Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Hibru 2:17 - Nobonob Baibel

17 Amunu, diig amunu, Nug Kayak noobppa oo gai-iitta doya oo metta ehanittak kobol, oo metta ii uuak kobol ele dim lamata mana mettak ikki danab daakkunu, amu Nug danab dilag hipuninnu eheɗ haknu nob nau Nug tiigppa iitta mekkunu heeb elele medakkunu elele daakkunu, Nug ib ohppa Nug laikkud bia bekkununab dayom.

အခန်းကိုကြည့်ပါ။ ကော်ပီ




Hibru 2:17
37 ပူးပေါင်းရင်းမြစ်များ  

Ag amu heeg, mana mettak danab ag meeme amu baalag otaɗatteg mauheg, ag tiilag ib etta hipunin haknu ofa daakkunu qaɗabppa Yawe medappig. Mana mettak danab ag tiig amu Yawe medappig, amuppa ag heppeg, eheɗ haknu nob nau doɗ amu tiigppa iitta mekkunu Israel danab oh dilagnu elele medakkunu heppig. King nug mana mettak danab ag manaknu ofa, amu ib etta hipunin haknu ofa ele Israel oh dilagnu hekkulagnu aum amunu, ag amu heppig.


Danab nug matagiɗ tagatte, amubia ⌊Jesi buɗub⌋ nug genab tutukku hak kobol aɗa dim lamidkku. Ao, danab lamen tagatte, amubia geha nug oo metta ii uuak kobol haen oh dim lamidkku.


Aria, Israel wan ohppanu sipsip 200 oolagppa ag laippu aon, danab okkai metteg! Israel wanppa gikkiɗahnu dad enanag, le elele aonna daatteb, amu ag amuppanu amu hekkulag. Ag nug anam medappeg, nug keeke amuppanu ee aegnu ofa, manaknu ofa, amu laippu dayaknu ofa hekkunu mana, da Yawe, da meɗakku. Nug amu heeb, amuppa mana mettak danab ag Israel danab ah dilag eheɗ haknu nob nau mana mettak amuppa iitta mekkunu heppeg elele medakku.” Naɗi Yawe Nug anam atte.


Israel danab ah ag amu nug mettaglag, amge ahilag okkai nug am mana mettak oh nuhig keekeppanu hobul dayaknu haen epeɗiak haenppa, kalam bau betteppa, Sabat deɗppa ele mana, da Yawe, da meɗakkunu bappaidkku. Amu nug bappaidkkunu am inam; manaknu ofanu keeke, ee aegnu ofanu keeke, amu wain gokkaɗaknu ofanu ele. Nug ib etta hipunin haknu ofanu, ee aegnu ofanu, manaknu ofanu, laippu dayaknu ofanu doɗ, ee aeg keeke, bappaidkkunu diig am, nug nuhig keekeppanu babaitteb, mana mettak danab ag amuppa Israel oh dilag eheɗ haknu nob nau mana mettak amuppa iitta mekkunu heppeg, elele medakku.” Yawe Nug anam atte.


Amu kalam amunu deɗ eblaih aɗitppa ele Israel dilag okkai nug digmakppa heum bianab eɗua, danab o ah nug ii doyaya, hipunin heumte, o nug ɗo ii doya hipunin heumte, nug aakku hipunin heum amunu, nug eɗua, beɗuppa aab iitta daakkunu nug anam hekku. Amu ib amuppa ag heppeg, da laul am dahil neekkakppa oppiaawak daakku.


Kayak Nug nahipad danab ah Israel, ag daanna anidkkulagnu, nahip aab okkai Kayaknu tituanak daatte, Jerusalem, amu tonakkunu, Nug haen maha 70 ba gokkunu ɗo laa aakku meum. Haen maha 70 amu bekkunu diig anen anen am inam: Haen maha amuppa Kayak Nug heeb, danab ah ag nai tappe nak kobol uuglag. Nug heeb, ag tuɗidna hipunin ii hemana. Nug eheɗ haknu nob nau nuhig ehanittak okkaippa iitta mekkunu heeb elele medakku. Nug heeb, kobol genab tutukku hanhannu bekku. Nug heeb, nuhikkud danab ag tulegleg genabppa aɗi aɗi keeke anidppig, propet ag dimppa bekkunu nai madippig ele amu, keeke amu oh meu okku. Amu Nug heeb, aben laa tituanaknab daakku.


Am mana mettak danab nug goɗen laih daatte, nug danab o ah Kayak ele ouqeya daaglahnu bekkun daatte, nug nug igippa gokkaɗeb nokku. Mana mettak danab nug keeke amu oh hette amu, ib amuppa nug Yawe noobppa eheɗ haknu nob nau iitta mekkunu heeb elele medakku.


Ib amuppa, mana mettak danab nug doɗ amu mana, Kayak medatta, nug heeb, Oo Gunnab Ele am Kayaknu neekkakppa oppiaawak daakku. Nug amu hekkunu diig am, Israel danab ag Kayak ele ouqa dayaknu elele iitta, ag hipunin henana, nai tappe nak ele hetteb amunu, ag aɗi aɗi hipunin heppig, nug amunu amu hekkuoitte. Aria, nug mettid haknu peh lag danab ah appa qagmetteb ele, nug lag amunu ele anamib hekku. Israel ag Kayak ele ouqa dayaknu elele iitta daaegeg, lag amu ag oolagppa daatte amunu, nug anam hekku.


Amge mana mettak danab nug doɗ laa ib etta hipunin haknu ofa daattenu tiig awa, mettid haknu peh lag danab ah appa qagmetteb ele, nug tiig amu awa, lag amu ooppa Oo Gun Eleppa ukka, mana mettak amu tiigppa nug eheɗ haknu nob nau doɗ tiigppa iitta meeb elele medakkunu hette amu, laa nug doɗ amu teppu nakok laa iinab lama. Teppu amu manappeg, ewa iitta mekkuoitte.


Ag eppelag igippa meeg amu, aria Moses makau dawai amu baag otaɗom dimppa, qaɗab oppiak ele daakkunu, Moses nug eppeg doɗo makau amunu tiigppa me no awa, manaknu ofa haknu qaɗabnu qeqeɗi waɗele ohppa meum. Amu tiig laih dayom amu, nug amu oh qaɗab diigppa gokkaɗom. Amunu Moses nug ib amuppa tiigppa he, qaɗab am Yawenu tituana mettak daya, Yawenu neekkakppa oppiaawak dayom.


Mana mettak danab nug Israel dilag eheɗ haknu nob nau doɗ tiigppa iitta meeb elele medakkunu, nug mana mettak anam aakkude haɗ! Nug anam heeb amu, Yawe Nug hipunin ahilag uhuqa madakku. Nug hipunin ahilag uhuqa madakkunu diig laa am, ag hipunin ii doonna heppig. Am diig aɗit laa am, ag aab aɗunu ofa hena, ag ib etta hipunin haknu ofa ele heppig.


Amunu da Kristus Jesusnu dayeye, da uɗat heinne, da Kayak uɗat hettemnu amu da maɗoɗppan gamag ahak doottem.


Aɗinu? Anukka ig Kayaknu kekeɗ daautut, Nug Bekka ihinignu mauha amu, mauhak nuhig amuppa Nug kekeɗ kobol he iitta me, gemu ig Kayak ele oonig laippu daattem. Kayak he, ig Nug ele oonig laippu daattem, Nug Bekka ele bau daatte, diig amunu genabnab genab Kayak Bekka ⌊Nug Kayaknu oppoɗi bak,⌋ Nug amuppanu eɗua awigkku.


Nug ad emaitakppa mauhom, amuppa ameg aɗit amu ouaqate, aa laippu daattep. Ad emaitak amuppaib Nug kekeɗ kobol qe iitta me, Nug danab amu oh omalatta, Kayak toppa ukkom.


Anukka ag Kolosi danab ah ag dabmak eheɗ aon, kobol nau ele heppig amunu, ag Kayaknu kekeɗ daappig. Ag Kayak ele ouqak ii daappig, piɗe laih daappig.


Laa ele amu ig am mana mettak ikki danab onig, ɠagattag ele, Nug Kayaknu danab gumigtte


Laa amu, Jesus Nug he, danab oppiaawak betteb. Amu danab oppiaawak betteb ele, ag Nug ele oh am Mamelag laippu waappa daatteb amunu, Jesus Nug amu dilagnu, “Da lailad,” akkunu Nug uɗa ii nette.


Nid naunau amu ag anilkad mamelkad ag beɗulag bia beɗulag aon oitteb amunu, Jesus Nug Satannu ɠagattag, ɠagattag amuppa Satan nug he danab mauhtteb amu, Nug ɠagattag amu heeb iitta mekkunu, Nug danab ag wan imuppan oiyak ahilagppa haen oh mauhaknu baɗak doon, ag amuppa hippalak daappig ele amu, ag amunu uhuqak ele madakkunu, Nug ele danab beɗu awa, Nug mauhom.


Genabnab Jesus Nug ⌊nuhig mauhakppa⌋ engel ii ehanadtte. Iitta. Nug Abraham buɗuppud ehanadtte.


Amunu O ig lainkad, ag Kayaknu danab ah oppiaawak ele, Nug ag ig ele hab aabppa daagnignu tituanikkom amu, ag Kristus Jesus, Nug am ihinig ooppa genab doyaknu mana mettak ikki danab, Nug am ihinig ooppa genab doyaknu totol danab daatte ele amu, ag nuhignu atognona dabmena autna aweg!


Kayak Nug uɗat amuppa meum amu Nug Kayak oɗe oo metta ii uuak kobolppa dim lamitta heum. Amu Nug anukka Moses Kayaknu danab oolagppa Kayak oɗe tutukku dim lamitta, uɗat heum bia heum.


Moses nug am Kayaknu danab ah tamaniak ooppa maɗi nid dayaya, oo metta ii uuak kobol dim lamitta, dimppa keeke bekkunu amu Kayak oɗeppanu awa madittom.


Anam daatte amunu, ig ooppa genab doyak ihinig, ig heut miag atitte ele amu, ig amu aɗat auta aotu! Aɗinu? Ig ihinig mana mettak ikki danab, Nug hab aabppa teum daatte. Nug am Jesus, Kayak Bekka.


Ele amu ihinig mana mettak ikki danab, Nug am danab laa ihinignu oo ii dookkunu laa iitta. Hipunin haknu eeɗak kobol oh ihinigppa bette amu, amu ele nuhigppa beum, amge Nug hipunin laa iinab heum amunu, keeke nuhigppa beum bia ihinigppa beebe, ig gai-iitta bia daautut amu, Nug ihinignu oo doyak dookkunu elelenab daatte.


Aria, mana mettak ikki danab tituanaknu kobol amu inam. Kayak Nug danab oh oolagppanu danab laa, nug danab ah oɗelag awa, Kayak amegppa akkunu, Kayaknu uɗat ele hekkunu, tituana mette. Danab amunu uɗat am nug Kayak ɗo medakkunu, amu Kayak Nug danab ah dilag hipunin uhuqa madakkunu, nug doɗ ele mana, Kayak medakkunu daatte.


Nug anam dayeye, Kayak Nug Nug mana mettak ikki danab, Melkisedek bia daakkunu tituanom.


Nug ele hipunin hekkunu eeɗak aotte amunu, nug danab ag ootot daatteb, ag ib apiɗidtteb ele amu, nug oo bodoettakppa atognoadkkunu elele daatte.


Amu Kristus Nug ele am anam. Nug nukka binag amu awa, mana mettak ikki danab ii beum. Iitta! Kayak Nug Nug amegppa aum. “Na am da Bekkal. Gemu da na Mamen bemi daattem,” awa aum.


Jesus Nug tatam lag oo amuppa ig ehanigkkunu noum. Nug am mana mettak ikki danab, Melkisedek bia hanhannu beum daatte.


Mana mettak ikki danab anam nug ig ehanigkkunu daakkunu am enanag. Nug am oppiaawak, ooppa kaliak laa iitta. Nug oppiak ele, hipunin danab bia ele iitta. Nug onig attannab tak daatte.


Amu ɗo tatamnu am danab gai-iitta tituanatte, ag mana mettak ikki danab daappig, amge nai Kayak Nug nukka Nug onigppa ɠagattag qetta aum, ɗo nai dayeye nai amu beum amu, nai amuppa Kayak Nug Bekka tituanom. Kayak Nug he, Nug Bekka amu Nug mana mettak ikki danab daakkunu elelenab ba, Nug hanhan anamib daatte.


Aria, nai ig attem ele, nuhig diig am inam. Ig mana mettak ikki danab Melkisedek bia ele, Nug matu hab aabppa Kayak, dagom onig ɠagattag ele, Nug eppeg naɗiap-ppa heɗep neum daatte.


Mana mettak ikki danab anen anen amu, ag ahilag uɗatppa ag mana mettak digdig hetteb amunu, Jesus Nug ele mana mettak laa hekkununab dayom. ⌊Nuhig mana mettak am Nug beɗu.⌋


Anam dayom, amge Kristus Nug itittak ena digdig, Kayak megakkunu dabmette ele amu, Nug amunu mana mettak ikki danab daakkunu uɗia dayom. Amu Nug Kayaknu mettid haknu peh lag elelenab, Kayaknu mettid haknu peh lag tatamnu eɗittak amu, uɗat nuhig hekkunu ooppa noum. Kayaknu mettid haknu peh lag amu danab ag eppelagppa ii heppig; am wan imuppan keeke iitta.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ