Aposel 2:39 - Nobonob Baibel

³⁹ Am Kayak Nug anukka nuhig Ouɗi ag, ag bekkalkad, amu wan laa adeppan danab ah, ag ele madakkunu nai qakka aum. Yo, Naɗi, ihinig Kayak, Nug aun aɗi ag onilagppa ette amu, Nug nuhig Ouɗi ag madakkunu nai qakka aum,” awa aum.

Aposel 2:39 ပူးပေါင်းရင်းမြစ်များ

Aisaia 44:3

Aɗinu ⌊ag ii baɗamnanu attem⌋? Da heppi gu huana wan qaɗaiettakppa na, leppu medakku. Ao, da heppi, gu huana neeb, le naunau kuɗum wan qaɗaiettakppa gokkulag. Da anam hekkul amu, anamib da dahil Ouɗi ag buɗulkad madakkul. Ao, da dahil itittak ena ag buɗulkad madakkul.

Aisaia 54:13

Danab ah oh Jerusalem daatteb, Juda laa oh ele amu, Yawe Nug ib tutukku ippuanatteb, ag maɗoɗnab daaglag.

Aisaia 57:19

Da amu heppi, Juda danab ag uug doon gaatteb amu, ag eɗun, ena doon, da onil humaglag. Da heppi, danab ah ag uma daatteb, laa ag guguittak daatteb ele amu, da heppi, ag oh maɗoɗ daaglag. Ge ag maɗoɗnab daan oiglag. Da heppi, ag enaib daan oiglag.” Yawe Nug anam atte.

Aisaia 59:19

Nug ɠagattagnab, gu huanaknab neene, le ui eheɗ oowo, ulah huanak ele dim lamitta le duttuntte bia haaha, bu madakku. Anam amunu, danab ah ag aam nodeppa daatteb, ag Yawenu ebehilag oh bodoetta le mekku. Ao, aam bedeppanu danab ah ag Yawe, Nug binag amahlak oppiaawak ele, ag amu doon, nuhignu ebehilag oh bodoetta le mekku.

Aisaia 59:20

Yawe atte. “Amu laa, Nug danab ah qagaiettakppanu eɗua uhuqaknu ehanittak hette ele amu, nug Sion uɗikku. Ao, laa uɗikku ele, Nug Jakop buɗub oolagppanu aun aɗi ag oolag eɗueb, hipunin ahilag dimettaglag amu, Nug ag ehanadkkunu uɗikku.” Yawe Nug anam awa atte.

Aisaia 65:23

Ag uɗat hamu ii hemana; am meu okku. Ag nid ahilkad uugppa daaglagnu ii menuadmana. Aɗinu? Da Yawe, da itadkkul. Da ag, ag buɗulkad dimppanu ele, da ahilagnu ele anam hekkul.

Esekiel 37:25

Ag anam henana, ag wan ag mamelkad aɗi daadppigppa, wan amu da Jakop mettami amu, ag amuppa daaglag. Ag, ag bekkalkad, ag alalkad uma ukkak ele ag hanhan wan amuppa daaglag. Ag anam daappeg, dahil maɗi nid Dawit, nug hanhan ahilag okkai daakku.

Joel 2:28

Yawe Nug atte. “Amu dimppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

Joel 2:32

Anam amge aun laa nug Yawe onigppa eeb amu, Yawe Nug ehanitteb, nug padal ii mema. Am aɗinu anam bekku? Yawe aumbia, qauko Sion, am Jerusalem appa ele, oɗo yaak danab daaglag. Ao, oɗo yaak danab oolagppa laa, Yawe onilagppa eum ele, ag daaglag.

Aposel 10:45

Am Juda danab ag Jesusnu oolagppa genab dooppig, ag Pita dim lamidna uɗippig ele, ag Kayak Nug Kornilius aɗi, ag iitta aɗi danab, Nug nuhig Ouɗi Juda danab mattom bianab, Nug iitta aɗi ag ele mattom anidna, ag ottaina dabmak kuɗum aoppig.

Aposel 14:27

Aa uɗiya Antiok beya, aa Kristen tamaniak qagmadya, aa amelagppa Kayak ahilahppa aɗi heum amunu oh mattiya, aa inam ele apiɗ. “Kayak Nug he, iitta aɗi ag ele oolagppa genab dooppig,” aoya apiɗ.

Aposel 15:14

Saimon nug ig amenigppa a, ig aakku doomut. Amuam digmakppa Kayak Nug iitta aɗi ehanadkkunu dabmaama, nug ahilagppa na, Nug danab ah amu oolagppanu danab ah nuhikkud diiattom.

Aposel 15:3

Amu Kristen tamaniak ag heeg, ag ahan Ponisia, Samaria ele tikkun gonana, ag appan Kristen amelagppa, Kayak Nug he, iitta aɗi ag oolag eɗuom amunu amelagppa appig. Ag anam heegeg, Kristen amu ag maɗoɗppan gamag ahak okkai dooppig.

Aposel 15:8

Amu Kayak, Nug danab ah oh oolag diig dootte ele, Nug iitta aɗi nuhig Ouɗi ig mekkom bia ag mattom, amuppa Nug eɗua diiadkkunu oo dayom ig ippunikkom.

Rom 11:29

Aɗinu? Kayak Nug danab tituana, keeke laa nuhig daakkunu hamu metta, nug onigppa eum ele amu, Nug nuhig dabmak dimppa amunu iinab baolitte.

Rom 8:30

Amu Nug danab anukka Nug Bekka bia daaglagnu maittak awom ele, Nug ag ele onilagppa eum. Nug danab onilagppa eum ele, Nug ahilagnu ele, “Genab tutukku hak danab,” awa aum. Nug danab laala, Nug ahilagnu, “Genab tutukku hak danab,” aum ele amu, Nug he, ag Nug Bekka bianab betteb.

Rom 9:24

Amuam ig danab ig Jesusnu oonigppa genab doottem. Nug ig Juda danab amu iitta aɗi danab ele ig anam hekkunignu oninigppa eum.

Rom 9:4

Israel ag am Kayaknu danab, ag Nug bekkod maattom daatteb. Ag Nug binag amahlak oppiaawak ele amu anidppig daatteb. Nug he, Nug ag ele nug tituanna nai qakkaladppig, nuhig ɗo ele aoppig. Ag Nug nuhig mettid lag, appa Nug noobppa dup noa binag maknu kobol aon dootteb, amu Nug ag ehanadkkunu nai qakka mattialatta maattom.

1 Korint 7:14

Amu ag doyeg! Danab nug Naɗinu ooppa genab ii dootte, amge ah nuhig nug ooppa genab dootte, gamu nug ahppa Kayaknu tituanak daatte. Aria, amubia ah nug ooppa genab ii dootte, amge nug gamu nug ooppa genab dootte, wau nug danabppa Kayaknu tituanak daatte. Anam iitta amu, haen aa nid menuadkkulah, ag am Kayak ele ouqa dayaknu elele iitta, amge anam iitta. Nid amu ag Kayaknu tituanak daatteb.

Epesus 1:18

Da Nug heeb, ahilag dabmak amahleb, butti aɗi ag aɗi keekenu Nug ag onilagppa eum ele amu, ag amunu dabmak ɠagattag aona, ag maɗoɗppan gamag doon, itittak enanagnab oh Nug nuhikkud danab ah oppiaawak ele oh aoglagnu nai qakka tituanom ele amu, ag amu oh dooglagnu ele unuqidttem.

Epesus 2:12

Haen amuppa amu ag umanab Kristus iittappa daadttappig. Ag Israel baekkudppa ele ii daadttappig. Kayak Nug he, Nug Israel ag ele nug tituanna nai qakkan, Kayak Nug Israel ag nuhikkud daan, keeke ena laala ele aoglagnu nai qakka aum, amge ag iitta aɗi ag amu ooppa ii daadttappig. Ag wan imuppa daappig amu, ag keeke ena laa dimppa bekkunu ameg mak ele ii daappig. Iitta. Ag hamu daappig. Ag Kayak ele ii dooppig, umanab daappig.

Epesus 4:4

Ig Kristen oh, ig Kristus beɗu daattem, amu beɗu laippuib daatte. Kayak Ouɗi ele laippuib daatte. Amu keeke laa, Kayak Nug ig Kristen, ig keeke laa aognignu dabmak aɗat daagnignu oninigppa eum daatte, amuam bauklel amu, dabmak amu aɗa dayaknu am ele laippuib daatte.

Duteronomi 29:15

Iitta! Yawe, ihinig Kayak, Nug, nug tituana nai qakkak imu aun aɗi ag Nug noobppa gemu daatteb, amu Israel danab ah dimppa bekkulag dilag ele hette.

2 Tesalonaika 1:11

Ig amunu dabmetata, ig haen oh Kayak ahilagnu unuqidttem. Ig Kayak, Nug ag onilagppa eum amu, ig Nug ag ehanatteb, ag nuhig ewak baag amu elele dim lamidkkulagnu Nug unuqidttem. Laa ele Kayak Nug ag ɠagattag matteb, ag kobol ena oh hekkulagnu hetteb ele amu henana, ag uɗat oh Kristusnu oolagppa genab doon hetteb, amu ele genab hekkulagnu ig unuqidttem.

2 Timoti 1:9

Kayak Nug ig eɗua awikkom, ig nuhikkud danab ah oppiaawak ele daagnignu oninigppa eum. Nug ihinig uɗat nobnu oninigppa ii eum. Iitta. Nug nukka Nug maittak awom amu, Nug nuhig ehanittak okkai hamu mettak, Kristus Jesusnu uɗatppa beum, Nug amu dabmaama, oninigppa eum. Nug ehanittak okkai hamu mettak amu ig megakkunu anukkanab, keeke ii dayom haenppa, babaitta ig mekkom daatte.

Hibru 3:1

Amunu O ig lainkad, ag Kayaknu danab ah oppiaawak ele, Nug ag ig ele hab aabppa daagnignu tituanikkom amu, ag Kristus Jesus, Nug am ihinig ooppa genab doyaknu mana mettak ikki danab, Nug am ihinig ooppa genab doyaknu totol danab daatte ele amu, ag nuhignu atognona dabmena autna aweg!

Hibru 9:15

Amunu Kayak Nug danab onilagppa eum ele, danab amu ag itittak ena haen ohnu ele, Kayak anukka Nug bekkod madakkunu nai qakka aum amu, ag amu aoglagnu elele daaglagnu, Kristus Nug nug tituana nai qakkak baunu gamag danab daatte. Kayak Nug amu madakkunu elele daattenu diig am Kristus Nug danab ag nug tituana nai qakkak alag waappa daana, hipunin heppig ele, ag hipunin amuppanu uhuqak aoglagnu mauhom.

1 Pita 5:10

Kayak Nug am ehanittak okkai hamu mettak kobolnu diig daatte, Nug ag Jesus Kristusnu uɗatppa ag geha nuhig binag amahlak oppiaawak hanhan daatte ele, ag amu ooppa daaglagnu onilagppa eum amunu, ag geha uug haen tutuib doonna daappeg, dimppa Nug eɗua heeb, ag eɗun ena daan, ag lag ukku enappa ɠagattag daatte bia ag ɠagattag daaglag.

2 Pita 1:10

Amunu, O lailad, Kayak Nug ag onilagppa ewa, ag tituanattom, diig amunu ag Nug dim lamidkkulagnu wagai meig! Aɗinu? Ag anam hena amu ag iinab nena qemana.

2 Pita 1:3

Kayak Nug nuhig ɠagattag okkaippa, Nug keeke oh ig bau daat, genab tutukku hak danab daagnignu mekkom. Nug nuhig ena hak kobol, nuhig binag amahlak oppiaawak ele dabmaama, ig oninigppa e, ig Nug doottem, amu doyak amuppa Nug keeke amu oh ig mekkom.

Revelesen 17:14

Medappeg, ag Sipsip Nag ele ban hena, Sipsip Nag Nug ag oh eɗadkku. Aɗinu? Nug am naɗi dilag Naɗi, amu king dilag King. Amu laa Nug ag onilagppa eum, Nug ag nuhig daaglagnu tituanattom, ag nuhignu oo metta ii uuak kobol dim lamidtteb ele, danab amu ag oh Sipsip Nag ele daana, ban eɗidkkulag,” awa aum.

Revelesen 19:9

Amu dimppa engel nug da amelppa aum. “Na nai imu ye! ‘Danab ah, Kayak Nug ag Sipsip Nagnu ah awaknu hobulppa uɗiglagnu onilagppa eum ele amu, ag itittak ena aoppig daatteb,’ ” awa aum. Awona amu, nug da amelppa aum. “Nai imu am Kayak oɗe, amu nai nuhig am nai genab,” awa aum.