Jeremaia 15:2 - Nobonob Baibel

² Na amu heppe, ag inamtai oɗ mettaglag. ‘Ig adeppa gokkunig?’ aon oɗ mettaglag. Ag anam oɗ mettaglag dayeb, na inam appe doyeg! ‘Yawe Nug inam atte. “Ag laa ag oɗe nau aon mauhkkulagnu daatteb amu, ag gona, oɗe nauppa mauhkkulag. Laa ag qep elabppa mauhkkulagnu daatteb amu, ag gona, qep elabppa mauhkkulag. Laa ag enugppa mauhkkulagnu daatteb amu, ag gona, enugppa mauhkkulag. Aria, laa ag diia ukka, laih me dayak danab ah wan laappa gona daaglagnu daatteb amu, ag gona anam aakku daaglag,” ’ ” awa atte.

Jeremaia 15:2 ပူးပေါင်းရင်းမြစ်များ

Aisaia 10:4

Ag am keeke laa hekkulagnu ib iittanab iitta. Geha kekeɗ ag ag aqaglag, o iitta ag aɗualadppeg, ag ag eppelagppa daaglag. Anam, amge amuppa Yawe Nug nuhig oo nauhak am iinab bodoettama. Iitta. Nug ⌊bu tuɗitta madakkunu⌋ eppeg huma daakku.

Aisaia 24:18

Am inam bekku. Danab nug haen naunu nai doya, nug haen nau amu ii aomanu nug oolkku amu, geha nug moɗ hayagppa nokku. Aria, ⌊haen amuppa⌋ laa nug moɗ hayagppanu ba oola ukka amu, geha pelemppa tekku. Amu haen amuppa hab od oh geha matuleb, le gokkaɗa, wanppa neebeb, geha wannu ukku uɗalkku.

Jeremaia 14:12

Danab ah imu ag ee ohnu kud mena daaglagtai, amge diig amunuib da ahilag unuqittak ii doopa. Ag manaknu ofa, amu ee aegnu ofa ele hekkulagtai, amge diig amunuib da ahilagnu ena ii doopa. Iitta. Da heppi, ag banppa, enugppa, amu oɗe nau danab kuɗum aqe mauhtteb eleppa ele mauhadna, padal mekkulag,” awa aum.

Jeremaia 14:16

Ag anam mauhkkulag, amu danab ah laa, propet amu ag ag amelagppa nai ahilag maditteb amu, danab ah amu ele ag anamib mauhkkulag. Ag mauhppeg, laa ag ag gaɗalag agappeg gona, lag dimittim aab Jerusalemnu ibppa hamu anam niiglag. Huanak mauhkkulag amunu, laa ag, ag waalkad, ag bekkalkad, ag aɗelkad ele boumadkkunu ii daama. Danab ah amu ag nai hambuppuak amu doon, dim lamidnana, hipunin huanak hetteb amunu, ag bu nau aoglagnu daanna, da heppi, ag bu anam aakku aoglag.

Jeremaia 16:4

“Ag oɗe naunabppa mauhkkulag. Ag mauhppeg, laa ag ii mahimna, ii boumadmana ele. Ag gaɗalag hamu kinipan bia wanppa niiglag. Ele amu, kekeɗ ag qep elabppa ag aqappeg mauhppeppeg, ag enugppa ele mauhkkulag. Ag mauhna, ag gaɗalag am ai hab waappa hagagaɗna oitteb, doɗ dakkuɗ wanppa oitteb ele dilag ee daaglag,” awa atte.

Jeremaia 19:7

Juda danab, laa Jerusalemnu, laa Juda wanppa laih laihnu amu, ag aɗi aɗi hekkulagnu, ag attem attem daaglagnu maittak aotteb amu, aben imuppa da heppi, maittak amu iitta mekku. Juda dilag kekeɗ, ag Juda danab aqaglagnu hetteb ele amu, da heppi, ag ag qep elabppa aqappeg mauhkkulag. Da heppi, ag aqappeg mauhppeg, ai hab waappa hagagaɗna oitteb, doɗ wanppa oitteb ele amu, ag gaɗalag lakkulag.

Jeremaia 43:11

Babilon dilag king nug banelag uɗieb, nug Isip danab ele ban hekkulag. Ag ban hebeppeg, aun aɗi laa ag oɗe nau aon mauhkkulagnu daatteb, ag oɗe nau aon mauhkkulag. Aun aɗi laa ag diia ukka laih me dayak danab ah daaglagnu daatteb, ag gona, diia ukka laih me dayak danab ah daaglag. Aun aɗi laa ag qep elabppa mauhkkulagnu daatteb amu, ag qep elabppa mauhkkulag.

Esekiel 12:11

Na amu appe dooppeg, na imu ele appe doyeg! ‘Da Esekiel, da ⌊ippu hak⌋ hei anidppig amu, amuam ahilag at aakku, am anamnab ahilagppa bekku. Kekeɗ ag gona heppeg, ag wan laappa diia ukka laih me dayak danab ah daaglagnu, laa eppelagppa daan gokkulag.

Esekiel 14:21

Aɗinu? Naɗi Yawe Nug inam atte. “Bu mettak nau waɗele amu oolagppa laippu bekku dayeb am uug nau ele, amge da heppi, waɗele amu oh Israel danab ah aqadkku amu, amuam uug naunab nau. Bu mettak waɗele amuam ban, enug, doɗ nau, oɗe nau danab kuɗum aqe mauhtteb ele. Da heppi, bu mettak waɗele amu oh Israel danab ah, ahilkad doɗ ele ag mauhkkulagnu aqaglag.

Esekiel 33:27

⌊Amu danab bekka, na tuɗidna,⌋ na ag amelagppa, ‘Naɗi Yawe Nug inam atte,’ awona, na imu ele ahilagnu appe doyeg! ‘Ag wan imu ii aomna. Da Naɗi Yawe, da inam attem. Da genab bau daattem, genab amubia ag gemu aab nauhppig daattebppa daatteb amu, laa ag qep elabppa ag aqappeg mauhkkulag. Ag laa ag aab dimittim wanppa daatteb amu, da ag doɗ dakkuɗ nau eppelagppa maadppi, ag ag aqappeg mauhppeg, lattaglag. Amu ag laa ag ban haknu aben ɠagattagppa, o wan oɗeppa daatteb amu, oɗe nau danab kuɗum aqe mauhtteb amu ag aqeb mauhkkulag.

Esekiel 5:12

Ag Jerusalem daatteb amu, ag obatak ewam daatteb bia. Amu aab ooppa danab ah oh obatak laippu laa ooppa daatteb, ag oɗe nau danab kuɗum aqe mauhtteb elenu, o enugnu aab okkai ooppa mauhkkulag. Danab ah obatak laappa daatteb amu, kekeɗ ag aab dimittim ag ag aqappeg mauhkkulag. Amu obatak laa da heppi, kekeɗ ag diin heppeg, ag wan laalappa matatun gona daaglag, amge appa ele da heppi, ag qep elabppa mauhkkulag.

Esekiel 5:2

Na uɗug amu anam piɗe piɗe mewona, na kekeɗ ag aab laa eɗadkkulagnu oo mattan aqaglagnu meidna daanna hetteb, na amu ippu hak hena malona, na uɗug qagmak laippu aon, aab okkai dottog amu ooppa mena, manappe ewaɗ! Ameg mak laa na aon, aab dottog amu daug ohppa maadna, qep-ppa okkuladppe, naunaunab naɗ! Amu ameg mak laa na aon buɗiadppe attan teeb, ulah awa ukkaɗ! Amge appa ele da heppi, kekeɗ ag aqappeg mauhkkulag.

Daniel 9:12

Na Moses oɗeppa ig, ihinkad danab okkai ele ig hipunin hekkunig dayeb, ig bu okkainab aognig ame amu, na he, nai amu meu o, ig nauhta autta aomut. Uug naunab Jerusalem beum amu, deɗ laa wan atu ohppa uug amubia aab o wan laappa ii beum. Iitta. Jerusalem bu okkainab awom.

Amos 5:19

Deɗ amu geha danab laa nug doɗ laion laa baɗitta, oola ukka, doɗ bea laa noobppa watte bia daakku. O iitta, danab laa nug ⌊aɗi keeke baɗitta oola,⌋ laug ooppa noa, nug eppeg bahia, lagnu gilil aɗa hik aokkunu heehe, mat nau laa eppeg emaltte bia daakku.

Sekaraia 11:9

Anam daye, da ag amelagppa ami. “Da baula ahilag gumak danab ii daapa. Ag mauhkkulag dayeb, ag mauhkkulag! Laa ag ag aqadppeg mauhkkulag dayeb amu, ag aqadppeg mauhkkulag! Aria, laa ii mauhkkulag amu, ag akka akka nug laig!” awe ami.

Revelesen 13:10

Am aun nug maniguittakppa gokkunu daatte amu, appa gokku. Aun laa nug qep elabppa mauhkkunu daatte amu, nug qep elabppa mauhkku. Kobol amuam Kayaknu danab ah oppiaawak ele, ag tuɗidna uug doyaya eɗittaknuib dabmak awak kobol dim lamidna, ag oo metta ii uuak kobol ele tuɗidna anamib hekkulagoitte ippunigtte