Amos 8:5 - Nobonob Baibel

⁵ Ag akka ag inam atteb. “Kalam baunu qagmak gamag ahak ele imu paha iitta meeb, ig gota, ig ee daden maknu abenppa laa daden mekkulagnu ee mekkunignu oonig hette,” aon atteb. Ao, ag, “Ig Sabat imu iitta meeb, ig gota wit dadennu mekkunignu oonig daatte,” aon atteb. Ag maket henana, ag doonna skel eheɗppa uɗat heeg, keeke danab aotteb ele am happiak, elele ii aon, men doɗo amunu awaknu ele, eleleppa ii aotteb. Iitta. Ag men doɗo attan tak mattan aotteb.

Amos 8:5 ပူးပေါင်းရင်းမြစ်များ

2 King 4:23

Ah nug anam a amu, gamu nug wau oɗ mettom. “Aɗinu na gemunab gokkutnu hettem? Gemu am Sabat deɗnu hobul, o kalam baunu qagmak gamag ahak ele iitta,” awa aum. Nug anam a amu, ah nug amegppa aum. “Na maɗoɗib daye!” awa aum.

Eksodas 31:13

“Na Israel danab ah amelagppa inam a! ‘Ag dahil Sabat ohnu amu, ag deɗ amu dabmenana, da ɗo deɗ amunu mattami amu, ag amu dim lamitteg! Aɗinu? Da am Yawe, da hei, ag dahilnu tituanak daatteb, amu Sabat deɗ, deɗ amuam da ag ele gamagppa amunu at hanhan, buɗub buɗub doobob, anamib daakku.

Prowerb 11:1

Danab nug doyaya, keekenu uug anidkkunu skel uɗat pehettak ii hettep-ppa mette amu, Yawe Nug amunu ooppa uuaknab dootte; amge danab nug uug doyaknu keeke pehettak skelppa uɗat mattak amu, Yawe Nug amunu ooppa enanagnab dootte.

Prowerb 16:11

Keekenu uug anidkkunu skel pehettak am Yawe eppegppanu uɗitte; uug doyaknu keeke skelppa uɗat mattak oh battamppa inak daatteb amu, Nug keeke amu oh babaittom.

Prowerb 20:23

Uug doyaknu keeke skelppa uɗat mattak pehettak iitta amu, Yawe Nug amunu ooppa uuaknab dootte. Yo, danab nug skelnu keeke uug pehettak he ii bette, nug amuppa uɗat hette amu, Yawe Nug amunu oo ena ii daatte.

Aisaia 1:13

Ag mana mettak hamu haen oh aon uɗitteb amu, da mana mettak amunu, da ool ii daatte. Ag amu baula aib heppig! Ag uueg! Ag kalu danab ile, muttuɗig enanag bette amu, ag kalu amu amotna, da meɗatteb, amge da noolppa danab uɗig naunab doya, baula dookkunu ooppa uuaknab dootte, amubia da doottem. Ag kalam bau deɗppa, Sabat deɗppa, amu Kayak dabmekkulagnu deɗ laala eleppa ag qagmenana, ⌊oɗelagppaib da binal menana,⌋ nau ele hetteb. Da qagmak eheɗ ahilag amu baula anidkkulnu ool iinab daatte.

Aisaia 58:13

Amu Yawe Nug atte. “Ag Sabatppa ɗo dahil dim lamidkkulag dayeb, ao, ag dahil deɗ, deɗ amuam dahilnu tituanak daatte, ag deɗ amuppa aɗi keeke ag amu hekkulagnu amelag qette, amge da ag amu hekkulagnu ii ami, ag amu hekkulagnu uuglag dayeb, ag Sabatnu, ‘Deɗ enanagnab, ehanigtte ele,’ dooglag dayeb, ao, ag da, Yawe, ag dahil deɗ, dahilnu tituanak daatte amu, ag deɗ amunu, ‘Deɗ imuam deɗ binag ele,’ dooglag dayeb, ag ahilag dabmak ii dim lamidna, amuppa ag dahil deɗ binag mekkulag dayeb, ao, ag dahil Sabatppa ele aɗi keeke hekkulagnu oolag hette, amge da ag amu hekkulagnu ii ami amu, ag amu ii hekkulag dayeb, ag deɗ amuppa nai hamu hamu ele ii mattiglag dayeb,

Hosea 12:7

Ag Israel ag amu hekkulagoitte, amge keeke laihnu awa, daden maknu danab laa ag hambuppuna, ag skel melemel elele iitta ele, ag amuppa uɗat hena, danab ah dilag keeke yab kobol amuppa aotteb; ag kobol amunu oolag okkai daatte. ⌊Amu ag Israel, ag danab amubia daatteb.⌋

Hosea 12:8

Israel ag enaen mena, akka binalag mena, ag atteb. “Ig am enunig okkai ele, ig keeke kuɗumnab aomut! Ig enunig naɗi ele, amge laa nug ig hipunin aɗitai hetat aomut akkunu elele iitta,” aon atteb. ⌊Amge amuam genab iitta.⌋

Lewitikas 19:36

Ahilag skel, nuhig uug doyaknu keeke ele am tutukkunab daakkuoitte. Ahilag keeke inaknu teɗu, keeke qaɗaiettak, o leppu mettak melemel haknu, ag amu tutukkunab hekkulagoitte. Da am Yawe, ahilag Kayak. Da ag Isipnu diie, omalatti uɗippig.

Sekaraia 5:6

Nug anam a, da attan neekki te, da engel amegppa ami. “Amu aɗi?” ain oɗ mettami. Oɗ mettai, nug aum. “Kaleg amuam wit, o bali, o rais keeke, aeg nuhig uug gane doyaknu kaleg, amu amuppa wan imuppan hipunin oh inak daatteb,” awa aum.

Sekaraia 5:8

Da amu anitti, engel nug da amelppa aum. “Ah amu onig am nau hak,” aawo, ⌊ah amu hibaitta dimittim dokkunu heehe antta, dimittim domanu⌋ nug ehale, kaleg ooppa eɗua no, kaleg ameg uugnab ele eɗua qeum.

Malakai 1:13

Ag amu henana, ag kobol da Yawe, da ag hekkulagnu mattami, ag kobol amunu, ‘Ig kobol amu oh hekkunignu am uug okkainab,’ aon atteb. Ag kobol amunu, am keeke hamunab doon, kobol amunu ena iitta dootteb.” Yawe Nukka Ɠagattag Oh Ele Nug anam awa atte. Amu Yawe Nug inam atte. “Ag doɗ yab heppig elete, o ebehi kaliak elete, o oɗe meum elete, ag amu aon main meɗatteb amu, da amu aokkul am ena dabmettebte? Iitta!

Namba 10:10

Trampet iwalak amu ehanatteb, ag da, ahilag Kayak, ag dahilnu ag daulagppa dokku amunu, ag qagmak gamag ahak ele haknu haenppa, amuam hobul dayaknu haen epeɗiak, aria kalam bau bettenu hobul ele, ag haen amuppa manaknu ofa hetteb, laippu dayaknu ofa ele hetteb, haen amuppa ag trampet ele iwaleg! Da am Yawe, ahilag Kayak,” awa aum.

Kolosi 2:16

Kayak Nug anam heum amunu, ag uuppeg, danab laa nug nuhig dabmakppanu ee lanaknu, le lanaknu amu deɗ okkai mettidnu, kalam baunu mettidnu amu Sabatnu ele ɗo laala, ag dim lamidkkulagnu ii mema.

1 Samuel 20:5

Jonatan nug anam a amu, Dawit amegppa aum. “Antte! Butti am kalam baunu qagmak gamag ahak elenu deɗ, amu da geha king ele daaɗɗa, ee lakkunihnu daatte. Da hekkulnu aakku daatte, amge na appe, da geha ukke, aab dimittim dad okkaippa lokkumak aben eleppa lokkume daappi ukkeb, laatu tueb batak.