Amos 7:9 - Nobonob Baibel

⁹ Da heppi, Aisak buɗub ag kayak hambuppuak dilag mettid lag nakok bappaidppig ele amu, kekeɗ ag amu oh heppeg nauhkkulag. Ao, lag Israel danab ah ag appa kayak hambuppuak noolagppa dup nona binalag metteb ele amu, kekeɗ ag lag amu oh loppaɗppeg nauhkkulag. Amu da qep elabppa heppi, Israel dilag king Jeroboam buɗub laa sia king amuppa daakkunu ii daama,” awa aum.

Amos 7:9 ပူးပေါင်းရင်းမြစ်များ

Genesis 46:1

Jakop anam awowa, nug aha, keeke oh babaitta, nug baekkudppa oh omalatta, keeke oh nuhignu dayom ele awa ukka, Berseba appa doɗ manatta, nug mameg Aisaknu Kayak mettom.

2 King 14:24

Nug kobol eheɗ Yawenu neekkakppa heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, nug hipunin amu hekkunu ii uua, di-ii-mettom.

Aisaia 63:18

Haen tutuib ig nahip aben nahipnu tituanak daatte gumamut Ao, ig gumamut, amge gemu amu, kekeɗ ihinig ag nahip mettid lag heeg nauhom.

Jeremaia 51:51

⌊Ag Israel danab ah, ag atteb.⌋ “Wan laihnu danab ag Yawenu mettid lag, amuppa Oo Gun ele, Oo Gunnab Ele, aben amu oh am Yawenu tituanak daattep amu, ag amu ooppa noppig. Ao ag noppig amunu, danab laa ag eheɗ aon aon iqaeg, diig amunu ig uɗa nak nau guittak ele doottem. Uɗa nak ig tonikkom daatte,” aon atteb.

Esekiel 6:3

Na nai mattinna, na inam a! ‘O Israelnu qauko, ag Naɗi Yawe, ag nuhig nai doyeg!’ Naɗi Yawe Nug qauko okkai, qauko nakok, oolnu noak nakok, oolnu noak okkai ele, Nug ahilagnu inam atte. ‘Da ahilagppa ban hein, da heppi, kayak hambuppuak dilag mettid lag nakok ahilagppa daatteb amu, lag amu oh nauhna autna aoglag.

Hosea 10:8

Betawen appa kayak hambuppuak dilag mettid lag nakok am, laa ag heppeg nauhak daaglag; Israel ag appa hipunin hetteb. Lag amu nauhak daappeg, uud keeke qaun ele amu, keeke amuam geha qaɗab amu oh teguadkkulag. Amu oh beeb amu, Israel danab ah ag geha qauko dilagnu, “Ag nena tonikkeg,” akkulag. Ao, ag qauko nakok dilagnu, “Ag nena, qaɗenigppa qeig!” aon akkulag.

Amos 3:14

Haen da Israel ag hipunin heppig, da amunu bu madakkul, haen amuppa amu da Betel appa qaɗab daatteb oh loppaɗadppi nauhkkulag. Ag qaɗab amu oh qeqeɗilag okkuladppeg, wanppa nena qekkulag.

Amos 5:5

Amge ag amu hekkulagnu ag Betel appa aib mattiɗna goppig. Ag Gilgal ele aib goppig. Berseba ele aib goppig. Aɗinu? Kekeɗ ag genab uɗin, danab ah Gilgal appanu diin goppeg, Gilgal danab ah ag wan laappa diia ukka laih me dayak danab ah daaglag. Ao, kekeɗ ag ele Betel loppaɗna heppeg, nauha autanab awa daakku.” Yawe anam atte.

Amos 7:11

⌊Amuam genab.⌋ Aɗinu? Amos nug inam atte. ‘Jeroboam nug geha qep elabppa mauheb, kekeɗ ag Israel danab ah diin, ag diia ukka laih me dayak danab ah wan laappa, ahilag wan iittappa daaglagnu gokkulag.’ Nug anam atte,” awa aum.

Amos 7:13

Baula na propet nai Betel ippa aib mattime! Aɗinu? Mettid lag imuppa amu king nug dup noa binag mak hette. Lag imuam Israel dilag mettid lag,” awa aum.

Amos 8:14

Danab ah ag kayak hambuppuak Samaria daatteb onilag diin, ahilag nai ɠagattag qedatteb, o ag, ‘Dan danab, ahilag kayak genab bau daatte, genab amubia,’ o ag, ‘Berseba appa kayak laa genab bau daatte, genab amubia,’ atteb amu, danab ah amu ag nena qena, baula eɗun ii ahamna.” Yawe Nug anam awa atte.

Amos 9:1

Da, Amos, da Naɗi Nug qaɗab guguittak dayeye anitti, Nug da amelppa aum. “Na lagnu biidod menppa hak ikki huanaknab oppe, lag mawaknu ukku uɗalebeb, lag oh na qaɗ! Heppe, lag na qa, danab ah tonalatta, laa aqatteb mauhppeg, laa ii mauhkkulag ele amu, da heppi, kekeɗ ag qep elabppa aqappeg mauhkkulag. Laippu laa oola ii goma; oh mauhkkulag.

Maika 1:5

Yawe Nug oo nauhe uɗittenu diig am, Jakop buɗub ag hipunin henan heeg uɗie, gemu ele hetteb. Ao, Israel danab ah ag hipunin henan ii uuppig daatteb. Amu aun beɗuppa Jakop buɗub ag Yawe uuidna, kayak hambuppuak dim lamadtteb? Amuam ag ahilag aab okkai Samaria aakku. Amu Juda danab ah kayak hambuppuak noolagppa dup nona binalag metteb ele amu, amu hak naunu aab diig am adekku? Amuam ag ahilag aab okkai Jerusalem aakku.