Genesis 49:11 - Nobonob Baibel

¹¹ Juda nug keeke kuɗum ele amunu, nug danab nug donki nuhig muɗi grep diigppa qakkalo, nug amubia hekku. Ao, nug danab nug donki nag nuhig muɗi grep enanagnab, amuppa qakkalo, nug anambia hekku. Danab nug keeke kuɗum ele, wainnu am keeke hamu bia doya, lamen elab aguppa ihalo, Juda nug anam daakku. Ao, danab nug keeke kuɗum ele, lamen nuhig grep lebuppa ihalo, nug amubia daakku.

Genesis 49:11 ပူးပေါင်းရင်းမြစ်များ

Genesis 49:12

Juda nug danab beɗuppa oɗe laa iitta, nug amubia daakku. Ao, nug danab beɗuppa enanag dootte, nug anambia daakku.

1 King 4:20

Juda, Israel ele ag am appatna, danab ah huanak, kuɗumnab daappig. Ebqak ahilag am kuɗumnab, am abuɗ yu ihippa daatte, amubia. Ag ee, le ele, elele lanana, gamag ahak ele ena daappig.

1 King 4:25

Haen Solomon nug king dayeye amu, Juda danab ah, am Israel danab ah ele, aab onig Dan, appanu ukka ukka, Berseba aabppa batak, ag oh baɗak iittappa daappig. Amunu danab oh anen anen ag ahilag ad fig, amu muɗi grep ele waappa daanna, ag gumappig. Haen amuppa keeke eheɗ laa ahilagppa ii beum. Iitta.

2 King 18:32

Ag anam daanna labeppeg ukkeb, da eɗuen uɗien, da omaladppi, ag gona wan laappa, wan amuam ahilag wan imubia amu, da omaladppi gona, aguppa daaglag. Wan amuppa ee aeg, amu muɗi grep ele betteb. Ao, appa ag ee, wain bau ele elelenab aoglag. Wan amuppa bret, grep dad ele elele daatteb. Ao, wan amuppa olip ad ag beegeg, uppuh leppu ele daatte. Ag bau dayak tituaneg! Ag mauhak aib tituanppig! Ag Hesekaia atte amu, ag aib dooppig. Aɗinu? Nug atte. “Yawe Nug ehanikkeb, ig Asiria dilag king eppegppa ii daamta,” awa atte,

Joel 3:18

Haen amuppa amu, grep dad meu enanag otteb ele, am qauko oh tonadkkulag. Amu ag Israel, ag ahilkad makau, meeme ele qaukoppa gikkiɗah lanan daanna, huh huanaknab mattaglag. Le nakok Juda wanppa daatteb amu, ag ii qaɗaiettamna. Laa ele, Yawenu mettid lag ooppanu amu, le laa uɗiaya, oolnu noak ad akasia betteb amu, aben amu oh le madakku.

Amos 9:13

Amu Yawe Nug inam ele atte. “⌊Israel dilagppa⌋ haen laa uɗitte amu, da heppi, ee aeg ahilag am meu huanaknab okku. Ag ee aeg tuɗidna aonna, ii malappig haenppa, wan buuak haen dokku. Amubia ag keeke tuɗidna eppanna, ii malappig haenppa, grep meu tabappeg, leppu aoglagnu haen dokku. Amu ele, ahilag grep dad am qauko okkai daugppa daan, meu huan okkulag. Ao, grep dad am qauko nakokppa daan, meu huanaknab okkulag.

Maika 4:4

Danab anen anen oh ag maɗoɗ ele muɗi grep ahilkad logoppa daaglag. Ao, ag maɗoɗ ele, ahilkad ad fig waappa, logoppa daaglag. Ag anam maɗoɗ ele daappeg, laa heeb, ii baɗamna. Keeke amu oh anam daakkunu diig am, Yawe Nukka Ɠagattag Oh Ele Nug amu bekkunu ana malom.

Duteronomi 32:14

Nug he, makau, meeme ele ag lanaknu huh huanak ele daappig. Ao, Nug he, sipsip nakkud ittag ele, amu meeme ele ag ena meegeg, lanaknu teppulkad ena ele daappig. Yawe Nug Israel danab ah sipsip dawai enanagnab Basannu, Nug amu ele mattom. Ge, Nug ag wit ena ele mattom. Nug ag amu matte, Nug he, grep ahilkad meu ena oegeg, ag wain enanag lappig.

Duteronomi 8:7

Ag anam hekkulagnu diig am, Yawe, ahilag Kayak, Nug ag diia, wan ena, lenag naunau ele, le ameg ena ele, oolnu noakppa, qaukoppa ele le wan ooppan qeppuɗin bettebppa diia gotte.

Duteronomi 8:8

Wan amuppa wit, bali, grep muɗi, ad fig, pomigranet, olip ad, amu uppuh leppu kuɗum ele daatteb.

Revelesen 14:20

Amu ag grep meu, grep meu tappa leppu awaknu aben aab okkainu aɗ dimittim appa bappaidppigppa tabappig. Tappaeg, grep leppu noa amba eɗua tiig ba, leta dimittim ukka, 296 kilomita ukkom. Unuqag nuhig am hapahapa ewam bia.

Revelesen 7:14

Oɗ meɗe, da nuhig oɗmak nob mein ami. “Naɗi, na doottem,” awe ami. Da ai amu, nug da amelppa aum. “Danab imu amu, ag eheɗ hattak okkainab, amuppa daappig, amge ag Kayak di-ii-medappig. Ag lamen elab ahilkad Sipsip Nag tiigppa ihalatteg hakkab ebappig

Revelesen 7:7

Israel dilag huu okkai Simeonnu am 12,000, Israel dilag huu okkai Lewinu am 12,000, Israel dilag huu okkai Isakarnu am 12,000,