Hibru 12:1 - Nobonob Baibel

¹ Aria, ihinignu amu ig anukkanu danab kuɗumnab ag ig ooppa genab doyak kobol ippunikkeg anidttem amunu, ig ooppa genab doyak ippu tutukku dim lamidtu! Ig danab laa ag nug eɗid eɗid qaiettan gotteb ele ag keeke oh beɗulag uug medatte ele, ag amu buɗieg ukke, qaiettan gotteb, amubia ig aɗi keeke, ig amu aɗat ooppa genab doyaknu ippu tutukku ii dim lamidkkunig amu, ig keeke amu buɗipput ukkeb, ig aɗi hipunin, nug ig beɗunigppa ta aɗaikkom daatte ele, ig amu ele qepput na ukkeb, ig Kayak Nug ippunig mekkom amu, amuppa bahi yaak ele iittappa qaiettat gotu!

Hibru 12:1 ပူးပေါင်းရင်းမြစ်များ

Job 8:10

Na ig memetankad dilag nai dabmekkut dayeb amu, na appanu ippunittak iite aomna? Ge, na ig memetankad dilag doyak okkai dabmekkut dayeb amu, na nai amuppanu diignu doyak tutukku iite aomna?

Sam 18:23

Anam amu, Kayaknu neekkakppa da oolppa kaliak laa ii daatte. Ao, da hipunin hepanu, da dakka da hipuninnu awaitten daattem.

Aisaia 60:8

⌊Uub okkai umu uɗitteb amu,⌋ ag lombig ulah yeeye, paha paha laih gotte, o uppuɗil beɗulag nakok nug eɗua teɗppa tutukku gotte, ag amubia gotteb amu, ⌊uub⌋ amuam attemun?

Esekiel 38:16

Ag dahilad danab ele ban hekkulagnu uɗinna, ag lombig wan tonatte bia wan amu tonaglag. O Gog, butti aɗi, haen laa, wanppan wan ohppan danab ag da dahil hak nahip-ppa hekkul, ag amuppa da am Kayak doon, da oppiaawak daattem ele dooglagnu, da heppi, na Israel wan banelag uɗikkut,’ awa atte.” Yawe Nug anam aum.

Esekiel 38:9

Amu Gog na, nahipad daup, wanppan wan laalappan daup na ele daatteb amu, ag oh ahan, ulah huanak uɗitte bia gonana, lombig wan tonatte bia wan amu tonaglag.’ ” Yawe Nug anam atte.

Matyu 10:22

Da onil ahilagppa daatte amunu, danab oh ag oolagppa ahilagnu nau ninig ele dooglag, amge laa nug ɠagattag dayebeb ukkeb, keeke oh ba maleb, haen amuppa ele nug ɠagattag daakku amu, nug padal ii mema.

Matyu 24:13

amge laa nug ɠagattag dayebeb ukkeb, keeke oh ba maleb, haen amuppa ele nug ɠagattag daakku amu, nug padal ii mema.

Mak 10:50

Ag anam aeg, nug doya, nug lamen ulahnu uɗa buɗie ukke, nug paha aha, Jesus gumitta waum.

Luk 12:15

Anam awona, Nug danab ah oh amelagppa aum. “Ag dabmena, tutukku doyeg! Ag baubau awaknu hik qak kobol oh aib heppig. Aɗinu? Danab nug keeke ohnu elelenab eɗittak daatte amu, nug nuhig keeke amuppa bau dayak ii aotte,” awa aum.

Luk 16:28

Aɗinu? Da amalad tanig ele, amu ag ele aben guittak naɗi imuppa uɗimnanu, Lasarus nug nau aomnanu dabmettak nai ab ag dooglagnu ool daatte,’ awa aum.

Luk 21:34

Jesus Nug anam ana, Nug nai tuɗitta aum. “Keeke amu bekkun daatte amunu, ag daulag atieb, ag hanhan ee lanaknuib hik aqeb, le ɠagattag labeppeg, kaaka aqebeb, beɗu ena dayak amunu guattebeb hebeppeg, kobol amuib aha ag tonadmanu tutukku dabmeig! Kobol amu ag tonatteb, Naɗinu deɗ amu ag dab-ii-menana, pahaettak, doɗ pelemppa notte bia ag anadkku.

Jon 3:32

Laa Nug hab attannu neum amu, keeke Nug doya malom, keeke Nug anttom ele, Nug amunu maditte, amge laala ag oolagppa genab ii dootteb.

Jon 4:39

Aria Samaria kuɗum ag ahnu nai doona, ag Jesusnu oolagppa genab dooppig. Aɗinu? Ah nug, “Da anukka keeke oh hemi amu, Nug amu miag da amelppa aum,” awa aum.

Jon 4:44

Jesus Nug nukka anukka, “Propet nug appag diigppa am binag iitta,” awa aum.

Rom 12:12

Amu ag Naɗi ehanadkkunu dabmak aɗan daanna, ag maɗoɗppan gamag ahak doyeg! Uug laa ahilagppa uɗieb amu, ag ɠagattag dayeg! Amu ag hanhan unuqitteg!

Rom 2:7

Danab laala ag binag amahlak oppiaawak ele, bau hanhan dayak, binag ele mattinna, kobol tutukku hetteb amu, geha Kayak Nug danab amu bauklel hanhannu madakku.

2 Korint 7:1

O da gamalad, Kayak Nug ihinignu nai qakka anak amu aum amunu, ig meunignu, amu ouɗinignu dubuttid ele oh geɗidta, ig Kayaknu ebehinig oh bodoetta le mak dootta, ig meunig ohppa Kayaknu oppiaawak ele daat oitu!

Galesia 2:2

Kayak Nug da ippuniɗe, da aakku gomi. Da inam dabmemi. “Da ⌊Jerusalem tamaniak⌋ anuqak danab amelagppa, da iitta aɗi oolagppa Nai Ena mehuqttem amu da amunu ii akkul amu, uɗat da gemu hettem imu, uɗat tatam hemi ele amu, uɗat amu oh hamu ukka qettoɗkkutai.” Da anam dabmemi amunu, da ukkai, anuqak danab amu appa daappig ele, da ag akka aakkuib ele daatta, da amu ippunadmi.

Galesia 5:7

Anukka ag am ena oippig. Am aun nug ib oo ne, ag doyak diig genabib baula ii dim lamidtteb? Nug attem he, ag amu uuppig?

Epesus 4:25

Ag kobol hambuppuak uueg! Ag nai genabib laa amelagppa mattieg! Aɗinu? Ig am beɗu laippunu laih kuɗum daattem.

Pilipai 1:30

Amu ag uug da haen matu matu maomi anidppig, gemu ele da uug amuib mawewe daaiyi, ag dootteb amunu, ag da ele layam ena daat, uug amuib maotu!

2 Timoti 2:4

Danab nug ban daup uɗat hette amu, nug wan imuppan uɗat laala ele ii aɗatte. Nug ban daup uɗat ena heebeb, ban daup ikki nug nuhig uɗatnu ena dookkunu aakkuib dabmette.

2 Timoti 4:7

Da Jesusnu uɗat ena hein malen, da aɗi uɗat hekkulnu dayom amu hein, gogppa tein, da dahil ooppa genab doyak ele aɗami,

Hibru 6:15

Amunu Abraham nug oo makppaib, bahi yaak ele iittappa nai amu meu okkunu ameg ma dayaya, keeke anukka Kayak medakkunu nai qakka aum amu aakku awom.

Jems 1:3

Aɗinu? Ag dootteb. Ahilag ooppa genab doyak uugppa ma anttak aotte haenppa, uug doyaya eɗittaknuib dabmak awak kobol, nug ena mekkunu ib oɗeppa daatte.

1 Pita 2:1

Amunu ag kobol nau oh dim lamidkkulagnu uueg! Ag nai hambuppuak, kobol hambuppuak ele uuna, ag laa dilagnu aib amelag qeeb oolag elele ii dayom; baeg qak nai atten ele aib madippig.

1 Pita 4:2

Amunu amu dimppa, haen danab amu nug bau dayaya wanppa oitte amu, nug kobol nau baula ii dim lamidtte, danab laa hetteb bia. Iitta! Nug Kayaknu dabmaknab dim lamidtte.

1 Pita 5:1

Nai imunu amu, da ahilkad ikki danab ag oolagppa daatteb, da ahilagnu nai imu iikku yaattem. Da ele am ikki danab daattem, amu da amelppanab Kristus Nug uug mawe anitten, amunu da aɗi heehe anttomnu mattiak danab daattem. Da ag ele, ig oh geha Kristusnu binag amahlak oppiaawak ele heeb miag atieb, ig amu ooppa daagnig amunu, da ag ikki danab ag uɗat inam hekkulagnu ag maɗadakkulnu nai imu yaattem.

1 Pita 5:12

Amu da Silas, da nug am ig lainig, nug oo metta ii uuak kobol dim lamidtte doottem amu, da nuhig ehanittakppa da nai tutu imu ahilagnu yaami. Ad uɗug imunu amu, da ag ɠagattag aqakkulnu, da ag nai da yaami am Kayaknu ehanittak okkai hamu mettak genab ippuanadtte, da amu ele ippuanadkkulnu aakku yaami. Ag aguppa ɠagattag dayeg!

2 Pita 1:6

Amu ag akka ahilag oiyak pehettak atognoak kobol aon, doyak ele ouaqateg! Amu ag uug doonna eɗidkkulagnuib dabmekkulagnu kobol aon, ag akka ahilag oiyak pehettak atognoak kobol ele ouaqateg! Amu ag genab tutukku hak kobol aon, ag uug doonna eɗidkkulagnuib dabmekkulagnu kobol ele ouaqateg!

Revelesen 1:9

Da Jon, da ag lailag, da ag ele ig oh Jesus nuhigppa laippu daat, uug mua ele imu maottem. Da Kayaknu ɗo maɗoɗ ooppa, amunu uɗat haknu, ag ele daattem. Ig oh Jesus ig hekkunignu atte amu, ig nuhig ɠagattag aot daatta, ig tuɗidta, uug doyaya eɗittaknuib dabmak awak kobol dim lamidttem. Da Kayak nai mattimi da Jesus Kristusnu oolppa genab doottemnu ami, amunu ag da nud laa onig Patmos, amuppa meiɗppig.

Revelesen 13:10

Am aun nug maniguittakppa gokkunu daatte amu, appa gokku. Aun laa nug qep elabppa mauhkkunu daatte amu, nug qep elabppa mauhkku. Kobol amuam Kayaknu danab ah oppiaawak ele, ag tuɗidna uug doyaya eɗittaknuib dabmak awak kobol dim lamidna, ag oo metta ii uuak kobol ele tuɗidna anamib hekkulagoitte ippunigtte

Revelesen 22:16

Da Jesus, da dahil engel laa mei, ahilagppa ukka, nai dahil imu tamaniak ohppa ag amelagppa mehuqkkulagnu madakkunu ukkom. Dawit nug dahilppan be, da nug buɗubppan bemi. Da hoɗopai boitinannu amahlak bia daattem,” awa aum.

Revelesen 3:10

Na dahil haknunab nai dim lamidna, uug oh oo bodoettak ele maon oime amunu, da danab ah wan atu oh dilagppa uug naɗi, ma anttak madakkunu bekku amu, da na atognoidkkul; uug amu nahip-ppa ii bema.