Daniel 11:36 - Nobonob Baibel

³⁶ Wan yawalti uɗitteppanu daatte, wan amunu king nug aɗi hekkunu oo hette amu, nug aakku hekku. Nug nukka haaha, nug kayak oh eɗattak dabmekku. Nug Kayak, kayak laa oh eɗattak daatte amu, nug nuhignu nai nau, laa nug nai amubia deɗ laa ii mattiom amu, nug nai amu nuhignu madikku. Kayak Nug danab ah hipunin heppeg, oppoɗi bak doya, bu madakkunu haen tituanom, haen amu iitta ii meebeb, king amu nug aɗi hekkunu dabmekku am hekku. Laa nug ib oo ii nema. Aɗinu? Kayak Nug danab ah ag eheɗ heegeg, bu atten aoglagnu dabmak awe ɠagattag eppom daatte amu, ag amu haenppa aoglagoitte.

Daniel 11:36 ပူးပေါင်းရင်းမြစ်များ

Sam 136:2

Ig Kayak, Nug kayak laa oh eɗattak daatte, ig Nug amegppa, “Ena heme,” atu! Aɗinu? Nuhig oo mauhaknab kobol hanhan alet daatte.

Sam 33:10

Yawe Nug danab ah ag aɗi hekkulagnu maittak aotteb ele, Nug ahilag maittak amu he nauhtte. Yo, Nug ahilag dabmak maidtteb amu he, gabotitte.

Prowerb 19:21

Danab ag keeke laala haknu maittak digdig kuɗum aotteb; amge Yawe Nug aɗi bekkunu oo daatte ele amu, gog takppa amuib aakku bette.

Aisaia 10:23

Ag Israel danab ah, Naɗi, Nug Yawe Nukka Ɠagattag Oh Ele, Nug ag bu eheɗ aon nauhkkulagnu aum amu, Nug geha uug naɗinab amu anamib heeb bekku.

Aisaia 10:25

Aɗinu ⌊ag ii baɗamna⌋? Da ag Israel, da ahilagnu oo nauhak doomi amunu, Asiria ag gemu ag anam eheɗ hadatteb, amge dahil oppoɗi bak ahilagnu daatte iitta mekkunu am haen elab ii daatte; haen tutu daatte. Haen amu maleb, dimppa da geha eɗue awe, Asiria eheɗ madakkul,” awa atte.

Aisaia 10:5

Amu Kayak Nug atte. “Asiria danab ah dilagnu am gadonnab gadon. Gemu Asiria nug da eppelppa bu aɗak bia da aɗai dayeye, danab ah ag da oo nauhak meɗatteb amu, da amuppa ag uug matte, eheɗnab mataɗadttem. Ao, Asiria nug da eppelppa daɗib bia da aɗai dayeye, da danab ah dilagnu oppoɗi bak huanak doyeye, amuppa bu madattem.

Aisaia 14:13

Na nakka, nahip dabmakppa, na ame. “Da geha attannab hab eɗitten tein ukken daakkul. Geha da heppi, dahil sia king am Kayaknu hoɗoppai daatteb eɗatta ta daakku. Da geha anam hein, da geha sia king dahilppa qauko kayak qagmena daattebppa daakkul. Ao, da geha qauko ⌊kayak daatteb, da⌋ amuppa attannab daakkul.

Aisaia 14:14

Da geha attan tein ukke, lombig eɗitten daakkul. Da dakka da hein, da geha Kayak Attannab, laa oh eɗattak daatte bia daakkul.”

Aisaia 26:20

O danab ah dahilad, ag laulag ooppa nona, od maneg! Ag lokkumna haen nakokib oppoɗi bak haen imu iitta mekkunu ameg meig!

Aisaia 30:33

Amu bekkunu diig am, danab mauhe, ag gaɗa aab aɗuppa heeg ewa iitta mette, amubia Yawe Nug anukkanab he, Asiria dilag king, ⌊Asiria ele⌋ iitta mena autnanab aoglagnu babaittom daatte. Ao, Yawe Nug matu ⌊Asiria,⌋ ahilag king ele aab ewakppa iitta mekkulagnu babaittom daatte. Amuam laa ag danab gaɗa maiglagnu aben okkai, uma noa ukkak bapaidna, aab huanak akkaeg te, aben akka eɗitta te, gaɗa amu qaɗeppa meeg dayeye, kalu laa huana eotte onig salpa le nag gotte bia uɗia aab amote, aab gakkaɗaknab ewawa, gaɗa ewe iitta mette, amubia Yawe Nug heeb, Asiria dilag king, ⌊Asiria ele ag⌋ iitta mekkulag.

Aisaia 46:10

Da digmak haenppa keeke laanu gogppa tak haenppa bekku amu hei, miag atitte. Da anukkanab aɗi keeke butti aɗi bekku ai dooppig. Da attem. ‘Da aɗi keeke dabmein attem amu, da hei bette. Da aɗi oh hekkulnu hettem amu, da hekkul.’

Aisaia 57:9

Ag danab ah eheɗ hetteb ele, ag kayak hambuppuak onig Molek, ag nuhig neekkakppa ena daaglagnu ag olip goɗen gaɗalag laaidna, leppu muttuɗig enanag ele huanaknab laaidna, ag gona, nug noobppa dup nona binag metteb. Ag kayak hambuppuak laa ele anadna, noolagppa dup nona binalag mekkulagnu ag heeg, nai awa ukkak danab ahilkad ag umanab gona mattiadppig; ag mauhak abenppa batak amu hekkulagnu heppig.

Esekiel 28:2

“Danab bekka, na Tair dilag king amegppa, ‘Naɗi Yawe Nug inam atte,’ ana, na nai imu ele appe doyaɗ! ‘Na ootppa dada kobol henan, na, “Da am kayak laa, da kayak laanu sia enanagppa yu gamagppa iikku daattem,” mattin attem. Amge na am danabib, na kayak laa iitta. Na doyak dabmak ena nahipnu am kayak laanu bia daatte dabmettem, amge iitta!

Esekiel 35:13

Ag dada danab daan, dada danab nug layagnu nai nau maditte, amubia ag wan da Israel, Juda ele mattami aoglagnu mattinna, dahilnu nai nau huanak appig, amge da nai amu oh ele doomi,” awa atte.

Daniel 11:16

Wan yawalti uɗitteppanu daatte, amu dilag king nug ɠagattagnab amunu nug ooppa aɗi hekkunu oo daatte amu, nug aakku hekku. Laa nug nuhig ib oo nekkunu elele iitta. Nug wan enanag, am Israel wan amu, nug amuppa hibaitta daakku. Nug wan amu heeb nauhkkunu ɠagattag elele.

Daniel 11:3

Amge Grik wanppa king ɠagattagnab ele aha ba, king dayaya, nug ɠagattagnab anam dayaya, nug aɗi hekkunu dabmekku amu nug hekku.

Daniel 11:37

King amu nug mamekkud aɗi dilag kayak dab-ii-mema. Nug ah ag kayak laanu oolag mauhtte ele, nug laa amu dab-ii-mema. Ge! King amu nug kayak laalanu ii dabmema. Aɗinu? Nug nukka, nug kayak laa oh, Kayak genab ele eɗattak daatte dabmekku.

Daniel 12:7

Laa nug danab lamen linenppa hak takka, le attan dayom anam oɗ mette, nug eppeg naɗiap, naneh ele hume, habppa te, nug Kayak, Nug hanhan daatte, nug Nug onig awa, nuhig nai ɠagattag qetta, nug nai laa a doomi. Nai nug aum am inam. “Haen maha ewam, haen maha laanu maha ele ukkeb, keeke amu oh ba malakku. Danab ah ag Kayaknu oppiaawak ele ag akka ahilagppa ɠagattag laa iitta ele daappeg, haen amuppa keeke amu oh meu okku,” awa aum.

Daniel 2:47

Nebukatnesar nug anam ha mala, nug Daniel amegppa aum. “Genabnab genab, nahip Kayak Nug kayak laa oh eɗattak daatte; Nug king laa oh dilag okkai daatte; Nug dimppa aɗi bekkunu daatte danab ippunadtte. Aɗinu ⌊ig amu doognignu elele⌋? Nug he, keeke lokkumak dayom imu amu, na he, miag atiom,” awa aum.

Daniel 4:35

Danab ah wanppa daatteb ag Nug bia iitta. Ag Nug ele ouaqattak daalob, am danab ah ag ii daalob bia daalob. Nug habppan ɠagattag oh, wanppan danab ah ele gumattette, ag Nug waappa daatteb, Nug ag aɗi hekkulagnu dabmette amu, Nug he, ag hetteb. Kayak Nug aɗi hekkunu dabmette amu, laa nug heeb, ii hemanu elele iitta. Laa aitta, Nug amegppa, ‘Aɗinu na anam heme?’ akkunu elelete? Iitta!

Daniel 5:19

Kayak Nug king abenab attannab nug mettom amunu, wan atu ohppan danab ah, nai ohppan danab ah ele ag na mamen baɗidna, hahaɗppig. King nug laa mauhkkulagnu oo heum amu, nug he mauhppig. Laa nug ag bau daaglagnu oo heum amu, nug he, ag bau daappig. Laa nug ag okkai daaglagnu oo heum amu, nug he, ag okkai daappig. Laa ag onilag iitta daaglagnu oo heum amu, nug he, ag onilag iitta daappig.

Daniel 5:20

Amge na mamen nug nukka, nug onig huma, beɗuppa tak danab ba, nug dada danab ele ba dayaya, nug kobol ena hemanu dabmak nuhig ɠagattag eppom amunu, Yawe he, nug king ii daya, binag amahlak oppiaawak ele nuhig ele iitta meum.

Daniel 7:8

Da neekki ukke, qeqeɗi amu anatten, qeqeɗi amunu dabmein daaiyi, qeqeɗi nakok laa ele qeqeɗi laa oolagppa aakku beum. Baaba, qeqeɗi ewam laa duttunatte, bena gona ii daappig. Qeqeɗi dim beum amu, nug am ameg ele, ameg amuam danab ameg bia. Nug ele oɗe ele, amu nug nukka nug oɗeppa binag mak nai okkainab mattiom.

Daniel 8:19

Da hibaitten daaiyi, nug da amelppa aum. ‘Tulegleg na anidme ele am gog tak haennu keeke ippunigtte amunu, da qinob, Kayak oppoɗi beeb, bu mettak haenppa aɗi aɗi bekkunu daatte am appi dookkut.

Daniel 8:4

Da neekkitten daaiyi, sipsip dawai amu nug doɗ aɗi aɗi qaban uɗitteppa, yau uɗitteppa, yawalti uɗitteppanu ele daappig amu, nug appa ag ele ban hekkulagnu qaietta ukkom. Doɗ laa nug sipsip dawai amu eɗidkkunu elele iitta. Laa nug doɗ atten laa sipsip ele ban hepiɗ ehanitteb, sipsip nug aa ii eɗatmanu am laa iitta. Sipsip dawai nug aɗi hekkunu dabmeum amu, hakib heum. Nug anam he ukke, nug onig, ɠagattag okkainab ele dayom.

Sekaraia 11:16

Aɗinu? ⌊Na anam heppe, amuam piksa laa bia daakku.⌋ Am da paɗappi, ikki danab nau nug Juda danab ah gumadkku. Ikki danab amu nug sipsip gumak danab ag sipsip ii gumadtteb bia daakku. Sipsip gumak danab nau ag sipsip mauhkkulagnu hetteb am ii ehanadtteb; sipsip yuɗ qettoɗppig ele ag ii mattialadtteb; sipsip laa ag guittak aoppig ele ii ehanadtteb; sipsip beɗulag ena ele amu, ag ee ii madatteb. Ag helob bia amu, ag ii hetteb. Iitta! Ag sipsip beɗulag enanag ele am aqadna lanana, ⌊huppu nakoknab tippalmananu,⌋ ag baelkad di ele oppat-tteb. Ikki danab nau amu, nug anam hekku.

Jon 5:30

Am da dakka dahil dabmakppa keeke laa hekkulnu elele iitta. Iitta. Da Mama toppanu nai aomi, amuppa da danab epeɗiadttem amunu, dahil epeɗiak am tutukku. Aɗinu? Da dakka dahil dabmak ii dim lamidttem. Iitta. Laa Nug da meiɗe uɗimi ele, Nug oo niitte amuib da dim lamidttem.

Jon 6:38

Aɗinu? Da hab attannu wanppa uɗimi amu, da dahil dabmaknab awak dim lamidkkulnu ii uɗimi. Iitta. Da am laa, Nug da meiɗe uɗimi ele, da nuhig dabmaknab awak dim lamidkkulnu uɗimi.

Aposel 4:28

Ag anam hekkulagnu qagmena anam heppig amu, Kayak na nahip ɠagattagppa, nahip doyak dabmak ena eleppa keeke oh anam bekkunu anukka ib amunu ame amu, ag amuib heppig.

Duteronomi 10:17

Aɗinu? Yawe, ahilag Kayak, Nug am kayak laa oh eɗadtte, Nug am naɗi laa oh dilag Naɗi daatte. Nug am Kayak naɗinab, ɠagattag okkai ele. Nug am danab Nug antta, ebehi oh bodoetta le maknu Kayak daatte. Nug danab ah ohnab kobol eleleppaib epeɗiadtte. Nug lokkumakppa eheɗ haknu ehanittak ii aoma.

2 Tesalonaika 2:3

Ag heppeg, laippu laa nug ib laalappa aib buppualattom. Deɗ amu tatam iinab uɗima. Tatam Kayak dimettak kobol okkai beeb amu, ɗo ii dim lamittak danab, danab amu nug padal mekku ele amu, nug ele miag atikku.

2 Tesalonaika 2:4

Danab amu nug danab laa oh ag keeke oh dilagnu, “Imuam Kayak,” atteb, keeke amu noolagppa ag gatelag qaun otteb ele amu, nug amu oh tappeb neeb, nug onigib humeb, attan tekku. Nug Kayaknu mettid lag, appa nug aguppa daakkunu ta dayaya, nuhignu, “Da iikkuib am Kayak,” awa akku.

2 Tesalonaika 2:8

Haen amuppa ɗo ii dim lamittak danab nug miag atieb, dimppa Naɗi Jesus, Nug geha Nug oɗeppa ouɗi iwaleb, qeeb mauhkku. Yo, Naɗi Nug nuhig amahlak naɗi ele uɗia, miag atia, amahlak amuppaib Nug ɗo tappe nak danab amu heeb nauhkku.

Josua 22:22

“Yawe Nug nukka aakkuib am Kayak! Yawe Nug nukka aakkuib am Kayak! Ig Yawe waappa daagnignu uut, nuhig nai tabapput nekkunu qaɗab imu ii hemut. Ag ig genab Yawe waappa daat, nuhig nai tabapput nekkunu hemut anigtteb dayeb amu, ag gemu ig iqappeg mauhtu! Amge anam iitta. Yawe Nug ig Nug dimettata, kayak laa dim lamidkkunignu ikka ihinignu qaɗab imu ii hemut dootte. Nug dootte amu, ig ag Israel laa oh ele amu dooglagnu oonig daatte. Ig qaɗab amu hemut, amge ig manaknu ofa, o ee aegnu ofa, o laippu dayaknu ofa amuppa ii hemata. Yawe Nug neekka, ig kobol laa amu hekkunignu hemut anigkku dayeb amu, Nug ig bu megakkunu oonig daatte, amge anam iitta.

Revelesen 10:7

Iitta. Haen engel ebqak 7 nug trampet nuhig iwaleb amu, Kayaknu nai lokkumak niiom, Nug nuhig maɗi nid propet, Nug ag amelagppa aum ele amu, haen amuppa nai amuam meu okku,” awa aum.

Revelesen 12:14

Amge Kayak Nug ai igel haug aɗit ele ah amu nug hagagaɗa, mat naɗinab uuitta, wan meu waknu nakokib eleleppa, aben Kayak Nug ah amunu babaittom daatteppa ukkeb, maɗ ewam kalam 6 ele ag nug atognonana, ee medappeg lanana daakkunu ukkom.

Revelesen 13:1

Anam daye amu, da doɗ dakkuɗ laa qeqeɗi eblaih laih ele, ikki eblaih aɗit ele, nug qeqeɗiudppa haɗ eblaih laih ele daappig amu, da nug yuppanu beebe anidmi. Nug ikkiudppa amu, onilag laala yaak ele. Onilag amuam Kayaknu dabittak nai.

Revelesen 17:17

Ag oolag laippu mena, gumaknu ehah, ag amuppa king daatteb ele amu, ag oh gumaknu ehah amu doɗ dakkuɗ mettaglag. Ib amuppa ag Kayak nug dabmak amu ag oolagppa meum, ag Nug keeke anam bekkunu maittak awom am genab heppeg meu okku. Ag anam heppeg ukkeb, Kayak dabma mattiom amu, nai amu oh meu okku.

Revelesen 17:3

Awa a amu, Kayak Ouɗi dahilppa ambe, engel nug omaiɗa, atu taɗakppa ukke, da ah laa nug doɗ dakkuɗ laa beɗu kokoɗnab qaɗeppa dayeye anidmi. Doɗ amu beɗu am, Kayaknu dabittak nai kuɗum yaak ele; nug ikki eblaih aɗit ele, nug qeqeɗi eblaih laih ele.