Daniel 2:44 - Nobonob Baibel

⁴⁴ Baeg wan tabatte, wan aab aɗuppa ewom, aen ele qataqak am king laala ag laippu daaglagnu hekkulag, amge laippunab ii daamna ippunigtte, haen ag amu henan daappeg, haen amuppa Kayak hab attan daatte, Nug ɗo maɗoɗ laa daakkunu heeb, ɗo maɗoɗ amuam hanhan daakku. Ɗo maɗoɗ laa wan atu gumaglagnu ahan, ɗo maɗoɗ amu eɗidna ii aomna. Ɗo maɗoɗ amuam ɗo maɗoɗ oh heeb, iitta mekkulag, amge ɗo maɗoɗ amuam hanhan daakku.

Daniel 2:44 ပူးပေါင်းရင်းမြစ်များ

Genesis 49:10

Juda nug hanhan kingnu qakun aɗa daakku. Ao, Juda buɗub laa ag hanhan king daan oiglag. Ag anam daappeg ukkebeb, dimppa laa nug kingnu qakun mamegnab nug uɗia aweb batakku. Nug uɗieb amu, wan laalappan oh ag nuhig nai dim lamidkkulag.

2 Samuel 7:13

Laa nug gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku. Nid nahip amu, nugnab dahil lag, da onil amuppa daakkunu amu, nug hekku.

2 Samuel 7:16

Na buɗunad ag hanhan da noolppa daaglag. Ag iitta ii memana. Laa nug gumak uɗat nahip na eppenppanu matakka ii aoma; da heppi, hanhan na eppenppa, na buɗunad eppelagppa ele daakku.’ ” Yawe Nug Natan, Dawit amegppa anam akkunu amegppa aum.

Sam 145:13

Nahip ɗo maɗoɗ am hanhan daatte; am geha iitta ii mema. Ge! Na king hanhan daattem. Aɗi keeke Yawe Nug hekkunu atte amu, Nug aakku hette. Laa amu, Nug aɗi keeke hette ele, Nug oo bodoettak, enanag, maɗoɗ ele hette.

Aisaia 60:12

Amunu diig am wan laappan danab huu atten ag, ag Juda waappa daanna, ehanadkkulagnu uuglag dayeb amu, da Yawe, da heppi, ag padal mena, iitta mekkulag.

Esekiel 37:25

Ag anam henana, ag wan ag mamelkad aɗi daadppigppa, wan amu da Jakop mettami amu, ag amuppa daaglag. Ag, ag bekkalkad, ag alalkad uma ukkak ele ag hanhan wan amuppa daaglag. Ag anam daappeg, dahil maɗi nid Dawit, nug hanhan ahilag okkai daakku.

Daniel 2:28

amge Kayak, hab attan daatte, Nug keeke uug ele he, miag atitte. Nug anam hette amunu, Nug na, King Nebukatnesar, Nug na dimppa aɗi bekku aakku ippunittom. Na niiak abenppa tul niinna, tuleglegppa keeke digdig anidme am iikku.

Daniel 2:34

Na neegnana, laa Nug men laa qaukoppanu okkula awom, amge laa amu heum am danab laa iitta, na amu anidme. Laa Nug men amu okkula awe, dimppa men amu ukka, dottog amunu baeg wan tabatte, baeg amuam aen, wan ele qataqak, amu men baeg wan tabatte ye, baeg amu aakku nauha autanab awom.

Daniel 2:35

Men baeg wan tabatte ye, baeg amu nauha autanab awewe, men he, aen, wan, bras, silwa, gol ele huppu nakok nakok, uug iittanab ne, ulah iwale ukke, huppu nakok laa appa ii dayom. Danab nug ee aeg mumuɗaknu haenppa he, ulah ee aeg dappunkkeg iwale gotte, amubia dottog amuppa heum. Men dottog baeg anam ye, kobol anam dottogppa beum, amge men amu okkai maama, wan atu oh tona malom.

Daniel 2:37

O king, na am wanppan king laa oh eɗattak daattem. Kayak, hab attan daatte, Nug na king daakkutnu tituanitta, Nug ɠagattag, ebehi okkai, binag amahlak oppiaawak ele na metta,

Daniel 2:43

Amu danab nug wan aab aɗuppa ewom ele awa, aen ele qataqe, laippu qataqak ii daattep, amubia ɗo maɗoɗ wan atu gumadkku, ɗo maɗoɗ amunu danab ah ag laippu bia daaglag, amge ag tuɗidna, anamib laippu ii daamna; ag piɗe piɗe daaglag. Wan aab aɗuppa ewom, aen ele qataqettep bia ag hekkulag.

Daniel 4:3

Nug uɗat naɗi, Nug heumnu at daatte, Nug amu hette. Ao, Nug uɗat ɠagattagnab ele hette. Nuhig ɗo maɗoɗ am hanhan alet daatte. Ao, nuhig gumak am menuattak huu laippu bia, ahilagppa daye ukke, laa beeg, ahilagppa ele daatte.

Daniel 4:34

Kobol amu oh Nebukatnesar, nuhigppa be, dimppa Nebukatnesar nug aum. “Haen anam daakkulnu dayom am iitta me, da, Nebukatnesar, da amel humen, neekki, hab attan te, ⌊Kayak dabmei, Nug he,⌋ dahil dabmak eɗua, danab dilag dabmak, kaaka iitta aakku dayom. Kayak anam he, dahilppa anam be, da Kayak Attannab Laa Oh Eɗattak binag memi. Da binag onig okkai ele Laa hanhan daatte mettami. Aɗinu? Nuhig ɗo maɗoɗ am hanhan alet daatte. Ao, nuhig wan atu gumak am anamib alet, ii tuqa awak daatte.

Daniel 6:26

Da ɗo imu iikku mei gotte. Danab ah ohnab ag da wan atu gumattem amu, wan amunu aben ohppa, ag ohnab ag Danielnu Kayaknu ebehilag oh bodoetta le maɗ! Danielnu Kayak Nug bau daatte. Ao, Nug hanhan daatte. Nuhig ɗo maɗoɗnu amu, laa nug heeb ii nauhma. Ge, nuhig wan atu gumak am alet, ii tuqa awak daatte.

Daniel 6:27

Nug danab ehanatte, ag qagaiettakppa ii daatteb. Nug ehanatte, ag padal ii metteb, Nug habppa, wanppa ele uɗat naɗi, Nug heumnu at daatte amu uɗat ɠagattagnab ele hette. Nug Daniel ehanitte, qagaiettakkppa ii dayeye, laion ag nuhignu eheɗ laa ii heppig,” awa yom.

Daniel 7:27

Anam beeb, Kayak Nug king daakkunu ehah, ɠagattag, aria onig, ɠagattag ele wan atu oh hab waappa wanppa daatteb, wan atu amu ohppanu aɗitta awa, nuhikkud danab ah oppiaawak ele madakku. Danab amu ag am Kayak Attannab Laa Oh Eɗattaknu danab. Kayak Nug, nuhig wan atu oh gumattak am iitta ii mema. Hanhan daakku. Wan atu ohnu danab okkai, ag Nug noobppa dup nona binag mena, oɗe dim lamidkkulag,” awa aum.

Daniel 8:25

Nug hambuppuak kobolppa keeke haknu doya auta autanab awa, kobol amuppa nug nuhig uɗat haaha, laa kuɗum ag amu ii dabmetteb ele eɗadkku. Nug nukka, nuhignu, “Da am danab enanag, laa oh eɗattak,” dabmaama oikku. Laa ag akka, ag ahilagnu, “Ig maɗoɗ ele iikku daattem,” abeppeg, nug heeb nauhkkulag. Nug Kayak, Nug laa oh eɗadtte amu, nug Nug ele ban hekkulahnu hekku. Nug keeke okkai amu oh hekku, amge laa, danab iitta, laa nug heeb nauhkku.

Maika 4:7

Da, Yawe, da heppi, danab ah da bu mattami ele, ag eɗun, huu digmen daaglagnu oɗo yaak danab ah daaglag. Ao, da heppi, danab ah kekeɗ ag diin gona, wan laappa diia ukka laih me dayak danab ah daaglagnu maatteg daatteb ele amu, ag eɗun, wan ahilagppa ɠagattag ele daaglag,” awa atte. Ag anam uɗin daappeg, Yawe Nug qauko Sion appa dayaya, hanhan danab ah amu gumadkku

Hagai 2:22

Da heppi, king laala dilag sia king nena qena, nauhak daaglag. Da heppi, wanppan ɗo maɗoɗ laala dilag ɠagattag am iitta mekku. Da heppi, bannu karis, danab lamidtteb ele ag nena qeppeg, hos, ban danab hos attan oitteb ele ag ele nena qekkulag. Amuam danab amu lailkad eppelagppa bekku.

Hagai 2:7

Da heppi, wanppan wan oh uɗalkkulag. Ag uɗalppeg, appan danab ah ahilag en okkai aon uɗin, da laulppa meppeg, da heppi, dahil binag amahlak oppiaawak ele am lag imu ambekku.” Yawe Nukka Ɠagattag Oh Ele Nug anam awa atte.

Matyu 28:18

Anam heegeg, Jesus Nug ag gumatta doa, amelagppa aum. “Kayak Nug da keeke oh wanppanu, habppanu ele ikkilag daakkulnu meiɗom

Jon 12:34

Nug anam mattie amu danab ah kuɗum nug oɗeppa aon appig. “Ig ɗoppa nai inam doomut. ‘Kristus Nug hanhan daakku!’ Am attemun na Danab Bekkalag ad emaitakppa aihkkulagnu attem? Danab Bekkalag, na nuhignu madittem amu, Nug am aun?” aon appig.

Hibru 12:28

Keeke diignab ele aakkuib daakku, amu ig ɗo maɗoɗ amuppa daattem amunu, ig Kayak amegppa, “Ena hen mekkame,” aot atu! Amu ele ig ebehinig oh nuhignu bodoetta, le ma aut auta aweb, ig Nug oo niitte bia Nug noobppa dup nota binag metu!

Revelesen 11:15

Aria, engel ebqak 7 nug trampet nuhig iwale amu hab aab appa da laa baalag okkaippa inam aeg doomi. “Wan ohppan gumak uɗat aakku eɗua, ihinig Naɗi, amu laa Nug danab ah dilag Padal ii maknu ehanittak daakkunu tituanom, am Kristus, Nug ele eppelahppa daatte. Naɗi Nug hanhan uɗat amu hekku,” aon appig.

Revelesen 2:27

‘Nug danab amu kingnu qakun aenppa hak amuppa gumadkku. Ao, nug danab laa he, waa aoɗe, maha kuɗum nette, amubia danab amu gumadkku.’ Mame Nug da amubia hekkulnu onil meɗom, amubia da nug onig anam medakkul.