Eksodas 3:14 - Nobonob Baibel

¹⁴ Moses nug anam a amu, Kayak Nug oɗeppa awa aum. “Laa hanhan daatte, am daib. Da anam daattem amunu, na Israel danab ah amelagppa, ‘Laa Nug, “Da Daattem,” atte amu, Nug da meiɗe, ag gumatte uɗimi.’ Na anam aon a!” awa aum.

Eksodas 3:14 ပူးပေါင်းရင်းမြစ်များ

Job 11:7

Na Kayak diignab attemnab daatte mattin anidkkutnu elelete? Ao, na Laa Nukka Ɠagattag Oh Ele, Nug oppiaawak daatte amu, na nuhignu doyak oh dookkutnu elelete? Iittanab!

Sam 68:4

Ag Kayaknu ahi etteg! Ag onig humeg! Ao, Kayak Nug lombig qaɗeppa dayaya gotte; ag baalag okkaippa nuhignu binag maknu ahi etteg! Nug onig am Yawe. Ag Nug noobppa gamalag ahaɗ!

Sam 90:2

Na qauko ii hattame haenppa, ao, na wan, amu keeke oh amuppa daatteb ele ii hattame haenppa, na, O Kayak, na daame. Na am Kayak. Na hanhan anam daame, hanhan ele anam daakkut.

Eksodas 15:3

Yawe Nug am ban daup ɠagattagnab; Nug onig am Yawe.

Eksodas 23:21

Ag nug nai akku amu, ag tutukku doon dim lamitteg! Ag nuhig nai aib tabappeg neum. Aɗinu? Da onil nuhigppa daatte amunu, nug danab ah dilag nai tappenak amu, nug amunu hamu ii dooma. Iitta! Nug bu madakku.

Eksodas 3:13

Kayak Nug anam a amu, Moses nug Kayak amegppa inam awa aum. “Haen da ukken, Israel gumatte tein, ‘Ig mamenkad aɗi dilag Kayak Nug da meiɗe, ag gumatte uɗimi,’ appi, ag da, ‘Nug onig aun?’ oɗ meɗaglag amu, da nai aɗi am, ag amelagppa appi dooglag?” awa aum.

Eksodas 6:2

Amu Kayak Nug tuɗitta, Moses amegppa inam aum. “Da am Yawe.

Eksodas 6:3

Anukka da Abraham, Aisak, am Jakop ele gumatte nei, ag da onil, Kayak Nukka Ɠagattag Oh Ele, ag amuppa da dooiɗppig. Amge da onil Yawe, da onil amuppa, ag da dooiɗkkulagnu amu, da ii ippunadmi.

Aisaia 42:8

Da am Yawe, amuam da onil. Da uuppi, dahil binag amahlak oppiaawak ele am kayak hambuppuak laa, nuhigppa ii daama. Ao, da uuppi, kayak hambuppuak dottog laa da binal ii aoma.

Aisaia 44:6

Yawe, Nug Israel dilag king, Nug Israel dilag qagaiettakppanu eɗua uhuqaknu ehanittak, Nug Yawe Nukka Ɠagattag Oh Ele, Nug inam atte. “Da hanhan daattem; anuqakppa, batakppa ele da daattem. Kayak laal ii daatte.

Matyu 18:20

Ao, danab aɗit, o ewam aakkuib ag da onilppa, aben adekkuppa qagmekkulag amu, da ele ag oolagppa daakkul,” awa aum.

Matyu 28:20

Ag keeke oh da ag amelagppa haknunab ami amu, ag amu oh ele ippuanatteg! Ag doyeg! Da haen oh ag ele daapput ukkeb, gog tak haenppa batakku,” awa aum.

Jon 8:24

Diig amunu da ag amelagppa tatam ami. ‘Ag hipunin ahilag amu ag tonadppeg mauhkkulag.’ Am genab, ag da am Kayak Bekka oolagppa genab ii dooglag dayeb amu, ahilag hipunin genab tonadppeg mauhkkulag,” awa aum.

Jon 8:28

Amunu Jesus Nug ag amelagppa aum. “Dimppa ag Danab Bekkalag da ad emaitakppa atuliɗona amu, ag da am Kayak Bekka dooglag. Amu ele, da dahil dabmakppa keeke ii hettem. Iitta. Mame Nug da ippuniɗom amu, da amunuib madittem, ag amu ele dooglag.

Jon 8:58

Anam aeg, Jesus ag oɗelagppa awa aum. “Da genabnab genab ag amelagppa attem. Abraham ii dayom haenppa da daami, gemu daattem, butti aɗi daakkul,” awa aum.

2 Korint 1:20

Ao, Kayak Nug keeke oh hekkunu nai qakka aum amu, ag oh Kristus nuhigppa meu otteb. Kristus nuhigppa, ig “Genab, anam dayaɗ!” atata, nai amuppa ig Kayak binag mettem.

Hibru 13:8

Amu Jesus Kristus Nug attem daatte amu, Nug tumai, gemu, hanhan ele anamib daatte.

Revelesen 1:17

Da Nug anam anttena, mauhak bia Nug baegppa nein qemi. Amge Nug eppeg naɗiap da qaɗelppa ma dayeye, Nug da amelppa aum. “Na aib baɗame. Da hanhan daattem; anuqakppa, batakppa ele da daattem.

Revelesen 1:4

Da Jon, da Kristen tamaniak eblaih aɗit ele Asia wanppa daatteb ele, da ahilagnu iikku yaattem. Kayak Nug gemu daatte, anukka dayom, dimppa uɗikkunu ele daatte, Nug, amu nuhig Ouɗi, kobol ena oh nuhigppa ambak daatte, Nug Kayaknu sia king noobppa daatte, amu Jesus Kristus, Nug keeke imu ohnu aɗi anttomnu mattiak danab dayaya, oo metta ii uuak kobol dim lamitta ippunikke anidttem, Nug danab mauhppig ele dilag eɗua hibaittak danab anuqak, wanppanu king oh dilag okkai ele daatte amu, ewam amu oh ag ahilag ehanittak okkai hamu mettak, ahilag maɗoɗ ele amu, ag danab ag tamaniak eblaih aɗit ele ooppa daatteb, ahilagppa daaglahnu ool daatte. Kristus, Nug ihinignu oo mauhe, Nug tiigppa ihinig hipunin oh uhuqom,

Revelesen 1:8

Naɗi Kayak Nug inam atte. “Da haen oh daattem; da gemu daattem, anukka daami, dimppa uɗikkulnu ele daattem. Da Dakka Ɠagattag Oh Ele,” awa atte.

Revelesen 4:8

Hab daup waɗele Kayaknu bauklel aotteb ele, ag oh haulkad eblaih laippu ele, ag haulag qaɗeppa, waappa ele amelkad doɗo kuɗum ele. Ag tuqan amun ele Naɗi binag menana, inam atteb. “Naɗi Kayak Nukka Ɠagattag Oh Ele, Nug oppiaawak, Nug oppiaawak, Nug oppiaawak. Nug gemu daatte, anukka dayom, dimppa uɗikkunu ele daatte.” Amun, tuqan ele ag anam anana daatteb.