Jeremaia 11:17 - Nobonob Baibel

¹⁷ Yawe Nukka Ɠagattag Oh Ele, Nug danab ad eppe ba daatte, amubia Nug ag ehanatte, ag gemu daatteb, amge Nug uug naunab ahilagppa beeb, padal mekkulagnu ɗo ma malom. Aɗinu? Nug amunu atte. “Ag Israel danab ah, Juda danab ah ele ag eheɗ henana, ag kalu danab ile muttuɗig enanag bette ele aon main, kayak hambuppuak Bal mettaegeg, diig amunu da oppoɗil beum, gemu ele daatte,” awa atte.

Jeremaia 11:17 ပူးပေါင်းရင်းမြစ်များ

2 Samuel 7:10

Da danab keeke eppe, ena bette, amubia da Israel danab ah ag wan ele daaglagnu, ag amuppa maɗoɗ ele daaglagnu ehanatten, aben madappi daaglag. Danab nau ag anukka da Israel dilag ikki danab digmein tituanadmi, haen amuppa danab nau amu ag digmena, dahilad danab ah eheɗ hattaegeg uɗie, gemu ele hetteb, amge da heppi, ag amu tuɗidna ii hemana. Amu ele, da heppi, nahipad kekeɗ ag ɠagattag ii daamna. Amu da Yawe, da heppi, na buɗunad oolagppanu laala ele, ag anen anen ahilag haenppa, ag Israel dilag king hanhan bena daaglag.

2 Stori 28:25

Nug amu ha, nug ele Judanu aab ohppa nug kayak hambuppuak dilag mettid lag nakok laa, danab ag appa doɗ manadna, kayak hambuppuak mattaglagnu babaittom. Ahas nug kobol eheɗ amu he, Yawe, Ahas mamekkud aɗi dilag Kayak, Nug oppoɗi beum.

Sam 44:2

Ig mamenkad aɗi ii uɗippig dayeye, danab ah Kanan daappig ele ag na ii dim lamitteg ukke, haen na ig mamenkad omaladna uɗin, haen amuppa na laa ag wan anen anenppa wan imuppa daappig, na he, Israel ag danab amu lamatteg, na wan imu ig mamenkad aɗi mattame. Yo, na danab ah, ig mamenkad aɗi dilag kekeɗ, ag Kanan daappig ele amu, na hee nauheg, na hee ig mamenkad aɗi ag elele daappig.

Sam 80:15

Nanab, na ig wan imuppa daagnignu, danab grep muɗi ebatte bia wan imuppa meigme. Ao, ig na begapad daagnignu, nahipnu danab ah daagnignu hee bemut.

Sam 80:8

Anukka na grep muɗi laa Isipnu aon uɗin, na danab laa wan imuppanu lamadna, grep amu wan imuppa eppame.

Aisaia 5:2

Nug wan buue be, men oh akke ukke, muɗi grep eppeg enaib epeɗia eppom. Dad amu gamagppa nug neekkeb ukkeb, aɗi uɗitte anttaknu lag attan ta ukkak menppa hak laa heum. Amu nug dad ooppa nug grep meu tappa leppu awaknu aben laa heum. Nug keeke amu oh ha malowa, nug “Muɗi grep dahil imu geha meulag ena, ubuhi ele daaglag,” dabmeum. Nug anam dabmeum, amge anam iitta. Muɗi grep amu meu ena ii oppig, meulag doɗo naunau oppig; lanaknu am mua ele, ena iitta.

Jeremaia 1:14

Da anam ai, Yawe Nug aum. “Yawalti uɗitteppanu amu, da appanu danab heppi, ag uɗin, ag danab ah Juda wanppa daatteb hadappeg, padal mekkulag.

Jeremaia 11:11

Amu Yawe Nug atte. “Juda ag anam hetteb amunu, da heppi, uug naunab laa, ag eɗidna, ii anidmananu elele iitta, ahilagppa bekku. Uug naunab amu beebeb, ag da ehanadkkulnu da onilppa ekkulag, amge da ahilag ewak da ii doopa.

Jeremaia 11:13

O Juda danab ah, ag kayak hambuppuak kuɗumnab noolagppa dup nona binalag metteb. Ag ahilag wanppa aab gane daatteb, ag kayak hambuppuak ebqak amubia noolagppa dup nona binalag metteb. Laa amu, kayak hambuppuak laa onig Bal, kayak amu dim lamattaknu ɗo am uɗa nak ele, ag kayak amu noobppa dup nona binag mekkulagnu ag nuhig qaɗab kuɗum bappaidppig. Jerusalem aabppa ib gane daatte, ebqak amubia ag nuhig qaɗab bappaidppig.” Yawe Nug anam awa atte.

Jeremaia 12:2

Ag am ad na eppalatte, ag diɗilkad wan ooppanab noppig bia daatteb. Ag ena bena, meu otteb. Ag nahipnu hanhan oɗelagppa maditteb, amge ag oolag am na ele laippu iinab daatteb.

Jeremaia 18:15

Dahilad danab ah ag ele anam bia alet dabmeɗan oilob, amge iitta, ag dahilnu daulag atiom. Ag ahan, kalu danab ile muttuɗig enanag bette manan, kayak hambuppuak madatteb. Kayak hambuppuak amu ag heeg, dahilad danab ah ag nena qena daatteb. Ao, kayak hambuppuak ag heeg, dahilad danab ah ag kobol ena, anukka ippunittak amu aoppig amu, ag ib amuppa elele ii oitteb. Ag heeg, dahilad danab ah ag ib ena apiɗidna oitteb. Ao, ag ib nauppa oinna, ib enappa ii oitteb.

Jeremaia 18:8

amu wan amuppan danab ah, da ag amelagppa ag nau aomnanu dabmettak nai mattimi amu, danab ah amu ag oolag eɗueb, eheɗ tuɗidna hemananu dabmekkulag dayeb amu, da uug naunab madakkulnu dabmemi amu, da uuen, ii hepa.

Jeremaia 19:15

“Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.

Jeremaia 2:21

Israel danab ah, ag am muɗi grep danab eppom, amubia. Muɗi grep amuam enanag, meu okkunu elelenab, oɗe keeke iitta. Nug muɗi grep elele anam eppom, meu enanag aokkun dabmeum, amge muɗi grep ba, okkai ma, meu oum, me meu amuam ena iitta; am meu nau. Muɗi grep amuam eɗua, muɗi grep dakkuɗ, meu ena iitta ele beum. Amu ag Israel danab ah, ag dahilppanu anam bia aakku.

Jeremaia 24:6

Da ag atognoatten ehanadppi, ag wan imuppa eɗun uɗiglag. Da ag atognoadppi, elele daaglag. Da eheɗ hadappi ii nauhmana. Da danab keeke eppe, ena bette, da amubia ahilagppa hekkul. Danab nug keeke hiɗe nauhtte, da amubia ahilagnu ii hepa.

Jeremaia 26:13

Amunu ag ahilag oiyak, ahilag hak ele bappaidna, elele mettan dayeg! Ag anam henana, ag Yawe, ahilag Kayak, ag Nug oɗe doon dim lamitteg! Ag anam hekkulag amu, Yawe Nug nuhig dabmak baolia, Nug ag bu madakkunu dabma hekkunu aum bia ii hema.

Jeremaia 26:19

Maika nug anam aɗi dimppa bekkunu nai amu mattie, Juda dilag king Hesekaia nug nug qe mauhomte? Juda oolagppa laa nug nug qe mauhomte? Iitta! Hesekaia nug baɗe, Yawe oo gai-iitta doya oo metta ehanadkkunu unuqittom. Nug anam he, Yawe Nug uug naunab madakkunu uuom amunu, uug naunab ahilagppa bekkunu aum amu, ahilagppa ii beum. ⌊Dabmeig!⌋ Ig hepput, uug naunab ihinigppa bekkunu hetata oittemde!” aon appig.

Jeremaia 32:29

Babilon daup, ag gemu aab okkai imuppan danab ah aqaglagnu ban hetteb, ag aab okkai imu eɗidna, ooppa uɗin, maippeg eokku. Ewebeb, Jerusalem danab ah ag lag laala koɗokkoppa tena, appa ag kalu danab ile muttuɗig enanag bette ele main, kayak hambuppuak Bal mettona, ag wain gokkaɗaknu ofa kayak hambuppuak laala dilagnu ele heeg, da oppoɗil beum amu, Babilon dilag daup ag lag amu ele maippeg eokku.

Jeremaia 32:30

Israel huu, Juda huu ele ag memetalkad anukkanab, ag digmena, kobol digdig, danab nug kobol amu hette nug da neegttemppa eheɗ hette amu, ag kobol amu aakkuib heegeg uɗie, gemu ele hetteb. Genab, ag eppelagppa kayak hambuppuak dottolkad bappaidna, ag heegeg, da oppoɗil beum daatte.

Jeremaia 35:17

Ag amu hetteb amunu, da, Yawe, da am Kayak Dakka Ɠagattag Oh Ele, da Israel dilag Kayak, da attem. “Doyeg! Da heppi, uug naunab oh, amu da Jerusalem danab ah oh dilagppa, amu Juda danab ah laa oh ele dilagppa bekkunu ami amu, uug amu oh am bekkulag. Da ag amelagppa nai mattimi, amge ag daulag ii human dooppig. Da ag onilagppa emi, amge ag nai nob laa ii meɗappig.” Da Kayak, da anam awe attem.

Jeremaia 36:7

Yawe Nug danab ah imu dilag haknu oo nauhe, oppoɗi beum daatte; ag bu okkainab aoglagnu daatteb atte amunu, na ebqeppe, ag doon, ag anen anen ag Yawe unuqidnana, ag nau hak ahilag uuglagtai,” awa aum.

Jeremaia 40:2

Amu Nebusaradan, nug daup ag Nebukatnesar gumappig dilag okkai amu, nug Jeremaia antta, nug amegppa aum. “Yawe, Nug nahip Kayak amu, Nug uug naunab imu aben imuppa bekkunu aum.

Jeremaia 40:3

Nug anam aum amu, gemu Yawe Nug anamib bekkunu he, aakku beum. Nug aɗi bekkunu aum, amuibnab gemu aakku beum daatte. Uug amu oh beumnu diig am, ag Juda danab ah, ag Yawe, nuhigppa hipunin heppig. Ag Nug oɗe ii dim lamidppig.

Jeremaia 42:10

‘Ag Juda, ag hipunin heegeg, da bu madakkulnunab dayom, amge da gemu ag daattebnu oolppa guittak doottem amunu, gemu amu, ag wan imuppa daappeg, da danab lag he, ena daatte, amubia da ehanadppi, ag ena bena daan oiglag. Da danab lag loppaɗe nauhtte, da ahilagppa amubia ii hepa. Ge, ag wan imuppa daan oiglag amu, da danab nug ee eppe, ena ba, meu otte, amubia da ehanadppi, ag ena daan oiglag. Da danab ee hiɗe bunaɗtte, da amubia ahilagppa ii hepa. Iitta.

Jeremaia 44:5

amge Juda danab ah ag nai amu ii dooppig, ag daulag ii human doon, elele ii dabmedappig. Ag amu henana, ag ahilag nau hak hekkulagnu ii uuppig. Iitta. Ag kalu danab ile muttuɗig enanag bette tuɗidna maina, kayak hambuppuak madappig.

Jeremaia 44:8

Ag eppelagppa kayak hambuppuak dottolkad bappaidtteb, amu ag Isip daanna oiglagnu uɗin daanna, ippa ag kalu danab ile muttuɗig enanag bette main, kayak hambuppuak madatteb. Aɗinu ag heppeg, da oppoɗi bak dookkul? Ag amu tuɗidna hekkulag dayeb amu, ag akka ag hena, ag beɗulagppa ag nauhkkulag. Anam beeb, danab ah wanppan wan laa ohppan ag anidna, ag aon aon aqan, ag eheɗ laa awaknu anak waappa daaglagnu akkulag.

Jeremaia 45:4

Nai amunu amu, Yawe Nug aum. “Jeremaia, na nug amegppa imu ele appe doyaɗ! ‘Yawe Nug inam atte. “Da danab nug keeke babaitta, eɗua loppaɗtte, amubia da heppi, keeke da Juda wanppa bappaidmi ele am nauhakib daakku. Da danab nug keeke eppe be, eɗua hiɗatte, amubia da wan imuppa aɗi aɗi eppaladmi amu, da hiɗakkul.

Jeremaia 7:18

Nid naunau ag aab ilaknu aab aoegeg, ag mamelkad ag aab ilaeg, ah ag bret batappatak kayak hambuppuak laa onig Habnu Kuin, ag main nug mettaglagnu bappaidna medatteb. Ag da oppoɗi bekkunu wain gokkaɗaknu ofa kayak hambuppuak laala dilagppa hetteb.

Jeremaia 7:9

Ag yab hetteb. Ag layag qe mauhak hetteb. Ag ewau pakkua gappai hak kobol hetteb. Ag hettoɗiakppa nai hambuppuak aon, nai amunu, ‘Am nai genab,’ ahilag naippa ɠagattag qettan maditteb. Ag kayak hambuppuak Bal noobppa daanna, kalu danab ile muttuɗig enanag bette ele maina, nug medatteb. Ag kayak laala ele, ag anukka kayak amu ii dooppig, ag kayak amu ele dim lamadtteb.

Esekiel 17:5

Ai igel amu nug amu haaha, nug ag Israel, ahilag wanppanu muɗi aeg laa ele awa, ⌊danab amu dilag wanppa⌋ wan ittag eleppa eppom. Danab nug ad wilo le daugppa ebatte, anam nug aben le eleleppanab muɗi aeg amu eppom.

Hosea 10:1

Israel danab ah ag am en kuɗum ele daappig. Ao, ag am grep muɗi ena meu huana oa daatte, ag amubia daappig. Ag keeke kuɗum ele tuɗidna aon daan; ag keeke amu kayak laa madappig. Ag ee huanak aonna, ag men doɗo ele huanak aona; ag men doɗo amuppa men gappi, amuam kayak hambuppuak ahilkad amu, ahilag neekkak ena daaglagnu hena bappaidppig.