Genesis 8:21 - Nobonob Baibel

²¹ Mana mettette, Yawe Nug mana mettak amu muttuɗignu ooppa ena doya, Nug nukka, Nug ooppa inam aum. “Da danab dilag eheɗ hak amunu wan eheɗ laa awaknu anak waappa daakkunu memi imubia baula iinab hepa. Aɗinu? Da doottem, danab nug menuak haenppa ukka ukka, mauhak nuhigppa amu, keeke laa nug danab ooppa hipuninppa eeɗkkunu daatte. Amu laa ele, da hemi bia, da keeke oh bau daatteb ele amu, baula heppi, ii mauhmana.

Genesis 8:21 ပူးပေါင်းရင်းမြစ်များ

Genesis 3:17

Yawe Kayak Nug anam awowa, nug eɗua Adam amegppa aum. “Na waatnu nai dim lamidna, ad meu aa ii lamayanunab ami ele lame amunu, na beɗunppa wan am eheɗ laa awaknu anak waappa daatte. Anam daatte amunu, na haen oh ee aokkutnu uɗat okkai guittak ele hekkut.

Genesis 4:12

Aria, haen na dad uɗat hekkut amu, keeke oh ena ii bemana. Laa ele, na aben laippuppaib ii daamna. Na qati qati oikkut,” awa aum.

Genesis 5:29

Do amu Lamek nug aum. “Yawe Nug wan eheɗ laa awaknu anak waappa daakkunu meum amu, nid imu nug ig wanppa uɗat ihinignu ehanigkku,” amunu Lamek nug onig Noa ataɗom.

Genesis 6:13

Antta amu, Kayak Nug Noa amegppa aum. “Danab ah ag heegeg, laa guittak nau mauhnoak mettak kobol am wanppa ambeum daatte amunu, da heppi, danab oh ag iitta mekkulag. Genab da heppi, danab oh, wan ele padal mekkulag.

Genesis 6:17

Da keeke bau wan qaɗeppa oitteb ele amu mauhkkulagnu heppi, le hiɗ naɗi bekku. Beeb amu, keeke amu oh mauhkkulag.

Genesis 6:5

Amu Noanu haenppa Yawe nug danab dilag kobol, amu dabmak ele nauib daye anttom.

Genesis 6:7

Yawe Nug anam antta doya amu, Nug aum. “Da danab hemi amu, ag, aria doɗ, doɗ laa ag oolag wan qeeqe oitteb, amu ai hab waappa hagagaɗna oitteb ele amu, da heppi, ag oh iitta mekkulag. Aɗinu? Da ag hattaminu kahipal aoɗom bia doottem,” awa aum.

Job 14:4

Danab laa nug heeb, keeke dubuttid ele eɗua, oppiak ele daakkun elelete? Iitta!

Sam 51:5

Antte! Anai menuiɗom, haen amuppa da hipunin danab daami. Ge, anai ooppa nid bekkulnu meul oum, haen amuppa da hipunin danab daami.

Sam 58:3

Nau hak danab ag anilkad menuatteg dona, ag laippun ib apiɗidna, nauhtteb. Yo, ag anilkad oolkadppan donana, ag ib apiɗidna, hambuppuak nai maditteb.

Sam 58:4

Keeke ag hetteb, amuam mat naunu ouɗi, danab he mauhtteb, ag amubia hetteb. Ao, ag Kayak nai doomnanu, ag mat nau onig kobra nai laa ii dootte, ag amubia ag daulag itutteb.

Eksodas 29:18

na sipsip dawai amu oh qaɗabppa main, da meɗe! Amuam da, Yawe, da meɗaknu manaknu ofa. Ao, amuam da, Yawe, da meɗaknu aab aɗunu ofa. Mana mettak amunu muttuɗignu da, Yawe, da oolppa ena doottem.

Eksodas 29:25

Ag amu hena malappeg, na keeke amu oh ag eppelagppanu aon, doɗ laa, manaknu ofa dayeye, na qaɗabppa main meɗame ele amu, na keeke ag eppelagppanu aome ele, na amu ele qaɗabppa mane! Amuam da Yawe, da meɗaknu aab aɗunu ofa. Mana mettak amunu muttuɗignu da Yawe, da oolppa ena doottem.

Prowerb 20:9

Aun nug, “Da hei, da ool oppiak ele daatte,” akkunu elele? Ge, aun nug, “Da dubuttid iitta, hipunin ele iitta,” akkunu elele?

Eklisiastis 7:20

Wan imuppa genab tutukku hak danab daatteb, amge ag oolagppa laippu laa nug tutukkuib haaha, deɗ laa hipunin iinab hette laal ii daatte.

Aisaia 47:12

Anam bekku amunu, ag digmena huu daappig haenppa, ag haen amuppa digmena, baɗ digdig, emaɗ hak digdig ɠagattag aoglagnu henana oippig amu, ag amu hekkulagnu aib uuppig! Ag tuɗidna hekkulag amu, ag ehanittak nakok aoglagtai. Ag amu tuɗidna hekkulag amu, ag heppeg, laa ag eheɗ nau baɗadkkulagtai. ⌊Iitta. Da aɗi heppi bekku am bekku!⌋

Aisaia 47:15

Ag Babilon ag digmena huu daappig amu, ag haen amuppa danab amu ehanadkkulagnu gumadna godappig, amge uug bekkun daatte amu, uug amu bemanu ag ehanadkkulagnu elele iitta. Danab amu ag anen anen ahilag dabmak eheɗppa oinna hebeppeg, ag ehanittak laa ii aomna. Laa ag oolagppa ag ehanadppeg, padal ii memananu am laa iitta.” Yawe Nug anam atte.

Aisaia 48:8

Anukkanu, gemu ele ag dahil nai dooglagnu uun, ag amunu dabmak ii aoppig. Ag daulag hanhan ituakib daatte. ⌊Da gemu keeke bau imunu madittem, anukka ag amelagppa ii ai dooppig amu, amunu diig am⌋ da doottem, ag paha da dimeɗan, laa binag mekkulagnu hetteb. Ag digmak haenppanu, gemu ele ag da waalppa daamnanu, dahil nai tabappeg nekkunu henan oitteb.

Aisaia 53:6

Ig danab ah oh ig sipsip matatun gona, padal metteb, ig amubia ib apiɗidta, matatut gomut. Ao, ig anen anen oh ig ihinig dabmak dim lamidkkunignu hemut. Ge, ig anam hemut, amu Yawe Nug ig danab ah oh, ihinig hipunin amu, Nug nuhig maɗi nid, nug amu maokkunu nuhigppa meum.

Aisaia 65:6

⌊Da ag ehanadkkulnu, da ag eɗue diiadkkulnu ele heine daami, amge⌋ antte! Danab keeke daug atimanu pepappa yaatte, amubia ahilag hipunin da noolppa daatte. Anam daatte amunu, da iinab uupa. Da bu eheɗ hak amunu elele eɗuen madakkul. Da genab ahilag eheɗ hak eleleppa ag nob nau madakkul.

Jeremaia 17:9

O gadon, danab ah oolag unuqagppa hambuppuak aakkuib daatte. Danab aun laa danab oolagppanu nug amu heeb, babaittak daakkunu laa iitta. Aun nug amu tutukku dookkunu elele iitta.

Jeremaia 18:12

Na ag amelagppa anam appe dooglag, amge ag eɗun, na amenppa akkulag. ‘Ig anam helom, amge elele iitta. Ig ikka ig attem dabmettem am hekkunig. Ig anen anen ig oɗe dim lamidmatanu dabmak ihinig ɠagattag eppom daatte. Anam amu, ig aɗi eheɗ hekkunignu onig daatte amu, ig hekkunig,’ aon akkulag.” Yawe Nug anam atte.

Jeremaia 8:6

Da daul humen, nai dookkulnu daye autenab aottem, amge laa nug nai tutukku ii maditte. Laa nug nau hak nuhignu, “Da eheɗ hemi,” anana, oo ii eɗutte. Ag anen anen ohnab ag eheɗ hekkulagnu dabmetteb; ag dabmak amuib dim lamidtteb. Ag hos ag banppa qaiettan gotteb, ag amubia ahilag dabmak eheɗ dim lamidkkulagnu hetteb.

Esekiel 20:41

Da hei, gemu ag wanppan wan laalappa daatteb. Ao, da hei, gemu ag wan digdigppa matatun gona daatteb. Amu da ag wan atu amuppanu qagmatten omaladppi, ag uɗin, ahilag wanppa daanna, da danab nug kalu danab ile muttuɗig enanag bette mana, muttuɗig enanag dootte, da ahilagnu muttuɗig ena, amubia doyen, da ag dahiladnab daaglagnu diiadkkul. Da ag diien heppi, danab ah wan atu ohppanu ag da ag Israel oolagppa oppiaawak daattem dooglag.

Lewitikas 1:13

Amge ofa mameg nug tatam ooppan keeke, gamag, uɗuag, biig keeke, amu baekkud ele oh amu, nug leppa ihakkuoitte. Amu malak amu, mana mettak danab nug doɗ kunum oh awa, aakku qaɗabppa mana, Yawe medakku. Mana mettak amuam manaknu ofa; am aab aɗunu ofa aakku. Mana mettak amunu muttuɗignu, Yawe Nug ooppa ena dootte.

Lewitikas 1:17

Anam hewowa, nug haug laih laih aɗalata taietteb, ai beɗu pana otaleb, anamib dayaɗ! Anam hewowa, nug qaɗabppa aab attan meeb eokku. Mana mettak amuam manaknu ofa; am aab aɗunu ofa aakku. Mana mettak amunu muttuɗignu, Yawe Nug ooppa ena dootte.

Lewitikas 1:9

Amge ofa mameg nug tatam ooppan keeke, gamag, uɗuag, biig keeke, amu baekkud ele, amuam tatam leppa ihakkuoitte. Amu malak amu, mana mettak danab ag doɗ kunum oh aakku qaɗabppa manan, Yawe mettaglag. Mana mettak amuam manaknu ofa; am aab aɗunu ofa aakku. Mana mettak amunu muttuɗignu, Yawe Nug ooppa ena dootte.

Lewitikas 26:31

Da heppi, ahilag aab okkai am nauhak daappeg, dup noa binag mak aben oh loppaɗppi neeb, ahilag mana mettaknu amu, da ool iinab hema. Mana mettak amunu muttuɗignu amu, da ool enanagnab doolo, amge da anam ii doopa.

Lewitikas 4:31

Am laa nug beɗuppa aab ele nug meeme ittag oh, ag laippu dayaknu ofa hetteb bianab doɗ beɗuppanu aokkuoitte. Nug anam heeb, mana mettak danab nug ittag qaɗabppa maneb eokku. Mana mettak amunu muttuɗignu, Yawe Nug ooppa ena dootte. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.

Lewitikas 8:28

Ag anam heeg amu, Moses nug amu oh ag eppelagppanu awa, manaknu ofa qaɗeppa ma, nug baɗ awaknu ofa heum. Amuam Yawe mettaknu aab aɗunu ofa aakku. Mana mettak amunu muttuɗignu, Yawe Nug ooppa ena dootte.

Namba 15:3

ag anen anen deɗ laala aab aɗunu ofa henana, Yawe mettaglagnu doɗ aon, Nug gumidna wana, Nug mettaglag. Ag mana mettak hena, doɗ maippeppeg, muttuɗig teebeb, Yawe Nug mana mettak amunu muttuɗignu ooppa ena dookku. Doɗ laala amu makau, laala amu sipsip, o iitta meeme. Mana mettak amuam manaknu ofa, o iitta mana mettak laala daaglag. Mana mettak amuam nai genab ana qakkaknu ofatai, o iitta mana mettak amuam ɗo hamu mettaknu ofatai, o iitta mana mettak amuam hobul dayaknu haen epeɗiaknu ofatai. Amge ag aɗi mana mettak aon, Yawe gumidna wana mettaglag amu, auntai laa nug anam hette amu, nug ee aegnu ofa ele awa, Yawe gumitta ukka medakku. Mana mettak amu haknu am 1 kilogram plaua enanag, 1 lita goɗen ele kabolia, mana Kayak medakku.

Matyu 15:19

Kobol eheɗ imu oh dabmakppanu bette; dabmak eheɗ, danab qe mauhak kobol, ewau pakkua gappai hak kobol, gappai hak kobol digdig laa, yabhok kobol, nai genab iitta anak kobol, baeg qak kobol ele,

Jon 3:6

Danab nug beɗu bau daakkunu, amuam anig mameg dilahppa aotte, amge danab nug Kayak Bekka bekkunu amu, nug amu Kayak Ouɗi eppegppanu aotte.

Rom 1:21

Amu ag Kayak dooppig, amge ag Nug am genab Kayak oolagppa genab ii doonna, ag Nug binag amahlak oppiaawak ii mettana, ag nug amegppa, “Ena heme,” aon ii appig. Iitta. Dabmak ahilag eɗua, dabmak tutukku iitta be, ag oolag ootot aqe, gatatu manom.

Rom 3:23

Aɗinu? Ig danab oh ig hipunin hemut amunu, ig Kayak Nug ihinignu ig attem daagnignu dabmeum amu, ig amubia laa ii daattem.

2 Korint 2:15

Aɗinu? Danab laa nug ad uɗug muttuɗig enanag ele eɗippa me, muttuɗig otte amubia, ig Kayak noobppa Kristusnu muttuɗig enanag daatta, danab Kayak eɗua diiom, ag padal mekkulagnu ii oitteb, amu danab ag oolagppa genab ii dootteb, padal mekkulagnu oitteb ele amu, ag oh Kristusnu muttuɗig dootteb. Amge ag oh ahilagppa amu, muttuɗig amuam laippu bia ii daatte. Iitta.

Epesus 5:2

Ag nug oo mauhakppa, Kristus Nug ihinignu oo mauhe, Nug nukka Nug bau dayak nuhig ig ehanigkkunu uua, ihinignu mauhom bia oiyeg! Kristus Nug danab ag doɗ main Kayak muttuɗig ena dookkunu medatteb bia, nukka nuhigppa anam heum.

Pilipai 4:18

Ag Epaproditus eppegppa keeke meeg dahilppa uɗiom amu, da awen, da keeke kuɗumnab, elelenab daattem. Keeke ag meɗappig ele, keeke amuam mana mettak muttuɗig ena ele ag Kayak medappig bia daatteb. Kayak Nug mana mettak anam awa amu, Nug oo enanag ele daatte.

1 Jon 5:19

Ig doottem, ig Kayak bekkod daattem, amge wanppanu danab ag Satan waappa daatteb.

1 Samuel 26:19

O naɗi dahil, na am king daattem, da am nahip maɗi nid, na dahil nai dookkutnu ool daatte. Amu Yawe Nug he, na ahan, da aɗailkkutnu lamiɗttem dayeb amu, da doɗ laa mane, Nug medappi, Nug dahilnu oo ena daakkunu ool daatte. O iitta, danab laala ag heeg, na ahan aɗailkkutnu oittem dayeb amu, am geha ag Yawe noobppa eheɗ laa awaknu anak waappa daaglagnu ool daatte. Aɗinu? Ag kobol hetteb, kobol amuppa ag da lamiɗna, da inam oiyeye, da Yawenu mettid haknu peh lag appa ukken, Nug noobppa dup noin binag mekkulnu elele iitta. Kobol ahilag amuppa amu, ag aakku da amelppa, ‘Na gona, kayak laa binag me!’ atteb bia hetteb.