Aisaia 7:14 - Nobonob Baibel

¹⁴ Na atnu oɗmak hekkutnu uume amunu, Naɗi Nug nukka geha at laa na ippunidkku. At amuam inam. Ah makkun laa nug oo ele daya, geha nug nid danab menua, nid onig Imanuel ataɗkku.

Aisaia 7:14 ပူးပေါင်းရင်းမြစ်များ

Genesis 16:11

Yawenu engel nug baula ele aum. “Na gemu oot ele daattem. Dimppa na nid danab menukkut. Menuna amu, na nug onig Ismael ataɗkkut. Aɗinu? Yawe Nug nahip gayak doyom.

Genesis 29:32

Yawe Nug anam he, Lea nug oo ele oiyaya, nug nid danab menua, nug aum. “Yawe dahil uug nau antta ehaniɗom amunu, da gamul nug dahilnu oo mauhkku,” awa aum. Nug anam aum amunu, nug nid onig Ruben ataɗom.

Genesis 3:15

Amu da heppi, na ah ele gamalahppa hanhan kekeɗ daakku. Ele amu, ah buɗub, amu na buɗun ele gamagppa kekeɗ daakku. Amu ah buɗub laa aha, na ikkin tappeb toɗeb, na danab amu baeg bittub heppe hinqekku,” awa aum.

Genesis 30:6

Rahel nug aum. “Kayak Nug he, tutukku hak dahil aakku miag atiom. Nug dahil unuqittak doya, nid danab meɗom,” awa aum. Nug anam aum amunu, nug nid onig Dan ataɗom.

Genesis 30:8

Rahel nug aum. “Da apai ele i nug okkai mehqeɗa, amu da nug eɗidmi,” awa aum. Anam anana amu, nug nid onig Naptali ataɗom.

Genesis 4:25

Aria, Adam wau ele aa baula oiyya, Ewa nug nid danab baula menuom. Menua, nug aum. “Kain nug Abel makkuɗe mauhom amunu, Kayak Nug nid laa Abel abenab aokkunu meɗom,” awa aum. Nug anam aum amunu, nug onig Set ataɗom.

1 King 13:3

Kayaknu propet nug nai amu mehuqowa, nug nai imu, ippuanattaknu at daakkunu, nai imu ele mattia, nug nai tuɗitta inam aum. “Yawe Nug ippunittaknu at imu babaittom daatte. Qaɗab imu amu, Yawe Nug heeb, qaɗab imu nug oppateb, uhuɗ wanppa gokkaɗa nokku,” awa aum.

Sam 46:8

Ag dona, Yawe Nug keeke heum amu antteg! Ao, ag dona, wan imuppan wan anen anen ⌊appan danab ah ag ban haknu oolag mauhak daatteb ele amu,⌋ Nug attemnab he nauhppig amu antteg!

Aisaia 38:7

Yawe Nug anam a, Aisaia nug Hesekaia amegppa anam awowa, nug nai tuɗitta aum. “Yawe Nug aɗi hekkunu nai anan qakkom amu, Nug genabnab genab nuhig nai heeb bekku ippunidkkunu amu, Nug at laa medakku. ⌊Nug at amunu inam atte.⌋

Aisaia 9:6

Aɗinu? Ihinigppa ah laa nid danab menukku. Ge, nid amu Yawe Nug ihinignu meeb uɗikku. Nug ihinig king daakku. Nug onig anaknu laala inam: Ulum Ena Mettaknu Danab Enanagnab, Kayak Nukka Ɠagattag Ele, Mamenig Hanhannu, King Maɗoɗ Ele.

Jeremaia 23:6

Haen nug king dayebeb amu, Juda ag geha padal memananu ehanittak aon daaglag. Ao, Israel danab ah ag baɗak iittappa daaglag. Geha ag king amu onig am inam ataɗkkulag. ‘Yawe Nug Kobol Genab Tutukku, Nug Amunu Diig Daatte.’ ” Yawe Nug anam atte.

Jeremaia 31:22

O Israel danab ah, ag am nid ah laa, nug mameg oɗe ii doyaya, kobol digdig hette, ag amubia da dimeɗona kayak hambuppuak laala dim lamadtteb; amu haen gane laa ele ukkeb, ag kobol amu uun, eɗun Yawe ele laippu daaglag? ⌊Yawe Nug heeb, ag eɗun uɗiglag⌋ am kobol baunab aakku. Ah ag digmena, danab gumalob amuam kobol baunab aakku daalo, amubia Yawe Nug heeb, ag eɗun uɗiglag am kobol baunab aakku.

Jeremaia 44:29

Amu Yawe Nug imu ele atte. “Da bu matten, aɗi uug laala ahilagppa bekkunu appi, amu aakku bekku dooglagnu da bu okkai ag madakkul. Amu da ag genab Isip wan imuppa bu okkai ag madakkul dooglagnu, da at imu ag mattai bette anidtteb, ag anam dooglag.

Maika 5:2

Amu Yawe Nug atte. “Amge ag danab ah Betlehem Eprata daatteb, ag Juda wanppan aab ikki laa oh oolagppa aab ikki nakoknab daatteb, amge dimppa laa Nug ag oolagppanu, Nug Israel dilag okkai danab dayaya, gumak uɗat amu ha meɗakkunu bekku. Laa amu hekku, Nug mamekkud huu am tumaiib ii digmeppig; iitta, Nug mamekkud am anukkanab digmeeg uɗie uɗie, gemu ele daatteb. Nug huu amuppa bekku.” Yawe Nug anam atte.

Matyu 1:23

“Doyeg! Ah makkun laa nug oo ele daya, geha nug nid danab menukku. Menueb, ag nid onig Imanuel ataɗkkulag.” Onig amu diig am, “Kayak ig ele daattem.”

Luk 1:31

Doye, geha na oot ele daanna, nid danab menuna, na Nug onig Jesus ataɗkkut.

Luk 1:35

Anam a amu, engel nug oɗeppa awa aum. “Geha Kayak Ouɗi nahip-ppa uɗieb, Kayak Attannab Laa Oh Eɗattak, nuhig ɠagattag na tonidkku amunu, na nid oppiaawak ele menukkut amu, ag nuhignu, ‘Kayak Bekka,’ aona akkulag.

Luk 2:12

Ag Nug anidkkulagnu epponak keeke amu inam. Nug anig Nug lamen elabppa ehakka, doɗ dilag ee lanak taɗaɗ ooppa me niitte,” awa aum.

Luk 20:44

Ag iikkud antteg! Danab nug, nug bekkanu, ‘Naɗi’ ii atte, amge Dawit nug Kristusnu, ‘Naɗi,’ aum amunu, ig attem heta, ig Kristusnu, ‘Nug am Dawit bekka,’ akkunig?” awa aum.

Jon 1:14

Am Kristus, onig laa Nai Kayak Ippunigtte, Nug danab beɗu awa, ig oonigppa dayom. Ig oonigppa dayeye, ig nuhig binag amahlak oppiaawak ele anidmut. Binag amahlak oppiaawak ele amuam laa Nug Kayak Bekka laippunab daatte, Nug Kayak, nuhigppanu uɗiom amu, am nuhig aakku. Doyak diig genabib, amu ehanittak okkai hamu mettak kobol ele, amuam nuhigppa ambaknab ele daatte.

Rom 9:5

Kayaknu danab anukkanu amu, ag am Israel danab memetalkadnab. Amu Kristus ele amu, Nug danab daakkunu, Nug Israel buɗulagppa doum. Nug am Nug Kayak, keeke oh dilag ikki daatte. Ig Nug binag hanhan metu! Genab.

1 Timoti 3:16

Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.

Ikki Danab 6:36

Anam daye amu, Gideon nug Kayak amegppa aum. “Na da amelppa, na da ehaniɗppe, Israel danab ah Midian danab eppelagppanu eɗue diikkulnu nai anan qakkame amu, na genabnabnab anam hekkutnu dabmettem dayeb amu,

1 Samuel 4:21

Nug nai amu hamu doya, nug, “Kayaknu binag amahlak oppiaawak ele Israel ooppanu ukkom,” anana, nug nid onig Ikabod ataɗom. Nug anam aumnu diig am, Pilistia ag Kayaknu Tituanak Nainu Kunup aon goppig, amu nug gamu, gamu mameg ele oh mauhpiɗ.