Hibru 1:3 - Nobonob Baibel

³ Aam lettod ye, amahlak amia ukke, danab ah anidtteb, amubia Kayak Bekka Nug Kayak binag amahlak oppiaawak ele he, danab ah anidtteb, amu Nug Mameg daatte, amubianab daatte. Nug keeke oh nuhig naippa ɠagattag aqadtte. Nug nuhig mauhakppa Nug danab dilag hipunin uhuqa mattaknu ib ooɗom. Nug ib amu ooɗowa, Nug eɗua hab aabppa ta, Nug Kayak, Nug dagom onig ɠagattag ele, Nug Nug eppeg naɗiap-ppa daatte.

Hibru 1:3 ပူးပေါင်းရင်းမြစ်များ

1 Stori 29:11

O Yawe, habppanu keeke oh, wanppan keeke oh ele am nahipadib daatteb amunu, na onin, ɠagattag ele. Na ebehin ele, na binag amahlak oppiaawak ele. Na dagom onig ɠagattag ele. Na ɠagattag okkai naɗi ele daattem. Gumak uɗat oh am nahipib, na laa oh eɗattak, oh ikkilag daattem.

Job 37:22

Yawalti uɗia ye, bud ukka male, danab aam anidna, ⌊enanag dootteb⌋. Ao, Kayaknu amu, nuhig ɠagattag okkai naɗi ele, danab nug antta, nug ebehi oh bodoetta le mette.

Sam 110:1

Yawe Nug dahil Naɗi amegppa inam atte. “Na da eppel naɗiap-ppa daappe ukkeb, da nahip kekeɗ na waatppa maadkkul,” awa aum.

Sam 75:3

Haen wan nug uɗalele, danab ah wanppa daatteb ele ag uug doyegeg, daib da wan ɠagattag medattem. Sila.

Eklisiastis 8:4

King nug aɗi ab, nuhikkud danab ah ag aakku hekkulagoitte. Laa nug king amegppa, “Na aɗin hettem,?” akkun elele iitta.

Lewitikas 15:15

Am mana mettak danab nug appa ai aɗit amuppa mana mettak hekku; laa amu ib etta hipunin haknu ofa, laa am manaknu ofa. Ib amuppa mana mettak danab nug doɗ amu mana, Kayak metta, nug Yawe noobppa heeb, leppu nak iitta meum, amunu dubuttid danab amuppa daatte Kayaknu neekkakppa iitta mekkunu hak am elele medakku.

Maika 5:4

Amu laa Israel gumadkku Nug hibaitta, nuhikkud danab ah, sipsip gumak danab sipsip nuhikkud gumadtte, amubia nuhikkud danab ah gumadkku. Nug Yawenu ɠagattagppa nuhikkud danab ah gumadkku. Ao, Yawe, Nug dagom onig ɠagattag okkai ele, Nug am laa Israel gumadkkunu Kayak; amu laa Israel gumadkku amu, Nug Yawe onigppa nuhikkud danab ah gumadkku. Nug ag gumadkku amunu, ag ena, baɗak iitta eleppa daaglag. Aɗinu? Haen amuppa Nug onig, ɠagattag elenu nai am aha ukkeb, wan ohppa gokku.

Matyu 22:24

“Ippunittak danab, Moses nug aum. ‘Danab laa nug nid iitta ele mauheb amu, nug amag nug awag wau aweb, nid menuglah, amge aa nid menuglah amu, nid amuam danab amunu iitta, awagnu daakku.’ Moses nug anam yom.

Mak 16:19

Naɗi Jesus Nug anam a amu Kayak Nug he, Jesus Nug hab aabppa ta, Kayak eppeg naɗiap-ppa heɗep na dayom.

Jon 1:14

Am Kristus, onig laa Nai Kayak Ippunigtte, Nug danab beɗu awa, ig oonigppa dayom. Ig oonigppa dayeye, ig nuhig binag amahlak oppiaawak ele anidmut. Binag amahlak oppiaawak ele amuam laa Nug Kayak Bekka laippunab daatte, Nug Kayak, nuhigppanu uɗiom amu, am nuhig aakku. Doyak diig genabib, amu ehanittak okkai hamu mettak kobol ele, amuam nuhigppa ambaknab ele daatte.

Jon 1:29

Wagɗe deɗ amuppa Jesus Nug Jon gumitta uɗieye, Jon Nug antta aum. “Antteg, Kayaknu Sipsip Nag, Nug wanppan danab ah dilag hipunin uhuqtte, Nug am uukku daatte.

Jon 1:4

Nai Kayak Ippunigtte Nug am bauklel diig; bauklel amuam danab oh dilag amahlak.

Aposel 2:33

Nug hab aabppa teum, Kayak eppeg naɗiap-ppa daatte. Mameg Kayak Nug nuhig Ouɗi, anukka medakkunu nai qakka aum bia amu, Nug mettom. Mette, Jesus Nug ig ele iikku gemu Kayak Ouɗi mekkom amunu, ag keeke imu gemu anidna dootteb.

Aposel 7:56

Antta, Stiven nug aum. “Antteg! Da hab aab obate, Danab Bekkalag Nug Kayak eppeg naɗiap-ppa hibaitta dayeye anidttem,” awa aum.

Rom 1:16

Da Jesusnu Nai Enanu amu, da uɗa nak ii doottem. Aɗinu? Nai amuam Kayaknu ɠagattag, amu Kayak Nug amuppa danab aun aɗi ag oolagppa genab dootteb ele, Nug ag eɗua diitte; Juda ag tatam ⌊nai amu⌋ doyegeg, iitta aɗi ag aakku geha dootteb.

Rom 8:34

Aun nug danab ah amu hipuninnu nob nau aoglagnu akku? Auntai, laa iitta. Aɗinu? Jesus Kristus Nug nukka aakkuib mauhowa, Nug eɗua hibaitta, gemu Nug hab aabppa Kayak eppeg naɗiap-ppa dayaya, ihinignu Kayak unuqidtte.

2 Korint 4:4

Danab amu ag Jesusnu oolagppa genab ii dootteb. Aɗinu? Satan, nug wan imunu kayak hambuppuak daatte, nug ag Kristusnu dabmak pehettak aomnanu ib oo neum. Nug anam heum amunu ag Kristus, Nug genab Kayak attem daatte bianab daatte, ag nuhignu Nai Enanu amahlak, Kristus Nug binag amahlak oppiaawak ele ippunigtte amu, ag amu ii anidtteb.

Kolosi 3:1

Kayak Nug he, ag Kristus ele oh eɗun hippaidppig amunu, ag keeke attannu, aben amuppa Kristus Nug Kayak eppeg naɗiap-ppa heɗep na daatte amu, ag keeke amuib aoglagnu dabmenana oiyeg!

Taitus 2:14

Kristus Nug ig ihinig nau hak ohnu qagaiettakppanu eɗua uhuqak hekkunu, ig nuhikkudnab danab ah oppiaawak ele daatta, kobol ena tutukku aakkuib hekkunignu dabmak aognignu amu, Nug ihinignu mauhom.

Hibru 1:13

Kayak Nug Bekka amegppa anam aum, amge Nug anukka engel nuhig laa amegppa inam laa iinab aum. “Na da eppel naɗiap-ppa daappe ukkeb, da nahip kekeɗ na waatppa maadkkul.” Iitta! Nug Jesus amegppa aakkuib amu aum.

Hibru 10:12

Amge Kristus Nug am haen laippu aakkuib hipunin uhuqaknu mana mettak hanhannu aakku heum. Nug anam hewowa, Nug Kayak eppeg naɗiap-ppa heɗep na dayom.

Hibru 12:2

Amu ig amenig ukkeb, Jesus, Nug am ooppa genab doyaknu diig daatte, Nug ooppa genab doyak ihinig elelenab medakku diig ele amu, ig Nug anidtu! Jesus Nug anukka maɗoɗppan gamag ahak geha dimppa anidkkunu dabmeum amunu, Nug ɠagattag dayaya, ad emaitakppa uug doyaya, guittak awa mauhom. Ad emaitakppa mauhaknu amu uɗa nak ele, amge Nug dimppa maɗoɗppan gamag ahak okkai aokkunu dabmaama, uɗa nak amunu dab-ii-meum; am keeke hamu bia doyom. Nug amu hewowa, Nug hab aabppa, Kayak eppeg naɗiap-ppa heɗep na dayom.

Hibru 4:14

Anam daatte amunu, ig ooppa genab doyak ihinig, ig heut miag atitte ele amu, ig amu aɗat auta aotu! Aɗinu? Ig ihinig mana mettak ikki danab, Nug hab aabppa teum daatte. Nug am Jesus, Kayak Bekka.

Hibru 7:27

Jesus Nug am mana mettak ikki danab anukkanu, ag deɗ oh doɗ main, Kayak Nug hipunin ahilag tatam uhuqa mattowa, danab dilag ele uhuqa madakkunu medappig bia ii hette. Nug uɗat nuhig anam iitta. Kayak Nug danab ah dilag hipunin uhuqa madakkunu, Jesus Nug haen laippu aakkuib Nug nukka Nug beɗu oh Kayak mettom amunu Nug baula ii hema.

Hibru 8:1

Aria, nai ig attem ele, nuhig diig am inam. Ig mana mettak ikki danab Melkisedek bia ele, Nug matu hab aabppa Kayak, dagom onig ɠagattag ele, Nug eppeg naɗiap-ppa heɗep neum daatte.

Hibru 9:16

Danab nug dimppa mauhkku doya, nug bau dayaya aun en nuhig aokkunu dabmette amu nug nai amu uɗugppa ya, onig ele ye, danab laa ele nug antta onig ye, aria nai aakku ɠagattag aakku daatte. Anam amu, keeke mameg mauheb amu, danab ag tatam nug genab mauhom dooppeg amu, keeke mameg nug laa, nuhig keeke aokkun yom ele amu, nug keeke aokku. Keeke mameg ii mauhom haenppa amu laa nug keeke ii aoma. Nai amuam mauhak dimppa aakkuib keeke mamegnu dabmak ɠagattag qedatte.

Hibru 9:26

Nug laa hetteb bia helo amu Nug haen kuɗum, Kayak wan heum uɗie, gemu haen imu ele guittak awawa daalo, amge anam iitta. Haen nakok malele, Kristus Nug haen laippu aakkuib wanppa na, hipunin uhuqkkunu nukka Nug beɗu mana mettak bia Kayak mettom.

1 Pita 1:21

Nuhigppa ag Kayaknu oolagppa genab dootteb. Nug mauhe, Kayak Nug he, Nug eɗua hibaitte, Kayak Nug binag amahlak oppiaawak ele Nug mettom amunu, ahilag ooppa genab doyak, keeke ena bekkunu dabmak aɗa oiyak ahilag ele amu, Kayak Nugib keeke aɗit amu diilah daatte.

1 Pita 3:22

Jesus Nug eɗua hibaitta, Nug hab aabppa teum. Nug Kayak eppeg naɗiap-ppa daatte. Engel oh, laa ag gumaknu ehah ele oh, aria ɠagattag digdig oh ele, ag oh Nug waappaib daatteb.

2 Pita 1:16

Ig kaya, hamu doyaknu am ittag qak ele, auntai laa nug nukka, nuhig dabmakppa he beppig amu, ig kaya amu laa aot, ihinig Naɗi Jesus Kristus, Nug wanppa uɗiom, Nug am ɠagattag ele, ig amunu ag amelagppa ii mattimut. Iitta. Ig amenigppanab, Nug am danab dagom onig ɠagattag ele anidmut, amu ig amunu ag amelagppa mattimut.

2 Pita 1:17

Haen Mame Kayak Nug Jesus binag huma, binag amahlak oppiaawak ele hab aabppanu mettom amu, ig doomut. Kayak Nug inam aum. “Imuam da Bekkal, da nuhignu ool mauhtte. Da nuhignu enanag doottem,” awa aum.

1 Jon 1:7

Amge Nug nukka amahlakppa daatte, amubia ig amahlakppa oittem dayeb amu, ig oh nug oo laippu ele nug doya dayakppa daattem, amu Nug Bekka Jesus, Nug tiig ihinig hipunin oh mihehe, ig oppiak daattem.

1 Jon 3:5

Amu ag dootteb, Kristus Nug heeb, hipunin iitta mekkunu miag atiom. Nug ooppa hipunin laa ii daatte.

Jut 1:25

Kayak Nug nukka am Kayak, amu Nug am Padal ii maknu ehanittak ihinig daatte. Anam aakku amu, Jesus Kristus, ihinig Naɗi, nuhigppa binag amahlak oppiaawak ele, dagom onig ɠagattag ele, ɠagattag, amu gumaknu ehah oh ele Kayak, nuhigppa dayeg! Keeke amu oh am anukka haen ii digmeumppa, gemu, butti aɗi ele hanhan nuhigppa daatteb. Genab.

Revelesen 3:21

Aun laa nug ban eɗidkku amu, da nug daakkunu elele appi, nug da ele dahil sia kingppa, anukka da ban eɗitti, gemu da Mamel ele nuhig sia kingppa daattep amubia daagnih.

Revelesen 4:11

“O Naɗi, ihinig Kayak, Na keeke ohnab heme. Nahip doyakppaib na keeke oh he beppig. Gemu keeke amu oh nahip doyakppaib ele iikku daatteb amunu, binag amahlak oppiaawak, ɠagattag, binag ele nahip-ppa daakkunu, na elele daattem.” Ag anam aegeg anidmi.