Jeremaia 16:13 - Nobonob Baibel

¹³ Ag amu heppig, gemu ele hetteb amunu, da ag agappi, ag wan imu uun, ag gona wan laappa, ag, amu ag mamelkad aɗi ele ag wan amu ii dootteb ele, ag amuppa daaglag. Ag gona appa daanna, ag kayak laala amun, tuqan ele waalagppa daan, ag oɗelag dim lamidkkulag. Aɗinu? Da ag nakok laa ii ehanadpa,” ’ ” awa atte.

Jeremaia 16:13 ပူးပေါင်းရင်းမြစ်များ

2 King 25:21

Ripla am Hamat wanppa dayom. Nebusaradan nug danab amu diia, Ripla ukke, King Nebukatnesar nug he, aqaeg mauhppig. Anam amu, Juda danab ah ag ahilag wan uun gona, Babilon appa diia ukka laih me dayak danab ah daappig.

2 Stori 7:20

amu da geha ag Israel danab ah da wan dahil, da ag mattami imu amu, da wan imuppanu lamatten, mettid lag imu, da onil aguppa daakkunu dahilnu tituana meɗak daakkunu hemi amu, geha da baula amunu ii dabmepa. Am laa ele, da heppi, danab ah laa ag lag imuam nau bekkunu at daatte dabmena, ag aon aon qettaglag.

Sam 81:12

Amunu da ag uuatti, ag oɗe dim lamidmananu dabmak ahilag ɠagattag eppe daatteb. Ao, da ag uuatti, ag akka ag aɗi aɗi dooppig amu, ag amuib dim lamidkkulagnu daatteb.

Jeremaia 10:18

Aɗinu? Keeke amu bekkunu haen uɗieb, da pahanab heppi, kekeɗ ag uɗin, ag wan imuppa daatteb ele, ahilagnu heppeg, danab nug men ketapolppa e gotte, amubia Israel danab ah, ag wan imu uun gokkulag. Da heppi, uug nau ahilagppa beeb, ag eheɗ dooglag,” awa atte.

Jeremaia 14:8

O Yawe, naib ig Israel ehanigkkutnu elele. Uug nau haenppa naib na ihinig Padal ii maknu ehanittak daattem. Anam amunu, na aab diig danab iitta bia daattemnu, o na danab laih gokkunu oiyaya, tuqan laippu ɗo danab wan laappa dayaya, buttua aha gotte, na amubia daattemnu,

Jeremaia 15:1

Amu dimppa amu Yawe Nug da, Jeremaia, Nug da amelppa aum. “Moses, Samuel ele aa am dahilaɗ danabnab daapiɗ, amge aanab da noolppa daaya, danab ah imu dilag unuqiɗlop amu, da ag ena daaglagnu ii ehanadlom. Heppe, ag da noolppanu ukkeg! Da noolppa daaglagnu aib heme!

Jeremaia 15:14

Ag hipunin hetteb amunu, da ool nauhtte, oo nauhak dahil amuam aab huana ewewe, danab qauhkkunu elele iitta, amubia daatte amunu, da heppi, kekeɗ ag uɗin, diiadna gona heppeg, ag wan laappa, ag wan amu ii dootteb ele, ag wan amuppa ahilkad begbeg maɗi nid daaglag,” awa aum.

Jeremaia 15:4

Hesekaia bekka Manase, Juda dilag king, nug Jerusalem dayaya, nug kobol eheɗ nau kuɗum heum amunu, da heppi, wan laa ohppan danab ah ag Juda danab ah dilagnu oolagppa uuaknab dooglag.

Jeremaia 16:5

Anam amunu, Yawe Nug atte. “Laa mauhkku dayeb amu, laa nug laugppa, laikkud ele daaglagnu aib teum. Appa ee ele aib laum. Nug ukka, aib mahiom; mauhak laikkud ele ɠagattag aqak nai aib mattiom. Aɗinu nug amu oh ii hema? Da, Yawe, da Juda danab ah dilagnu oo mauhaknab tuɗid ele ii doopa; da oo gai-iitta doya oo matta ehanadkkulnu kobol tuɗid ele ii hepa; amu da ele itittak ena tuɗid ele ii madapa.

Jeremaia 17:4

Ag beɗulagppa ag wan ahilag, da wan amu ag aulag daakkunu ag mattami amu, ag beɗulagppa ag wan amuppa ii daamna. Ag hipunin anam heeg, oo nauhak dahil am aab huana ewewe, laa qauhkkunu elele iitta bia daatte amunu, da heppi, ag kekeɗ waalagpa, ahilag begbeg maɗi nid daan, ag wan laappa, ag amu ii dootteb ele, ag aguppa anam daan oiglag,” awa atte.

Jeremaia 22:26

Na anin nug wan imuppa doum. Wan imuppa ele na anin nug na menuittom, amge da heppi, danab ag men keeke buɗieg gotte, amubia kekeɗ ag na, na anin ele diiatna goppeg, wan laappa daaglah. Aa oh wan amuppa ii dopiɗ, amu aa aguppa daaya, mauhkkulah.

Jeremaia 22:28

⌊Yawe Nug anam awa atte, amu laa atteb.⌋ “O gadon, Jehoiakin nug am waa laa aoɗak daatte, danab laa nug waa amunu ena iinab dootte, nug amubia daattete? Ao, Jehoiakin nug laa waanu, ‘Waa amuam enanag, da aokkulnu ool okkai daatte,’ iinab atte amu, Jehoiakin nug amubia daattete? Aɗinu Yawe Nug heeb, danab nug men buɗie, laih gotte, amubia kekeɗ ag heppeg, Jehoiakin, bekkod ele ag amubia laih gokkulag? Ao, aɗinu Yawe Nug heeb, kekeɗ heppeg, Jehoiakin, bekkod ele ag wan imuppanu ahan gona, wan laappa, ag wan amu ii dootteb ele, ag aguppa daaglag?” aon atteb.

Jeremaia 5:19

Am inam bekku. Da heppi, amu beeb, deɗ laa Israel danab ah ag, ‘Yawe, ihinig Kayak amu, aɗinu Nug ihinignu imu inam heum?’ oɗ mettaglag amu, na ag amelagppa inam akkut. ‘Yawe Nug amunu inam atte. “Ag da uuiɗna, kayak hambuppuak, wan laihnu diin uɗippig amu, ag ippa, wan ahilagppa kayak amu waalagppa daanna, ag oɗelag dim lamidppig, amubia ag wan laalappa, wan amuam ahilag wan iitta, ag appa gona, wan amuppan danab waalagppa daan, ag oɗelag dim lamidkkulag.” ’ ” Yawe Nug anam awa atte.

Jeremaia 6:15

Ag naunab nau hetteb amunu, ag uɗalag nettete? Iitta! Ag uɗa nak nakoknab laa ii dootteb. Ag uɗa nak kobol hetteb, amge ag amelag kokoɗ iinab ebatte. Ag anam hetteb amunu, ib laa ii daatte. Ag laa qep elabppa mauhtteb bia, ag ele mauhkkulag. Da bu eheɗ madappi, ag nena qekkulag,” awa atte.

Duteronomi 28:36

Yawe Nug heeb, ahilkad kekeɗ ag eɗadna heppeg, king ag nug gumadkkunu meppig ele nug, ag ele, ag oh wan ag ii dootteb ele amuppa gokkulag. Am ag mamelkad aɗi ag wan amu, ag ele ii dooppig ele. Anam daanna, ag am diia ukka laih me dayak danab ah daan, ag kayak adppa, menppa ele hattak, ag amu noolagppa dup noa binag mak kobol hekkulag.

Duteronomi 29:28

Yawe Nug oo nauhak huanaknab doya, oppoɗi ele be, Nug danab ah nuhikkud, ahilag wanppanu lamatte gona, wan laa dilagppa daappig; gemu ele ag amuppaib daatteb,” aon akkulag.