Hosea 9:3 - Nobonob Baibel

³ Ag geha Yawenu wanppa ii daamna. Geha Israel danab ah ag Isip eɗun gokkulag. Ao, ag geha Asiria gona, appa ag ee ii lanaknu epeɗiak daatte lakkulag.

Hosea 9:3 ပူးပေါင်းရင်းမြစ်များ

1 King 9:7

da geha ag Israel danab ah da wan ag mattami imu amu, da wan imuppanu lamatten, mettid lag imu, da onil aguppa daakkunu dahilnu tituana meɗak daakkunu hemi amu, geha da baula amunu ii dabmepa. Am laa ele, wan atu ohppa, danab ah ag Israel ag nau bekkunu at daatte dabmena, ag aon aon aqaglag.

2 King 17:6

Hosia nug Israel dilag king dayaya, nuhig king dayaknu maɗ eblaih waɗeleppa amu, Asiria dilag king nug Samaria eɗatta, aab okkai amu awom. Awa, nug Israel danab ah diia, Asiria ukka, nug Israel laala aab Hala maattowa, laala amu diia, aab Gosan, nuhig wan ele, appa le Habor guguittak ele maattowa, Midia wanppan aab laalappa ele maattom.

Jeremaia 16:18

Juda ag am kayak hambuppuak huanaknab akkan, dahil wanppa meeg, wan amu dahil neekkakppa dubuttid tak ele daatte. Dottolkad amu, ag bau iitta, ag uɗig wak nau ele. Ao, ag heeg, kayak hambuppuak dottolkad dahil wanppa ambak daatteb. Dottolkad amunu amu, da oolppa uuaknab doottem. Juda danab ah ag anam hetteb amunu, da ahilag hak nau, ahilag hipunin ele, da diig amunu da bu elelenab madakkul.” Yawe Nug anam awa atte.

Jeremaia 2:7

Da ag Israel, da ag omalatti, ag uɗin, wan ittag ele imuppa uɗippig. Ag wan imunu ad meu, ee laa oh ele lakkulagnu uɗippig. Ag am anamnu aakku uɗippig, amge ag uɗin, wan da aul ag heeg, dahil neekkakppa dubuttid tak ele daatte. Ao ag heeg, da dahil wan imunu oolppa uuaknab doottem.

Gayak Nai 5:6

Ig ee aot lawota, bau daagnignu; ig Isip, Asiria ele waalagppa daagnignu, ig ag ele nug tituanta, nai qakkat oimut.

Esekiel 4:13

Yawe Nug anam ana, Nug tuɗitta aum. “Na anam hekkut, amubia Israel danab ah ag qinob da ahilag hipunin haknu nob madakkulnu heppi, kekeɗ ag uɗin eɗadna, diin gona heppeg, wanppan wan laalappa uug nauppa daan, ee dahil neekkakppa dubuttid tak ele lakkulag.” Yawe Nug anam awa aum.

Daniel 1:8

Amu king nug nid danab amu dilag ee, wain ele ag mattaglagnu aum, amge ⌊ee, le ele amuam Kayak Nug ag Israel ag ee, le ele aɗi aɗi lakkulagnu ɗo ag mattom, amu ee le ele amuam ɗo atte bia iitta⌋ amunu, Daniel nug kingnu ee, wain ele amu lanana heeb, Kayaknu neekkakppa ooppa dubuttid tak ele daamanu dabmak awa aɗe, dabmak amuam ɠagattag eppa dayom. Daniel nuhig dabmak anam daye, nug ee, wain ele amu lab, nug Kayaknu neekkakppa dubuttid tak ele daamanu, nug kingnu ikki danab dilag okkai am ee amu, wain amu ele ii lamanu oɗ mettom.

Hosea 11:11

Ag ai Isipnu hagagaɗna uɗitteb, amubia ag beɗulag hahaɗebeb uɗiglag. Ao, uppuɗil beɗulag nakok ag hagagaɗna, Asirianu uɗitteb, ag amubia beɗulag hahaɗebeb uɗiglag. Ag uɗippeg, geha da ag omalatte, eɗue appalagppa uɗie maadkkul.” Yawe anam atte.

Hosea 11:5

Amge dahilad danab ah ag oolag eɗueb, da dim lamiɗkkulagnu uuppig amunu, ag eɗun, Isip waalagppa daappig bia, laa waalagppa daaglag. Ao, ag Asiria waappa daaglag.

Hosea 7:11

Israel danab ah ag am ai kaaka ag aɗi keekenu oolag hette aolobnu, ag watteb, dotteb henana oitteb, amubia Israel ag hetteb. Tatam amu ag Isip dilagppa ehanittak aoglagnu oɗ meppig; appanu amu, ag Asiria dilagppa, ehanittak aoglagnu goppig.

Hosea 7:16

Da am Kayak Attannab Laa Oh Eɗattak daattem, amge da ag ehanadkkulnu gumiɗna ii uɗitteb. Ag am lat tanig laa lat doɗo pehetta ii ette, ag amubia daatteb. Israel dilag ikki danab ag dahilnu eheɗ doon dahil nai tappaeg ne oippig amunu, kekeɗ ahilkad geha ag qep elabppa aqaglag. Diig amunu Isip danab ah geha ag imadkkulag.” Yawe Nug anam aakku atte.

Hosea 8:13

Israel danab ah ag doɗ main, da meɗatteb. Ag mana mettak hena, ag teppu latteb, amge da, Yawe, da ahilagnu ena ii doottem. Gemu da ahilag hak naunu dabmein; da hipunin ag heppignu bu madakkul. Ag geha eɗun, Isip gokkulag.

Hosea 9:6

Aɗinu? Antte! Asiria ban danab ag laala ii aqaglag dayeb amu, geha Isip ag diiglag. Ao, Isip ban danab geha ag diin gona, Mempis maadppeg, appa ag mauhppeg boumadkkulag. Ag geha ippa ahilag wanppa ii daamna, geha uud keeke qaun ele bena, ahilag en, silwappa hak, teguadkkulag. Ao, keeke qaun ele geha ag laulkadppa bekkulag.

Lewitikas 18:28

Am ag Israel, ag kobol dubuttid ele hekkulag amu, amuppa ag heppeg, wan dubuttid tak ele daakku, amu da heppi, danab nug bahe ba gotte, amubia ag wan amu uun gokkulag. Danab ah ag geha wan amuppa daatteb ele, ag kobol dubuttid ele anam hetteb amunu, da aakku heppi, ag danab laa keeke bahe ba gotte bia, ag wan amu uun gona, appa ii daamna.” Yawe Nug ɗo amu Moses mettom.

Lewitikas 20:22

Ag dahil ɗo iɗu iɗu oh dabmettan dim lamitteg! Ag anam ii hekkulag amu, da geha, wan ag omalatte gottem ele, da amuppan heppi, danab nug bahe ba gotte, amubia ag wan amu uun gokkulag.

Lewitikas 25:23

⌊Am aib daulag atiom,⌋ wan amu dahilnab daatte amunu, ag wan amu aib hanhannu daden maknu meppig. Aɗinu? Wan am dahil; ag am wan laihnu danab ah daan, dahil wanppa daan, dahil uɗat hetteb.

Amos 7:17

Na da baula amunu ii madipanu attem amunu, Yawe Nug inam atte. ‘Uug naunab nahip-ppa bekku. Beeb, ah nahip nug aab okkai imuppa ib baag ah daakku. Nid danab nahipad, nid ahin nahipad ele amu, kekeɗ ag qep elabppa aqappeg mauhkkulag. Wan nahip amu, laa ag oppatppeg neeb, panin aoglag. Na amu, na wan laappa, wan imuppa iitta, laappa mauhkkut. Wan amuppa ag Kayak ii dimlamidtteb; ag kayak laa dim lamidtteb. Nahip-ppa anam beeb amu, kekeɗ ag heppeg, Israel ag genabnab genab ahilag wan imuppanu ahan gona, diia ukka laih me dayak danab ah wan laappa daaglag.’ Yawe Nug anam awa atte,” awa aum.

Maika 2:10

Ag nau amu hetteb amunu, ag ahan, wan imu uun ukkeg! Wan imuam ag ahilag aben hik aon daaglagnu iitta. Aɗinu? Ag heeg, wan ag daattebppa imu, am Kayaknu neekkakppa dubuttid tak ele daatte. Ao, ag heeg, wan ag daattebppa imuam nauha autanab awom daatte; babaittaknu elele iitta.

Aposel 10:14

Nug anam aum, amge Pita nug aum. “Naɗi, da Juda dilag ɗoppa doɗ ii lanaknu epeɗiak daatte deɗ laa ii lami, gemu ele ii lattem,” awa aum.

Duteronomi 28:63

⌊Ag Nug dim lamittegeg,⌋ Yawe Nug ena doya ehanatte, ag ena daan, kuɗum appatppig, amubia ag Nug dim ii lamidkkulag, ag ena daamnanu, Yawe Nug ag hatteb, padal mena, iitta mekkulagnu ena dookku. Nug heeb, ag auhppeppeg ukkeb, wan ag nona aon daaglagnu daatte ele, ag amuppa ii daamna.

Duteronomi 28:68

Anam dayeb, Yawe Nug ag maatteb, ag uubppa eɗun Isip gokkulag. Amuam oiyak okkainab, ag baula ii hemananu da ag amelagppa ami. Ag appa gokkulag amu, ag aakku akka ahilkad kekeɗ eppelagppa begbeg maɗi nid maɗi ah ele daaglagnu hekkulag, amge auntai laa ag daden maadkkunu oo ii daakku. Moses nug anam Yawe oɗeppanu nai Israel danab ah mattom.

Duteronomi 4:26

amunu, gemu da hab, wan ele aa dopeɗ, da nai imu Israel, ag amelagppa madippi, aa dooyya, dimppa aa da genab ag Israel danab ah, da ag amelagppa ami akkulahnu elele daaglah. Ag Israel, ag Jodan mataɗna wana, wan aon daaglagnu daatte, amuppa daaglagnu hetteb, amge diig amunuib ag haen elab appa, wan amuppa ii daamna. Iitta! Aɗinu? ⌊Ag digmen, kayak hambuppuak dim lamidkkulag dayeb,⌋ Yawe Nug genab heeb, ag padal mena autna aoglag.

Josua 23:15

Amge Yawe, ahilag Kayak, Nug keeke ena ag madakkunu nai ana qakkom ele, Nug amu ag genab mattom, genab amubia ag nug oɗe ii dim lamidkkulag dayeb, Nug geha ahilagppa haen nau ele heeb bekku. Nug geha wan ena Nug ag mattom, Nug imuppanu ag ohnab heeb, nauhna iitta mekkulag.