Eksodas 3:15 - Nobonob Baibel

¹⁵ Kayak Nug anam anana amu, Nug nai tuɗitta, Moses amegppa nai imu ele aum. “Na nai amu ag amelagppa awona, na Israel danab ah amelagppa inam ele appe doyeg! ‘Yawe, Nug ag mamelkad aɗi dilag Kayak, amuam Nug Abrahamnu Kayak, Nug Aisaknu Kayak, amu Nug Jakopnu Kayak ele amu, Nug he, da ag gumatte uɗimi.’ Da onil am anam aakku, amu da onil amuam hanhan anamib daakku. Amu Israel danab ag gemu daatteb, ag buɗulkad, alalkad aɗi, dimppa ag bekkulag ele amu, ag oh am da onil am anam ag dabmakppa aɗaglagoitte,” awa aum.

Eksodas 3:15 ပူးပေါင်းရင်းမြစ်များ

Genesis 24:12

Maɗi nid nug anam dayaya, nug Yawe inam unuqittom. “O Yawe, na dahil okkainu Kayak, na da ehaniɗkkutnu, na dahil okkai Abrahamnu oo mauhaknab ele dookkutnu ool daatte.

1 Stori 16:16

Amuam nug tituana nai qakkak Nug Abraham ele hepiɗ. Ao, amuam aɗi keeke Nug hekkunu Aisak amegppa nuhig nai ɠagattag qetta aum aakku.

1 Stori 29:18

O Yawe, ig mamenkad aɗi, Abraham, Aisak, Israel ele dilag Kayak, na heppe, nahipad danab ah ag hanhan, alet ele oolag enappa, oo qak iitta eleppa keeke na mettaglagnu, na heppe, ag nahipib dabmena oo metta ii uuak kobol dim lamidkkulagnu dabmak aɗan oiglagnu oɗ medattem.

2 Stori 28:9

Israel dilag daup ag amu heppig, amge Yawenu propet danab onig Odet, nug Samaria appa dayom. Nug appa daya, nug aha, Israel dilag daup uɗalag tekkunu wana, ag uɗalag teum. Nug ag uɗalag ta, nug ag amelagppa aum. “Yawe, ag mamelkad aɗi dilag Kayak, Nug Juda dilagnu oo nauhom amunu, Nug he, ag Israel dilag daup ag ag eɗatteg, eppelagppa daappig. Ag ag eppelagppa daappig, amge ag Israel ag oo doyak iinab doonna, ag oppoɗi bak nau, Kayak Nug amunu nob nau madakkunu daatte amu, ag oppoɗi bak amu doon, ag huanak aqaeg mauhppig.

Sam 102:12

Amge na, O Yawe, na hanhan king daattem. Na binan, onin ele hanhan daakkuib.

Sam 102:13

Na geha ahan, Sion danab ah dilagnu oot bodoetta le meeb ehanadkkut. Na amu hekkutnu diig am, gemu aakku na haen amu mena bappaidme daatte. Ao, na ehanadkkutnu gemu aakku anam hekkutnu nai ana tituanme.

Sam 135:13

O Yawe, danab ah wanppa daatteb, ag na onin hanhan dooglag; ii qettoɗma. Yo, na binan okkai ele amu wanppan danab ah ag hanhan doon, daulag ii atima.

Sam 30:4

Danab ah ag Yawenu oo metta ii uuak kobol dim lamidtteb ele, ag Yawenu ahi etteg! Yo, ag Yawe, Nug oppiaawak daatte amu, ag Nug binag meig!

Sam 30:5

Aɗinu? Nuhig oo nauhak am haen tutuib daatte, amge ii helo bia me, ehanittak kobol nuhig, kobol amuam danab ah nuhikkud bau daatteb, am haen amu oh anamib daatte! Danab ah ag tueb meeb gaappeg ukkeb, wagkkaɗkkutai, amge buttua amu, Nug ag gamag ahak madakku.

Sam 68:5

Kayak Nug nuhig aben nuhignu tituanak daatte ele, Nug amuppa daatte. Nug laa oh ag mamelkad mauhadppig ele, Nug ag mamelag daatte. Nug ah qab atognoadtte.

Sam 72:17

Danab ah ag hanhan king daulagppa dokkunu ool daatte. Ao, aam amahleb ukkeb ukkeb, batak haenppa batak, ag nuhignu daulagppa dokkunu ool hette. Wan atu ohppan danab ah oh nuhig itittak ena aon, ag nug binag mekkulagnu ool daatte.

Sam 72:19

Nug onig am binag amahlak oppiaawak ele; ag Nug hanhan binag meig! Wan atu ohppan danab ah ag Nug binag amahlak oppiaawak ele amu, ag amu anidkkulagnu ool daatte. Genab anam dayaɗ! Genab, anam dayaɗ!

Eksodas 15:2

Yawe Nug nukka da ɠagattag iukkunu dootte; Nugib da ehaniɗtte amunu, da gamag ahak doye, ahi edattem. Nugib da ehaniɗe, da padal ii mettem. Nug am dahil Kayak, da Nug onig humakkul. Nug am da mamelnu Kayak, da Nug binag okkai humakkul.

Eksodas 15:3

Yawe Nug am ban daup ɠagattagnab; Nug onig am Yawe.

Eksodas 3:13

Kayak Nug anam a amu, Moses nug Kayak amegppa inam awa aum. “Haen da ukken, Israel gumatte tein, ‘Ig mamenkad aɗi dilag Kayak Nug da meiɗe, ag gumatte uɗimi,’ appi, ag da, ‘Nug onig aun?’ oɗ meɗaglag amu, da nai aɗi am, ag amelagppa appi dooglag?” awa aum.

Eksodas 3:6

Kayak Nug anam anana, Nug nai tuɗitta aum. “Da am na mamenad aɗi anukkanu dilag Kayak. Da Abrahamnu Kayak, da Aisaknu Kayak, amu da Jakopnu Kayak ele,” awa aum. Moses nug amu doya, nug iɗu happutom. Aɗinu? Nug Kayak iɗuppa neekka, mauhmanu baɗom.

Eksodas 4:1

Kayak Nug anam a, Moses Nug amegppa inam aum. “Amge Israel ag dahil nai dooglagnu uuglagtai, oolagppa ele genab iitai dooglag. Da nai mehuqkkul amu, aria ag geha inam akkulagtai. ‘Na hambubuttem. Yawe Nug na gumitta ii neum.’ ⌊Ag anam akkulagtai amunu, ag anam appeg, geha da attem hekkul?⌋” awa aum.

Eksodas 4:5

Yawe Nug anam a, Moses nug anam he, Yawe Nug aum. “Na Israel gumadna gona, na heme imu bia ele hekkut. Amu na anam hekkutnu diig am, Israel danab ah ag anidna, ag da Yawe, da genab na gumitte nemi oolagppa genab dooglagnu hekkut. Da am Yawe, da ag mamelkad aɗi dilag Kayak, amuam da am Abrahamnu Kayak, am Aisaknu Kayak, amu Jakopnu Kayak ele,” awa aum.

Eksodas 6:2

Amu Kayak Nug tuɗitta, Moses amegppa inam aum. “Da am Yawe.

Prowerb 18:10

Yawe Nug am lag attan ta ukkak menppa hak, ɠagattag ele, Nug amubia daatte; genab tutukku hak danab ag nuhigppa qaiettan gona, ag bau daatteb.

Aisaia 26:8

O Yawe, ig ihinig oiyak ohppa nahip ɗo dim lamidtata, amenig na anidtata, naib amen mekkunig. Ig na onin, binan okkai ele daakkutnu oonig okkai daatte.

Aisaia 42:8

Da am Yawe, amuam da onil. Da uuppi, dahil binag amahlak oppiaawak ele am kayak hambuppuak laa, nuhigppa ii daama. Ao, da uuppi, kayak hambuppuak dottog laa da binal ii aoma.

Aisaia 63:12

Laa nug ɠagattag okkai okkainab nuhigppa Moses ehanittom amu, Nug gemu adeppa daatte? Laa Nug danab ah oh nuhig ɠagattag anidna, daulag ii atimanu Nug he, ig memetankad noolagppa yu obata, laih laih gilil bia dayeye, Nug danab ah nuhikkud ib amuppa yu gamagppa omalatta laih ukkom amu, Nug gemu adeppa daatte?” aon oɗ medappig. ⌊Yawe Nug amu oh heum amu,⌋ Nug nuhikkud danab ah omalatta, le gamagppa ib amuppa ugekke, hos nug uɗem gikkiɗahib daatteppa ugakka, na ii qette, amubia ig memetankad ag ib amuppa oippig.

Aisaia 9:6

Aɗinu? Ihinigppa ah laa nid danab menukku. Ge, nid amu Yawe Nug ihinignu meeb uɗikku. Nug ihinig king daakku. Nug onig anaknu laala inam: Ulum Ena Mettaknu Danab Enanagnab, Kayak Nukka Ɠagattag Ele, Mamenig Hanhannu, King Maɗoɗ Ele.

Jeremaia 33:2

“Da Yawe, da wan hein, da nuhig abenppa daakkunu memi. Da onil am Yawe, amu da nai imu na, Jeremaia, da na amenppa attem.

Daniel 2:23

O Kayak, na da mamelad aɗi dilag Kayak, da na amenppa, ‘Ena heme,’ ainne, da na binan humattem. Na da doyak dabmak ena ele meɗan, na ɠagattag ele meɗame. Ig na keeke laanu oɗ mettaut, na da ippuniɗme. Na hee, ig kingnu tul niiak attem dayom amu, ig aakku amu doomut,” awa aum.

Hosea 12:5

Kayak Nug am Yawe Kayak Nukka Ɠagattag Oh Ele. Nug onig amu Yawe!

Hosea 12:6

Anam amunu, gemu amu, ag Israel danab ah ag ahilag Kayak toppa eɗun gokkulagoitte! Ag haen ohppa oo mauhaknab kobol, nai doya mala hettoɗia epeɗia elele mettak kobol ele dim lamidkkulagoitte. Laa amu, ag haen oh, Kayak, Nugib am ahilag Kayak, ag Nug doon, nuhignuib oolagppa genab dooglagoitte.

Lewitikas 24:11

Nug qak ooppa, Israel ah, gamu Isip ted, nug bekka, nug Israel ted baeg qa, nug Yawe eheɗ laa awaknu anak waappa daakkunu aum. Yawenu nai aum, amuppa nug Yawenu dabittak nai mattiom. Nug anam heum amunu, ag danab amu Moses toppa ⌊hettoɗiak hekkunu⌋ aon goppig. Nug anig am onig Selomit. Nug am Dibri aɗeg, Israel dilag huu okkai laa Dan, amuppanu.

Maika 4:5

Anam amunu, danab ah wan atu laih ohnu, ag ahilkad kayak hambuppuak onigppa oiglagnu oolag heeb, anam oiglag, amge ig Yawe, ihinig Kayak, ig Nug onigppa hanhan oignig.

Malakai 3:6

Yawe atte. “Da am Yawe, da baoliak ii hettem, diig amunu Jakop buɗub, ag nauhna, iittanab ii meppig.

Matyu 22:32

‘Da am Abrahamnu Kayak, Aisaknu Kayak, amu Jakopnu Kayak ele,’ awa aum. Kayak Nug danab mauhppig dilag Kayak ii daatte; Nug danab bau daatteb dilag Kayak daatte,” awa aum.

Aposel 3:13

Abrahamnu, Aisaknu, Jakop elenu Kayak, Nug am ig mamenkad aɗi dilag Kayak, Nug aakku nuhig uɗat imuppa nuhig maɗi nid Jesus binag amahlak oppiaawak ele mettom. Amge ag amu, ag Nug aon, kekeɗ eppelagppa meppig. Pailat nug uhuqkkunu aum, amge iitta, ag am danab amu, Nug Jesus amu, ag Nug Pailat noobppa dimedappig.

Aposel 7:32

‘Da am na mamenad aɗi dilag Kayak. Da Abrahamnu, Aisaknu, Jakopnu ele Kayak,’ awa aum. Awa a, Moses nug ottaiya baɗa, Kayak anidmanu ii neekkom.

Duteronomi 1:11

Amu Yawe, ag mamelkad aɗi dilag Kayak amu, Nug heeb, ag tausen huanaknab appatkkulagnu, ele Nug ag itadkkunu, Nug hekkunu nai anan qakkom bia amu, da Nug anam hekkunu ool daatte!

Duteronomi 1:35

“Ag aun aɗi ag naittuɗ meppig ele, ag menuattak huu laippu bia, ag nau hetteb ele amu, ag oolagppa laippu laa nug geha wan ena da ag mamelkad aɗi madakkulnunab nai ɠagattag qetten ami ele amu, nug am bau dayaya, ii anidma.

Duteronomi 4:1

Aria, gemu amu, ag Israel, ag ɗo iɗu iɗu imu da ippunadkkulnu hettem amu, ag doon autnanab aweg! Ag bau daaglagnu, amu wan laa, Yawe, ag mamelkad aɗi dilag Kayak, Nug wan ag madakkunu hette, ag wan amuppa gona, aon daaglagnu, ag Kayaknu ɗo imu dim lamitteg!

Hibru 11:16

amge anam am iitta. Ag appalag ena dimppanu, hab aabppa amunuib dabmeppig amunu Kayak Nug, “Da ahilag Kayak,” akkunu amu uɗa ii nette. Iitta. Nug aab enanag, ag daaglagnu babaittom daatte.

Hibru 13:8

Amu Jesus Kristus Nug attem daatte amu, Nug tumai, gemu, hanhan ele anamib daatte.