Aisaia 9:12 - Nobonob Baibel

¹² Nug heeb, aam nodeppanu danab Pilistianu, ag ahappeg, amu aam bedeppan daup Aramnu, ag ele ahappeg, ag oh Israel aqaglagnu uɗin, ag Israel qena, tabappeg nokku. Anam, amge amuppa Yawe Nug nuhig oo nauhak am iinab bodoettama. Iitta! Nug ⌊bu tuɗitta madakkunu⌋ eppeg huma daakku.

Aisaia 9:12 ပူးပေါင်းရင်းမြစ်များ

2 King 16:6

Haen amuppa Aram dilag king Resin nug aab Elat eɗua aokkunu ban ha, nug Juda daappig amu lamatte ukkaeg, nug awom. Nug awe, Edom danab ag gona, aab amu aon daaeg uɗie, gemu ⌊nai imu yaak haenppa⌋ ele, ag appa daatteb.

Sam 79:7

Aɗinu? Ag ig Jakop buɗub, ig iqappig. Ao, ag Jakop buɗub dilag wan atu heeg nauhom.

Aisaia 10:4

Ag am keeke laa hekkulagnu ib iittanab iitta. Geha kekeɗ ag ag aqaglag, o iitta ag aɗualadppeg, ag ag eppelagppa daaglag. Anam, amge amuppa Yawe Nug nuhig oo nauhak am iinab bodoettama. Iitta. Nug ⌊bu tuɗitta madakkunu⌋ eppeg huma daakku.

Aisaia 11:14

Israel huu, amu Juda huu ele ag geha buɗub laa aam nodeppa daatteb, ag am Pilistia danab, ag ag eɗadkkulag. Amu ag buɗub laa aam bedeppa daatteb, ag ag ele eɗadna, ahilkad keeke aoglag. Israel huu, Juda huu ele, ag Edom huu, Moap huu ele eɗadna, ag Amon ele eɗadkkulag. Eɗadppeg amu, Amon ag Israel huu, Juda huu ele waalagppa daaglag.

Aisaia 31:1

Aun aɗi ag Isip appanu ehanittak aoglagnu dabmetteb amu, ahilagnu am gadonnab gadon. Ag bannu hosppa ⌊Isipnu⌋ ehanittak aoglagnu dabmetteb. Ag Isip dilag daup bannu karis kuɗum eleppa daan, ban hetteb doon amunu, bannu karis amuppa ehanittak aoglagnu oolagppa genab dootteb. Ao, ag Isipnu ban danab kuɗumnab hos attan daan oin, ban hetteb doon amunu, ahilagppa ehanittak aoglagnu oolagppa genab dootteb. Ag anam dabmetteb, amge ag Israel dilag Kayak Oppiaawak Ele, ag nuhig dabmak aoglagnu oɗ ii medatteb. Ao, ag Yawenu, ag ehanittak nuhigppanu aoglagnu ii dabmetteb. Ag anam hetteb amunu, ahilagnu gadonnab gadon.

Aisaia 5:25

Diig amunu amu, Yawe Nug nuhikkud danab ah dilagnu oo nauhak naɗi dootte. Ge! Nug eppeg humom dayeye, Nug makkuɗadtte. Nug eppeg e, qauko oh uɗaltteb. Nug eppeg e, kuɗum mauheg, ag gaɗalkad aab okkainu ibppa kinipan bia niitteb. Anam, amge amuppa Nug nuhig oo nauhak amu iinab bodoettom. Iitta. Nug ⌊bu tuɗitta madakkunu⌋ eppeg humom daatte.

Aisaia 9:17

⌊Ikki danab aɗi ag anam hetteb,⌋ diig amunu ⌊Israel danab ah oh⌋ ag Kayaknu, nuhig haknu ele uuak doon, ag nau hak kobol henana, nai uɗig wak ele oɗelagppa anan oitteb. Anam amunu, Naɗi Nug Israel dilag nid bau dilagnu gamag ahak laa ii dootte. Diig amunu Nug ah qab, amu nid ag mamelkad mauhppig ele, Nug amu dilagnu ele oo ii madatte. Anam, amge Naɗi Nug nuhig oo nauhak amu iinab bodoettama. Iitta! Nug ⌊bu tuɗitta madakkunu⌋ eppeg huma daakku.

Aisaia 9:21

Manase buɗub ag ahan, Epraim buɗub tappadppeg nokkulagnu hebeppeg, Epraim buɗub ag ahan Manase buɗub tappadppeg nokkulagnu hekkulag. Amu aa oh anam heyaya, aa oh ahai, Juda tabapeɗ nokkunu hekkulah. Anam, amge amuppa Yawe Nug nuhig oo nauhak amu iinab bodoettama. Iitta. Nug ⌊bu tuɗitta madakkunu⌋ eppeg huma daakku.

Jeremaia 10:25

Wan laalappan danab ah, ag na am Kayak dabmekkulagnu uun, ag na waatppa ele daaglagnu uutteb amu, ag ig Jakop buɗub heikkeg nauhmut. Ag ig heikkeg, ig padal meta autta aomut. Ag ihinig wan ele heeg nauhom. Anam amunu, na amu dilagnu oppoɗin beeb, ag bu madakkutnu ool daatte.

Jeremaia 15:7

Danab nug ulah ee aeg dappunkkeg iwale ukkaknu uɗat hette, amubia ikki danab dilag qagmak aben aab okkai odppa daatte, da appa heppi, Juda danab ah ag ahilag wanppa ii daamna; ag umanab gona, diia ukka laih me dayak danab ah daaglag. Ag oolag eɗueb, da oɗel dim lamittaknu uun oitteb amunu, da heppi, ag oolagppa guittak doon, ag ele nauhkkulag.

Jeremaia 35:11

Ig mamenig anukkanu anam haknunab anak amu mekke, ig dim lamittutut uɗie, gemu ele hettem, amge Babilon dilag king Nebukatnesar nug wan imu aokkunu nuhikkud daup ele ban hekkulagnu uɗin, wan imuppa beeg, ig amut. ‘Ahappeg, ig Babilon dilag daup, Aram dilag daup ele eppelagppa daamtanu, ig gota, Jerusalem appa teta, nakok daagnig,’ amut amunu, ig uɗit, ippa Jerusalem iikku daattem.” Rekap buɗub ag Jeremaia amegppa anam appig.

Jeremaia 4:8

Anam bekku amunu, ag lamen heɗiag ele takkanna, ag mahia, gayak okkai ele heig! Aɗinu? Ihinig hipunin haknu amu, Yawenu oo nauhak huanaknab aakku daatte. Ii iitta meum,” awe ami.

Esekiel 16:27

Na nau anam heme amunu, da bu mettai, laa ag uɗin, wan nahip laa aoppig. Da hei, Pilistia danab ag baubau awaknu hik qak danab daan oitteb amu, ag uɗieg, na ag waalagppa daame. Amu Pilistia danab ah ag gappai heeb baknu kobol nahipnu uɗa nak dooppig.

Esekiel 6:14

Da heppi, uug naunab ahilagppa beeb, wan ahilagppa tom adeppa adeppa daatte, am nauhakib daakku; amuam yau uɗitteppanu tomppa, appa am atu taɗak nau, tom amuppan ukka, yawalti uɗitteppanu tomppa aab onig Dibla daatteppa, tom amu batak am atu anamib daakku. Da amu heppi, ag dooglag, da am Yawe.” Yawe Nug anam awa atte.

Hosea 7:10

Israel danab ah ag am beɗuppa tak danab ah. Ahilag beɗuppa tak kobol am he, ag eheɗ hetteb am miag atiak daatte, amge ag Yawe, ahilag Kayak, ag eɗun, Nug waappa daaglagnu, o Nug mattin anidna dim lamidkkulagnu ii hetteb.

Amos 4:10

Yawe Nug anam ana amu, Nug atte. “Da anukka Isip danab ah uug naunab aqadkkunu hei aqom amu, da uug amuib ag Israel, ag aqadkkunu hei aqom. Ao, da hei, ban ahe, ahilkad nid bau ag banppa daan, qep elabppa mauhegeg, kekeɗ ag ag Israel, ahilkad bannu hos ele diin aqatteg mauhppig. Ge, da hei, anam be, danab, hos ele gaɗalkad beɗaegeg, uɗig nau ahilag haen tutu dayaknu aab kalappigppa dayom. Keeke amu oh ahilagppa beum, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:11

Yawe Nug anam ana amu, Nug ele atte. “Da hei, ag oolagppan laa ag Sodom, Gomora danab padal meppig, amubia padal meppig. Ge, ag am aab bau maha laa, danab nug aab maha amu ewebeb, eɗua aotte, tuɗitta ii eotte, ag amubia daappig, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:6

Amu Yawe Nug atte. “Da hei, ag aab okkai ohppa ee iitta daappig. Ao, aab naunau ohppa ag bret iitta daappig, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:8

Gu ii nedeppa amu, appa le iitta daye, danab ah ag beɗulag gai-iitta daye, ag ahan qiin ona, qiin donana, aab laappa le mattin goppig; amge ag le lakkulagnu elele ii aoppig. Da hei, ag Israel, ag ahilagppa anam beum, amge ag eɗun dim lamiɗkkulagnu da gumiɗna ii uɗippig,” awa atte.

Amos 4:9

Yawe Nug anam ana amu, Nug atte. “Haen kuɗum da hei, ahilkad dadppa, ahilkad grep dadppa ele eenu oɗe ba, ahilkad ee amu he nauhom. Ao, da hei, ahilag dadppan keeke oɗenu nauhppig. Da hei, tap-lokus ag uɗin, ad fig, ad olip ahilkad ele heeg nauhppig; da amu hemi, amge ag eɗun, da dim lamiɗkkulagnu da gumiɗna ii uɗippig,” awa atte.

Sepanaia 1:6

Da heppi, laa ag anukka da noolppa dup nona binal meppig, amge ag uun uuiɗna, kayak laanu dabmetteb; ag da, Yawe, ag da aniɗna dim lamiɗkkulagnu ii mattiɗna, ag da ulum madakkulnu oɗ ii meɗatteb amu, da ag ele heppi, ag nauhkkulag.” Yawe Nug anam awa atte.

Sepanaia 3:2

Jerusalem danab ah ag ulum nai laa oɗeppa aoglagnu uun autna aotteb. Ao, laa nug daulag batebeb, ag nai nuhig ii doomna; uuglag. Jerusalemnu danab ah ag Yawenu oolagppa genab ii dootteb. Ag ahilag Kayak ii dim lamidtteb.

Duteronomi 31:17

Ag anam heppeg, da ahilagnu ool nauhkku. Da ag uuatte, dimadappi, ahilkad kekeɗ geha hadappeg nauhkkulag; uug naunab, uug digdig laa ele ahilagppa bekku amunu, ag akkulag, ‘Kayak ihinig, Nug ig ele ii daattem amunu, keeke naunab imu ihinigppa beum,’ akkulag.