Hibru 9:4 - Nobonob Baibel

⁴ Aben amuppa kalu danab ileb muttuɗig enanag baknu qaɗab golppa hak, amu nug tituana nai qakkak kunup, ag amu adppa hewona, ad amu qaɗeppa ooppa ele gol mewona, ag nug ameg am golppaib heppig amu, keeke aɗit amu aa aguppa daapiɗ. Amu kunup amu ooppa gol id laa, amuppa ag maana inappig, aria Aronnu bu ita beum ele, amu men otala aɗit, amuppa ɗo nai yaalattak ele, keeke amu oh kunup amu ooppa daappig.

Hibru 9:4 ပူးပေါင်းရင်းမြစ်များ

1 King 7:50

tappiɗ gol ena dubuttid iitta eleppa hak; lamnu wik babaittaknu keeke; tiig amuppanu awa tauɗeb ukkaknu tappiɗ, tappiɗ naunau, amu tappiɗ danab amuppa kalu danab ile muttuɗig enanag bette ilappig ele, amu oh am gol ena dubuttid iitta eleppa hak; mettid lag Oo Gunnab Ele, amunu odnu hinsis, amu Kayaknu mettid lag, amunu odnu hinsis ele golppa hak.

1 King 8:21

Amu Yawenu Tituanak Nainu Kunup lag amuppa daakkunu amu, da lag amu ooppa aben laa bappaidmi. Amu men aɗit Tituanak Nainu Kunup amu ooppa daattep. Men aɗit amuppa am tituanak nai, Yawe Nug ig mamenkad aɗi haen Nug ag Isipnu diia omalatte uɗiegeg, Nug he, Nug ag ele nug tituanppig, nai amu amuppa daatte.” Solomon nug anam aum.

1 King 8:9

Amu Tituanak Nainu Kunup ooppa am keeke kuɗum iitta; men maha aɗit, amuppa Kayaknu ɗo nai yaak ele, Moses Horep appa kunup amuppa meum ele amu, men aɗit amuib aguppa dayom. Horep appa amu, Israel danab ah ag Isip uun uɗin, Horep bena daaegeg, appa amu Yawe he, Israel Nug ele ag nug tituanna nai qagappig.

2 Stori 5:10

Amu Tituanak Nainu Kunup ooppa am keeke kuɗum iitta; men maha aɗit, amuppa Kayaknu ɗo nai yaak ele, Moses Horep appa kunup amuppa meum ele amu, men aɗit amuib aguppa dayom. Horep appa amu, Israel danab ah ag Isip uun uɗin, Horep bena daaegeg, appa amu Yawe he, Israel Nug ele ag nug tituanna nai qagappig.

Eksodas 31:18

Yawe Nug Sinai qaukoppa Moses amegppa nai amu oh mattia malowa, Nug men maha aɗit ɗo nai yaak niitte, amuppa Nug eppeg doɗoppa nai amu yom amu, Nug Moses men aɗit amu mettom.

Eksodas 32:15

Aria, Moses nug eɗua aha, qaukoppanu noawa, nug men maha aɗit Kayak Nug amuppa ɗo yom ele, nug amu eppegppa aɗalata noum. Kayak Nug men aɗit amu heqolah laih laih ohppa ɗo nai yom.

Eksodas 34:29

Aria, haen Moses nug qauko Sinai uua, nug men maha aɗit ɗo nai yaak niitte mawa noa, nug Yawe ele nai madipiɗ, diig amunu nug iɗu huanak amahlom, nug amu ii doyom.

Eksodas 37:25

Amu ag ad akasia aon, qaɗab laa, amuam kalu muttuɗig enanag ileb baknu qaɗab, ag amu ele heppig. Qaɗab amu elab nuhig am 45 sentimita, emaitak nuhig amu 45 sentimita, amu attan nuhig amu 90 sentimita. Elab nuhig, emaitak nuhig ele am laippu. Amu keeke makau qeqeɗi bia ⌊waɗele qaɗab agappa, daug waɗeleppa⌋ amu oh qaɗab ele laippuib daaglagnu ele hoippig.

Eksodas 39:35

Aria, keeke laa ag aon uɗippig am, Tituanak Nainu Kunup kontrak inak ele, amunu ameg, ameg amuam eheɗ haknu nob nau tiigppa iitta me elele medatte ippunadtte, amu kunup amu mawaknu tuqai aɗit ele;

Eksodas 40:3

Yawe Nug nuhig mettid haknu peh lag qappaknu ana, Nug nai tuɗitta aum. “Na mettid haknu peh lag amu oh qappona, na Tituanak Nainu Kunup kontrak inak ele, na amu aon, dahil mettid haknu peh lag ooppa mewon, Na Oo Gun Ele, Oo Gunnab Ele makkulaknu lamen, nainu kunup amu qehagkkunu, na amu aihe!

Lewitikas 16:12

Nug qewowa, nug kalu danab ile muttuɗig enanag bettenu tappiɗ gapappa hak awa, amu nug ottag qaɗab Yawe noobppa daatte, amuppa awa ineb ambekku. Aria, nug eppeg aɗit ohppa kalu ile muttuɗig enanag bette amu appua awowa, nug amu, aria kalu ile muttuɗig enanag bettenu tappiɗ ele mawa, Oo Gun Ele, Oo Gunnab Ele makkulaknu lamen, nug amu ooppa, Oo Gunnab Eleppa nokku.

Namba 17:10

Anam heeg, Yawe Moses amegppa aum. “Na Aronnu dudqak hokkat amu eɗun, Tituanak Nainu Kunup kontrak inak ele noobppa me! Na appa meppe, at aakku dayebeb, da aɗi nai attemnu, danab, ag nai tappe nak danab amu, ag dahilnu naittuɗ ii memananu dabmekkulag. Ag at amu dabmena ag dahilnu naittuɗ ii hena, ag ii mauhmana,” awa aum.

Namba 17:5

Na anam maadppe daappeg, danab laa da nug mana mettak danab daakkunu tituanmi ele amu, nuhig dudqak hokkat amu qaɗu bekku. Ib amuppa da heppi, Israel danab ag nahipnu naittuɗ heegeg da doottem ele amu uuglag,” awa aum.

Namba 17:8

Nug appa qagmaatte daaegeg, wagɗe deɗ amuppa Moses nug peh lag men maha aɗit ɗo nai yaak niitte ele appa daattep, nug amuppa noum. Nug amuppa noa amu, nug Aronnu hokkat am qaɗu bak aakkuib ii anttom. Iitta! Qaɗu bena, haɗag qena, haɗag mappateg, hokkat am meu almon oeg anttom. Aronnu hokkat am Lewi buɗubppanu dayom.

Duteronomi 9:11

Deɗ 40, tuqan 40 ele male amu, Yawe Nug men maha aɗit, amuppa nug tituana nai qakkak yaak dayom amu, Nug da amu meɗom.

Duteronomi 9:9

Haen amuam da qaukoppa men maha aɗit, Yawe Nug he, Nug ag ele nug tituana nai qakkak heppig, Nug nai amu men maha aɗit amuppa yom, amu da men maha aɗit amu diiatkkulnu temi. Da attan appa deɗ 40, tuqan 40 oh daami, da ee laa ii lami, le ele ii lami.

Revelesen 11:19

Ag anam aeg amu, Kayaknu mettid lag, hab aabppa daatte ele, laa nug od matule, tituanak nainu kunup amu miag atiom. Miag atie amu, amemɗi awewe, hakkaɗ diigppa qeeqe, hakkaɗ qa aɗeɗe ne, mim ne, ais doɗo okkainab ele neum.

Revelesen 8:3

Engel laa ele nug kalu danab ile muttuɗig enanag bette elenu gol tappiɗ aɗa doa, qaɗab noobppa dayom. Dayeye, ag kalu danab ile muttuɗig enanag bette ele okkai medappig. Nug kalu danab ile muttuɗig enanag bette ele, amu Kayaknu danab ah oppiaawak ele dilag unuqittak, nug keeke aɗit amu oh gol qaɗab, amu sia king ⌊anuqak⌋ noobppa daatte, qaɗab amuppa keeke aɗit amu mana, Kayak medakkunu dayom.