Hibru 8:5 - Nobonob Baibel

⁵ Mana mettak uɗat, ag wan imuppa hetteb ele amu, ag hab aabppa Kayaknu mettid lag ooppa kobol niitte amubia dottog aakku hetteb. Nai laa amu ippunigtte am nai anukka Kayak Nug Moses amegppa aum. Nai amuam haen Moses nug Kayaknu mettid haknu peh lag digma hekkunu heehe, Kayak aum. “Da na qaukoppa dottog ippunidmi bianab na heppe, ag keeke amu oh anamib heig!” awa aum.

Hibru 8:5 ပူးပေါင်းရင်းမြစ်များ

1 Stori 28:12

Kayak Ouɗi Nug aɗi aɗi dabmak Dawit mettom amu, Dawit nug amunu dottog mettom. Dottog amuam Yawenu mettid lagnu haɗap, oo Nug laug heqo laih laih talilittak daatteb, en maknu oo anen anen, keeke danab ag Kayaknu tituanna medatteb, en amu maknu oo anen anen ele amu, keeke amu oh dottolkad dottog amuppa dayom.

1 Stori 28:19

Dawit nug amu oh Solomon ippunitta, nug aum. “Yawe Nug da aɗaile, da Nug oɗeppanu nai awen yaami amu, nai amu oh amuppa daatte. Nug nai amu da meɗa he, da nuhig lag haknu dottog oh doyen malami,” awa aum.

Eksodas 25:40

Da na qaukoppa dottog ippunidmi bianab na heppe, ag keeke amu oh anamib heig” awa aum.

Eksodas 25:9

Amu mettid haknu peh lag amu, keeke oh peh lag ooppanu ele, da na dottog ippunidkkul bianab na heppe, ag heig!” awa aum.

Eksodas 26:30

Ag amu hewona, ag dahil mettid haknu peh lag amu, dottog da ippa qaukoppa ippunidmi bianab ag qappeg!

Eksodas 27:8

Ag qaɗab amu plangppa kunup bia hekkulag, amge ag kunup ameg waappa attan ele aib meppig; uuppeg, hamu anam dayeɗ! Da ippa qaukoppa dottog na ippunidmi iikku, amu ag anamnab aakku hekkulag.

Namba 8:4

Lam maattaknu balal amu haknu amu, ag gol aon, hamappa qenan, lam maattaknu balal amu diigppan ta ukka, bala daatteppa batak heppig. Amuam Yawe Nug Moses amegppa ag anamnab aakku hekkulagnu ippunittom.

Matyu 2:12

Mettona, ag niiegeg, tuqan tulppa Kayak ag eɗun Herot toppa ii gomananu aum amunu, ag eɗun, ib laa aon, ag appalagppa goppig.

Aposel 7:44

Aria, ig mamelkad aɗi anukka ag atu taɗakppa daappig amu, haen amuppa ag mettid haknu peh lag men maha aɗit ɗo nai yaak niitte ele appa daattep amu, ag peh lag amu ele aon oippig. Ag mettid haknu peh lag heppig amu, ag hekkulagnu dottog Kayak Moses ippunittom amu, ag amubia heppig.

Kolosi 2:17

Keeke amu oh am keeke laanu itotog bia, am keeke amunab iitta. Amu Kristus Nug am amu oh eɗattak, Nug genabnab meunab aakku daatte.

Hibru 10:1

Aria, Mosesnu ɗo am Israel danab ah ag attem attem hekkulagnu ippunattom, amge hak amu oh am keeke ena butti aɗi genab bekkulag dottogib aakku dayeye anidttem. Hak amu oh am ɗo diigppanab aɗi daatte dottogib daatte; am keeke amunab iitta. Diig amunu amu, ɗo nug mana mettak iɗu iɗu anamib maɗ ohppa haknu atte, amge ɗo nug danab ag gunnab abenppa nokkulagnu elele daaglagnu bappaladkkunu elele iitta. Ɗo nug heeb, ag elelenab ii bemana.

Hibru 11:7

Noa nug Kayaknu ooppa genab doyom, amu Kayak Nug keeke laa, Noa nug deɗ laa ii anttom bekkunu nug amegppa nau aomanu nai mattie, Noa nug ebehi oh Kayaknu bodoetta le meum ele amu, nug nuhig nai amu doya, nug baekkudppa ele ena daaglagnu nug uub itom. Ooppa genab doyak nuhig amuppa amu nug danab laa oh, ag oolagppa genab ii dooppig ele, ag eheɗ heppig aakku ippuanatta, ooppa genab doyak amuppa ele nug am genab tutukku hak danab beum.

Hibru 12:25

Amunu ag dabmeig! Ag aib daulag itun, Kayak nai maditte qeppeg neum. Anukka wan imuppa Sinai appa amu, Kayak Nug nai ɠagattag danab amelagppa aum, amge ag nuhig nai tappaeg neum. Ag tappaeg neum amunu, ag ahilag hipuninnu nob nau qe-eɗidna gokkulagnu elele iitta daappig. Gemu Kayak Nug hab aabppa dayaya, nai ɠagattag ig megatte amunu, ig Nug dimettata, ig oolta hipunin ihinignu nob nau qe-eɗidkkunignu elelete? Iittanab!

Hibru 13:10

Aria, ig Kristen ele, ig am qaɗab laa, ⌊amuam Jesusnu ad emaitak,⌋ am mana mettak danab ag mettid haknu peh lakka appa ahilag uɗat hetteb ele, ag ihinig qaɗabppa ehanittak aoglagnu elele iitta.

Hibru 9:9

Amu oh am ig gemu haen imu daattem am keeke ippunigtte. Amuam danab ah ag ɗo iɗu iɗu Kayak mettanna, mana mettak iɗu iɗu ele heppig, amge keeke amu oh, danab heppig ele am heeb, danab amu dilag hipunin uhuqa mettak daaglagnu elele iitta.

Josua 22:28

Ag anam ii amana, amge ag anam ig amenigppa, o ig buɗunkad amelagppa akkulag dayeb amu, ig ag nob mattat, inam akkunig. ‘Antteg! Qaɗab imu, ig mamenkad aɗi heppig amu, am ihinig Yawenu qaɗab bia, amge qaɗab imuam manaknu ofanu, o mana mettak laalanu iitta. Iitta! Qaɗab imuam ag ig ele, ig oh am Yawenu danab ah daattem epponigkkunu at daatte.’

Revelesen 15:5

Amu dimppa da neekke, amu Kayaknu mettid lag hab aabnu, amuam mettid haknu peh lag men maha aɗit ɗo nai yaak niitte ele appa daattep amu, lag amu matulak dayeye anidmi.