Amu Israel danab ah ag le lanana, spak metteb ele, ahilagnu am gadonnab gadon. Gemu ahilag aab anuqak, Samaria, aab amuam binag amahlak oppiaawak ele; nug aben laa wan ittag enanag ele, amuppa qauko nakok eleppa daatte. Amu Israel danab ah ag wain lanana, spak metteb ele ag Samaria onig attannab human, laa oh eɗattak anambia dootteb, amge iitta! Bala laa bunaɗkkunu mauɗe neekkak ena iitta daatte, aab amuam amubia daatte.
Hosea 7:1 - Nobonob Baibel1 Da heppi, Israel bau mekkunu hettem. Da anam hettem, amge da ehanidkkulnu heiyi, Israel dilag hipunin am miagib daatteb. Ao, da ehanidkkulnu heiyi, Samaria danab ah dilag ɗo tippalak miag atiak daatteb. Aɗinu? Israel danab ah ag hambuppuak henan daatteb. Ao, ag laa laulkad loppaɗadna nona, keeke yab aotteb. Ge, ag oohona, ibppa danab ah dilagppa keeke yab agatteb. အခန်းကိုကြည့်ပါ။ |
Hosea 7:1
30 ပူးပေါင်းရင်းမြစ်များ
Aɗinu ig amu ii anidttem. Ig hipunin kuɗumnab hetat oitut, na, Yawe, na hipunin amu oh anadttem. Ao, danab hettoɗiakppa layag eheɗ heumnu atte amu, ihinig hipunin ag ihinignu na amenppa anam bia hetteb. Eheɗ hak ihinig am laa nug he ii iitta meppig; amu ihinigppa ina daatteb. Ao, ig hipunin digdig hemut amu, ig amu aakku doottem.
Hipunin ig hemut am, Ig Yawe waappa daagnignu uut, ig nuhig nai tappaut neum. Ig Nug dim lamidkkunignu amut, amge ig uut, ib laappa gomut. Ig ihinig Kayak dimettamut. Ig danab ah laa ele eheɗ hadata, uug kuɗum mattata, ig laa ag ele amu hekkulagnu eeɗadmut. Ig Kayak waappa daagnignu uut, ig laa ag ig gumigkkulagnu maattom ele amu, ig ag lamadtata, ig laa ag anam hekkulagnu eeɗadmut. Ig oonigppa hambuppuak nai dabmetat, ig amu oɗenigib mattimut.
Nai doya mala hettoɗia epeɗia elele mettak kobol am uma ukkom daatte. Ao, genab tutukku hak kobol am miag iitta, am umaib daatte. Aɗinu? Doyak diig genabibppanu mattiaknu, dim lamittaknu ele, kobol amuam na qeum, ihinigppa ii daatte. Ge, doyak diig genabibppanu mattiak kobol, dim lamittak kobol ele ihinigppa ii daattep.
Ee makkeg apag amu onig Oholah; makkeg onig am Oholibah. Ah aɗit aa am da Yawe, dahilaɗ daapiɗ. Aa anam daayya, aa nid danab, nid ah ele menuatpiɗ. ⌊Amge ah aɗit am piksa ippunittak daattep.⌋ Oholah nug Samaria ⌊Israel danab ahnu piksa⌋ daatte, amu Oholibah am Jerusalem ⌊Juda danab ahnu piksa⌋ daatte.
Jerusalem danab ah, ag kobol nau heppig; ag gappai heeb baknu kobol dim lamidppig. Anam amu, da heppi, ag oppiaawak daaglagnu hemi, amge ag uun, dubuttid ele daaglagnu heppig. Anam amunu, ag bu awak iitta eleppa oppiaawak baula ii daamna. Iitta. Da ahilagnu oppoɗi bak doottem, amu da bu eheɗ madappi ukkeb, gogppa teeb, dahil oppoɗi bak oug meeb, ag oppiaawak daaglag.
Am danab ah Samaria daatteb ele ag kekeɗ uɗin, makau gaiɗ dottog golppa hak, Bet Awen appa daatte amu, ag uɗin, dottog amu ahilag wanppanu aon gomananu baɗan daatteb. Amge kekeɗ ag uɗin anam hekkulag amunu, kayak hambuppuak amu dilag mana mettak danab, danab ah laa ag dottog amu dim lamidtteb ele, ag geha nuhignu oolag dookku. Ge, danab ah oh ag dottog amu, nuhig neekkak enanagnab ele, ag amunu gamag ahak okkai dooppig, gemu ele hetteb amu, haen kekeɗ ag appalagppa maon gobeppeg, ag diig amunu geha oo doyak aoglag.
O gadon, ag Israel ag am dahilad; da attem hein uuadppi, ag laa eppegppa daaglag? Ao, ag Israel, ag dahilad; da attem hein uuadppi, laa nug ahilagnu, ‘Dahilad,’ dookku? Da attem hein uuadppi, ag Atma danab iitta meppig bia iitta mekkulag? Ao, da attem hein uuadppi, ag Seboim danab ah padal meppig bia padal mekkulag? Da oolppa kobol laa hekkulnu doottem. Ao, ahilagnu amu, da ool bodoetta le mette.
Israel danab ah ag am danab laa nug ulah lanan daakkunu hette bia hetteb. Ao, ag am danab laa nug kaɗag ulah deɗ ohppa dim lamittattaib hette bia hetteb. Ag hambuppuak kuɗumnab mattinna; ag danab ah guittak nau mauhnoak madatteb. Ag nug tituana nai qakkak Asiria danab ah ele heeg; ag ⌊Isip ahilagnu, “Ig lainig,” dooglagnu, ag amu daden nob daakkunu⌋ olip goɗen meeg, Isip gotte.
Yawe Nug inam ele atte. “Mana mettak danab, ag nai imu doyeg! Ao, ag Israel dilag ikki danab oh, ag daulag human, doyeg! Ge, ag king baegppan oh, ag daulagppa doyeg! Aɗinu? Danab laa pelem ma, doɗ aotte, amubia ag Mispa appa, kayak hambuppuak dottolkad noolagppa dup nona binalag mena, ag danab ah laa ag ele amu hekkulagnu omalatteg, hipuninppa noppig. Ao, ag danab laa nug uhui ma, ai aotte, amubia ag Tabor appa ag kayak hambuppuak dottolkad noolagppa dup nona binalag mena, ag danab ah laa ag ele amu hekkulagnu omalatteg, hipuninppa noppig. Anam amunu, bu awaknu nai imuam ahilagnu.
⌊Am Yawe Nug atte.⌋ “Ag Israel danab ah, da aɗi heppi, ag kobol ena hekkulag? Ao, ag Juda danab ah, da aɗi heppi, ag kobol ena hekkulag? Oo mauhaknab kobol ahilag dahilnu am buttua buttuɗai paha oppia gotte bia iitta mette. Yo, oo mauhak kobol ahilag dahilnu am buttua baito paha qaɗaiedatte bia iitta mette.
Amu Yawe Nug inam atte. “Israel danab ag kobol tutukku dim lamidna hekkulagnu ib ii dootteb. Ag ahan, lailkad dilag keeke hamu aotteb. Ag ban danab laih gona, wan laappan daup eɗadna, wan amuppan keeke aon gotteb, ag Israel, ag amubia ag lailkad dilagppa anam hena, ag keeke aotteb amu, ag aon gona, aab aɗ ɠagattagnab ele, ag aguppa daatteb amu, ag appa aon gona metteb,” awa atte.
Uug amu bekkunu diig am, ag Juda, ag Israel dilag king nau, Omri, ag nuhig ɗo dim lamidna, hipunin hetteb. Ao, ag Israel dilag king nau, Ahap, nug baekkudppa ele kobol ag aɗi aɗi heppig bia henana, Ahap aɗi ag kobol atten atten heppig amu, ag amu dim lamidna oitteb. Ag ahilag nai dim lamidtteb amunu, da laa ag heppeg nauhkkulagnu ippulag ii oo nepa. Da amu ii hepa amunu, wan laappan danab ah ag eheɗnab imadkkulag. Ao, wanppan wan oh dilag danab ah ag ahilagnu, ‘Keeke hamunab,’ dooglag,” awa atte.
ကြော်ငြာတွေ