Hosea 10:12 - Nobonob Baibel

¹² Ag Israel, ag genab tutukku hak kobol ag oolagppa ebappeg, Yawenu oo mauhaknab ag tonadkku. Ag oolag ɠagattag eppak daamanu, ag heppeg, ag oolag gai-iitta dayaɗ! Aɗinu? Gemu am ag Yawe anidna, Nug dim lamidkkulagnu mattiglagnu haen aakku daatte. Ag amu hekkulagnu diig am, ag amu heppeg, Nug gu digittig bia he ne, dattan keeke ena bette, amubia Nug heeb, ag genab tutukku hak danab ah bena daaglag.

Hosea 10:12 ပူးပေါင်းရင်းမြစ်များ

Sam 105:4

Ag Yawenu, nuhig ɠagattag okkai elenu oolagppa genab doyeg! Ao, ag hanhan Nug anidna dim lamidkkulagnu Nug mattieg!

Sam 72:6

King nug gu naana, gikkiɗah le medatte bia, nug anam bia daakku. Yo, nug gu naunau na, wan le medatte bia daakku.

Prowerb 11:18

Nau hak danab nug keeke aotte me, nug keeke diig genab ele ii aotte; amge danab nug genab tutukku hak kobol hette amu, nug meu ena genab aotte.

Prowerb 18:21

Na aɗi nai madittem, amuppa na meu aottem. Na amuppa bau daakkut, o mauhkkut. O iitta, laa nai amuppa bau daakku, o mauhkku; danab ag nai dabmettanna maditteb, ag amuppa nob ena aoglag.

Eklisiastis 11:6

Na nahip uɗat attem meu okku amu, na ii doottem; uɗat laa imu meu okkutai, o uɗat laa umu am meu okkutai, o aɗit oh meu okkulahtai, na ii doottem, amunu na buttua ahan, ee keeke eppan; tueb ele na uɗat henan daye!

Aisaia 30:23

⌊Ag amu heppeg,⌋ Yawe Nug heeb, gu nug keeke ag ebappig ele le medakkunu neebeb, ee meu huanak, ittag ele wanppanu aoglag. Haen amuppa ahilag makau ag gikkiɗah dad okkai okkaippa gikkiɗah lanan daaglag.

Aisaia 31:1

Aun aɗi ag Isip appanu ehanittak aoglagnu dabmetteb amu, ahilagnu am gadonnab gadon. Ag bannu hosppa ⌊Isipnu⌋ ehanittak aoglagnu dabmetteb. Ag Isip dilag daup bannu karis kuɗum eleppa daan, ban hetteb doon amunu, bannu karis amuppa ehanittak aoglagnu oolagppa genab dootteb. Ao, ag Isipnu ban danab kuɗumnab hos attan daan oin, ban hetteb doon amunu, ahilagppa ehanittak aoglagnu oolagppa genab dootteb. Ag anam dabmetteb, amge ag Israel dilag Kayak Oppiaawak Ele, ag nuhig dabmak aoglagnu oɗ ii medatteb. Ao, ag Yawenu, ag ehanittak nuhigppanu aoglagnu ii dabmetteb. Ag anam hetteb amunu, ahilagnu gadonnab gadon.

Aisaia 32:20

amge ⌊dimppa, haen ena bekku, haen amuppa⌋ ag itittak ena aon daaglag. Ag le guguittak ee eppaladnan, ag heppeg, ahilag makau, donki ele ag gikkiɗah lakkulagnu laih laih gona hamu oiglag.

Aisaia 44:3

Aɗinu ⌊ag ii baɗamnanu attem⌋? Da heppi gu huana wan qaɗaiettakppa na, leppu medakku. Ao, da heppi, gu huana neeb, le naunau kuɗum wan qaɗaiettakppa gokkulag. Da anam hekkul amu, anamib da dahil Ouɗi ag buɗulkad madakkul. Ao, da dahil itittak ena ag buɗulkad madakkul.

Aisaia 45:8

Gu na, wan oh leppu medatte, amubia genab tutukku hak kobol hab attannu wan atu oh tonaɗ! Ao, gu lombigppanu na, wan oh leppu medatte, amubia genab tutukku hak kobol hab attannu na, wan atu ohppa dayaɗ! Wan nug gu awe, keeke bette, amubia ⌊genab tutukku hak kobol neeb,⌋ Padal ii maknu ehanittak kobol ba, okkai maɗ! Ao, wan gu awe, keeke bette, amubia ⌊genab tutukku hak kobol neeb,⌋ kobol amu, Padal ii maknu ehanittak kobol ele oh laippu okkai meiɗ! Da, da Yawe, da kobol amu hei beum.

Aisaia 48:18

Ag dahil nai, dahil ɗo ele tutukku dabmena dim lamidlob am ena, amge ag ii heppig. Ag anam helob amu, ahilag maɗoɗ am le hanhan ugakkaib daatte bia daalo. Ag helob amu, ahilag genab tutukku hak kobol am yu duban qa gotte uɗitte, ahilag genab tutukku hak kobol am anam daalo.

Aisaia 5:6

Dad mameg nug anam anana amu, nug tuɗitta aum. “Geha da wan amu heppi, wan meu waknu nakokib elele bia dayebeb, appa danab nug muɗi grep babaittak uɗat, wan buuak uɗat laa ele ii hema. Uud keeke qaun ele bena dad tonappeg, da geha gu ele dad amuppa nemanu, da ɗo mekkul,” awa aum.

Aisaia 54:14

Ag genab tutukku hak kobol dim lamidnana, tutukku, ɠagattag anamib daaglag. Yawe Nug heeb, keeke laa ag baɗaglagnu ii daama amunu, eheɗ hak laa eppelagppanu amu, eheɗ hak amu ahilagppa bekkunu aib dabmeppig. Ao, Yawe Nug heeb, baɗak nau ag gukkuattak ii daama amunu, ag baɗak naunab ahilagppa bekkunu aib dabmeppig!

Aisaia 55:6

Gemu ag Yawe anidna dim lamidkkulagnu mattiglagnu elele daatteb amunu, ag Nug anidna dim lamidkkulagnu Nug mattieg! Ao, gemu, Yawe Nug ag gukkuattak daatte amunu, ag Nug unuqitteg!

Jeremaia 50:4

Amu Yawe Nug atte. “Haen amuppa amu, Israel danab ah, Juda danab ah ele ag ahan, ag gaanna, ag da, Yawe, ahilag Kayak, ag da aniɗna dim lamiɗkkulagnu mattiɗkkulag.

Esekiel 34:26

Da ag, amu aben oh dahil qauko Sion talilittak daatteb ele itadppi, ena daaglag. Da heppi, gu nuhig haenppa elele neeb, itittak ena ele aakkuib daaglag.

Hosea 12:6

Anam amunu, gemu amu, ag Israel danab ah ag ahilag Kayak toppa eɗun gokkulagoitte! Ag haen ohppa oo mauhaknab kobol, nai doya mala hettoɗia epeɗia elele mettak kobol ele dim lamidkkulagoitte. Laa amu, ag haen oh, Kayak, Nugib am ahilag Kayak, ag Nug doon, nuhignuib oolagppa genab dooglagoitte.

Hosea 14:1

O Israel, ag eɗun, Yawe, ahilag Kayak, ag Nug waappa dayeg! Aɗinu? Ag hipunin heppig, amuppa ag nena qeppig.

Hosea 6:3

Ig Yawenu doyaknu wagai metu! Ao, ig Yawe doognignu wagai metu! Ig anam hekkunig amu, aam nug genab buttua hanhan bette, genab amubia, Yawe Nug uɗia, ig ehanigkku. Ge, gu oug haen iitta metteppa hanhan nette, amubia Nug genab uɗia, ig ehanigkku.” Israel ag anam akkulag.

Hosea 8:7

Israel danab ah ag kobol nau huanak hetteb amunu, ag geha bu naunab aoglag. Amuam laa nug ulah eppalo, amge meu awak haenppa nug ulah kilibob aolo, amubia. Geha bu qak Israel danab ah dilag, amuam ee nug ena ii bema, meu ele ii oma. Meu laa ololob amu, wan laihnu danab ag akkan lalob.

Amos 5:15

Ag kobol enanu amu, ag oo mauhak doon, ag kobol naunu, ag nau ninig ele doyeg! Ag hettoɗiakppa nai doya mala hettoɗia epeɗia elele mettak kobol ele dim lamitteg! Ag anam hebeppeg amu, Yawe Kayak Nukka Ɠagattag Oh Ele, Nug geha ag Israel danab ah, oɗo yaak daaglag, Nug ahilagnu oo gai-iitta doya oo matta ehanadkkutai.

Amos 5:4

Laa amu, Yawe Nug Israel danab ah amelagppa atte. “Israel danab ah, ag bau daaglagnu, ag da aniɗna dim lamiɗkkulagnu da mattiɗna oiyeg!

Amos 5:6

Ag Israel danab ah, ag eɗun, Yawe mattina, dim lamidkkulagnu mattieg! Iitta amu, aab aɗu paha keeke ewe iitta mette, amubia Yawe Nug paha bu matteb, ag padal mekkulag. Nug anam hekku dayeb amu, kayak hambuppuak ahilkad Betel appa ag padal mak amu, aab aɗu huana diditte bia amu, kayak hambuppuak amu ag ehanadkkulagnu elele iitta.

Amos 5:8

⌊Ag laa ag anam hetteb amu, ag⌋ Laa Nug hoɗoppai huu mak laa onig Pledes, laa onig Orion ele, Nug ag hatta, abenalkadppa mattom daatteb, ag Laa Nug he, tuqannu gatatu am eɗua, wagkkaɗakppa amahlak daatte, ag Laa Nug he, amunnu amahlak am eɗua, tuqannu gatatu daatte, ag Laa Nug he, yuppan le am wan tonadtte, Nug onig am Yawe, ⌊ag Nug mattina, dim lamidkkulagnu mattieg⌋!

Luk 13:24

“Ag od hogogdoak ele noaknu ebehilag qaiettaɗ! Da ag amelagppa attem, danab kuɗum ag od oɗe nakokppa nokkulagnu hekkulag, amge ag elele iitta.

Aposel 2:18

Ao, haen amuppa amu, da dahil Ouɗi Nug dahilad maɗi nid, dahilad maɗi ah ele madappi, ag propet nai mattiglag.

2 Korint 9:10

Kayak, Nug ee eppaknu danab ee tumu madatte, Nug ee digdig danab oh lakkulagnu ele madatte amu, Nug geha ag keeke oh elele matteb, ag laa madappeg, aria ag Korint ag geha genab tutukku hak kobol ahilag amu nug tuɗid okkai maama, ag laa daɗek daatteb keeke kuɗum mattaglagnu elele daaglag.

Jems 3:18

Danab ag maɗoɗ ikki daatteb amu, ag am danab ee eppowa meu aotte, amubia meu laa, amuam genab tutukku hak kobol, meu amu aotteb.