Aposel 1:24 - Nobonob Baibel

^24-25 Ag danab aɗit otiatona, ag inam unuqidppig. “Naɗi, na danab oh oolag diig doottem amunu, danab aɗit imu oolahppan na aun nug Judas abenabppa ba, totol uɗat imu aokkunu tituanme amu, na ig ippunigkkutnu oɗ medattem. Judas nug nuhig abenppa gokkunu uɗat amu uuom,” unuqidna anam appig.

Aposel 1:24 ပူးပေါင်းရင်းမြစ်များ

1 King 8:39

amu Yawe na, na dayak aben nahip, amuam hab aab, na appa daanna, unuqittak amu dookkutnu ool daatte. Doon, hipunin attem daatte amu, na uhuqna mekkan, am ehanittak elele ele hekkutnu ool daatte. Na anam henana amu, na nakkaib danab ah oh dilag dabmak doottem amunu, na dabmak amu anidnana, na ag anen anen kobol heppig ele, na amuppa na ag melemel elele mattan, na ag kobol heppignu nob elele madakkutnu oɗ medattem.

1 Stori 28:9

Amu Solomon da bekkal, da na amenppa attem. Yawe Nug danab dilag dabmak unuqagppa daatte mattia anidtte, Nug danab nug diig aɗinunab keeke hette ele dootte amunu, na, na mamenad dilag Kayak, Nugib am Kayak dabmena doon, na meut ohppa, nahip dabmak ohppa ele Nug waappa daan, Nug oɗe dim lamitte! Na Yawe anidna dim lamidkkutnu Nug madikkut dayeb, Nug heeb, na Nug anidkkut. Amge na Nug dimettan, uuidkkut dayeb amu, Nug ele na geɗitteb, na anam daappe ukkeb, gogppa teeb batakkut.

1 Stori 29:17

O Kayak dahil, da doottem, na danab oolagppa attem attem daatte, ag oolag italttem. Amu na danab nug nuhig dabmak oiyak ele am tutukkuib anidna, na amunu ootppa ena doottem. Anam amu, keeke imu oh da na mettami amu, da oo qak iitta ele, da dabmak genab dim lamitten mettami. Laa amu, da danab nahipad ag ina daatteb amu, ag oo qak iitta ele keeke medappig, da amu ele antten, gamag ahak okkai doottem.

Sam 7:9

O Kayak, na genab tutukku hak kobolib dim lamidttem, na danab ah dilag dabmak unuqagnab daatte, na amu neegna anidttem. O Kayak, na heppe, nau hak danab, ag laa guittak nau mauhnoak madatteb, ag amu uuglagnu, na laa oh ag na oɗen dootteb ele, na ag ehanadkkutnu oɗ medattem.

Prowerb 15:11

Keeke oh mauhak abenppa daatte amu, Yawe Nug amu genab dootte; amunu Nug danab bau daatteb, Nug genabnab ag aɗi dabmetteb dootte.

Jeremaia 11:20

Ag anam henan appig amu, da Yawe unuqitte, inam ami. “O Yawe Nakka Ɠagattag Oh Ele, na epeɗiak tutukkuib hettem. Na danab ag oolagppa, ag ahilag dabmak unuqagppa ele, ag diig aɗinu kobol laala hetteb amu, na diig amu doottem. Na amu doyeye, da hak nau ag dahilppa hekkulagnu hetteb ele na eppenppa mettem amunu, na danab ag eheɗ heiɗkkulagnu hetteb ele nob elele madappe anidkkulagnu oɗ medattem,” awe unuqidmi.

Jeremaia 17:10

Anam, amge Yawe Nug atte. “Da Yawe, da danab, nuhig hak aɗi ippuniɗtte amu, da amu dabmein, nob tutukkuib medakkulnu, da nuhig kobol aɗi ippuniɗtte amu, da amu ele dabmein, nob tutukkuib medakkulnu, da danab oolag unuqag andette, da ahilag dabmak ele anidttem.

Jeremaia 20:12

O Yawe Nakka Ɠagattag Oh Ele, na danab ah ag tutukkute, o iittate, na amu epeɗiadnana, na ag oolag, amu dabmak ahilag oh ele doottem. Na anam aakku henana daattem amunu, da eheɗ haknu nob tutukku mattaknu uɗat amu na eppenppa mettem. Uɗat amu na eppenppa mettem amunu, danab ag da eheɗ heiɗkkulagnu hetteb amu, na eheɗ hak ahilag, na amunu nob tutukku madakkutnu oɗ medattem.

Namba 27:16

“O Yawe, na aakkuib am Kayak danab oh bauklel madattem. Danab ah nahipad imu, ag sipsip laa ii gumadtte ele bia daamnanu, na danab laa nug ag dabmadakkunu epeɗikkutnu, da na oɗ medattem,” awa aum.

Luk 16:15

amge Nug ag amelagppa aum. “Ag amu danab dilag neekkakppa genab tutukku hak danab daaglagnu, ag amunuib oolag daatte, amge Kayak Nug ag oolag diig dootte. Danab ag aɗi keekenu enanag dootteb ele, Kayak Nug amunu ooppa uuaknab dootte.

Jon 21:17

Jesus baula ewam batak Pita oɗ mettom. “Saimon, Jon bekka, na dahilnu oot mauhttete?” awa aum. Pita Jesus haen ewam batak, “Na dahilnu oot mauhttete?” aum amunu ooppa guittak doyaya, nug Jesus amegppa aum. “Naɗi, na keeke oh doon malame, amu na da nahipnu ool mauhtte ele doottem,” awa aum. Pita anam a amu Jesus amegppa aum. “Dahil sipsip bekkadna meɗe!” awa aum.

Aposel 14:23

Anam heyaya amu, aa Kristen tamaniak amu ohppa ikki danab laala otiadya maadpiɗ. Aa ee ohnu kud meya daayya unuqidyaya, aa Kristen tamaniak amu oh diiya, Naɗi, ag nuhignu oolagppa genab dooppig ele amu, Nug eppegppa maadpiɗ.

Aposel 15:8

Amu Kayak, Nug danab ah oh oolag diig dootte ele, Nug iitta aɗi nuhig Ouɗi ig mekkom bia ag mattom, amuppa Nug eɗua diiadkkunu oo dayom ig ippunikkom.

Aposel 6:6

Ag danab amu otiadna heeg, totol danab 12 noolagppa hibaitteg, ag eppelag qaɗelagppa mena, ahilagnu unuqidppig.

Rom 8:27

Amu Kayak, Nug danab oo unuqagnab anidtte ele, Nug nuhig Ouɗinu unuqittak amu dootte. Aɗinu? Kayak Ouɗi Nug Kayaknu danab ah oppiaawak ele dilag unuqittak awa, Nug Kayak oo niitte bia amunu unuqidtte.

Hibru 4:13

Amu keeke laippu laa Kayak Nug amegppa lokkumak iinab daatte. Iitta. Keeke oh am Nug amegppa miagib amahlakppa daatteb. Amu dimppa ig Nug noobppa daata, ihinig haknu Nug amegppa mattignig.

Revelesen 2:23

Da nuhikkud nid ele heppi mauhkkulag. Amuppa Kristen tamaniak oh ag dooglag, da danab oolag, amu ahilag dabmak ele epeɗie aute aottem. Amu ele, da Taiataira daatteb, da ahilag hak attemu amu, da amuppa nob madakkul.

1 Samuel 14:41

Ag anam aeg, Saul nug Yawe, Israel dilag Kayak, nug Nug unuqitta aum. “Laa hipunin heum amunu, na gemu oɗmak dahilnu nob laa ii meɗame doottem, amu na aun hipunin heum ippuniɗkkutnu ool daatte,” awa aum. Saul nug anam unuqitta awowa he, ag om ena yaaeg, Jonatan, o Saul ippunattom. Daup laa am iitta.

1 Samuel 16:7

Samuel nug ooppa anam aum, amge Yawe Nug Samuel amegppa aum. “Na nid imu, nug beɗu, iɗu ele ena anidna, ‘Imuam king daakku,’ aib ame! Aɗinu? Da nug king daakkunu geɗidmi. Da amu heminu diig am, da danab keeke anidna epeɗitteb, da amubia ii hettem. Iitta. Ag am keeke dimittim amuib anidna epeɗitteb. Da am danab oolag anidttem,” awa aum.