Eksodas 32:13 - Nobonob Baibel

¹³ Na nahipad maɗi nid, am Abraham, Aisak, Jakop ele, na amu dilag dabmenana, na amu dilagnu keeke hekkutnu na oninppa, nahip nai ɠagattag qena ame amu, na nai amu dabmekkutnu oɗ medattem. Na nai ɠagattagnab qakkan, ag amelagppa ame am inam. ‘Da dakka da onilppa nai imu ɠagattag qetten, inam attem. Da geha heppi, ag buɗulkad ag kuɗumnab, hoɗopai daatteb bia bekkulag. Anam amu, da geha ag wan imuppa daatteb ele amu, da wan imu oh ag buɗulkadppa madappi, ag aulag hanhan daakku.’ Na anam ag amelagppa ame,” awa aum.

Eksodas 32:13 ပူးပေါင်းရင်းမြစ်များ

Genesis 12:2

Amu da heppi, na buɗunad ag appatna, huu okkainab, ɠagattag ele daaglag. Da na itittak ena ele medakkul. Na onin okkai humappi, na laala itittak ena madakkut.

Genesis 12:7

Anam daye amu, Yawe Nug Abram gumitta na, amegppa aum. “Da wan imu oh na buɗun madakkul,” awa aum. Anam a amu, aben amuppa Yawe Nug Abram gumitta ukkom amunu, Abram nug Yawe noobppa dup noa binag mekkunu qaɗab qeum.

Genesis 15:18

Oiye amu, deɗ amuppa Yawe Nug kobol amuppa he, Nug Abram ele nug tituanya nai qagapiɗ. Aa nug tituanya, nai qakkaya, Yawe Nug Abram amegppa aum. “Da wan imu na buɗunad madattem. Tom nuhig amu inam; le nakok onig Isip, tom am amuppanu digma ukka, le okkai onig Yupretis batak.

Genesis 15:5

Awowa amu, Nug Abram omala, dimittim noa, amegppa aum. “Na neegppe teeb, habppa hoɗopai daatteb ele umu, na ebaqadkkutnu elele daattem dayeb amu, na ebaqe! Na buɗunad amu, geha ag anam daaglag,” awa aum.

Genesis 15:7

Abram nug Yawenu nai ooppa genab doye, amu Yawe Nug Abram amegppa aum. “Da am Yawe. Da na wan imu medappi, nahip daakkunu Ur, Kaldia wanppanu awitten, omaitti uɗime,” awa aum.

Genesis 17:8

Na gemu Kanan wan imu ooppa wan laihnu danab ina daattem, amu da na, na buɗunad ele, da ag wan imu madappi, ahilag wan hanhan daakku. Amu da ahilag Kayak daakkul,” awa aum.

Genesis 22:16

“Yawe Nug inam awa atte. ‘Da dakka, da onil awen, da nai dahil imu da onilppa ɠagattag qein madittem. Nai am inam: Na nid nahipnab meɗame. Na ii awaidna aɗame

Genesis 22:17

amunu, diig amunu da genabnab genab na itidkkul. Da itidppi, na buɗunad ag appatna, abuɗ le ihippa, o hoɗoppai bia kuɗum daaglag. Ag kekeɗ eɗadna, ahilkad aab diiglag,

Genesis 24:7

Yawe, Nug hab aabppa Kayak amu, Nug he, da appal diig, amu da mamelad ele uuadmi; Yawe Nugib da amelppa inam hekkunu nuhig nai ɠagattag qetta, inam aum. ‘Da na buɗunadppa wan imu oh madakkul.’ Nug anam aum amunu, Nug engel nuhig meeb, na noomppa anuqa ukka, keeke oh babaitteb, na Aisaknu ah laih uppanu aokkut.

Genesis 48:16

Kayak, Nug uug ohnu qagaiettakppanu uhuqiɗom amu; Kayak amunu amu, da Nug nid aɗit imu itittak ena matakkunu ool daatte. Ahilahnu amu, aa da alal Abraham, da mamel Aisak amu da ele, aa ig buɗunig ooppa daaglahnu ool daatte, amu aa appatpeɗ, buɗultippa danab kuɗum bekkulagnu ele ool daatte,” awa aum.

Eksodas 13:11

Aria, Yawe Nug Kanan wan ag madakkunu, ag, amu ag mamelkad aɗi ele amelagppa nai ɠagattag qetta aum. Anam amu, Nug geha ag diia omalatteb, ag Kanan danab, ag ahilag wanppa goppeg, Nug wan amu ag madakku amunu,

Eksodas 13:5

Yawe Nug Kanan wan, wan amuppa Kanan danab, Hit danab, Amo danab, Hiwi danab, amu Jebus danab ag daatteb, Yawe Nug ag Israel ag wan amu madakkunu, ag mamelkad aɗi amelagppa nai ɠagattag qetta aum ele, wan amuam wan enanag, wan ittag ele, amuppa ee meu huana otte amu, Nug wan amuppa omalatteb tekkulag amunu, ag maɗ ohppa kalam imu doobob, ag deɗ imu dabmekkulagoitte.

Eksodas 33:1

Amu Yawe Nug Moses amegppa inam aum. “Na danab ah na Isipnu omalatte uɗippig ele amu, ag aben imu uun, wan laa, da Abraham, Aisak, Jakop ele wan amunu amelagppa, ‘Wan laih umu, geha da ag buɗulkad madakkul’ mattien, nai ɠagattag qettami amu, ag wan amuppa gokkulagnu omaladna ukke!

Lewitikas 26:42

da geha nug tituana nai qakkak Jakop, Aisak amu Abraham ele hak amunu dabmeinne, wannu ele dabmekkul.

Duteronomi 1:10

Yawe, ahilag Kayak, Nug he, ag appatna, ag ebqak huanak, kuɗumnab, ag hoɗoppai habppa daatteb bia daatteb!

Duteronomi 7:8

Yawe Nug ahilagnu oo mauhtte, amu ahilagnu keeke hekkununab nuhig nai ɠagattag qetta, ag mamelkad aɗi amelagppa aum, diig aɗit amunu Nug ag uppa Isip dilag king Paro waappa begbeg maɗi nid daamnanu, Nug nuhig ɠagattagppa ag amunu qagaiettakppanu eɗua uhuqak haaha, Nug ag Isipnu diia, omalatte uɗippig. Yawe Nug amu hekkunu, nuhig ɠagattag okkaippa heum.

Duteronomi 9:27

Danab ah imu ag na oɗen dim lamidmananu dabmak ahilag ɠagattag eppom dayeye, hipunin, nau hak ele hetteb, amge na amu dab-ii-memananu oɗ medattem. Na dabmak baolin, nahip maɗi nid Abraham, Aisak, Jakop ele, na hee, na ag ele nug tituanna nai qagappig amu, na nai amu dabmekkutnu oɗ medattem.

Hibru 6:13

Aria, auntai laa nug Kayak eɗittak iitta amunu, anukka haen Kayak Abraham amegppa keeke hekkunu nai qakka aum amu, Kayak Nug, Nug onigppa nuhig nai ɠagattag qetta aum.