Jeremaia 14:12 - Nobonob Baibel

¹² Danab ah imu ag ee ohnu kud mena daaglagtai, amge diig amunuib da ahilag unuqittak ii doopa. Ag manaknu ofa, amu ee aegnu ofa ele hekkulagtai, amge diig amunuib da ahilagnu ena ii doopa. Iitta. Da heppi, ag banppa, enugppa, amu oɗe nau danab kuɗum aqe mauhtteb eleppa ele mauhadna, padal mekkulag,” awa aum.

Jeremaia 14:12 ပူးပေါင်းရင်းမြစ်များ

Job 27:9

Uug nau nuhigppa bette haenppa amu, Kayak Nug nuhig unuqittak doottete?

Prowerb 1:28

Amu da Doyak Dabmak Ena ele anam hekkul, amu haen amuppa aun aɗi ag dahil nai ii doon dim lamidppig ele amu, ag dahilnu ekkulag, amge da nob laa ii madapa. Ag da mattiɗkkulag, amge ag da ii aniɗmana.

Prowerb 15:8

Haen nau hak danab nug mana mettak laa hette amu, Yawe Nug mana mettak amunu ooppa uuaknab dootte; amge haen genab tutukku hak danab ag unuqittak hetteb amu, Nug amunu ooppa ena dootte.

Prowerb 21:27

Nau hak danab ag doɗ manan, Kayak mettaglagnu heegeg anatta, Nug ooppa uuaknab dootte. Nug amunu uuaknab dootte amunu, genabnab genab ag ɗo hamuib dim lamidna, eheɗ hekkulagnu dabmena, mana mettak hekkulag amu, Nug amunu ooppa uuaknab okkai dootte.

Prowerb 28:9

Aun nug Kayaknu ɗo dim lamidkkunu uua hette amu; Kayak Nug nuhig unuqittaknu am ooppa uuaknab dootte.

Aisaia 58:3

Ag amu henana, ag da amelppa atteb. ‘Aɗinu ig ee ohnu kud meta daattem, amge na ii anigttem? Ao, aɗinu ig ikka, ig oninig qeut nette, amge na amunu dabmak nakok laa ii aottem?’ Ag, ag anam atteb, amge ⌊gadon, ag kaliak nau hetteb. Deɗ ag ee ohnu kud mena daatteb amu, deɗ amuppa ag dimittimnuib, da anidkkulnu hetteb⌋. Ag ee oh lamananu genab kud daatteb, amge keeke laa ag oolag hette ele, ag amu hetteb. Ag amu henana, ag ahilkad maɗi nid maɗi ah ele eheɗ hattana, uɗat huanak madatteb.

Jeremaia 11:11

Amu Yawe Nug atte. “Juda ag anam hetteb amunu, da heppi, uug naunab laa, ag eɗidna, ii anidmananu elele iitta, ahilagppa bekku. Uug naunab amu beebeb, ag da ehanadkkulnu da onilppa ekkulag, amge da ahilag ewak da ii doopa.

Jeremaia 11:14

Yawe Nug anam awowa, Nug da amelppa aum. “Jeremaia, na danab ah imu dilagnu aib unuqiɗme. Na da ehanadkkulnu aib oɗ meɗame. Aɗinu? Da nahip nai ii doopa. Ag uug nau anidnana, da unuqiɗppeppeg, da amu ele ii doopa,” awa aum.

Jeremaia 15:1

Amu dimppa amu Yawe Nug da, Jeremaia, Nug da amelppa aum. “Moses, Samuel ele aa am dahilaɗ danabnab daapiɗ, amge aanab da noolppa daaya, danab ah imu dilag unuqiɗlop amu, da ag ena daaglagnu ii ehanadlom. Heppe, ag da noolppanu ukkeg! Da noolppa daaglagnu aib heme!

Jeremaia 16:4

“Ag oɗe naunabppa mauhkkulag. Ag mauhppeg, laa ag ii mahimna, ii boumadmana ele. Ag gaɗalag hamu kinipan bia wanppa niiglag. Ele amu, kekeɗ ag qep elabppa ag aqappeg mauhppeppeg, ag enugppa ele mauhkkulag. Ag mauhna, ag gaɗalag am ai hab waappa hagagaɗna oitteb, doɗ dakkuɗ wanppa oitteb ele dilag ee daaglag,” awa atte.

Jeremaia 21:6

Da heppi, danab, ah, doɗ ele aab okkai ooppa daatteb amu, ag oɗe naunab danab kuɗum aqe mauhtteb ele, ag oɗe amu aon mauhkkulag.” ’ Yawe Nug aa Sedekaia amegppa anam akkulah awa atte.

Jeremaia 24:10

Da heppi, kekeɗ ag uɗin, qep elabppa aqappeg, enug haen beeb, oɗe nau danab kuɗum aqe mauhtteb ele beeb, ag mauhna, wan da ag mamelkad aɗi mattami amu, ag amuppa ii daamna.’ ” Yawe Nug anam awa atte.

Jeremaia 32:24

Antte! Kekeɗ ag aab okkai imu eɗidkkulagnu ag wan buun, aon uɗin, gokkaɗegeg beebe, aɗ eleleppa bekkunu hetteb. Aab imuppan danab ah ag qep elabppanu mauhakppa, enugnu mauhakppa, oɗe nau danab kuɗum aqe mauhtteb, mauhak amuppa ele, Babilon ag aab okkai imu eɗidna aoglag. O Yawe, na aɗi keeke bekkunu ame amu, kobol anam aakku beebe na anidttem.

Jeremaia 6:20

Juda danab ah, ag Sebanu kalu danab ile muttuɗig enanag bette, ag kalu amu amotna, da meɗatteb, amge ag hipunin hekkulagnu ii uutteb amunu, da kalu amunu ool hettete? Da amunu oolppa ena doottemte? Iitta! Ao, ag goɗen muttuɗig enanag hekkulagnu wan umanabnu keeke qaittobttob bia onig kalamus aon, da meɗatteb, amge ag hipunin hekkulagnu ii uutteb amunu, da kalamus amunu ool hettete? Da amunu oolppa ena doottemte? Iitta! Manaknu ofa ahilag amu, ag am pehettak iitta; da ii aopa. Ao, ahilag mana mettak laa amu, da amunu ena ii doottem.” Yawe Nug anam atte.

Jeremaia 8:13

Yawe Nug atte. “Da heppi, ahilag ee meu ii oma. Grep muɗippa meu laa ii daama. Ad fig uɗug bunaɗppeg, meu ii oma. Da aɗi keeke Juda danab ah mattami amu, da ag eppelagppanu eɗuen hiɗakkul.

Jeremaia 9:16

Da heppi, kekeɗ ag uɗin eɗadna heppeg, Juda danab ah ag wan laala, ag, amu ag mamelkad aɗi ele ag wan amu ii dooppig amu, ag wan amuppa, doɗ oolna, matatun gona, piɗe piɗe mauhnoak daatteb, Juda danab ah ag appa anam daaglag. Amu da heppi, kekeɗ ag lamadnana aqappeg, Juda danab ah ag padal mena autna aoglag,” awa atte.

Esekiel 14:19

O da oppoɗil beeb heppi, oɗe nau danab kuɗum aqe mauhtteb ele wan amuppa danab ah aqeb, danab, ahilkad doɗ ele mauhkkulag dayeb amu,

Esekiel 14:21

Aɗinu? Naɗi Yawe Nug inam atte. “Bu mettak nau waɗele amu oolagppa laippu bekku dayeb am uug nau ele, amge da heppi, waɗele amu oh Israel danab ah aqadkku amu, amuam uug naunab nau. Bu mettak waɗele amuam ban, enug, doɗ nau, oɗe nau danab kuɗum aqe mauhtteb ele. Da heppi, bu mettak waɗele amu oh Israel danab ah, ahilkad doɗ ele ag mauhkkulagnu aqaglag.

Esekiel 8:18

Ag amu hetteb amunu, da oo nauhak doyeye, da nob madakkul. Da ag anatte, oo doyak ii doopa! Ge, da ag anatte, bu madakkulnu ii uupa! Israel ag da daulppanab da ehanadkkulnu ekkulagtai, amge da ii doopa; ii ehanadpa,” awa aum.

Hosea 5:6

Ag geha Yawe anidna, Nug dim lamittaknu Nug mattinna, ag ahilkad sipsip, meeme, amu makau main, Nug mettaglagnu akkan uɗiglag, amge ag Nug ii anidmana; Nug nukka awaitta, piɗe ukkom daatte.

Amos 5:21

Yawe atte. “Ag hobul da ag hekkulagnu ami amu, ag hetteb, amge ⌊ag hambuppun hetteb⌋ amunu, da nau ninig ele doottem. Ge, da amunu ena iinab doottem Ag da onilppa qagmak okkai hetteb, amge ⌊ag hambuppuna heeg,⌋ da qagmak okkai amunu amu, da nau aakkuib doottem.

Maika 3:4

⌊Amu ag Israel dilag okkai danab, ag anam hetteb amunu, Yawe Nug bu madakku.⌋ Haen amu uɗieb amu, ag Yawe ehanadkkunu gaaglag, amge Nug ag ii ehanadma. Ag eheɗ heppig amunu, haen amuppa Yawe Nug ag ehanadkkunu ii neekkadma. Iitta.

Sekaraia 7:13

Amu Yawe Nukka Ɠagattag Oh Ele Nug atte. “Israel danab ah ag da ag amelagppa nai mattimi, haen amuppa ag dahil nai dooglagnu uuppig amunu, ag da onilppa eeg, da ele ii doomi.

Malakai 1:10

Yawe Nukka Ɠagattag Oh Ele Nug atte. “Da laa nug ag mana mettak danab oolagppanu, nug ag mana mettak ena iitta amu ii manadmananu, nug dahil mettid lag, nuhig tomppan keeke oh elenu od manadkkunu ool okkai daatte! Da ahilagnu ena ii doottem. Da ahilag mana mettak amu, da ii aopa.

Malakai 2:13

Imuam keeke laa ag danab ah Judanu, ag hetteb. Yawe Nug ahilag mana mettaknu ii dabmette, Nug amunu ena doya ag eppelagppanu ii aotte amunu, ag gaanna, mahinna, ag Yawenu qaɗab amelag lebppa haut-tteb.

Revelesen 6:8

A amu da neekke, hos laa, nuhig beɗu anttak am lanlan geɗaɗa ele, da amu anidmi. Anitti amu danab hos amu attan dayom, nug onig Mauhak. Hades nug nug gukkuitta dim lamitte dopiɗ. Aa dopiɗ, amu wanppan danab ah oh waɗele waɗele oolagppa aa qep elabppa, enugppa, oɗe danab kuɗum aqe mauhttebppa, amu doɗ dakkuɗ oɗelagppa ele hepeɗ, laippu mauhkku, ewam bau daaglagnu ɠagattag aopiɗ.