Ikki Danab 2:18 - Nobonob Baibel

¹⁸ Am haen Yawe Nug epeɗiak danab laa Israel dilag qappom amu, nug epeɗiak danab amu ele daayya, epeɗiak danab amu nug bau dayaya oiyom, haen amu ohppa Yawe Nug danab ah ehanatte, ag kekeɗ eppelagppa ii daappig. Aɗinu Yawe Nug epeɗiak danab anam he beppig? Haen nuhikkud danab ah ag kekeɗ eppelagppa daaeg, kekeɗ ag eheɗ hattana, guittak mattegeg, ag gaaegeg, Yawe Nug nuhikkud danab ah dilagnu oo bodoetta le meum.

Ikki Danab 2:18 ပူးပေါင်းရင်းမြစ်များ

Genesis 6:6

Nug amu antta, danab wanppa daaglagnu hattomnu kahipa aoɗom bia doya, ahilag haknu ooppa guittak doyom.

2 King 13:4

Aria, King Jehoahas nug Yawe ehanidkkunu unuqitte, Yawe Nug Jehoahasnu unuqittak amu doyom. Aɗinu? Yawe Nug doyom, Aram ag eheɗ huanak Israel dilagppa heppig.

Sam 12:5

Amu Yawe Nug atte. “Danab ah ag laa gai-iitta daaegeg, ag ag eheɗ hadatteb amu, da anadttem. Ao, daɗek ele ag aeqagatteb amu, da doottem. Anam daatte amunu, gemu amu, da ehanadppi qagaiettakppa ii daamnanu ahakkul. Ao, laa ag gai-iitta daatteb, daɗek daatteb ele amu, laa ag ahilagnu nai nau mattin, nau hattaglagnu dabmetteb ele amu, da gai-iitta daatteb, daɗek daatteb ele ehanadppi, ag uug amuppa ii daamna,” awa atte.

Sam 90:13

O Yawe, na ihinignu oot nauhe hee, ig uugppa daattem, amu na heppe, nahip oo nauhak iitta mekkunu unuqidttem. Na oot nauhom daatte; haen gane laa ele ukkeb, oppoɗi bak nahip am bodoedakku? Amu, na ig nahipad maɗi nid, na ihinignu oot gai-iitta doon oot mekkan ehanigkkutnu oɗ medattem.

Eksodas 2:24

Israel ag anam heeg, Kayak Nug ahilag gayak amu doya, Nug hei, Nug Abraham, Aisak, Jakop ele nug tituanna nai qagappig ele amu, Nug tituana nai qakkak nuhig amu dabmeum.

Eksodas 3:12

Amu Kayak Nug inam aum. “Da na ele daagnih. Amu geha na da, da na Israel ehanadkkutnu meitti gome ootppa genab dookkutnu at am, haen na Israel danab ah omaladppe, ag Isip uuglag, haen amuppa ag oh uɗin, ag qauko imuppa da noolppa dup nona binal mekkulag,” awa aum.

Eksodas 32:14

Moses nug anam unuqitte, Yawe Nug nuhig dabmak eɗue, Nug he, nuhikkud danab ah dilagppa eheɗ nau bekkunu aum amu, am ii beum.

Hosea 11:8

O gadon, ag Israel ag am dahilad; da attem hein uuadppi, ag laa eppegppa daaglag? Ao, ag Israel, ag dahilad; da attem hein uuadppi, laa nug ahilagnu, ‘Dahilad,’ dookku? Da attem hein uuadppi, ag Atma danab iitta meppig bia iitta mekkulag? Ao, da attem hein uuadppi, ag Seboim danab ah padal meppig bia padal mekkulag? Da oolppa kobol laa hekkulnu doottem. Ao, ahilagnu amu, da ool bodoetta le mette.

Jona 3:10

King nug anam a, danab ah ag anam heeg, Kayak Nug amu antta, Nug ag ahilag eheɗ hak uuppig ele anatta, Nug ahilagnu oo bodoetta, le me, Nug he, ag padal ii meppig.

Namba 10:9

Haen kekeɗ ag uɗippeg, ag ele ag wanelagppa ban hekkulagnu heppeg amu, ag kekeɗ amu ele ban hekkulagnu henana, ag trampet amu huana iwalppeg, da Yawe, ahilag Kayak, da amu doyen, da ag kekeɗ eppelagppanu eɗuen diikkul.

Duteronomi 32:36

Aɗinu ⌊Israel dilag kekeɗ ag anam aoglag⌋? Yawe Nug nuhikkud danab ah gumadkku. Ao, Nug ahilagnu oo gai-iitta doya oo matta ehanadkku. Nug amu hekkunu diig am, Nug ɠagattag ahilag iitta meeb, anidkku. Ao, Nug laippu laa, nug begbeg maɗi nidte, o begbeg maɗi nid iittatai, nug ena iinab dayebeb anidkku.

Josua 1:5

Josua, da haen oh na ele daagnih. Da Moses ele daamuɗ, amubia da na ele daagnih. Na wanppa bau daappe, haen amu ohppa laa nug na eɗidkkunu elele ii daama. Da na ii uuidpa. Da na ii paɗaidpa.

Ikki Danab 10:16

Israel danab ah ag anam unuqittona, ag heeg, laa dilag kayak hambuppuak dottolkad ag oolagppa ii daaeg, ag Yawe waappa daan, Nug oɗe dim lamidppig. Ag anam heeg, Nug ag uug nau dooppignu, Nug ooppa guittak doyom.

Ikki Danab 11:32

Jepta nug anam awowa, nug nuhig ban danab diie nona, Amon ele ban heeg, Yawe ehanitte, nug ag eɗattom.

Ikki Danab 2:19

Amge epeɗiak danab anen anen ag mauheg amu, danab ah ag eɗun, hak naunu ibppa wana, ag kobol diig ena iitta uɗig wak ele mamelkad aɗi hedappig, amu eɗittak henana oippig. Ag kayak laala dim lamadna, ag waalagppa daan, ag oɗelag dim lamidna, ag noolagppa dup nona binalag ele meppig. Ag ahilag eheɗ hak ii uueg, ag Yawe oɗe dim lamidmananu, ahilag dabmak ɠagattag eppom.

Ikki Danab 3:9

Amge, Israel ag Yawe ehanadkkunu gaaeg, Yawe Nug danab laa ag ehanatta, Kusan Risataim eppegppan eɗua diikkunu qappom. Nug onig am Otniel, nug am Kalep amag Kenas bekka.

Ikki Danab 6:12

Nug anam heehe, Yawenu engel nug gumitta noa aum. “Yawe Nug na, na ban danab ɠagattag okkai ele, Nug na ele daattep!” awa aum.

Ikki Danab 6:16

Gideon nug anam a, Yawe nug amegppa aum. “Da na ele daagnih amunu, na geha Midian dilag daup oh hadappe nauhkkulag,” awa aum.