ii eɗuom. Iitta.

Jeremaia 35:15

Da haen kuɗum dahilad maɗi nid, ag propet amu, da ag maatti, ag gona, ag Israel, ag amelagppa inam appig. ‘Ag anen anen ag nau hak ahilag uun, ii henana, ag ena hak henana, ag kayak laa dim lamadna, waappa daan, ag oɗelag dim lamidkkulagnu aib heppig. Ag amu hekkulag dayeb amu, ag haen elab wan imuppa, da wan imu ag mamelkad aɗi mattami amu, ag wan imuppa haen elab daaglag.’ Da propet oɗelagppa haen kuɗum anam ami, amge ag daulag human, nai dahil ii dabmedappig. Ag dahil nai ii dooppig.

Jeremaia 5:3

Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.

Jeremaia 6:8

O Jerusalem danab ah, ag bu amu aomnanu, ag hamu bia aib dooppig. Iitta! Ag nau baula aomnanu dabmeig! Iitta dayeb amu, laa nug appa daakkunu elele iitta daakkunu, da dimatten heppi, ahilag wan am hele-ettak daakku,” awa atte.

Jeremaia 7:28

Anam amunu, na ag amelagppa inam appe doyeg! ‘Juda danab ah, ag Yawe, ahilag Kayak, ag Nug oɗe ii dim lamittegeg uɗie, gemu ele ii dim lamidtteb. Nug ag daulag bate, ag daug batak amu ii dabmeppig, ii dim lamidppig. Ag oolagppa doyak diig genabib ii daatte. Ao, ag oɗelagppa doyak diig genabibppanu nai laa ii bette.’ ” Yawe Nug da amelppa anam aum.

Esekiel 20:13

Da amu oh hemi, amge Israel danab ah ag atu taɗakppa dahil nai tappaeg neum. Ag dahil ɗo iɗu iɗu uuna, ii dim lamidppig. Ɗo amunu amu, danab nug amu dim lamidtte ele, nug bau daakku, nug padal ii mema. Amge ag dahil nai, dahil ɗo amu ele ii dim lamidnana, ag ɗo da ag Sabat deɗppa dim lamidkkulagnu ami amu, ag amunu hamu bia doon, iinab dim lamitteg, dahil neekkakppa deɗ amu ena ii dayom. Ag amu heppig amunu, da atu taɗakppa eheɗ nau hadappi, padal mekkulagnu dabmein ami.

Esekiel 20:16

Da amu mattiminu diig am, ag dahil ɗo iɗu iɗu, ag amu uuna, ii dim lamidppig. Ag ɗo da ag Sabat deɗppa dim lamidkkulagnu ami amu, ag amunu hamu bia doon, ii dim lamidppig. Aɗinu ag nau amu oh heppig? Ag kayak hambuppuak dottolkad ahilkad, ag amu dilag oolag huan heum; uuaknu uun autnanab aoppig.

Esekiel 20:21

Da danab amu ag bekkalkad aɗelkad ele amelagppa amunu ami, amge ag ele dahil nai tappaeg neum. Danab nug dahil ɗo dim lamidtte amu, nug bau daakku, nug padal ii mema, amge ag dahil ɗo iɗu iɗu pehettak ii dabmettan, ii dim lamidppig. Ag ɗo da ag Sabat deɗppa dim lamidkkulagnu ami amu, ag amunu hamu bia doon, ii dim lamidppig. Ag amu heppig amunu, da oppoɗil be, bu madakkulnu ami. Ao, da ool nauhehe, da ahilag hak naunu atu taɗakppa nob madakkulnu ami.

Sepanaia 3:7

Amu da Jerusalem danab ah amelagppa ami. ‘⌊Ag uug digdig da laa dilagppa hemi anidppig amunu,⌋ gemu ag Jerusalem danab ah, ag dahilnu ebehilag oh bodoetta le mekkunu doottem. Ao, ⌊ag anidna,⌋ gemu ag daug batak nai dahil doon, dim lamidkkulag ⌊amunu, da baula bu madakkulnu ii hepa⌋ doottem,’ ami. Amge iitta. Jerusalem danab ah ag anam heppiglob amu, ahilag aab nauhkkunu ii daama. Ge, dahil bu oh ahilagppa taknu ii daama. Anam, amge ag tuɗidna hipunin hekkulagnu oolag huana dayom. Ao, ag buttua ukka tueb batak hewona, tueb ukka buttua aam bette batak amuib henan daappig,” awa atte.

Aposel 7:51

Aria, Israel ag am tappe nak danab, ag oolag, daulag ele am ituak, iitta aɗi danab bia amunu, ag mamelkad aɗi heppig amubia, ag hanhan Kayak Ouɗi dimedatteb.

Ikki Danab 6:10

Da ag amelagppa ami. “Da am Yawe, ahilag Kayak. Ag Amo danab, gemu ag ahilag wanppa daatteb ele amu, ag amu dilag kayak noolagppa dup noa binag mak kobol ii hekkulagoitte,” ami, amge ag da ii dooiɗppig.’ ” Propet nug Kayak nai amu, danab ah amelagppa aum.