Duteronomi 15:9 - Nobonob Baibel

⁹ Am ag dabmen autna aweg! Am ag dabmak nau aon aɗan, akka akka ahilagnu inam aib appig. “Nakok laa ele amu maɗ eblaih aɗit ele, amuam lonnu hippalakppanu uhuqaknu maɗ amu, maɗ amu digmekkunu daatte, am da men doɗo dahil eɗuen aokkulnu elele iittatai.” Dabmak amuam ena iitta. Ag amubia dabmena, ag daɗek keeke laa ii mattaglag am eheɗ. Danab amu amu, ag am ag lailkad, am ag ii ehanadkkulag dayeb amu, ag eheɗ heppignu Yawe oɗ mettaglagnu elele daatte. Ag anam heppeg, Kayak Nug ag eheɗ heppig akku.

Duteronomi 15:9 ပူးပေါင်းရင်းမြစ်များ

Job 34:28

Danab okkai amu ag daɗek danab ah dilag eheɗ hatteg, daɗek amu ag Kayak ehanadkkunu gaappig. Ag gaaegeg, Nug ahilag unuqittak doyom.

Sam 101:3

Ao, da keeke laa na noomppa uɗig wak ele daatte doottem amu, da amu anttaknu uukkul. Kobol oh danab ag na ii dim lamidtteb ele, ag hetteb amu, da kobol amunu nau ninig ele doottem. Da kobol amu ohppanu aɗitai laa ii hepa.

Sam 12:5

Amu Yawe Nug atte. “Danab ah ag laa gai-iitta daaegeg, ag ag eheɗ hadatteb amu, da anadttem. Ao, daɗek ele ag aeqagatteb amu, da doottem. Anam daatte amunu, gemu amu, da ehanadppi qagaiettakppa ii daamnanu ahakkul. Ao, laa ag gai-iitta daatteb, daɗek daatteb ele amu, laa ag ahilagnu nai nau mattin, nau hattaglagnu dabmetteb ele amu, da gai-iitta daatteb, daɗek daatteb ele ehanadppi, ag uug amuppa ii daamna,” awa atte.

Eksodas 22:22

Ag ah qab, o nid laa anilkad mamelkad mauhppig amu, ag laa amubia, ag ahilagppa aib eheɗ heppig.

Eksodas 22:23

Ag laa amubia, ag ahilagppa eheɗ heppeg, ag da amelppa amunu gaappeg amu, da ahilag ewak genabnab genab dookkul.

Eksodas 3:7

Aria Moses nug anam dayeye amu Yawe Nug Moses amegppa aum. “Danab ah dahilad Isip daatteb amu, Isip danab ag eheɗ hattegeg, da anidmi, gemu ele anidttem. Danab ah dahilad ag Isipnu uɗat gumak danab nau oo doyak iitta ele eppelagppa daaeg, guittak mattaeg gaan, da ehanadkkulnu da onilppa eegeg, da ahilag ewak amu, da doottem. Ag guittak nau, uugnab maoegeg, da dabmettem amunu,

Prowerb 14:21

Danab nug mudippan laippunu ena iinab dootte amu, nug aakku hipunin hette; amge danab nug daɗek ehanadtte, nug itittak ena awom daatte.

Prowerb 21:13

Daɗek danab ag laa ehanadkkunu oɗ medappeg, nug ahilag nai ii dookku dayeb amu; haen nug ehanittak aokkunu oɗmak heeb, auntai laa nuhig unuqittak ele ii dooma.

Prowerb 23:6

Na danab ag nug ehanittak ii dootteb ele, na amu dilag ee aib lame; ag ee enanag eletai, amge na ee amunu aib oot huana heum.

Prowerb 24:9

Danab ag Kayak dab-ii-maama hak hekkulagnu dabmetteb amu, ag hipunin hetteb; amu danab ag awa awa qettak danabnu oolagppa uuaknab dootteb.

Prowerb 28:22

Danab nug, nug ehanittak uua, nukka nuhignuib dabmette, nug enub okkai aokkunu hik qette; amge nug ii dootte, uma iitta nug daɗek daakku.

Prowerb 4:23

Nahip bau dayak attem gokku amu, na oot unuqagnabppanu bette amunu, na oot unuqagnab dabmettan, aut autnanab awe!

Jeremaia 17:10

Anam, amge Yawe Nug atte. “Da Yawe, da danab, nuhig hak aɗi ippuniɗtte amu, da amu dabmein, nob tutukkuib medakkulnu, da nuhig kobol aɗi ippuniɗtte amu, da amu ele dabmein, nob tutukkuib medakkulnu, da danab oolag unuqag andette, da ahilag dabmak ele anidttem.

Jeremaia 34:14

“Maɗ eblaih laippu ele ukkeb, maɗ eblaih aɗitppa Hibru danab, o Hibru ah auntai nug he, nug ag oolagppanu laa waappa nuhig maɗi nid daatte amu, ag anen anen ag danab ah amubia uhuqadppeg, ag ag waalkadppa, ahilkad maɗi nid tuɗidna aib daappig. Ag uhuqak dayeg! Danab o ah amubia ag maɗ eblaih laippu ele ahilkad maɗi nid daan, ahilag uɗat hekkulag, amge maɗ eblaih aɗitppa ag tuɗidna ahilkad maɗi nid ii daamna. Ag uhuqak aon, hamu daaglag, amu ag laa ag uhuqadkkulagoitte ami. Da anam ami, amge ag mamelkad aɗi ag da oɗel ii dooppig. Ag daulag human, nai doon, elele ii dabmedappig.

Matyu 15:19

Kobol eheɗ imu oh dabmakppanu bette; dabmak eheɗ, danab qe mauhak kobol, ewau pakkua gappai hak kobol, gappai hak kobol digdig laa, yabhok kobol, nai genab iitta anak kobol, baeg qak kobol ele,

Matyu 20:15

Nug anam ana, nug tuɗitta aum. ‘Da dahil keekeppa, keeke laala hekkulnu ool dayeb amu, da hekkulnu elele iittate? O iitta, da danab imu laa oh ehanadkkulnu hettem amu, na amunu amen qe, oot elele ii daattete?’ ” Jesus Nug anam aum.

Duteronomi 15:1

Maɗ eblaih laippu ele ukkeb, maɗ eblaih aɗit ele iitta mekkunu heebeb amu, ag anen anen ag men doɗo Israel danab laa lon medappig, ag men doɗo amu eɗun mattaglagnu daatteb amu, ag lon amu hamu obippeg, iitta maɗ!

Duteronomi 24:15

Nug am daɗek, amunu nug ee, amu keeke laala ele daden mekkunu, nug men doɗonu oo daatte. Anam amunu na uɗat hak nob nuhig deɗ ohppa uu-ii-doobob medakkut. Na anam ii hekkut dayeb amu, danab amu nug hak amunu Yawenu gayeb, hipuninnu aab na beɗunppa daakku.

Duteronomi 31:10

Amu Moses nug haknunab anak nai imu mattom. “Maɗ eblaih aɗit ele awebeb, amuam lonnu hippalakppanu uhuqaknu maɗ amu, maɗ amu malatte haenppa, haen amuppa ag Pehppa Dayaknu Hobul hekkulag; amu haen amuppa,

Jems 4:17

Amunu danab laa nug kobol ena hekkunu dootte, amge nug ii hette, nug aakku hipunin hette.

Jems 4:5

Kayak nai laa amunu ag keeke hamu bia doottebte? Nai amuam inam. “⌊Nuhig⌋ Ouɗi, Kayak Nug ig oonigppa meum daatte ele amu, Nug ihinignu dahil doya laa aomanu doyak aɗa daatte.”

Jems 5:4

Antteg! Uɗat nid ag ahilag uɗat heppig, me ag enub danab ag uɗat nid amu buppualadnana, uɗat heppignu daden nob ii madappig amu, men doɗo amu eɗua danab baag bia, “Ag eheɗ heppig,” awa maditte. Uɗat nid amu dilag ewak, nai amuam Naɗi Ɠagattag Oh Ele, Nug daugppa noum daatte.

Jems 5:9

O lailad, ag lailkad ele aib nug naittuɗ meppig. Ag kobol amu hekkulag amu, Kayak Nug ag epeɗiatta, nob nau madakku. Amu Epeɗiak Danab Nug dokkunu haen miagnab malom daatte.

1 Pita 4:9

Ag lailkad dilagnu nug ehanittak kobol naittuɗ mak iitta ele dim lamidna heig!