Daniel 10:1 - Nobonob Baibel

¹ Amu Persia dilag king Sairus nug king abenab awa nuhig king dayaknu maɗ ewamppa Kayak he, Daniel, onig laa Beltesasar, nug dimppa aɗi bekkunu nai laa doyom. Nai amuam ban naɗi daakkunu nai, am nai amuam genabib. Daniel nai amu tuleglegppa awe, Kayak he, nug tuleglegppa nai amunu diignu doyak tutukku aɗom.

Daniel 10:1 ပူးပေါင်းရင်းမြစ်များ

Genesis 41:32

Kayak Nug keeke imu genab bekkunu nai qakkom, diig amunu na tul niiak aɗit, diig laippu ele ippunittom. Keeke imu bekkunu amu uma iitta, miagnab daatte. Am Kayak Nug hekku.

2 Stori 36:22

Anam be amu, Persia dilag king Sairus nug Babilon eɗitta mala, Babilon dilag king daye, nuhig king dayaknu maɗ tatamnu Yawe Nug nai Jeremaia oɗeppa mattiom ele meu okkunu, Nug Sairus nuhig dabmak maɗette, nug wan oh nug gumaama, nai laa pepappa ya me, ag oh, ahilagppa ukkom.

Esra 3:7

Persia dilag king Sairus nug Israel buɗub ag Lebanon wanppa ad sida aon, Yawenu mettid lagnu uɗat mettaglagnu aum amunu, Israel ag Taia danab, Saidon danab ele ag ad oadna, ad amu aon, yuppa mena, aon Jopa uɗiglagnu, Israel buɗub ag ee aeg, wain, olip goɗen ele Lebanon danab Tair aabppa, Saidon aabppa ele daappig amu, ag ag madappig. Ag mattan, ag danab menppa uɗat haknu dooppig, lag hak danab ele ag uɗat amu hekkulagnu men doɗo madappig.

Esra 4:3

Ag anam appig, amge Serubabel, Jesua, amu Israel baelkadppan dilag okkai laa oh ele ag eɗun, nob mena, inam appig. “Ag ehanigppeg, ig Juda, ig ihinig Kayaknu mettid lag ii buumta. Iitta. Ig Persia dilag king Sairus nug ig Yawe, ihinig Kayak, ig Nug laug buugnignu haknunab aum bia, ig ikka buugnig,” aon appig.

Esra 4:5

Ag amu hena, ag ulum danab laala ag nai nau digdig king amegppa appeg, Juda danab ag uɗat amu hekkulagnu elele iitta daaglagnu men doɗo madappig. Ag Persia dilag king Sairusnu haenppa amu heeg, uɗie uɗie, Persia dilag King Dariusnu haen batakppa ele heppig.

Esra 6:14

Ag anam heppig amunu, Juda dilag ikki danab ag Kayaknu mettid lag heegeg, propet danab Hagai, propet laa Ido buɗub Sekaraia ele, aa naippa ɠagattag aqaeheh, ag lag amu heppig. Ag Kayak, Israel dilag Kayak, ag nuhig haknunab anak, amu Persia dilag king Sairus, Darius, Artekserksis ele, ahilag ɗo maknu anak, ag ele appig bia, ag Kayaknu mettid lag buun malappig.

Esra 6:3

King Sairus nug king dayaya, nuhig king dayaknu maɗ digmakppa nug Kayaknu mettid lag Jerusalem appa daakkunu ɗo laa meum. Nai amuam inam. ‘Jerusalem appa danab ag doɗ main, Kayak mettaglagnu amu, Juda danab ag eɗun, Kayaknu mettid lag eɗua daakkunu, ag lag amu buueg! Ag lag amunu men ukku mewona, ag lag buuglag; lag amunu emaitak am 27 mita, attan tak nuhig ele 27 mita daakku.

Aisaia 44:28

Amu da Sairusnu ele attem. ‘Danab ah dahilad ag sipsip bia daatteb, amu Sairus nug am dahil sipsip gumak danab daatte. Nug da ool hette oh heeb bekku. Nug Jerusalemnu, “Danab ag ahan babaitteg!” akku. Ao, nug dahil mettid lagnu, “Danab ag ahan, digmen babaitteg!” akku.’ ” Yawe Nug anam atte.

Daniel 1:17

Ag ee amuib laeg, Kayak Nug nid bau waɗele amu doyak ena ele matta, Nug ag kaya digdignu diignu doyak tutukku, am dabmak unuqagnu diignu doyak tutukku ele ag mattom. Nug amu matta, Nug he, Daniel nug tul niiak digdig, tulegleg digdig ele anattaknu diig doya, mehuqkkunu ehah ele mettom.

Daniel 1:21

Amu Daniel nug kingnu ikki danab daye ukke, king laala beeg ukke, Sairus king abenab awa daya, maɗ nug amu digmeumppa Daniel nug uɗat amu uuom.

Daniel 1:7

Ag onilag Hibru naippa anam daatte amge Nebukatnesarnu ikki danab dilag okkai nug amu uua, nug ag Babilon onilag awa ataɗattom. Nug Daniel onig laa Beltesasar ataɗa, Hanania onig am Satrak ataɗa, Misael onig amu Mesak ataɗa, Asaria onig am Abetnego ataɗom.

Daniel 10:14

Nug ehaniɗkkunu uɗiom amunu, da dimppa nahipad danab ah dilagppa aɗi bekkunu meu appi dookkutnu uɗimi. Aɗinu? Tulegleg imuam dimppanu keeke,” awa aum.

Daniel 11:2

Amu laa Daniel anttom amu, nug nai tuɗitta aum. “Da geha madikkulnu hettem am nai genab. King ewam baula Persia wanppa bekkulag. Ag bena malappeg, laa ele ag dimulagppa bekku. Nug am enub huanaknab ele. Nug enub huanak ele amunu, nug enub amuppanu ɠagattagppa heeb, nuhig ehanittak oh ag Grik wan eɗidkkulagnu dabmekkulag.

Daniel 12:4

Amge Daniel, keeke na anidme, buk itoɗiakppa yaak niitte am paha meu ii oma. Haen elab ukkeb, meu okku amunu, na nai amu qettoɗmanu aɗi hekkutnu daatte amu, na pehettak babaitte! Kuɗum ag doyak tuɗidna aoglagnu ag laih wana, eɗun laih dona, ahan laih gokkulag, ⌊amge doyak amu buk imuppa iikku daatte⌋,” awa aum.

Daniel 12:9

Da anam oɗ mettai, nug da amelppa aum. “Daniel, na maɗoɗ ele daye! Aɗinu? Nai imu qettoɗmanu babaittak aakku daatte. Am anam dayebeb ukkeb, gog tak haenppa nai imuam daakku.

Daniel 2:21

Kayak Nug wanppa aɗi keeke bekkulag, aria haen adekkuppa bekkulag ele gumatte. Nug he, danab laa king abenabppa tette. Nug he, danab amu king abenabppa ii daatte. Nug he, danab doyak dabmak ena ele nug doyak dabmak ena amu tuɗid ele aotte. Nug he, danab diignu doyak tutukku ele, nug diignu doyak tutukku tuɗid ele daatte.

Daniel 4:8

Ag elele iitta, dimppa Daniel nug gumiɗa uɗie, da tul niie, aɗi anidmi amu, da nug amegppa ai doyom. Nug onig laa am Beltesasar. Laa nug dahil kayak onig amu awa, oela qettom. Aria, kayak ouɗi am nuhigppa daatteb.

Daniel 5:12

Danab amuam onig Daniel, amge king nug onig ataɗa, Beltesasar aum. Da danab amu, nuhignu ami, amubia nug dabmak pehettak ele, nug doyak ele, nug diignu doyak tutukku ele. Amge amuib iitta. Iitta. Nug laa tul niiom amu, nug tul niiak amunu meu mehuqkkunu elele. Nug nai meunabnu diig, nai meu uug elenu diig ele, nug nai amu oh diig mehuqeb, laa dookkunu elele. Amunu na Daniel onigppa eppe uɗiowa, nug nai eppeg laa yom umu, nug nai amunu meu mehuqeb dookkut,” awa aum.

Daniel 5:17

King nug Daniel amegppa anam a, Daniel nug nob ma aum. “O king, na keeke ena ena meɗakkutnu attem am da aokkulnu ool ii daatte. Na keeke amu nahipnu aɗakkut, o laa medakkutnu ool daatte. Amge da nai eppeg gililppa yom daatte umu, da ebqein, meu ele appi dookkut.

Daniel 6:28

Amu Daniel nug Darius king dayom haenppa, Sairus, Persia danab, nug king dayom haenppa ele, Daniel nug maɗoɗ ena eleib dayom.

Daniel 8:16

Nug tula ba, hibaitta daye, baag laa, Ulai le daugppa appa aum. “Gabriel, na danab imu nug tulegleg anidtte amu, na tulegleg amunu meu mehuqppe doyaɗ!” awa aum.

Daniel 8:26

Kayak he, na tulegleg anidme, tulegleg amuppa na buttua ganenu, tueb ganenu nai doome amu, tulegleg amuam genabib. Am genab, amge keeke na anidme am paha meu ii oma. Haen elab ukkeb meu okku amunu, na tulegleg amu yaan, na nai amu qettoɗmanu aɗi hekkutnu daatte amu, na pehettan babaitte!’ ” awa aum.

Luk 1:20

Amge na da nai ami amu ootppa genab ii doome amunu, na nai madikkutnu, oɗenppa oqotti laa hekkutnu ele elele iitta daakkut. Iitta. Na anam daappe ukkeb, haen keeke amu oh genab beeb, na eɗun nai madikkut. Da nai ami amu haen dob, genab meu bekku,” awa aum.

Revelesen 19:9

Amu dimppa engel nug da amelppa aum. “Na nai imu ye! ‘Danab ah, Kayak Nug ag Sipsip Nagnu ah awaknu hobulppa uɗiglagnu onilagppa eum ele amu, ag itittak ena aoppig daatteb,’ ” awa aum. Awona amu, nug da amelppa aum. “Nai imu am Kayak oɗe, amu nai nuhig am nai genab,” awa aum.