Eksodas 27:9 - Nobonob Baibel

⁹ Aria laa amu, ag lamen laala, linen muɗi hakkab eleppa agappeg, lamen amuam dahil mettid haknu peh lagnu aɗ bia daya, lag amu talilitteb, haɗap dayaɗ! Am lamen laa, am aben laih ulah yau uɗitteppanu daakku amu, lamen amu, elab nuhig am 44 mita daakku.

Eksodas 27:9 ပူးပေါင်းရင်းမြစ်များ

1 King 6:36

Amu nug lag amunu talilittaknu aɗ ooppan haɗap daakkunu haaha, nug men otaɗa babaittak ele amu, nug amu akka, huu ewam, laa am laa qaɗeppa mak amu, maatte ukke, nug men aɗ amu attan ad sidanu plang gikkiak okkai ele me ukkom.

1 King 8:64

Laa ele, deɗ amuppa King Solomon nug wan huppu nakok laa Yawenu mettid lag odppa, haɗap amu gamagppa wan huppu amu Yawenu tituana mettom. Wan gamag amuppa nug manaknu ofa, amu ee aegnu ofa, amu laippu dayaknu ofanu ittag ele manatta, Yawe mettom. Aɗinu? Bras qaɗab Yawe noobppa dayom amu, qaɗab amu, nuhig okkai am elele iitta, Solomon nug manaknu ofa, amu ee aegnu ofa, amu laippu dayaknu ofanu ittag ele, nug mana mettak amu oh amuppa hekkunu elele iitta.

2 Stori 33:5

Amu Yawenu mettid lag, lag amuppa haɗap aɗit ohppa Manase nug aam, kalam, hoɗoppai ele binalag maknu qaɗab aqom.

2 Stori 4:9

Amu Solomon nug mana mettak danab dilag haɗap ha, nug haɗap laa okkainab, danab dilag, nug amu ele heum. Nug ha, nug haɗap aɗit amunu od ele hatta, nug od qaɗelagppa bras qataqeum.

Sam 100:4

Ag Yawenu mettid lag ooppa nonana, ag Nug amegppa, “Ena heme,” anana ag Nug laugnu aɗ taliliaknu od oɗeppa wanana, ag Nug binag meig! Ge, ag Nug amegppa, “Ena heme,” anana, ag Nug binag meig!

Sam 116:19

Da geha Yawe laugnu haɗap-ppa, hekkul. Ao, da Jerusalem gamagppa hekkul. Ag Yawe binag meig!

Sam 84:10

Deɗ laippu na guguitta dayaknu am enanag. Deɗ 1,000 atu laih adekku dayaknu am enanag iitta! Da Kayaknu mettid lag, da amuppa od gumak danab aakkuib daakkul am enanag. Da nau hak danab ele daat, keeke ena ena ele aɗat oignig, amuam eheɗ, am nau.

Sam 92:13

Ag am ad laa aben enanagppa eppaeg ba auta aotte, amubia ag Yawe laugppa daan, ena betteb. Ao, ag ihinig Kayak laugppa enaib daatteb.

Eksodas 27:10

Lamen am anam dayeb amu, ag biidod 20 ele hattana, ag diig ɠagattag daakkunu tatap brasppa hak 20 ele hattana, ag biidod amu aon, diig ɠagattag daaglagnu tatap oɗelkadppa aɗualadppeg nona daaglag. Ag silwa ele aon, ag huk, ring ele lamen aihaknu ele hattana, ag biidodppa qata-aqatteg!

Eksodas 35:17

Keeke laa haknu daatteb am, lamen aɗ, mettid haknu peh lagnu haɗap talilittaknu, aɗ amunu biidod, biidodnu diig ɠagattag daakkunu tatap, amu lamen laa aɗ odppa daakkunu ele.

Eksodas 36:17

Aria, lamen ring 50 amu batakppan lamen okkai laa daugppa koitattona, ag lamen ring 50 laa amu, batakppan lamen okkai laa daugppa ele koitadppig.

Eksodas 39:40

laa am, mettid haknu peh lagnu haɗap talilittaknu lamen, aɗ amunu biidod, biidodnu diig ɠagattag daakkunu tatap, amu lamen laa aɗ odppa daakkunu ele, amu aɗ amunu muɗi, pin elab ele. Aria, keeke oh mettid haknu peh lag danab ah appa qagmetteb ele, lag amunu ooppan keeke oh.

Eksodas 40:33

Moses nug amu oh ha malowa, nug mettid haknu peh lagnu haɗapnu aɗ ⌊lamenppa hak⌋ mettid haknu peh lag amu, mana mettaknu qaɗab ele taliliat-tte ele amu, nug aɗ amu qappowa, nug haɗapnu od oɗenu lamen ele aihom. Moses nug amu oh ha male, qappak uɗat amu aakku iitta meum.

Eksodas 40:8

Amu na amu hena malona, na dahil mettid haknu peh lagnu haɗap talilittaknu aɗ qappona, na haɗapnu aɗ od oɗeppan lamen ele aihe!

Esekiel 40:14

Oo laa onig Entrans Oo amu, oo amuppa haɗap ukkaknu aakku daatte. Amu danab nug melemel meum ele amu, nug amuppa melemel me, da oo amunu emaitak am 10 mita anidmi.

Esekiel 40:17

Amu danab nug melemel meum ele nug da omaiɗe, da od laug amuppa oiye ukken, Israel danab dilag haɗap-ppa wami. Da wain, neekki ukke, aɗ Kayaknu mettid lag nuhig tomppan keeke oh ele talilitta daatte amu, aɗ amuppa ag oo 30 ele bappaidppig anidmi. Lag amunu men gilil laih am aɗ aakku. Aria, lag amu noobppa ag aben amuppa men duqaeg daatte.

Esekiel 40:20

Amu danab amu nug od oɗe, od laug amuppa melemel ma malowa, nug ukka, od laug yawalti uɗitteppanu, amuppa daatte amu, nug lag amunu keeke melemel meum. Appa ele Israel danab nug odppa ta, od lag elab amu ooppa noa, nug ukka Israel danab dilag haɗap-ppa wakku.

Esekiel 40:23

Amu danab amu nug od laug batakppanu digma, mana mettak danab dilag haɗapnu aɗnu od oɗe digmakppa melemel me, melemel amuam 50 mita anidmi. Imuam od laug kaɗag uɗitteppanu daatte bianab daatte.

Esekiel 40:28

Amu dimppa danab nug melemel aɗom ele nug omaiɗa, od oɗe, od laug ele mana mettak danab dilag haɗap aɗppa yau uɗitteppanu daatte, od oɗe, od laug ele amuppa uɗia, mana mettak danab dilag haɗap ooppa noum. Nug appa ta, nug od oɗe, od laug elenu melemel me, od oɗe, od laug ele, amunu okkai am od oɗe laa, ahilag okkai am laippu anidmi.

Esekiel 40:32

Amu dimppa danab nug melemel aɗom ele amu, nug omaiɗa, od oɗe, od laug ele mana mettak danab dilag haɗap aɗppa kaɗag uɗitteppanu daatte, od oɗe, od laug ele amuppa uɗia, mana mettak danab dilag haɗap ooppa noum. Nug appa ta, nug od oɗe, od laug elenu melemel me, od oɗe, od laug ele, amunu okkai am od oɗe od laug ele laa oh, ahilag okkai am laippu anidmi.

Esekiel 40:44

Amu danab nug keeke amu oh melemel meum ele amu, nug amu ha malowa, nug omaiɗe, mana mettak danab dilag haɗap-ppa temuɗ. Aben amuppa lag aɗit, oh oo laippuib, lag aɗit amuppa daattep. Lag amu laa am aben amunu od oɗe yau uɗitteppanu daatte, od oɗe amu heqo laih daatte. Lag amunu noob am yawalti uɗitteppanu, appa daatte. Aria, lag laa am aben amunu od oɗe yawalti uɗitteppanu daatte, od oɗe amu heqo laih daatte. Lag amunu noob am yau uɗitteppanu, appa daatte. Lag aɗit amunu od am mana mettak danab dilag haɗap daatteppa daattep.

Esekiel 42:3

Lag amunu gilil laih am Kayaknu mettid lag nakok guguittak daatte. Laa nug lag amu uua, Kayaknu mettid lag, amuppa ta, amu nug 10 mita gokku. Aria, lag amunu gilil laih am Israel danab dilag haɗap, men duqak ele daatte, aben amu guguittak daatte. Lag amuam oo attan tak ewam ele; laa wanppa daatte, laa amu attan daatte, amu laa am amu attan daatte. Lag elab wanppanab daatte amu, nug nuhig emaitak am nakok okkai. Lag laa, lag amu attan hak amu, amu nuhig emaitak am ele okkai, amge laan emaitak bianab iitta. Aria, lag laa, lag gamagppa attan hak amu, nug nuhig emaitak am gamagppa bia iitta. Nakok hogogdoak ele.

Namba 4:26

Ag haɗap, dahil mettid haknu peh lag amu qaɗab ele talilitta daatte, lamen aɗ bia amu talilidtte, aɗnu odppan lamen, mettid haknu peh lag qappaknu muɗi, lamen amunu keeke laa oh ele, ag maoglagnu daatte. Gerson nug buɗubppan ag uɗat amu oh hekkulagnu aakku daatte.

Namba 4:32

Ag haɗap, mettid haknu peh lag talilidtte ele amu, ag amunu biidod, biidod ɠagattag daakkunu tatap, pehnu pin elab, muɗi, keeke oh aɗ amu qappaglagnu uɗat madatteb ele amu, ag amu oh maoglagnu daatte. Danab anen anen ag keeke amu anen anen maoglagnu tituanattak daatteb amu, ag anamib maoglag.