Jeremaia 13:13 - Nobonob Baibel

¹³ Ag anam akkulag dayeb amu, na ag amelagppa appe doyeg! ‘Yawe Nug inam atte. “Da heppi, Juda danab ah oh ag danab nug wain huana la, kaaka qette, ag amubia daaglag. Juda danab ah Jerusalem daatteb, Juda danab ah laa oh Juda wanppa daatteb, ahilag king, Dawitnu sia kingppa daatte, ahilkad mana mettak danab, amu ahilkad propet ele, ag ohnab anamib daaglag.

Jeremaia 13:13 ပူးပေါင်းရင်းမြစ်များ

Sam 60:3

Na ig bu ɠagattagnab mekkame. Ao, na hee, ig uug doot, danab nug le nau la, qe oiyom bia hemut.

Sam 75:8

Aria, amu anaknu diig laa am, Yawe Nug danab ah dilag nai doya mala hettoɗiatta epeɗiatta elele madatte amu, amuam kap Nug eppegppa aɗatte bia. Amu kap amuppa wain ɠagattag, keeke laala ele kaboliak daatte. Anam amu, Nug wain gokkaɗa heeb, nau hak danab ah oh ag lakkulagoitte. Ag biɗa naunau oh am lakkulagoitte.

Aisaia 29:9

Ag ⌊Juda, ag⌋ dabmak iitta ele oinna, ag dabmak kuɗumnab aotteb! Ag heeg, amelag gaɗue oitteb! Ag kaaka aqe oitteb, amge ag le ɠagattag lappig amunu, ag anam ii hetteb! Ag oinna, nena qena, ahan eɗun nena qetteb, amge ag le ɠagattag lappig amunu, ag anam ii hetteb!

Aisaia 49:26

Laa ag Juda ahilagnu eheɗ hetteb ele amu, da heppi, ag akka akka ag teppulag lakkulag. Da heppi, ag akka akka ag tiilag lawona, danab nug wain la, kaaka qette bia daaglag. Da anam hekkul amunu, danab laa oh ag da Yawe, ag dahilnu, da am ag Juda, ahilag padal memananu ehanittak danab dayeye, da ahilag qagaiettakppanu eɗua uhuqaknu ehanittak dayeye, da am Yawe, da Laa Ɠagattag Okkai Ele, Jakop da binal meum ele amu, da anam daattem dooglag.” Yawe Nug anam atte.

Aisaia 51:17

Juda danab ah, ag ahan dayeg! Ag aheg! Ag eheɗ heeg, Yawe oppoɗi be, bu mattom. Amu ahilag bu Nug eppegppanu amu, bu amuam wain nau kap-ppa daatte, amubia daye, ag wain amu aakku lana malappig. Ao, wain nau amu, wain amuam danab he nauhtte ele amu, ag amu ohnab lana malappig.

Aisaia 51:21

Anam amunu, ag Juda danab ah, ag danab wain la ukke, kaaka qe, eheɗ kuɗum aotte, ag amubia daatteb, amge ahilag eheɗ awak am le ɠagattag lanakppan iitta. Iitta. Ag hipunin heeg, Yawe Nug bu mattom amunu, ag Juda danab ah, ag nai imu doyeg!

Aisaia 63:6

Da ool nauhehe, da wan atu laihppan huu tabatti neppig. Ao, da oppoɗil beebe, da hei, ag nena qeppig. Da ag tiilag wanppa gokkaɗmi.” Laa uɗiom ele nug anam aum.

Jeremaia 13:12

Amu Yawe Nug tuɗitta aum. “Juda aɗi ag dahil nai ii dim lamidppig amunu, Jeremaia, na ag amelagppa inam appe doyeg! ‘Yawe, Israel dilag Kayak, Nug inam atte. “Doɗ gaɗa wain inaknu oh am wain ele ambak dayeb, amuam kobol ena,” aon a! Na anam appe ag inam akkulagtai. “Doɗ gaɗa wain inaknu oh wain ambak daakku am ena iite doottem?” ’ Ag anam aon akkulagtai.

Jeremaia 25:27

Da kap amu Yawe eppegppanu aomi amu, haen amuppa Nug da kap awen madette, da inam ag amelagppa akkulnu aum. “Yawe Nukka Ɠagattag Oh Ele, Israel dilag Kayak, Nug atte. ‘Ag danab wain lawowa, spak ma, bahaha, na qa nauha auta awa, eɗua ii aha, nauhak daatte, ag amubia daaglag. Aɗinu ag anam daaglag. Da heppi, ban ahilagppa bekku.’ ” Yawe Nug da ag amelagppa anam akkulnu aum.

Jeremaia 25:29

Antteg! Da aab okkai da onil aguppa daatte, da amuppa digmein, ag bu madattem amunu, ag laa ag bu iite aoglag. Iitta! Ag aoglag. Ag bu ii eɗidmana. Aɗinu? ⌊Wan atu ohppan danab ah ag eheɗ hetteb amunu,⌋ da wan atu ohppan danab ah banppa bu madakkul.” ’ ” Yawe Nukka Ɠagattag Oh Ele, Nug anam aakku atte.

Jeremaia 51:57

Amu Yawe Nug atte. “Da heppi, Babilonnu ehanittak anuqak danab, doyak dabmak ena ele danab, gawana, ban daup ikki danab, ban daup ele ag danab le ɠagattag huanak lawowa, niie ukke mauhtte, amubia Babilon danab amu ag mauhkkulag.” Yawe Nukka Ɠagattag Oh Ele, Nug king daatte, Nug anam awa atte.

Jeremaia 51:7

Wan atu laihppa danab ag hipunin heeg, Yawe Nug ahilagnu oppoɗi be, Nug Babilon ag bu madakkunu uɗat mattom. Nug matte amunu, Babilon kap golppa hak Yawe Nug eppegppa aɗom bia dayom. Yawe Nug danab ah hipunin heppig dilag oppoɗi beum amu, oppoɗi bak amuam wain nau kap-ppa daatte, amubia. Amu Yawe he, wan atu ohppan danab ah ag wain nau amu laeg, kaaka aqom.

Habakuk 2:16

Amge ⌊Babilon dilag okkai⌋ na, nahip-ppa anam bekku. Danab ah ag nahipnu nau dooglag. Ag binag ii memana. Iitta! Na uɗa nak dookkut. Gemu am nahip haen! Na le ɠagattag lappe, kaaka nitteb, lamen uɗona, na uɗan naɗ! Wain amu kap Yawe eppeg naɗiap-ppa daatte, am nahip-ppa aakku uɗitte, amu na amu lawona, na uɗa nak nau guittak ele doon, binan nakok laa ii daama.