Hibru 8:13 - Nobonob Baibel

¹³ Nug nug tituana nai qakkak baunu anam anana, nug tituana nai qakkak tatamnu amu Nug he, alag meum. Amu keeke nug alag ma, nug kaino bia nakoknab dayaya, iitta mette.

Hibru 8:13 ပူးပေါင်းရင်းမြစ်များ

Aisaia 51:6

Ag danab ah ag amelag human, hab anidna, ag honap wan ele antteg! Aɗinu? Qinob dimppa hab nug aab kah iitta mette bia iitta mekku. Ao, wan ele am alag ma, iitta mekku. Ge, danab ah wanppa daatteb amu, ag qabuttid mauhtteb bia mauhkkulag. Keeke oh anam iitta mekku, amge dahil danab ehanatte, padal ii metteb kobol amu, kobol amuam hanhan daakku. Ao, genab tutukku hak kobol dahil am iitta ii mema.

Matyu 24:35

Hab wan ele am iitta mekkulah, amge nai dahil am iitta iinab mema.

Luk 22:20

Ag ee lana malona, Nug matu heum, amubianab Nug kap awa amelagppa aum. “Kap imuppa da nug tituana nai qakkak bau da tiilppa hettem. Da tiil ag ehanadkkunu gokkaɗttem.

1 Korint 13:8

Am oo mauhak kobol amuam geha iitta ii mema. Iitta. Nug hanhan daakku! Propet nai mehuqak uɗat amu geha iitta mekku; nailag digdig mattiaknu uɗat am ele geha iitta mekku. Amu ⌊wanppanu⌋ doyak danab ag aoppig, amu ele iitta mekku.

2 Korint 3:6

Kayak Nug he, ig elele daata, ig nug tituana nai qakkak baunu maɗi nid daattem. Tituanak bau imu amu, nuhig ɗo nai yaak laa iitta. Iitta. Nug am Kayak Ouɗinu keeke. Ɗo nai yaak, amuam danab qe mauhtte, amge Kayak Ouɗi Nug danab bauklel medatte.

2 Korint 5:17

Amunu aun nug Kristusnu daatte, nug am danab bau. Anukka dayom amubia am iitta. Nuhigppa keeke oh am bau daatte.

Hibru 1:11

Na hatame, amge aa iitta mekkulah. Aa am iitta mekkulah, amge na hanhan daakkutib. Aa geha lamen alag mette bia, alag meya, iitta mekkulah.

Hibru 12:24

Amu ag Jesus, Nug am gamag danab, Nug nug tituana nai qakkak bau heum daatte ele amu, ag nuhigppa wappig. Kain nug Abel qe mauhom, haen amuppa Abel tiig neum, amunu nob nau mak dayom, amge Jesus ehanigkkunu he, Nug tiig neum amu, ag amuppa wappig.

Hibru 7:22

Kayak Nug Jesus mana mettak danab daakkunu, nuhig nai ɠagattag qetta aum, laa ag anukka mana mettak danab daappig, ahilagnu anam ii aum, diig amunu ig ⌊Jesusnu oonigppa genab doottem, ig dimppa nug tituana nai qakkak nai bau, ig nob ena aɗi aɗi aognignu atte amu, ig genab aognignu doottem.

Hibru 8:6

Jesus Nug mana mettak uɗat awom ele amu, uɗat amuam mana mettak uɗat alag eɗidtte, Nug tituana nai qakkak bau, Jesus Nug amunu gamag danab daatte amu, nai qakkak bau amuam nug tituana nai qakkak alag eɗidtte, amubia. Ele amu, nug tituana nai qakkak bauppa keeke Kayak heeb bekkulagnu nai qakka aum ele amu, ag alag amunu eɗadtte.

Hibru 8:8

Amge Kayak Nug nug tituana nai qakkak alag, amunab danab ehanadkkunu elele iitta, Nug amu nai laappa ippunikka, miag atia aum. Nai amuam inam. “Naɗi atte. ‘Haen laa uɗitte, haen amu uɗieb, haen amuppa da heppi, Israel danab ah, am Juda danab ah ele, da ag ele ig nug tituana nai qakkak bau hekkunig.

Hibru 9:15

Amunu Kayak Nug danab onilagppa eum ele, danab amu ag itittak ena haen ohnu ele, Kayak anukka Nug bekkod madakkunu nai qakka aum amu, ag amu aoglagnu elele daaglagnu, Kristus Nug nug tituana nai qakkak baunu gamag danab daatte. Kayak Nug amu madakkunu elele daattenu diig am Kristus Nug danab ag nug tituana nai qakkak alag waappa daana, hipunin heppig ele, ag hipunin amuppanu uhuqak aoglagnu mauhom.