Eksodas 7:3 - Nobonob Baibel

³ Nug anam akku, amge da heppi, Paronu dabmak aakku ɠagattag eppeb daakku. Anam dayebeb, da geha dahilnu dabmettaknu kobol danab haknu elele iitta kuɗum, uɗat ɠagattagnab kuɗum laa ele Isip wanppa hekkul.

Eksodas 7:3 ပူးပေါင်းရင်းမြစ်များ

Nehemaia 9:10

Nahipnu dabmettaknu kobol danab haknu elele iitta, amu uɗat ɠagattagnab ele na hee, Paro, nuhikkud ehanittak anuqak danab, nuhikkud danab ah ele anattegeg, uug aqom. Isip danab ag beɗuppa tak danab dilag kobol henana, ag ig mamenkad aɗi eheɗ hattegeg anidme amunu, na anam aakku heme. Na kobol digdig amu hee, danab ah wan atu kuɗumnabnu doon, ag na onin okkai daatte aakku dooppig, gemu ele, ag dootteb.

Sam 135:9

Yawe Nug Isip appa, nuhignu dabmettaknu kobol danab haknu elele iitta, amu uɗat ɠagattagnab laala ele heum. Nug uɗat okkai amu oh he, Paro, amu nuhikkud danab ah oh ele ag amuppa uug okkainab aon daappig.

Sam 78:12

Ag mamelkad aɗi ag anttegeg, Nug keeke danab haknu elele iitta kuɗum heum. Ao, uppa Isip wanppa, wan atu onig Soan talilittak, appa Nug keeke danab haknu elele iitta kuɗum heum.

Eksodas 11:10

Moses, Aron ele amu, aa uɗat ɠagattagnab ele kuɗum Paro noobppa hepiɗ, amge Yawe Nug he, Paronu dabmak aakku ɠagattag eppa dayom amunu, Paro nug he, Israel ag nuhig wan, am Isip wan, ag wan amu ⌊paha⌋ uun ii goppig.

Eksodas 11:9

Yawe Nug matu keeke amu oh ii nak haenppa Moses amegppa ⌊nai laa aum amu, nai amu aakku meu oum.⌋ Nug aum. “Paro nug geha nahip nai ii doya hekku. Nug anam hekku, diig amunu da geha uɗat ɠagattagnab ele, da amu laala Isip dilagppa hekkul,” awa aum.

Eksodas 14:4

Nug anam ab, geha da heppi Paronu dabmak aakku ɠagattag eppeb, nug geha eɗua, ag diikkunu dim lamadkku. Amge geha da nug, nuhikkud daup ele eɗatten, geha da amuppa, da binag amahlak oppiaawak ele aokkul. Da amu heppi, Isip ag geha dooglag; da dakkaib, da am Yawe,” awa aum. Aria, Israel ag Yawe aum, ag amu dim lamidna, ag eɗun goppig.

Eksodas 3:20

amunu, geha, da kobol digdig, danab haknu elele iitta Isip wanppa dahil ɠagattagppa geha heppi, kobol amu Isip danab ah eheɗ oɗoɗadkku. Aria, anam dayeb amu, dimppa Paro nug ag paɗatteb gokkulag.

Eksodas 4:21

Am Yawe Nug Moses amegppa aum. “Dimppa na gona, Isip tewona amu, na kobol danab haknu elele iitta, da na kobol amu na hekkutnu ɠagattag mettami amu, na amu oh Paro noobppa hekkut. Na anam hekkut amge da heppi, Paronu dabmak aakku ɠagattag ebakku. Nuhig dabmak am ɠagattag eppa dayebeb, Paro nug danab ah uuatteb ii gomana.

Eksodas 4:29

Amu dimppa amu Moses, Aron ele ⌊aa Isip goya,⌋ aa Israel dilag ikki danab qagmaadya,

Eksodas 4:7

Anam dayeye, am Yawe Nug baula aum. “Na eppen baula meppe, saket ooppa noaɗ!” awa aum. Yawe Nug anam a, aria Moses nug anam ha, haen nug eppeg eɗua awe amu, eppeg am ena, beɗu laa oh daatte bia dayom.

Eksodas 7:13

Aqa laattom, amge Yawe Nug aum bianab, Paronu dabmak ɠagattag eppak dayom, nug Moses, Aron ele dilah nai amu ii doyom.

Eksodas 9:16

amge da geha dahil ɠagattag okkai na ippunidkkulnu, danab ah wan atu ohppa da onil dooglagnu amu, da na king meitti, na okkai aakku daattem ⌊amunu, da ag aqai ii mauhppig⌋.

Prowerb 21:1

King nug Yawe eppegppa daatte, amuam lenag bia. Ao, Nug le ippu adeppa gokkunu he, le gotte bia, Nug kingnu dabmak attem bekkunu he bette.

Aisaia 51:9

O Yawe, na ahan, nahip ɠagattag amuppa ehanigkkutnu oɗ medattem! Na anukka, haen laappa ehanigme, amubia ehanigkkutnu oɗ medattem! Na Rahap iite eɗidna, tuqae neum? Yo, na doɗ okkai nau ele amu iite qeme?

Maika 7:15

Am Yawe Nug atte. “Haen ag alalkad ag Isip wanppanu ahan, Kanan wanppa uɗiegeg, da hei, ag kobol danab haknu elele iitta kuɗum anadppig, amubia da heppi, ag gemu daatteb, ag baula dahil hak amubia anadkkulag.”

Jon 4:48

Jesus Nug nug amegppa inam aum. “Da heppi, ag Kayak dabmettaknu kobol danab haknu elele iitta digdig ii anidkkulag amu, ag oolagppa genab iinab dooglag,” awa aum.

Aposel 2:22

Amu Israel danab ag nai imu doyeg! Da ag amelagppa Jesus, Nasaret ted, nuhignu appi dooglag. Ag akka aakku dootteb, Kayak Nug ehanitte, Nug ag oolagppa kobol danab haknu elele iitta, uɗat ɠagattagnab, Kayak dabmettaknu kobol danab haknu elele iitta digdig heum. Kayak he, Jesus anam heum, amuam Kayak Nug Jesus me neum ippunadtte.

Aposel 7:36

Amu Moses nug danab amu ag Isip wanppanu gokkunu omalattatta, nug Kayak dabmettaknu kobol danab haknu elele iitta digdig heum. Nug omalatta ugakka, nug Isip wanppa, Le Kokoɗppa amu atu taɗakppa ele, appa maɗ 40 batak anamib heum.

Rom 15:19

Ele amu, iitta aɗi ag Kayak dabmettaknu kobol danab haknu elele iitta okkai okkai, amu kobol danab haknu elele iitta digdig ele Kayak Ouɗinu ɠagattagppa da hei anidna, ag Kayak nai dim lamidppignu madikkul. Nug anam ehaniɗom amunu, da Jerusalem appa digmein, Kristusnu Nai Ena ohnab mehuqeqe, aben ohppa ele oii ukke ukke, Ilirikum aabppa batami.

Rom 9:18

Amunu ig doottem, Kayak Nug danab laippu laa nuhignu oo gai-iitta doya oo metta ehanidkkunu oo hette amu, Nug aakku anamib hette, o iitta Nug heeb, danab laanu dabmak ɠagattag ebakkunu oo hette amu Nug aakku hette.

Duteronomi 4:34

Am kayak atten laa nug danab ah ameg laa, wanppan wan okkai laappan diia he, nuhig danabnab bena, ag wanppan wan laappa daaglagnu daappigte? Iitta! Amge Yawe, ahilag Kayak, Nug ahilagnu Isip appa anam heum. Nug nuhig ɠagattag okkaippa ag ehanatta, ahilagnu heewo, ag amelagppanab anidppig. Nug oɗe nau Isip dilagppa he be anidppig. Nug Isip ele ban heppig. Nug nuhignu dabmettaknu kobol danab haknu elele iitta he, Isip danab ah ag eheɗ nau baɗappig.

Duteronomi 7:19

Keeke Yawe, ahilag Kayak, Nug heum amu, ag amelagppanab anidppig. Nug Isip ag guittak okkainab aoppig ele amu he beum. Nug nuhignu dabmettaknu kobol danab haknu elele iitta, uɗat ɠagattag ele kuɗum heum. Nug nuhig ɠagattag okkainabppa keeke digdig amu oh haaha, ag Isipnu diia, omalatte uɗippig. Yawe, ahilag Kayak, Nug ɠagattag amuppaib, ag ehanatta heeb, ag danab baɗadtteb ele amu eɗadkkulag.