Hosea 14:3 - Nobonob Baibel

³ Asiria ag ig ehanigkkulagnu elele iitta. Ao, ig ban haknu hosppa ban hetata, ena daagnignu ii dabmemata. Ig keeke dottolkad eppenigppa hak, ig amu dilagnu baula, ‘Am ihinig kayak,’ ii amata. Aɗinu? Na aakkuib nid anilkad mamelkad iitta dilagnu oot bodoetta, le mette.” Ag anam aig!

Hosea 14:3 ပူးပေါင်းရင်းမြစ်များ

2 Stori 16:7

Amu haen amuppa propet danab Hanani nug Juda dilag king Asa gumitta ta, nug amegppa aum. “Na Yawe, nahip Kayak, na Nug ehanidkkunu ii dabmeme. Iitta. Na Aram ag na ehanidkkulagnu dabmeme. ⌊Aram ag nahipad kekeɗ,⌋ na ahilagppa ehanittak awaknu ii helom, na ag eɗadppe, ag na eppenppa daalob.

Sam 10:14

⌊Amge,⌋ O Kayak, na hanhan laa nug layag guittak medatte, na amu anidttem amunu, na ag heppig amu, na anidna malame. ⌊Diig amunu amu,⌋ danab ah bodoettak ag nahipnu oolagppa genab dootteb. ⌊Amu diig amunu ele,⌋ na nid anilkad mamelkad mauhppig ele, na amu dilag aɗ itak daattem.

Sam 146:3

Wanppan gumak danab ag na aun, ag na padal memananu ehanidkkulagnu elele iitta, na amu dilag aib ootppa genab doome. Ao, wanppan danab mauhtteb ele, ag na padal memananu ehanidkkulagnu elele iitta, na amu dilag aib ootppa genab doome.

Sam 146:9

Nug wan laihnu danab atognoadtte. Amu Nug ah qab, aria nid ag mamelkad mauhppig ele ehanadtte. Nug anam anam hette, amge Nug nau hak danab dilag maittak he nauhtte.

Sam 33:17

Am hos laala, daup ag amu attan tena oinna ban hetteb ele, hos amu ag heeg, daup amu ag kekeɗ ii eɗadtteb. Ao, hos amu ag ɠagattagnab, amge ag danab ag qaɗelagppa daaegeg oitteb ele, ag ag ehanadppeppeg, padal ii memananu elele iitta.

Sam 68:5

Kayak Nug nuhig aben nuhignu tituanak daatte ele, Nug amuppa daatte. Nug laa oh ag mamelkad mauhadppig ele, Nug ag mamelag daatte. Nug ah qab atognoadtte.

Aisaia 1:29

Ag ad ok, ⌊ag amu waalagppa kayak hambuppuak noolagppa dup nona binalag metteb,⌋ ag ad amunu enanagnab dootteb ele, ag amunu uɗalag nekku. Genab, ag dad ena ena, ⌊amuppa ag kayak hambuppuak noolagppa dup nona binalag mekkulagnu⌋ tituantteb amu, ag amunu laa noolagppa uɗa nak nau guittak ele dooglag.

Aisaia 2:20

Haen amuppa danab ah ag geha ahilkad kayak hambuppuak dottolkad golppa, silwappa ele hak, ag amu noolagppa dup nona binalag mekkulagnu eppelagppa heppig, ag dottolkad amu oh geha agappeg, tog, meɗeb ele daattebppa gokkulag.

Aisaia 27:9

Yawe Nug anam hekku amunu, amu beeb, Israel wanppa kayak hambuppuak qaɗab laa ena ii daama. Iitta. Oh nauhadna autnanab aon, gappud bia daaglag. Israel wanppa kayak hambuppuak Aserah dabmekkulagnu biidod laa qappak ii daama. Amu qaɗab laa, qaɗab amuppa danab ag kalu danab ile muttuɗig enanag bette ele manatteb amu, kayak hambuppuak dilag qaɗab laa amu ele ii daama. Iitta! ⌊Amu beeb, Israel ag ele oolagppa keeke amu uuppeg amu, Yawe Nug⌋ ib amuppa, Nug Jakop buɗub dilag eheɗ haknu nob nau nuhig ɠagattag naɗippa heeb, iitta mekku. Ao, ag hipuninnu nob nau aolob, amge ag ii aomna.

Aisaia 30:16

Ag amu uuna, ag appig. ‘Iitta. Ig hos attan oolkkunig.’ Ag anam appig amunu genab, ag oolkkulag, ⌊amge kekeɗ ag ag lamadkkulag⌋. Ag, ‘Ig hos qaiettan gotteb ele attan daat oolkkunig,’ appig amunu genab, ag anam oolkkulag, amge ahilag kekeɗ ag hos qaiettan, huan gotteb ele amu, ag amuppa ag lamadna, ag eɗadkkulag.

Aisaia 30:2

Ag da oɗ ii meɗanna, ag Isip gona, ehanittak ahilagppanu aoglagnu hetteb. Isip ag ehanadppeppeg ena daaglagnu dabmetteb. Ao, danab nug aam ɠagattag nette haenppa ad logoppa ena daatte, amubia ag Isip ahilag padal mak eɗitteb ena dayaknu ehanittak dayebeb, ena daaglagnu dabmetteb. ⌊Ag nau amu oh hetteb amunu, ahilagnu gadonnab gadon.⌋

Aisaia 31:1

Aun aɗi ag Isip appanu ehanittak aoglagnu dabmetteb amu, ahilagnu am gadonnab gadon. Ag bannu hosppa ⌊Isipnu⌋ ehanittak aoglagnu dabmetteb. Ag Isip dilag daup bannu karis kuɗum eleppa daan, ban hetteb doon amunu, bannu karis amuppa ehanittak aoglagnu oolagppa genab dootteb. Ao, ag Isipnu ban danab kuɗumnab hos attan daan oin, ban hetteb doon amunu, ahilagppa ehanittak aoglagnu oolagppa genab dootteb. Ag anam dabmetteb, amge ag Israel dilag Kayak Oppiaawak Ele, ag nuhig dabmak aoglagnu oɗ ii medatteb. Ao, ag Yawenu, ag ehanittak nuhigppanu aoglagnu ii dabmetteb. Ag anam hetteb amunu, ahilagnu gadonnab gadon.

Aisaia 31:3

Isip danab ag am danabib, ag Kayak iitta. Ge! Isipnu hos ag doɗ. Ag ouɗi iitta. Yawe Nug ɠagattag nuhigppa heeb, miag atieb, Isip dilag daup, ag laa ehanadkkulagnu hetteb ele amu, ag taataɗ qekkulag. Ao, danab laa ag Isip appanu ehanittak aotteb, ag nena qekkulag. Ge, ag oh laippu padal mekkulag.

Aisaia 36:8

⌊Asiria dilag ban daup ikki banppa o ban guguittakppa daatte nug anam anana, nug tuɗitta, Juda awa awa aqatta, inam aum.⌋ “Ahappeg! Ag dahil naɗi, Asiria dilag king, ag nug ele nai qakkeg! Ag amu hekkulag dayeb amu, da hos 2,000 ag madakkul, amge ag Juda ag danab 2,000 hos amu attan daan gona, ban hekkulagnu anadkkulagnu elelete?

Jeremaia 49:11

Amge ahilkad nid naunau, anilkad mamelkad iitta amu, da ag mauhmananu ehanadkkul. Ahilkad ah qab ele, ag dahilnu oolagppa genab dooglagnu elele,” awa atte.

Esekiel 36:25

Ag wan ahilagppanab daappeg, da le oppiaawak ele awen, ahilagppa tauɗppi ag oppiaawak daaglag. Da heppi, dubuttid, da noolppa daakkun elele iitta ahilagppa laa ii daama; ag baula kayak hambuppuak dottolkad noolagppa dup nona binalag ii memana.

Esekiel 37:23

Ag anam daappeg, da ehanadppi, ag tatam kayak hambuppuak dottolkad, amu oh am uɗig wak ele, ag ag noolagppa dup nona binalag meppig, kobol nau digdig laa ele heppig amu, ag baula anam ii hemana. Da ehanadppi, ag baula hipunin ii henana, da ii dimeɗamna. Da heppi, ag oppiaawak daaglag. Ag dahilad danab ah daappeg, da ahilag Kayak daakkul.

Hosea 12:1

Israel danab ah ag am danab laa nug ulah lanan daakkunu hette bia hetteb. Ao, ag am danab laa nug kaɗag ulah deɗ ohppa dim lamittattaib hette bia hetteb. Ag hambuppuak kuɗumnab mattinna; ag danab ah guittak nau mauhnoak madatteb. Ag nug tituana nai qakkak Asiria danab ah ele heeg; ag ⌊Isip ahilagnu, “Ig lainig,” dooglagnu, ag amu daden nob daakkunu⌋ olip goɗen meeg, Isip gotte.

Hosea 13:2

Gemu amu, ag tuɗidna, hipunin henan henan daatteb; ag kayak hambuppuak dottolkad danab ah ag amu noolagppa dup nona binalag mekkulagnu silwa ahilagppa hetteb. Ag dottolag amu eppelagppa kobol kobol ele hattana autna aotteb. Ao, danab uɗat amu haknu doyak okkai ele, ag dottolkad amu oh hetteb. Am danab ah laala ag Israel danab ah dilag atteb. “Ag nid naunau ahilkad manan, kayak hambuppuak mattanna; ag makau gaiɗ dottolkad eppelagppa hadappig, ag ag ootuqadtteb,” aon atteb.

Hosea 14:8

O Israel, ag dottolkad eppelagppa hak, ag amu dilagnu awaidna dayeg! Da aakkuib, ag dabmadette atognoadttem. Da am ad pain ena laa bia, ⌊ag da waalppa ena daaglagnu elele⌋. Ahilag meu wak am dahilppanu ahilagppa uɗitte.” Yawe Nug anam atte.

Hosea 2:17

Da heppi, geha nug kayak hambuppuak Bal iɗu iɗunu daug atikku. Ao, geha nug ag onilag diiak baula ii hema.” Yawe anam awa aum.

Hosea 4:12

Am dahilad danab ah ag dabmak aoglagnu keeke adppa hoyak oɗ madatteb. Ao, ad maha ag ulum nai madatte! Aɗinu? Ag ahilag kayak hambuppuak noolagppa dup nona binalag mekkulagnu oo hak nau doon hetteb amu, ahilag oo hak nau amuam he, ag ib apiɗidna gotteb; ag da, ahilag Kayak, ag da ippunadmi bia da dim lamiɗkkulagnu uun hena, ag kayak hambuppuak dim lamidna oitteb.

Hosea 5:13

Amu Israel danab ah ag ahilag oɗe anidna doon, ag Asiria dilag king ehanadkkunu dabmena oɗ medappig. Ge, Juda danab ah ag ag ihilkad anidna, ag Asiria dilag king okkai ehanadkkunu dabmena oɗ medappig. Ag anam heppig, amge Asiria dilag king nug heeb, ag ahilag oɗe iitta mekkunu elele iitta. Ao, Asiria dilag king nug heeb, ag ihilkad iitta mekkunu elele iitta.

Hosea 7:11

Israel danab ah ag am ai kaaka ag aɗi keekenu oolag hette aolobnu, ag watteb, dotteb henana oitteb, amubia Israel ag hetteb. Tatam amu ag Isip dilagppa ehanittak aoglagnu oɗ meppig; appanu amu, ag Asiria dilagppa, ehanittak aoglagnu goppig.

Hosea 8:6

Israel danab ah oolagppan danab uɗat amu haknu doyak okkai ele nug eppegppa makau gaiɗ dottog amu heum. Amuam Kayak iitta! Diig amunu geha danab ag loppaɗppeg, Samaria dilag makau nag dottog amuam qatti qatti nekku.

Hosea 8:9

Aɗinu? Ag Asiria gona, ag ehanadkkulagnu oɗ madappig; ag am donki dakkuɗ laa nug mauhnoak, laih ukka, eɗua uɗia, hamu hamu oitte bia daatteb. Israel danab ah ag am ah laa nug nukka beɗu awa, danab matte, nug ele niitteb, ag amubia hetteb.

Jona 2:10

Jona nug anam unuqitte, aakku Yawe he, kakai nug Jona abuɗppa kele teum.

Sekaraia 13:2

Yawe Nukka Ɠagattag Oh Ele Nug atte. “Deɗ amuppa da heppi, Juda wanppa danab o ah laippu laa nug kayak hambuppuak noobppa dup noa binag ii mema. Diig amunu amu, danab ah ag kayak hambuppuak laippu laa onignu ii dabmemana; oh am daulag atikku. Da heppi, propet ouɗi nau dilag ehanittakppa uɗat hetteb, amunu laippu laa, amu ouɗi nau amu oolagppanu laippu laa ele Juda wanppa iinab daama.

Jon 14:18

Da ag nid laa, nug anig mameg ele mauhpiɗ, nukkanab daatte, da amubia ii uuadpa. Iitta. Da gumatte uɗikkul.

Duteronomi 17:16

Am king nug nukka nuhig hos kuɗum ele daakkunu ii hema. Nug danab nuhikkud maatteb, Isip gona, hos daden ii mekkulagoitte. Aɗinu? Yawe Nug ag amelagppa aum. “Ag eɗun, Isip ii gokkulagoitte.”